Kele vôm ô ne lañe de

Kele sous-menu

Kele tep

Bengaa be Yéhôva

Bulu

La Tour de Garde  |  No 1 2018

1 Help to Avoid Problems

1 Help to Avoid Problems

Melebe ya Kalate Zambe ma so fo’o be Zambe a me ne “mvolan mfa’a ya ñye’elan, mfa’a ya nleban, mfa’a ya nsôane bôte zôsô.” (2 Timothée 3:16) Ye nalé a ne été? Yenané avale fe’e ya Kalate Zambe é nga volô bôte na be sa’ale beta minju’u y’ényiñ, ôsusua na mia yale be fé.

MBIA NYUANE MEYOK

Delphine bia te jôô nye atata’a, a yemelane na minju’u mié mmie mi nga bo na, a taté na a nyu meyok a lôte nné. Kalate Zambe a nji tyili nyuane meyok, ve a jô na: “Te tabe nsamba bôt b’adañe nyu vin.” (Minkana 23:20) Mbia nyuane meyok a soo bibubua bi akon, a ndamane memvôé, a wôé fe bemillion be bôte mbu ôse. Bôte be ne sa’ale avale minju’u ete nge ba tôñe melebe ya Kalate Zambe.

Nne Delphine a nga bo nalé. A jô éyoñe ji na: “Me nga yene na meyok me nji volô ma na, me dañe minju’u miam. Me nga tôñe fe’e ja so kalate Bephilippien 4:6, 7, a jô na: ‘Te tyelane minleme yôp a jam éziñ. Ve katane Zambe e mam mia sili.’ (Mfefé Nkôñelan) Alu ese, éyoñ mbia b’asimesan be mbe be ndeñele’e ma, a éyoñ nlem ô mbe ô tyele ma yôp, me mbe me ye’elane Yéhôva. Me mbe me kate’e nye avale ma wô’ôtan, me kate’e nye ôlun a mintaé me mbe me wô’ô; me mbe fe me ja’é nye na, a ve ma ngule ya bi mbamba b’asimesan. Ane tyé é lendé, me mbe me jeñe’ na me yemelane nge me titaneya mbia b’asimesan bete. Fulu éte é nga volô ma na, me bem ôsimesane wom e biôme me mbe me bili, sa ke bi me nji be me bili. Me nga tyi’i na, ma ye ke beta nyu meyok. Mbôle mvo’é me bili é ne angôndô ya édima, me vo’o beta kañese jañele je.”

 MAME BISÔK

Mame bisôk me ne jame da dañe soo mbia b’akon a azoé. Ve miñye’elane ya Kalate Zambe mi ne volô bia na, bi sa’ale avale minju’u ete, amu mia kate bia mintene mi mam mia tindi môte na, a bo mame ya bisôk. Bi ne nyoñ éve’ane ya bo bôt ayas (nge vôé a môt a nji bo nyo nnôm nge nyo ngal) a pornographie. Ndôman éziñ é too jôé na Samuel ja jô na: “É mbe tyi’ibi ya vôé a nlem bôte bevok. E mbe e kui na me bo teke nye’e minga ve me ne jô na a mbe a nye’e ma​—a nalé a nga bo na me kômbô vôé a nye.” Samuel a kate na be nga somane nye abui biyoñ amu mboan ôte​—ja’a éyoñ a nji ke de bo​—nde a nga su’ulane tyi’i na a bo jam ete. Ve fulu éte é nga ndeñele nye. A jô dene na, “É mbe abé, amu ja yale mbia minkômban.”

Samuel a nga lañe nlô ajô wo kobô ajô bisoé e jw.org. A simesane mejô ma so kalate Minkana 20:11, nye a jô na: “Ja’ane mongô a liti avale môt a né, a mboane mame wé, nge ésaé jé é ne mvo’é, a nge é ne zôsô.” Aval avé éfus éte é nga volô nye? Samuel a nga yemelane na, e bo môt ayas a nji bo mvo’é, nge zôsô. A jô dene na: “Me nga yé’é fe na, ésoé ja bo ayas, ja yale mefulu ma ye soo minjuk nda alu’u jé. Ane me nga taté na ma fas avale minga ma ye lu’u a ye wô’ôtan nge a yene ma me bo’o minga mfe ayas. Nalé a nga bo na, me yemelane na, fulu éte é nji bo abeñ. Ayas e vo’o bo zôsô fo’o ve amu na e ne tyi’ibi.” Samuel a nga tyendé. E sa’ale mboan ayas a nga volô fe nye na, a sa’ale mame bisôk.

Antonio a mbe a tele mbia été ya mame bisôk: A mbe ôlo ya pornographie. Akusa bo a nga lu’u minga a mbe a nye’e abui, ve a nga teme na fulu éte é nga beta yaé. A jô na, e fase jame kalate 1 Pierre 5:8 a jô, a nga volô nye abui. Bia lañ été na: “Mi taba’an nkôman, mi momba’an: nsiñe wônan diable a ke a wulu’ aval ane ñbweñbwem je abam, a jeñe nyô a ne ngule ya bi.” Antonio a kañete na: “Bive’ela ya pornographie bia bômane bia vôm ase, a bive’ela bite bi ne tabe ôsimesane wongan ayap. Éfus éte é nga tu’a volô ma na, me fase vôme meve’ele mete ma so. Ma yi na me yemelane na, bive’ela ya pornographie bia so be Satan. Ma yem éyoñe ji na, Yéhôva étam nnye a ne volô ma na me tabe ‘nkôman a me mombô’ asu ya na, me wosan asimesan ete nlô wom, nleme wom, a nda alu’u jam.” Antonio a nga bi mvolan a mbe a yi, ane a nga su’ulane lume mbia fulu ate mvus. Nalé a nga su’ulane volô nye na, a sa’ale beta minjuk.

Jam ete da liti ne ngeññ na, Kalate Zambe a bili miñye’elane mi ne volô bia na, bi sa’ale beta minjuk. Ve jé bi ne jô a lat a minju’u mi maneya lôme minkañe si, aval é ne na mi nto ayaé ya té? Bi tame yen aval ane Mejô me Zambe me ne volô bia na bi dañ avale minju’u ete.

Miñye’elane ya Kalate Zambe mi ne volô bia na bi sa’ale minju’u miziñ