Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nda bôte jôé é ne nyiñe meva’a été

 NGABE 2

Ba’ale’e élat é ne zañe mia môt ô nga luk

Ba’ale’e élat é ne zañe mia môt ô nga luk

“Bôte Zambe a maneya lat, môt a [bo te] kandé be.”Marc 10:9

Yéhôva a yi na bi bi “nye’an ô ne mban.” (Michée 6:8, MN note) Fulu te é ne mfi alu’u denan amu, ndi éziñ é vo’o bo éyoñ nye’an wo jemban. Fulu te é ne fe mfi asu na nye’an ô yaé.

E den, nye’an ô ne mban wo jemban abui. Nge wo kômbô ba’ale alu’u dôé, wo yiane tôñe melebe mebaé ma.

 1 BO’O NA ALU’U DÔÉ É BO NYA MFI E MISE MÔÉ

JÔME KALATE ZAMBE A JÔ: “Mi aye yemelane mam me adañ mvaé.” (Bephilippien 1:10) Alu’u dôé é ne jame da ya mame ma dañe mfi ényiñe jôé. Ô nji yiane vuane nalé.

Yéhôva a yi na ô ve môt ô nga lu’u nleme wôé ôse a na mi bu’uban éyiñe nsamba. (Ecclésiaste 9:9) A kobô ne bôsa na ô nji yiane biasé môt ô nga luk, ve mia bebaane mia yiane jeñe na mi yemelane mame me ne futi asos alu’u denan. (1 Becorinthien 10:24) Jeñ a mezene mese na a yeme na wo yi nye, a fe na wo nye’e nye.

JÔM Ô NE BO:

  • Jeñané na mi nyoñ éyoñe ya tabe nsamba, teke jô’é na ôsimesane wônan ô ke vôme mfe

  • Te beta bo mi jô’ô na “ma,” ve “bia”

 2 BA’ALE NLEME WÔÉ

JÔME KALATE ZAMBE A JÔ: “E môt ase a fombô minga a nkôban éziñ e nlem a boya mejian a minga ate e nleme wé été.” (Matthieu 5:28, Mfefé Nkôñelan) Nge môt éziñ a ke ôsu a fase mame mejian, a nji beta wulu ba’aba’a a môte ba nye be ne nlu’an.

Yéhôva a jô na wo yiane “ba’ale nleme wôé a mban ôse.” (Minkana 4:23; Jérémie 17:9) Nalé a tinane na wo yiane kôme ba’ale mise môé. (Matthieu 5:29, 30) Vu éve’ela môte ya melu mvus be mbe be loone na Job. A nga bo élat a mise mé asu na a bo teke fombô minga mfe a mbia minkômban. (Job 31:1) Nyoñe ntyi’ane na ô bo te fombô bôte be ne nsoé e bingeñgeñe nge ke vôm éziñe mfe. Tyi’i fe nleme wôé été na ô bo te lat avale ngbwa éziñ a môte mfe, e vaa ve nyô mia nye mi ne nlu’an.

JÔM Ô NE BO:

  • Liti’i bôte bese ne sañesañ na wo nye’e fo’o ve nyi ô nga luk

  • Vô’ôlô miñyiane mié; nge amvôé dôé éziñ ja ndeñele nye, telé de avôlavôl