Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngon ôsu 2016

“Bia kômbô ke nsamba wôé”

“Bia kômbô ke nsamba wôé”

“Bia kômbô ke nsamba wôé amu bia wô’ôtane na Zambe a ne be mia.”ZACHARIE 8:23.

BIA: 65, 122

1, 2. (a) Yéhôva a nga jo na jé j’aye bobane melu mangane ma? (b) Minsili mivé ayé’é di da zu yalan? (Fombô’ô fôtô a ne atata’a ya ayé’é di.)

ZACHARIE 8:23 a jô na: “Bikul awôm, môt ase y’été a kobô’ô nkobô wé, bia ye bi mone beyude ñwôndé ngômesane wé a jô nye na: ‘Bia kômbô ke nsamba wôé, amu bia wô’ôtane na Zambe a ne be mia. ’” Yéhôva a jô na nkulane ajô te wo tôéban melu mangane ma. “Mone beyude” a ne bôt Zambe a ve mbamba nsisim. Ba loene fe be na “Israël Zambe.” (Begalate 6:16) “Bikul awôm” bi ne bôte be bili ndi nlem ya nyiñe nnôm éto si va. Ba yeme na Yéhôva a nga botane nsamba miñwo’an wu. Ba simesane fe na, e kañe Yéhôva fufulu a miñwo’an, a ne be beta jam.

2 Aval ane nkuli mejô Zacharie, Yésus fe a nga jô na, bebo bisaé be Zambe ba ye bo nlatan. A nga loene bôte ba ye ke nyiñe yôp na, “mone nsamba mintômba.” wôna, bôte ba ye nyiñe si va, a nga loene be na, “mintômba mife.” Ve Yésus a nga jô na bese ba ye bo “mbame wua” a tôñe “mba’ale wua,” nnye a ne Yésus. (Luc 12:32; Jean 10:16) Mbôle minsamba mi ne mibaé, bôte béziñe be ne sili na: (1) Melu ma, ye mintômba mife mia yiane yeme biyôlé bi bôte bese be ne miñwo’an? (2) Miñwo’ane mibiene mia simesan aya mfa’a wop? (3) Nge môt éziñe ya  akônda dôé, a taté na a di belet, a nyu wone mesimesa’ane ya awu Yésus, wo yiane yene nye aya? (4) Ye nleme wo yiane tyebe wo yôp, éyoñe wo yene na tañe bôte ja di belet, a nyu wone mesimesa’ane ya awu Yésus, é ne ve nenenen? Ayé’é di d’aye zu ve biyalane ya minsili mite.

MELU MA, YE MINTÔMBA MIFE MIA YIANE YEME BIYÔLÉ BI BÔTE BESE BE NE MIÑWO’AN?

3. Amu jé bi se ngule ya kôme yem, bôte ba ye bo be 144 000 (Ntete toyini a betoyini mewôme menyin a benyin)?

3 Ye mintômba mife mia yiane yeme biyôlé bi bôte bese be ne miñwo’an be ngenane si va? Momo. Amu jé? Amu môt éziñ a se ngule ya yeme nya ñyemane na, kalasi, kalaka, a ye nyoñe ma’ane ya ke nyiñe yôp. [1] (Fombô’ô ayemé é ne afebe si.) To’o Zambe a tobeya be na ba ye nyiñe yôp, ba ye bi ma’ane map fo’o ve nge, ba wulu ba’aba’a a Yéhôva akekui awu. Satan a yeme nalé, jôme te nje a jeñ a mezene mese na, a “yale be zene fe” a zene ya “bekuli mejô be ne medu’an.” (Matthieu 24:24) Bekristene be ne miñwo’an, be se ngule ya tabe ndi na, ba ye nyoñe ma’ane map, nge Yéhôva émien a nji bo na be kôme yeme na be ne zôsô mise mé. Yéhôva a ne su’ulane nyoñe ntyi’an ôte ôsusua na miñwo’ane mia wu, nge na, nane “beta nju’u” a taté.Nlitan 2:10; 7:3, 14.

4. Nge bi se ngule ya yeme biyôlé bi bôte bese be ne miñwo’an be ngenane si va éyoñe ji, aval avé mintômba mife mi ne “ke nsamba” wop?

4 Nge bi se ngule ya yeme biyôlé bi bôte bese be ne miñwo’an be ngenane si va éyoñe ji, aval avé mintômba mife mi ne “ke nsamba” wop? Kalate Zambe a jô na ‘bikul awôm . . . bia ye bi mone beyude ñwôndé ngômesane a jô na: ‘Bia kômbô ke nsamba wônan amu bi wô’ôya na Zambe a ne be mia.’’ Kalate Zambe a kusa kobô ajô mone beyude wua, ve jame da, bifia “wônan” a “mia” bia liti na a nji bo môte wua, a ne abui bôt. Nalé a tinane na mone beyude a nji bo môte wua, a ne nsamba miñwo’an ôse. Mintômba mife mia yeme nalé, jôme te nje mia bo Yéhôva ésaé fufulu a nsamba miñwo’an ôte. Be nji kômbô yeme éyôlé môt ase a nyoñeya mbamba nsisim na, be tôñe nye. Yésus étam, nnye a ne ntebe ôsu wongan, jôme te Kalate Zambe a jô bia na bi tôñe fo’o ve nye étam.Matthieu 23:10.

MIÑWO’ANE MIBIENE MIA SIMESAN AYA MFA’A WOP?

5. Ayemé avé, ñwo’an ôse wo yiane fase nya mfasane, a amu jé?

5 Miñwo’ane mia yiane fase nya mfasane beta ayemé a ne kalate 1 Becorinthien 11:27-29. (Lañ.) Aval avé ñwo’an ô ne kui na ô di belet, a nyu won “aval ane e ne te yian” môse mesimesa’ane ya Awu Yésus? Nge ñwo’an wo bo te ba’ale mbamba amvôé a ne zañe ba Yéhôva, a bo nye melo, ve ô kele ôsu a di belet a nyu wone, ñwo’an ôte wo liti na ô ne ébiasé. (Behébreu 6:4-6; 10:26-29) Ayemé ya éfuse te, da ba’alane miñwo’ane mise na, mia yiane nyiñ ane Zambe a nye’e, nge ba kômbô nyoñe “ma’ane me tii a nloone ya yôp, ñwô Zambe a loone bia e be Yésus Krist.”Bephilippien 3:13-16 Mfefé Nkôñelan.

6. Miñwo’ane mibiene mia simesane aya mfa’a wop?

6 Paul a nga jô bekristen be ne miñwo’ane na: “Ajô te, ma, mbô’ô ya be Tate, me aye’elane mia na, mi wulu ane de ayiane nloene . . . mi nga loban.” Aval avé ba bo de? Paul a yalane na: “A nje’ebane minlem ôse a évôvoé ése, a ôte’ete’e ya yaa, miabebien mi jiba’an a nye’an; mi tuka’a ve’ele ba’ale ntaban nleme wua ya nsisim nlatane ya ngbwa été.” (Beéphésien 4:1-3)  Mbamba nsisim Yéhôva, a volô bebo bisaé bé na be sili bebiene si; be bo te bo éngelezek. (Becolossien 3:12) Jôme te nje miñwo’ane mi nji buni na, mia dañe Bekristen bevo’o bese. Ba yeme na, Yéhôva a nji ve miñwo’an mbamba nsisim a dañe Bekristen bevok. Miñwo’an mi nji simesane na, be ne ngule ya wô’ô miñye’elane ya Kalate Zambe a dañe Bekristene bevok. Nalé fe ñwo’an ô nji yiane kate Kristene mbo’o na, Zambe a veya Kristen ate mbamba nsisim; a na, Kristen ate fe a yiane di belet a nyu wone môse mesimesa’ane ya awu Yésus. Ve ba sili bebiene si, a yeme na, fo’o ve Yéhôva Zambe étam, nnye a loene kristene na a zu nyiñe yôp.

7, 8. Miñwo’ane mi nji buni aya, a amu jé?

7 Miñwo’an mia yeme na, nloene Yéhôva a loene be na be zu nyiñe yôp été, ô ne beta jam. Ve be nji buni Bekristene bevok, ba yiane nyoñe be ngumba aval. (Beéphésien 1:18, 19; lañe Bephilippien 2:2, 3.) Ba yeme fe na, éyoñe Yéhôva a ve be mbamba nsisim na be ke nyiñe yôp, a nji kate Bekristene bevok jame te. Nde ñwo’an ô nji yiane tabe fe’e ne vema, nge Bekristene bevok ba bo te buni été été na, Zambe a veya fo’o nye mbamba nsisim. Ba simesane na mboane te, wo lu’an a njôane Kalate Zambe a jô na, bi bo te ji’a buni môt a jô na Zambe a veya nye ngumba asu ésaé éziñ ékôane jé été. (Nlitan 2:2) Amu ñwo’an ô nji yi na, Bekristen bevok be wumulu nye, ajô te, ñwo’an wo ye bo te kate bôt a yen éyoñ ôsusua na, Zambe a loeneya nye na a ke nyiñe yôp. Éyoñe éziñ na, a ye ba’ale de nlem été, te ke de kate bôt. Ñwo’an ô nji bo éngelezek mfa’a ya mbamba mam wo ye bo éyoñe wo ye ke yôp.1 Becorinthien 1:28, 29; lañe 1 Becorinthien 4:6-8.

8 Bekristen be ne miñwo’an, be nji buni na, ba yiane tabe fo’o ve a miñwo’ane mivok. Be nji jeñe miñwo’ane mivok asu na, be laane mam me afombô miñwo’an, nge tabe bebe na be yé’é Kalate Zambe. (Begalate 1:15-17) Akônda da ye ke tabe nleme wua, nge miñwo’an mia nyiñe nalé. Miñwo’an mia ye wosane mbamba nsisim, nnye a bo bebo bisaé be Zambe be tabe nleme wua, a évôvoé été.Lañe Beromain 16:17, 18.

BIA YIANE NYOÑE BE AYA?

9. Amu jé bia yiane tabe ntyel a avale bia nyoñe bôte ba di belet, a nyu wone môse mesimesa’ane ya awu Yésus? (Fômbô’ô nlô ajô “Nye’an ‘ô ne te bo ane e ne te yian.’”)

9 Aval avé bia yiane nyoñe bobejañ a bekale bangane be ne miñwo’an? Yésus a nga jô beyé’é bé na: “Mia bese mi ne bobenyañ.” A nga beta fe jô na: “Bôte bese môt a ye bet émiene yôp, a ye subane si; a môt a ye suu émiene si, a ye betebane yôp.” (Matthieu 23:8-12) Nde é nji bo mvaé na bi dañe sek mam ngumba Kristene wo bo, to’o Kristen ate a ne ñwo’an, nge monyañe Krist. Éyoñe Kalate Zambe a kobô ajô ya bemvendé, a jô bia na bi vu mbunane wop; ve a nji jô na, bi telé ngumba môt ô bo ntebe ôsu wongan. (Behébreu 13:7) É ne été na Kalate Zambe a jô na bôte béziñe “ba yiane nyoñ ésemé biyoñe bibaé.” Ve ésemé ba nyoñe biyoñe bibaé le, é ne amu ba “tu’u nyôl ésaé nkatane mbamba foé, a ñye’elan,” sake amu be ne ñwo’an. (1 Timothée 5:17) Nge bi dañe wumulu miñwo’an alôté nné, bia ye viane bo na be wô’ô ôson. Ve jame da dañedañ abé é ne na, bi ne bo na be bi fulu éngelezek. (Beromain 12:3) Môt éziñe ya bebia, a nji kômbô na miñwo’an mi timbi aval ôlame te!Luc 17:2.

Aval avé wo nyoñe môt a di belet, a nyu won e môs mesimesa’ane ya awu Yésus? (Fombô’ô mebeñ 9-11)

10. Aval avé ô ne liti na wo semé Bekristen be ne miñwo’an?

10 Aval avé bi ne liti na, bia semé bôte Yéhôva a veya mbamba nsisim? Bia ye  ke sili be na, be kate bia mam be nga bo asu na be bo miñwo’an. Jame te da fombô ve bebien, a bi nji yiane jeñe na bi yeme de. (1 Bethessalonicien 4:11; 2 Bethessalonicien 3:11) Nde fe bi nji yiane simesane na, beyal, nge beyôm miñwo’an; bebiaé bap, nge bibu’a ya nda bôte jap fe be ne miñwo’an. Ndi nleme ya ke nyiñe yôp, é nji bo jôme bia nyoñ amu na bi ne nda bôte jia. (1 Bethessalonicien 2:12) Bia yiane sa’ale sili minsili mi aye bo na, bôt bevok be wô’ô mintaé nlem. Éve’an é ne na, bi nji yiane sili ngal mojan a ne ñwo’an, jé a simesane mfa’a ya ényiñe ya nnôm éto si nyi te ke nnôme wé. Ve jam bi ne tabe de ndi e ne na, mfefé émo Yéhôva a ye “jalé nkômbane ya jôm ése é vee.”Besam 145:16.

11. Aval avé bia ba’ale bia bebien éyoñe bia bo te ke “wumulu mefulu me ngumba môt” a lôté nné?

11 Nge bia bo teke yene Bekristene be ne miñwo’an, na be ne mfi abui a lôté bôte bevok, bia ba’ale bia bebien. Aval avé? Kalate Zambe a kate bia na éyoñ éziñe “bobenyañe ya minsos [mbia be bobenyañ] ba ye nyin akônda été a jô na, be ne miñwo’an. (Begalate 2:4, 5; 1 Jean 2:19) A fe na, miñwo’an miziñ mi aye ke ke ôsu a wulu ane Zambe a nye’e. (Matthieu 25:10-12; 2 Pierre 2:20, 21) Ve nge bi nji “wumulu mefulu me ngumba môt” a lôte nné, bia ye bo te tôñe nye, to’o a ne ñwo’an, to’o abui bôt da yeme nye, to’o a boya Zambe ésaé abui mimbu. Jame te da ye bo na, to’o ba bo Yéhôva melo a kôlô akônda, mbunan wongan wo aye ke voé, a nde bia ye ke jô’é ésaé bi nga jô na bia bo Yéhôva.Jude 16.

YE MINLEME MIA YIANE TYEBE BIA YÔP MFA’A YA TAÑE BÔT?

12, 13. Amu jé minleme mi nji yiane tyebe bia yôp, mfa’a ya abime bôte da di belet a nyu wone mesimesa’ane ya awu Yésus?

12 Mimbu ya mvus, tañe bôte é mbe é ja’a belet a nyu won e môse mesimesa’ane ya awu Yésus é mbe é se’eban. Ve melu ma, tañe bôt éte, ja bete mbu ôse. Ye jame te da yiane tye’ele bia minleme yôp? Momo. Bi tame zu yen amu jé.

13 ‘Yéhôva a yeme ba be ne émbé.’ (2 Timothée 2:19) Bobejañe ba lañe bôte ba di belet a nyu wone môse mesimesa’ane ya awu Yésus, ba selan a Yéhôva. Amu Yéhôva émien, nnye a kôme yeme bôte be ne benya miñwo’an. Nde éyoñe bia yene tañe bôte ja di belet, a nyu won môse mesimesa’ane ya awu Yésus, bia yiane yeme na, benya miñwo’an, a ba be nji bo miñwo’ane be ne été. Éve’an é ne na, bôte béziñe be mbe be ja’a belet a nyu won, be nga su’ulane jô’é. Ba bevok ba kone nlô a nlem, jôme te nje ba buni na b’aye ke jôé yôp. Nalé a liti na bi se ngule ya yeme tañe benya miñwô’an é li’iya si nyi.

14. Kalate Zambe a jô aya mfa’a ya tañe miñwo’an ja ye li’i si, éyoñe beta nju’u aye taté?

14 Miñwo’ane mia ye bo mmialane si se, éyoñe Yésus a ye zu nyoñe be na a kee be yôp. Kalate Zambe a jô na Yésus “a ye  lôme beange bé a beta nkobô toñ, be aye kôane bôte Zambe a nga top be so’o mimfa’a minyine ya si nyô, ataté mfa’a yôp wua, akekui mfa’a yôp mbok.” (Matthieu 24:31) Kalate Zambe a liti fe na, melu m’asu’ulan, mon abime miñwo’an a ye li’i si va. (Nlitan 12:17) Ve a nji kate tañe miñwo’ane mia ye li’i si éyoñe beta nju’u aye taté.

15, 16. Jé bia yiane tu’a wôk mfa’a ya bôte ntete toyini a betoyini mewôm menyin a benyin (144 000) Zambe a nga top?

15 Yéhôva émien a tyik éyoñ a ye tobe miñwo’an. (Beromain 8:28-30) Yéhôva a nga taté na a tobe miñwo’ane mvuse nwômane Yésus. Nalé a liti na ntete mimbu ôsusua, benya Bekristene bese be mbe miñwo’an. Mvus abui mimbu, abui bôt é mbe é jô’ô na é ne Bekristen, é nga bene tôñe Krist. To’o nalé, Yéhôva a nga ve abime bôt é mbe é bo’o nkômbanwé, mbamba nsisim. Be mbe ane mbia fes Yésus a nga jô na ja ye yaé a mbamba fes. (Matthieu 13:24-30) Nté melu ya asu’ulane ma lôt, Yéhôva a ke ôsu a tobe bôte ya mebuka’a ya bôt ntete toyini a betoyini mewôm menyin a benyin (144 000). [2] (Fombô’ô ayemé é ne afebe si.) Nde nge Zambe a tyi’i na a top bôte béziñe na be bo mebuka’a ya bôte bete, bi nji yiane sôô na Zambe a bo mbamba jam. (Ésaïe 45:9; Daniel 4:35; lañe Beromain 9:11, 16.) [3] (Fombô’ô ayemé é ne afebe si.) Bia yiane tabe ntyele ya bo ane bebo bisaé be nji nye’e avale masa wop a nga nyoñe bôte be nga su’ulane taté ésaé.Lañe Matthieu 20:8-15.

16 Sa ke bôte bese be bili ndi nleme ya ke nyiñe yôp, mbe be ne “mbo ésaé a ne mewôk a fek.” (Matthieu 24:45-47) Aval ane ntete mimbu ya ôsusua, Yéhôva ba Yésus ba belane fe mon angôse bôte na, be ve abui bôte bidi ya nsisim, nge ye’ele be. Yéhôva a nga belane fo’o ve mon abime miñwo’ane na be tili éfase Kalate Zambe é nga tilibane nkobô Grèk. A melu ma, fo’o ve mon abim miñwo’an, nnye a be’e mbe’e ya ve bebo bisaé bé “bidi [ya nsisim] éyoñe ja yian.”

17. Jé wo te yé’é ayé’é di?

17 Jé bia te yé’é ayé’é di? Yéhôva a nga tyi’i na, a ve bizu’u bi bôt ényiñe ya melu mese e si va. A na a ve mon abime bôt éziñ ényiñe yôp été asu na, ba be Yésus be ke jôé wé. Yéhôva a ye ya’ane bebo bisaé bé bese, “Beyude” a “bikul awom” a yi fo’o ve na be tôñ avale metiñe da, a bo Yéhôva mewôk. Bia bese bia yiane sili bia bebien si. Bia bese bia yiane kañe nye nsamba, a mvo’é été. A bia bese bia yiane ve ngule na, akônda é tabe mvo’é été. Nkelan ôsu bia bese a kañe Yéhôva a tôñe Krist nsamba wua, nté asu’ulane da zu da subu.

^ [1] (abeñe 3) Avale Besam 87:5, 6 a jô, melu ma zu, Zambe a ye kate biyôlé bi bôte bese ba ye jôé fufulu a Yésus e yôp été.Beromain 8:19.

^ [2] (abeñ 15) Akusa bo kalate Mam Minlôman 2:33 a liti na, Yésus fe a bili tyiñ éyoñe Zambe a ve môt mbamba nsisim, ve Yéhôva émien étam, nnye a loene môt na a zu yôp.

^ [3] (abeñ 15) Nge wo kômbô yem abui mam mefe, fombô’ô “Questions des lecteurs” de La Tour de Garde du 1er Mai 2007 page 30-31.