Kele vôm ô ne lañe de

Kele tep

Bengaa be Yéhôva

Tobôk nkobô Bulu

Miñye’elane ya Kalate Zambe​—mia volô kom ése

Miñye’elane ya Kalate Zambe​—mia volô kom ése

TAME FASE JAME DI: Ô ne musée; minnôme mi biôme ya ôteñ mi ne nta’ane vôm ase. Abui ya été e tatéya na da ndaman. Bifase ya mi mivok, bi maneya jañ. Ve étua jam é ne na, jôme jia ya été é ngenan étua mvo’é; é ne teke ayeñ. Nde wo sili môt a saé musée na, “E biôm bise bi ne va, ye ji nje ja dañe mfefé a bi bivok?” Nye na, “Teké’é, nje ja dañe nnôm a bi bise bevok, a be ngenane teke tame kôme je môs éziñ.” Nde wo beta nye sili na, “Ye be nga solé je ngume vôm asu na é bo te ndaman?” Nye na, “Momo, évuñulu a mveñ bi nga jimbi je, ve é nji ndaman. Abui bôt e nga jeñe fe na e ndamane je.” Ô ne kam, a sili womiene na, ‘É nga kômban a jé?’

Bi ne jô na, Kalate Zambe a ne ane nnôme jôme ya ôteñ wu. A ne kalate a dañe nnôm a ba bese bevok. Minnôm mi kalate mivo’o mi ne fe. Ve, aval ane minnôm mi biôme ya éve’ane bia te nyoñ, abui mintilane ya ôteñ e nga mane ndaman a éyoñ. Éve’an é ne na, mfefé ñyeman ô zuya tyendé mame mintilane ya ôteñ mi nga jô a lat a ñyemane mam. Melebe mi nga ve a lat a nsaén akon me nji ke fe dañe volô, me nga viane so so bia bibubua bife. Nde fe, minnôme mi kalate mite mi li’iya ve bitune bitun, a mefebe méziñe ya été me maneya ndaman nge jañ.

Kalate Zambe a selan a bekalate bevok. A nga tilibane den a ntoo mintete mimbu 35 a mvuk, ve a ngenane te tyendé. Nté ôse wu, bôte be nga jeñ a mezene mese na, be di’i nye, be kamane bôte na be lañe nye; ve a nga dañe mewosane mete mese. Nde fe, mame méziñ me ne été me nji selan a ñyemane bi bili éyoñe ji; Bible a kate fe bia beta be mam ôsusua na bôte ba yeme me.​—Yene’e nka’ale ô ne nlô  ajô na, “Ye a keya abo si, ye a kate mam ôsusua na be yeme me?

MBAMBA MEFULU MA SILI BIA DEN

Ô ne ñhe sili womiene na, ‘Ye miñye’elane ya Kalate Zambe mi ne fo’o bo mfi asu ényiñe jangane ya den?’ Asu na ô bi éyalane ya nsili ôte, sili’i womiene na: ‘Minju’u mivé bôte ba dañe tôbane mie den? Mivé mia dañe tyelé be minleme yôp?’ Éko éziñ ô ne simesane bita, ndamane bôte ba ndamane si, mewôé me bôt, nge ki ébotezel. Bi tame zu fase miñye’elane miziñe Kalate Zambe a ve. Nté bia bo de, sili’i womiene na, ‘Nge bôte ba tôñe melebe mete, ye ényiñe ja ye ke dañe bo mvo’é nga?’

E NYE’E MVO’É

“Mvom, a bôte ba miase mvo’é amu ba ye lobane na bone be Zambe.” (Matthieu 5:9, Mfefé Nkôñelan) “Nge e ne ngule ya boban, abim e ne be mia, taba’ane bôte bese mvo’é.”​—Beromain 12:18.

E WÔ’Ô BÔT ÉNGÔNGOL, A E YEME JAMÉ

“Ébotan a bôt be awô’ô bôte befe éngôngo: amu be aye fe wô’ô be éngôngo.” (Matthieu 5:7) “Wua a jibi’i nyô mbok, a wua a jamé’é nyô mbok, nge môt éziñ a bili nyô mbo’ ajô; aval ane Tate [Yéhôva] * a nga jamé mia, nalé ate fe mi bo’ok.”​—Becolossien 3:13.

E NYE’E BÔTE BESE

Zambe “a nga bo bôte ya meyoñe mese be so’o be môte wua a tabe si se.” (Mam Minlôman 17:26) “Zambe a nji nye’e ngumba môt: ve meyoñe mese môt a ko nye woñ, a bo mame ya zôsô, nnye Zambe a yen mvaé.”​—Mam Minlôman 10:34, 35.

E SEMÉ SI

“Yéhôva Zambe a nga nyoñe môt ate, a toé nye afup Éden, na, a kôme de a ba’ale fe de.” (Metata’a 2:15) Zambe a ye “jiane ba be ajiane si.”​—Nlitan 11:18.

E SA’ALE ÔZAÑ AKUM A MBIA NKEANE BINOÑ

“Taba’an ntye, te boan ôzañ akum: amu akum abui môt a bili, e ne te ve nye ényiñ.” (Luc 12:15) “Mejian, a mvin ése, nge minyamete, bi bo’o te totebane vôm mi to, aval ane de ayiane bôte ya Zambe.”​—Beéphésien 5:3.

E BO ZÔSÔ A E SAÉ A NGUL ÉSE

“Bi kômbô tabe ane de ayian mfa’a ya mam mese.” (Behébreu 13:18) “Nyô a nga wup, a bo’o te beta wup: ve de adañ mvaé na, a bo ésaé.”​—Beéphésien 4:28.

E VOLÔ BÔTE BE TELE MINJU’U ÉTÉ

“Mi volô’ô minlem ya ba be ne ate’e minlem, mi volô’ô mintetek, mi bo’an abui njiban mfa’a ya bôte bese.” (1 Bethessalonicien 5:14) “Jome bobenyui a minkus vôm be ayen njuk.”​—Jacques 1:27.

Kalate Zambe a nji su’u ve na a liti bia mefulu mete. A liti fe bia avale bi ne kui na bi bi me ényiñe jangane ya môs ôse. Nge abui bôt da jeñe na e bi mefulu mete, nga ô lôô na minju’u mi ne émo ji mia ye sé’éban? Bi lôô fo’o na, miñye’elane ya Kalate Zambe mia dañe dañe mfi melu mangane ma! Nde, aval avé mi ne volô wo ataté éyoñe ji?

 AVALE MIÑYE’ELANE YA KALATE ZAMBE MI NE BO WO MFI DEN

Mfefe’e môt éziñ ô nga jô na: ‘Fek j’akabe amu mimboone mié.’ (Matthieu 11:19, Mfefé Nkôñelan) Ye wo fe wo simesane nalé? Ba jô na môt a ne fek, éyoñ a yeme belane ñyeman a bili. Nde ô ne fase na: ‘Nge miñye’elane ya Kalate Zambe mia volô fo’o, ye mi nji yiane wume mbamba bibuma ényiñe jam? Aval avé mia volô ma na me dañe minju’u ma tôbane mie éyoñe ji?’ Bi tame nyoñ éve’an.

Delphine * a mbe a nyiñ abeñ, a mbe a bili abui mame ya bo. Ve abui minjuk e nga kui nye fifiti. Ngo jé é nga wu é ngenan ésoé. Alu’u dé e nga ndaman. A nga ku azoé été. A beta simesan: “Me nji be me yeme’ aval ényiñe jam ja ye bo​—teke mon, teke nnôm, teke nda. Me mbe me yene’e mamiene zezé jôm​—me nga bili atek, a me nji be me yeme’e aval ényiñe jam ja ye bo melu ma zu.”

Mejô ma me nga nambe Delphine avale me mbe me ngenane te tame nambe nye éyoñ éfe: “Melu ya mimbu miangan me ne mimbu mewôme zañbwa, nge amu ngu bi atabe mimbu mewôm mwom; ve mebune map me ne ve ésaé a ôlun; amu é ne avôle ya lôt, a bi ayele a ke.”​—Besam 90:10.

 Delphine a nga yene mvolane Kalate Zambe été. A nga volô nye nya nya abui. Avale minlô mejô milal mia tôé valé mia ye liti, abui bôt e nga kui na e dañ minju’u miap éyoñe be nga tôñe melebe ya Kalate Zambe. Be nga yene na Kalate Zambe a ne ane nnôme jôme ya ôteñ ya éve’ela bia te nyoñ atata’a. A nji bo ane minnôm mi kalate mivok. Ye a ne amu a nga kômbane ngum aval? Ye a ngenane fo’o a bili asimesane Zambe, sa ke di bôt?​—1 Bethessalonicien 2:13.

Éko éziñ wo fe ô yeneya na, ényiñ é ne njalan a minjuk. Éyoñ minju’u mi lôteya wo nkôñ, nne ô wô’ô ke jeñe mbamba melebe a mvolane nlem vé?

Bi tame zu yene bevôme belal Kalate Zambe a ne volô wo ényiñe jôé. A ne volô wo na ô yem aval ô ne

  1. sa’ale minjuk.

  2. dañe minju’u mia kui.

  3. jibi minju’u mia tabe ayap.

Minlô mejô mia tôé valé mia ye kobô ajô ete.

^ É.N. 10 Kalate Zambe a liti na éyôlé Zambe é ne Yéhôva.​—Besam 83:18.

^ É.N. 24 Ba te tyendé biyôlé biziñe nlô ajô wu a mi milal mia ye tôé valé.