Kele vôm ô ne lañe de

Kele sous-menu

Kele tep

Bengaa be Yéhôva

Bulu

La Tour de Garde  |  No 1 2018

2 Help to Resolve Problems

2 Help to Resolve Problems

Minju’u miziñ bia tôbane mie ényiñ mi wô’ô bo ayaé ya dañ. E wô’ô kui na, bi juan a mie ane mimbu mia lôt; mi wô’ô yeme kôm éto ényiñe jangan ôsusua na bia zu yemelane de. Nde ñhe, ye Kalate Zambe a ve bia melebe me ne volô bia na, bi dañ avale minju’u ete ? Bi tame yene bone bive’an.

E DAÑE KO WOÑ

Rosie a jô na: “Me mbe me ko mbia woñ éyoñ ése amu asimesan dam e mbe e tii ve mbia be mam ba ye boban.” Éfus évé ya Kalate Zambe é nga volô nye? Jia y’été é ne Matthieu 6:34. Ja jô na: “Ajô te, te tyelane minleme yôp ajô mam me aye boban akiti: amu mame ya mi atyelé minleme yôp akiti, me aye boban akiti. Mam abé ya môse wua me ayiane môs ôte.” Rosie a jô dene na, mejô mete me nga volô nye na, a bo teke dañe tyelé nleme yôb a lat a mam ma ye boban akiti. A beta jô na, “Me mbe fe me mbili abui minjuk, é nji be mfi na me beta kô’ôlane mi mi ngenane teke kui a to ke na, mi ne bo teke kui kui.”

Yasmine nnye fe a nga wô’ôtane na, a ne kom ése ve tyelé nleme yôp. A jô na: “Mimôse miziñe ya sondô, me mbe me yônôk, a teke ke ôyo melu méziñ. Me mbe me yene’e ve ane mbia b’asimesan ba mane ma di vevee.” Éfus évé é nga volô nye? A nga lañe kalate 1 Pierre 5:7, a jô na: “Mi va’ane nye [Zambe] mam mese me atyelé mia minleme yôp, amu nnye a ba’ale mia.” Yasmine a jô na: “Ane éyoñ é nga lôt, me nga ke ôsu a ye’elan Yéhôva, a nga yalane fe ma. Me nga wô’ôtan ve ane ba vaa ma adite mbe’e é mbe é bete ma bitul. Mbia b’asimesan be wô’ô beta so biyoñe biziñ, ve me nga yem avale me ne dañe be.”

 E BI FULU YA BO MAM ÉYOÑ ÉYOÑ É LOTEYA

Mona minga a to jôé na Isabella a jô na: “Ma simesane na, e bi fulu ya bo mam ve mvus é ne ma metyi amu pepa fe a bili je. Ma te’elane mfa’a ya bo mam me ne mfi fo’o ve amu ma kômbô dañe vôman nge yene télé. Fulu éte é ne abé amu é ne soo môt abui minjuk, a su’ulane bo na môt a bo teke bo ésaé jé avale da yian.” Ñye’elane ya Bible ô nga volô nye wo so kalate 2 Timothée 2:15; wo jô na: “Ô va’a ngule ya telé womien be Zambe ane nyô a ne nkañesan, ane mbo ésaé a ne te yiane wô’ ôson.” Isabella a jô na: “Me nji be me yi na Yéhôva a wô’ô ma ôson fo’o ve amu me ne éles.” Den a tyendéya abui.

Aval ete fe, Kelsey a jô na: “Nge me mbe me bili jam éziñe ya bo, me mbe kom ése ve bo de mvus. Nalé a mbe a bo’o na me yôn, me bo teke ke ôyo, a na me ko woñ. Jam ete é nji be mvo’é asu dam.” Kelsey a nga yene mvolan e kalate Minkana 13:16, a jô na: “Môt ase a ne fek a taté fas te na a bo jam éziñ, v’akut da liti asu’u dé éngengeñ.” (Mfefé Nkôñelan) A liti jam éfus éte é nga ye’ele nye: “E bi ngume nta’ane mam a tôñe wô, a ne zene ya fek. Den, me bili kalate vôme ma ta’a mam a bete ma tebele, a volô ma na me ta’a avale ma zu saé, a na, me sa’ale fulu ya bo bisaé éyoñ éyoñ é maneya lôt.”

E WÔ’ÔTANE V’ANE Ô N’ÉTAM

Kirsten a jô na: “Nnôme wom a nga tyam aluk, a kelé, a li’i ma a bone benyin.” Mvolan ôvé a nga bi ô so’o Kalate Zambe? Kalate Minkana 17:17 a jô na: “Mvôé ja nye’e biyoñ bise a monyañ a ne valé mfa’a ya volô éyoñ y’ôlun.” (Mfefé Nkôñelan) Kirsten a nga jeñe mvolane be bebo bisaé be Yéhôva. Mvolan ôvé a nga bi? “Bemvôé bam be nga su’u ma abui bevôm! Bevo’o béziñ be nga zu li’i ma bidi a mesam mbé yôp. Biyoñe bila, éyoñe bia bone bam bi nga tyendé étaba’a, abui y’été é nga zu volô bia. Môte wua a nga volô ma na me yene bisaé. Bemvôé bam be mbe fo’o éyoñ ése a ma.”

Delphine bia te jô nye mvus, nnye fe a nga juan a nju’u ôte. A beta simesan aval a nga wô’ôtan éyoñ a nga jañele abui mam: “Me nga wô’ôtan ve ane ma fombô avale bôte bevo’o ba nyiñe nsamba, me’ ki me too valé, éngôngol a étam.” Éfuse jia é nga volô nye é ne kalate Besam 68:6, ja jô na: “Zambe a toé ba be ne étam menda me bôt été.” Delphine a jô na: “Me nga too me yeme’e na, éfuse ji é nji kobô ve ajô ya nda be lôô a mis. Me nga su’ulane yeme na, Zambe a ve bia nda mfa’a ya nsisim, vôm ô ne tabe mvo’é, a vôm ô ne bi mbamba bemvôé ba nye’e wo, be nye’e fe Yéhôva. Ve me nga too me yeme’e na, me vo’o subu be bebé nge me bo teke taté subu Yéhôva bebé. Nde kalate Besam 37:4 a nga volô ma mfa’a ôte: ‘Yene’ fe mvaé jôé be Jehova; a nnye a ye ve wo mam nleme wôé w’akômbô.’”

Delphine a su’ulane jô na: “Me nga yeme na jam é mbe mfi é mbe na, me kôme late ngbwa a Yéhôva. Nnye a dañe bemvôé bese. Mvuse ya valé, me nga mane tili mam m’éziñ me ne bo a be, asu ya na me bo ngule ya bi bemvôé e zañe bôte ba nye’e Yéhôva. Me nga yé’é na me yene ve mam me n’abeñe be bôte bevok, a jeñe na me bo teke beme mise mam bikobe biap.”

E ne été na, bemvôé ba kañe Zambe be ngenane bebo mam abé. Bengaa be Yéhôva ba tôbane fe minjuk, ane bôte bevok. Ve melebe ya Kalate Zambe ma ve be ngule ya volô bôte bevok abime be ne ngule ya bo. E jeñ avale bemvôé ete a ne zene ya fek. Ve, ye miñye’elane ya Kalate Zambe mi ne fe volô asu avale minju’u mi vo’o mane den, ane ôkon ô vo’o saéban a mintaé ya nlem?

E tôñe melebe ya Kalate Zambe a ne volô wo na ô bi mbamba bemvôé