Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngon ôsu 2016

‘Mveane Zambe ô ne teke atoté’ ô tindi’i bia na bia fe bi bi fulu nye’an

‘Mveane Zambe ô ne teke atoté’ ô tindi’i bia na bia fe bi bi fulu nye’an

Akéva e bo’o be Zambe amu mveane wé, ñwô ô ne te ke atoté.”2 BECORINTHIEN 9:15.

BIA: 121, 63

1, 2. (a) “Mveane Zambe . . . ô ne te ke atoté,” mame mevé me ne bifia bite été? (b) Minsili mivé bia ye yalan ayé’é di?

ZAMBE a nga liti bia na a nye’e bia abui, éyoñe a nga lôme édima mone jé Yésus e si. (Jean 3:16; 1 Jean 4:9, 10) Nlômane Paul wo loene dase te na “mveane wé . . . ô ne te ke atoté.” (2 Becorinthien 9:15) Amu jé Paul a nga belane mejô mete?

2 Paul a mbe a yeme na, mveane Yésus a nga ve émien, ô ne jôme ja liti na bengaka’a bese Zambe a bo be aye tôéban. (Lañe 2 Becorinthien 1:20.) Nalé a tinane na “mveane Zambe . . . ô ne te ke atoté,” ô nji su’u ve mveane Yésus a nga ve émien. Wo tinane abui mam afe. Mbamba be mam Yéhôva a ye bo bia melu ma zu, ma liti fe na Yéhôva a nye’e bia. Bi nji bi bifia bi avolô na, bi kôme wôk atinane ya beta jam ate. Beta das ate a bo na bi wô’ô aya? Mbu 2016, mesimesa’ane ya awu Yésus m’aye bobane môse nté wua ya ngone lale é to melu 23. Nté bia kômesane me, aval avé jame te da ve bia ngule nlem?

 MVEANE ZAMBE Ô NE NGUMBA AVAL

3, 4. (a) Wo wô’ô aya éyoñe môt a bo wo mvaé? (b) Mvaé môt a bo nyi mbok é ne tyendé ényiñe jé ése, aval avé?

3 Bia bese bia wô’ô mvaé éyoñe môt a ve bia jôm éziñ akap. Ve biôme biziñe ba ve bia, bi ne tyéndé ényiñe jangan ése, amu biôme bite bi bili mfi ô ne ngumba aval. Bi tame nyoñ éve’an. Nge mia be bôte mia te wôé môt, fonôse fé ja yiane wo? Awu, nga? Nde nge atemeteme na, môt ô nji yem a soé, nye na be foñôsô nye señe jôé, a zu wu señe jôé, jame te da ye bo wo nlem aya?

4 Aval étua jame te, da liti fo’o wo na môt a te bo wo de, a nye’e wo abui. Jame te da ye tindi wo na, ô fas a yene jôme wo yiane tyendé ényiñe jôé. Teke va nge bété, jame te da ye fe tindi wo na ô bo anyep, a nye’e bôte bevok, a jamé abé ése be ne bo wo. Nté ôse wo ye nyiñ, nleme wôé wo ye tindi wo kom ése na ô bo te vuane mvaé môt ate a nga bo wo.

5. Aval avé ntañ ô ne mfi abui a lôté jôm ése be ne bia ve?

5 Jôme Zambe a nga ve bia é ne ntañ. Ntañ ôte wo dañe mvaé ba te bo môt éve’ane bi ndeme mane yene yôp. (1 Pierre 3:18) Tame fase jame di: bia bese bi nga nyoñ abé be Adam, a fonose ya abé te é ne awu. (Beromain 5:12) Nye’ane ñwô ô nga tindi Yéhôva na a lôme Yésus, a zu wu asu bôte bese a “tye’ awu mfa’a môt ase.” (Behébreu 2:9) Ve awu Yésus a nga wu da ye bo abui mam afe! D’aye mane awu éyoñe jia ya biyoñe bise. (Ésaïe 25:7, 8; 1 Becorinthien 15:22, 26) Bôte bese ba liti a mimboane na ba buni Yésus b’aye nyiñe mvo’é été a meva’a été nnôm éto. Ba ba ye ke jôé a Yésus yôp, aval ane ba ba ye nyiñ Éjôé Zambe si e si va. (Beromain 6:23; Nlitan 5:9, 10) Mveane Yéhôva a nga ve, wo so bia bibotane bivé bife?

6. (a) Bibotane bivé bia so, mveane Yéhôva bia yange? (b) Lañe mame mela mveane Zambe a nga ve, ma tindi bia na bi bo.

6 Bibotane bia so mveane Zambe a nga ve bia, bi ne na: si j’aye beta bo paradis, akone da ye man a bewu b’aye wômô. (Ésaïe 33:24; 35:5, 6; Jean 5:28, 29) Bia nye’e Yéhôva a édima mone jé amu be nga ve bia “mveane wé . . . ô ne teke atote.” Mvean ôte wo tindi bia na bi bo jé? Wo ye tindi bia na bi (1) tôñe bibô’a mebo bi Yésus, (2) bi nye’e bobejañ a (3) bi jamé be a nlem ôse.

NYE’ANE KRIST WO TINDI BIA

7, 8. Bia yiane wô’ôtan aya mfa’a ya nye’an Krist a bili asu dangan, a nye’ane te wo yiane tindi bia na bi bo jé?

7 Di ôsu, wo yiane tindi bia na bi belane ényiñe jangane na bi ve Yésus duma. Nlômane Paul ô nga jô na: “Nye’ane Krist wo tindi bia.” (Lañe 2 Becorinthien 5:14, 15.) Paul a mbe a yeme na, nge bi kañese beta nye’ane Yésus, nalé aye tindi bia na bi nye’e nye a ve nye duma. Yaa, éyoñe bia kômbô yeme jame Yéhôva a nga bo asu dangan, nye’ane wé wo ye tindi bia na bi nyiñ avale Yésus a nye’e. Aval avé bia bo de?

8 Nye’ane bi bili asu Yéhôva wo ye tindi bia na bi tôñe bibô’a mebo bi Yésus. (1 Pierre 2:21; 1 Jean 2:6) Bia liti na bia nye’e Yéhôva ba Yésus éyoñe bia bo be mewôk. Yésus a nga jô na: “Môt a bili metiñe mam a ba’ale me nnye ate a nye’e ma: môt a nye’e ma, Ésa wom a ye nye’e nye, ma fe me aye nye’e nye, me aye liti nye mamien.”Jean 14:21; 1 Jean 5:3.

9. Mam mevé émo ja tindi bia na bi bo?

9 Nté bia kômesane mesimesa’ane ya  awu Yésus, é ne mvo’é na bi fas avale bia belan ényiñe jangan. Nde sili’i womiene na: ‘Awolo bia kobô di, mam mevé me boya ane Yésus a mbe a bo’ok? Bevôme bevé ma yiane ve ngule ya vu Yésus?’ É ne mfi na bi sili bia bebiene minsili mi, amu émo ja yi na bi tôñ abo dulu dé. (Beromain 12:2) Nge bi teke tabe ntyel, bi ne viane vu beye’ele ya émo, bôte ba wum émo, a beta bebo bivôé. (Becolossien 2:8; 1 Jean 2:15-17) Aval avé be ne bo teke kee bia zen éte?

10. Minsili mivé bia yiane sili biabebien, nté bia kômesane mesimesa’ane ya awu Yésus, Jé biyalane ya minisili miôé mia ye tindi wo na ô bo? (Fombô’ô fôtô ya atata’a ya ayé’é di.)

10 Nté bia kômesane mesimesa’ane ya awu Yésus, é ne mvaé na bi fas avale mimbote bia jaé, avale bingeñegeñe bia yen, avale mezi’i bia wôk, a mam me ne minsini a ne ane boo môt wom, nkule minsok wom. Sili’i womiene na: ‘Nge Yésus a suane va atemetem, a zu koane ma me yene jôme ma yene ji, ye ma ye si’an?’ (Lañe 1 Timothée 2:9, 10.) ‘Ye mimbote miam mia liti na me ne nyé’é Yésus? Ye Yésus a ye nye’e a yene mam ma yené bingeñegeñ? Ye a ye nye’e a wô’ô mezi’i ma wôk? Nge ma yôé Yésus nkule minsok wom, nge minsini a ne ane boo môt wom, ye nlem wo ye tyebe ma yôp? Ye da ye bo ayaé mfa’a wom, na me kate Yésus amu jé ma nye’e ma vôé bivôé bi alôt e bingeñegeñ?’ Nye’ane bi bili asu Yéhôva wo ye tindi bia na bi bo teke bo mam mese Bekristene ba yiane sa’ale, ja’a jé ja’a jé. (Mam Minlôman 19:19, 20) Éyoñe bi nga ve biabebiene ngumba be Yéhôva bi nga ka’a nye na, bia ye belan ényiñe jangane na bia ve Krist duma. Nde bi nji yiane kañese na jôm éziñ é bo na bi kate vu Yésus.Matthieu 5:29, 30; Bephilippien 4:8.

11. (a) Aval avé nye’ane bi bili asu Yéhôva ba Yésus wo tindi bia na bi kañete? (b) Aval avé nye’ane wongan ô ne tindi bia na bi volô bôte bevo’o ya akônda?

11 Nye’ane bia nye’e Yésus wo yiane tindi bia na bi kañete, a ye’ele bôt a ayôñ ése. (Matthieu 28:19, 20; Luc 4:43) Éyoñe ya mesimesa’ane ya awu Yésus, ye ô ne bo ngômôtô na ô bo nkpwa’a mefane ya étun éyoñ a ve mewolo 30 nge 50 ngon? Fam éziñ é mbe nkus a to mimbu 84 a mbe a buni na, a se ngule ya bo nkpwa’a mefan amu a ne nnôm a ntutuñ. Ane bepkwa’a mefane ya vôm a mbe a too be nga volô nye. Be nga jeñe vôm a mbe ngule ya kañete; be nga jeñe fe ébi’iti a ye belane je na a ke nkañete. Nde a nga bo ngule ya kañete mewolo 30. Ye ô ne volô môt éziñe ya akônda dôé na, a bo nkpwa’a mefane ngone lale, nge ngone nyini? To’o bia bese bi se ngule ya bo bekpwa’a mefan, ve jame da bi ne belane ngule jangan a éyoñe jangane na bi nene ésaé nkañete jangan. Nge bi bo nalé aval ane Paul bia ye liti na bi bili nye’ane Yésus. Jé éfe nye’ane Zambe wo ye tindi bia na bi bo?

BI NE NTINDANE NA BI NYE’ESAN

12. Nye’ane Zambe a nye’e bia wo tindi bia na bi bo jé?

12 Jame baa é ne na nye’ane Zambe wo yiane tindi bia na bi nye’e bobejañ. Nlômane Jean ô nga jô na: “A bôte me anye’e, nge Zambe a nga nye’e bia nalé, bia fe bi ayiane nye’esan.” (1 Jean 4:7-11) Nde nge bia kañese nye’ane Zambe a nye’e bia, wôna bia fe bia yiane nye’e bobejañ. (1 Jean 3:16) Aval avé bi ne liti na bia nye’e bobejañ?

13. Éve’ela évé Yésus a nga li’i bia mfa’a ya nye’e bôte bevok?

 13 Éve’ela Yésus ja liti bia aval avé bi ne nye’e bobejañ. Éyoñe Yésus a mbe si va, a mbe a volô’ô fo’o ve bôte be mbe be sili bebiene si. A nga saé minkôkon, minyeyem, mindidim, mindôdok, a mimvumvuk. (Matthieu 11:4, 5) Yésus a nji be ane bivete ya menda me Zambe amu, a mbe a nye’e a ye’ele bôte be mbe be kômbô’ô yeme mam ma fombô Zambe. (Jean 7:49) A mbe a nye’e bôte ba sili bebiene si. A mbe fe a va’a mengule ya volô be.Matthieu 20:28.

Ye ô ne ngule ya volô monyañe wé a yômbôya nge kale jôé ya nsisim é yômbôya nkañete? (Fombô’ô abeñ 14)

14. Jé ô ne bo asu na ô liti bobenyoñe bôé na wo nye’e be?

14 Éyoñe ya mesimesa’ane ya awu Yésus, é ne fe mbamba éyoñe ya fas aval ô ne volô bobejañ a bekale bangane be ne akônda dôé. Ye ô ne ke jome be? Ye ô ne ke ve be ésua bidi? Ye ô ne ke volô bo be bisaé ya nda? Ye ô ne ke liti be ésulan, nge ke loene be na mi kui nkañete? (Lañe Luc 14:12-14.) Jôké’é nye’ane wo nye’e Zambe ô tindi wo na ô nye’e bobenyoñe bôé!

WÔ’Ô BOBENYOÑ A BEKALE BÔÉ ÉNGÔNGOL

15. Jé bia yiane yemelan?

15 Jame lale, nye’ane Yéhôva wo tindi bia na bi jamé bobejañ a bekale bangan. Bia bese bi nga nyoñ abé a awu be Adam. Ajô te môt éziñ a se ngule ya jô na “Me nji yi ntañ.” Ja’a mbo ésaé Zambe a dañe zôsô a yi ntañ. Môt ase ya bebia a bi njamane ya beta abé bi nga nyoñe be Adam. Amu jé bia yiane de yemelan? Bia zu yen éyalane ya nsili te éve’ela jia ya bive’ela Yésus a nga belane bie.

16, 17. (a) Jé bia yiane yé’é éve’ela njô bôt a bebo bisaé Yésus a nga nyoñ? (b) Éyoñ ô maneya fas éve’ela Yésus a nga nyoñ, ntyi’an ôvé ô nyoñeya?

16 Yésus a nga nyoñe éve’ela ya njô bôt a nga jamé beta mvôla mbo ésaé wé a mbe a bili nye. Mvôla éte é mbe betalent toyini awôm (35 190 000 000 fcfa). Mvuse ya valé, ane mbo ésaé ate a nga bene jamé, mvôla mbo ésaé mbok a mbe a bili nye. Mvôla éte é mbe befranc 100 (58 650 fcfa). Mbamba nleme njô bôt a nga yiane tindi mbo ésaé be nga jamé beta mvôla na, nye fe a jamé mone mvôla môte mbok a mbe a bili nye. A nga jô na: “A wo mbia mbo ésaé, me nga jamé wo mvôla jôé ése amu ô nga ye’elane ma; ngaa wo fe ô nga yiane ko ébe mbo ésaé wôé éngôngo ane ma fe me nga ko wo éngôngo?” (Matthieu 18:23-35, Mfefé Nkôñelan) Aval ane njô bôt, Yéhôva fe a nga jamé bia beta mvôla, nye’ane Yéhôva, a ñwô’an éngôngole wé, wo yiane tindi bia na bi bo jé?

17 Nté bia kômesane mesimesa’ane ya awu Yésus, bi ne sili biabebiene na: ‘Ye mojañ éziñ a te bo ma jame ma wô’ô abé? Ye ma yen ayaé ya jamé jam a te bo ma? Nge nalé, wôna mbamba éyoñe  ya vu Yéhôva nye ñhe nyi; amu a ne “avôle ya jamé.” (Néhémie 9:17; Besam 86:5) Bia ye liti na bia nye’e beta ñwô’an éngôngole Yéhôva, éyoñe bia wô’ô bôte bevo’o éngôngol a jamé be a nlem ôse. Nge bi se ngule ya nye’e a jamé bobejañ, yeme na Yéhôva fe a se ngule ya nye’e bia a jamé bia. (Matthieu 6:14, 15) Éyoñe bia jamé bôte bevok, nalé a nji tinane na be nji bo bia mbia jam, ve nalé a ne jame ya bo asu na melu ma zu me bo bia mvaé.

18. Aval avé nye’ane Zambe ô nga volô kale jangane ya mbunane na a nyiñ a monyañe wé ya mbunan a bili mefulu me ne nju’u ya jibi?

18 É ne bo ayaé ya nyiñ a bobejañ a bekale be bili avale mefulu é ne nju’u ya jibi. (Lañe Beéphesien 4:32; Becolossien 3:13, 14.) Kale jangan éziñe ya mbunan é to jôé na Lily é nga bo jame te. [1] (Fombô’ô ayemé é ne afebe si.) A nga volô nkuse minga ô too jôé na Carole. A mbe a kele a liti nye vôm ase a mbe a kele. A mbe a volô ke kuse nye biôm, a mbe fe a bo’o abui mam asu dé. Lily akusa bo mam mese ma, Carole a mbe kome ése ve komekan lily. Ve Lily a nga tyi’i na a beme mise mé fo’o ve mbamba mefulu Carole a bili, nde a nga bo ésaé te mimbu abui akekui Carole a nga fame beta ôkon a wu. Akusa bo ésaé a mbe a bo’o Carole é mbe ayaé ya bo, ve Lily a mbe a jô’ô na: “Ma simesan éyoñe ma ye yene Carole awolo ya ñwômôlane miñwuan. Ma kômbô yem avale môt a ye bo éyoñ a ye bo zôsô nne tiññ.” Nalé a liti ne sañesañe na nye’ane Zambe ô ne volô bia na bi nyiñ a bobejañ a bekale bangane be bili avale mefulu é ne nju’u ya jibi. Ô ne fe volô bia na bi simesan aval môt a binam a ye bo éyoñ abé Adam a nga kôé bia da ye man éyoñe jia ya biyoñe bise.

19. Aval avé mveane Zambe ô ne teke atoté wo ye tindi wo na ô nye’e bobenyoñ?

19 Yéhôva a nga ve fo’o bia “mveane wé, nwô ô ne teke atoté.” Ngo’é nge bia ke ôsu a yene mveane te mvaé! Éyoñe ya mesimesa’ane ya awu Yésus é ne fo’o mbamba éyoñe ya fase mam mese Yéhôva ba Yésus be boya asu dangan. Ngo’é nge nye’ane wop ô ne tindi bia na, bi tôñe bibô’a mebo bi Yésus, a bi nye’e bobejañ a jamé fe be a nlem ôse.

^ [1] (abeñ 18) Ba te tyendé biyôlé biziñ ya ayé’é di.