Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nda bôte jôé é ne nyiñe meva’a été

 NGABE 8

Éyoñe mbia jam a kui

Éyoñe mbia jam a kui

“Mfa’a ôte mi adañe vak, akôsa bo ôyôm nté ya éyoñ ji, nge de ayiane bo nalé, mi nga vebane ôlune minleme a meve’ele mevale meva.”1 Pierre 1:6

Ja’a mia ve mengule na nda bôte jenan é tabe mvo’é, mi ne tôban nju’u wo ye bo na mi wô’ô mintaé nlem. (Ecclésiaste 9:11) Amu a nye’e bia, Zambe a volô bia éyoñe bia tôbane minjuk. Nge ô tôñe melebe ya Kalate Zambe ma, nda bôte jôé a womiene mia ye dañe minjuk, ja’a a ne avale minju’u avé.

 1 NYOÑANE NGULE BE YÉHÔVA

JÔME KALATE ZAMBE A JÔ: “Mi va’ane nye mam mese ma tyelé mia minleme yôp, amu nnye a ba’ale mia (a wô’ô mia mintaé.)” (1 Pierre 5:7) Te vuane na minju’u wo tôbane mie mia so ki be Zambe. (Jacques 1:13) A ye ve wo mvolane wo yiane nge ô kele ôsu a subu nye bebé. (Ésaie 41:10) “Kulane mame me ne mia minlem asu dé.”Besam 62:8.

Mi ne fe yene mvolan nge mia lañ a yé’é Kalate Zambe môs ôse. Jamete jé volô na mi yen a mise menan mebien aval avé Yéhôva “a volô bia minlem nju’u wongan ôse été.” (2 Becorinthien 1:3, 4; Beromain 15:4) A ka’ale na é ve mia “mvo’é Zambe, nje éte je adañe fe’ ése.”Bephilippien 4:6, 7, 13.

JÔM Ô NE BO:

  • Ye’elane Yéhôva na a volô wo na ô bôône nleme si a na ô bi mbamba asimesan

  • Fase mezene mese me ne volô wo, mvuse ya valé, tobe zene ja yian a été jôé

2 NYOÑE WOMIENE NGAP A NDA BÔTE JÔÉ

JÔME KALATE ZAMBE A JÔ: “Nleme ya môt a ne ntye w’anyoñ ñyeman; a alo ya mfefek d’ajeñ ñyeman.” (Minkana 18:15) Kôme’e jeñe na ô fase mame mese. Jeñe na ô yeme miñyiane mi nda bôte jôé ése. Laan a be. Vô’ôlô be.—Minkana 20:5.

Nge a bo ki na môte wo nye’e a wu? Te wo wô’ô ôsone ya yôn. Simesane na Yésus émiene fe “a nga [yôn.]” (Jean 11:35; Ecclésiaste 3:4) É ne fe mfi na ô ke ôyo, a na ô kôme nyoñ éyoñe ya wo’on. (Ecclésiaste 4:6) Mame mete mé volô wo na ô yeme jibi mintaé ya jame ja kui wo.

JÔM Ô NE BO:

  • Yé’é na wo laan a nda bôte jôé nté mbia jam a nga’ane te kui. Éyoñ nju’u wé kui, bé laan a wo tyi’ibi

  • Laane fe a bôte be nga tate tebe été ô tele

 3 JEÑANE MVOLAN

JÔME KALATE ZAMBE A JÔ: “Mvôé ja nye’e biyoñe bise a monyañ a ne valé mfa’a ya volô éyoñ y’ôlun.” (Minkana 17:17, Mfefé Nkôñelan) Bemvôé bôé ba kômbô volô wo; ve wo yiane be kate jé wo yi na be bo. Te wô’ô aval étam ya sili be mvolan. (Minkana 12:25) Jeñe fe mvolane ya nsisim be bôte ba tu’a wô’ô Kalate Zambe. Melebe bé ve wo ma ye volô wo.—Jacques 5:14.

Nge wo bo ô tabe bisulan a bôte ba buni mengaka’a me Zambe nya mbunane, wé bi ngule nyul. Ngule jé so fe wo nge ô jeñe na wo volô bôte bevok. Kate be ndi nlem ô bili be Yéhôva a mengaka’a mé. Belan éyoñe jôé na wo volô bôte bevok, a te lume bôte ba nye’e wo mvus.Minkana 18:1; 1 Becorinthien 15:58.

JÔM Ô NE BO:

  • Kobô’ô a benya bemvôé bôé a kañese’e na be volô wo

  • Te solé be jôm éziñ, kate be jôme wo yi