Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngone samane 2016

Melu ma, môt a bili nde’e memdime ya ntili bekalate a ne Yésus Krist; nnye a ve bôte ndem ya ényiñ

Minsili mi bôte ba lañe bekalate bangan

Minsili mi bôte ba lañe bekalate bangan

Za a ne môt a bili nde’e mendime ya ntili bekalate, a bôte besaman be bili jôme ba wôé je bôte mo, bia koone ñyenan Ézéchiel a nga bi?

Be ne bitétéa bi ne yôp été, bi nga jiane Jérusalem, a bia ye fe jiane mbia nta’ane mam Satan e bita ya Armaguédon. Amu jé ñwô’ane bi bili éyoñe ji a lat a ñyenane te ô ne mvo’é?

Ézéchiel a nga yene mbia be mam bôte ya Jérusalem be mbe be bo’ok, ôsusua na ba jiane tisone te mbu 607 Ô.É.J. Mvuse ya valé, a nga bi ñyenane ya mam m’aye bo na be jiane Jérusalem. A nga yene bôte besaman be bili jôm ba wôé je bôte mo. A nga yene fe môte wua a to zañe jap, a be’e “ngômesane ndombo” a bili “nde’e mendime ya ntili bekalate.” (Éz. 8:6-12; 9:2, 3) Yéhôva a nga jô môt ate na: “Kele’ tulan nlame zañ . . . a ve bôt b’asôé abuk a ba b’ayôn mbia be mam mese m’abobane zañe ya été ndem mvom mesu.” Ve a nga jô bôte besaman bevo’o na, be wôé bôt bese be ne tison été, be nji bi ndem. (Éz. 9:4-7) Jé ñyenane wu wo ye’ele bia, a za a ne môt a bili nde’e mendime ya ntili bekalate?

Nkulane mejô wu, ô nga veban mbu 612 Ô.É.J., a ô nga taté tôéban éyoñe nkane bita ya Babylone ô nga zu jiane Jérusalem mvuse mimbu mitan. Yéhôva a nga belane bôte ya Babylone be nji be be kañe nye na, be jalé nkômbane wé. (Jér. 25:9, 15-18) Nalé a mbe amu Yéhôva a nga kômbô foñesô ayoñe dé é nga lume nye mvus. Ve, Yéhôva a nji jô na, be wôé bôt éwôé wôé. Be nga ye bo teke mane wôé bezôsô be bôt, a bikotekot bi bôt fufulu. Yéhôva, nye’ane wé été, a nga mane ta’a mame na, a nyii Bejuif be nji be be bo’o mbia be mam me mbe me boba’an e tison été.

Ézéchiel a nji bo ésaé ya ve bôte ndem, nge ésaé ya jiane tison. Beéngele mbe be nga bo ésaé te. Nde a zene ya nkulane mejô wu, bi ne ngule ya yene mam me nga bobane yôp été. Yéhôva a nji jô beéngele bé ve na be jiane mbia be bôt, a nga lôme fe be na, be kandé bezôsô be bôt asu ényiñ. *

Ñyenane wu wo ye fe tôébane melu mangane ma. Mimbu ya mvus, bi nga jaé jô na, môt a bili nde’e mendime ya ntili bekalate, a ne miñwo’an. Bi mbe bi simesane na, bôte ba kañese fo’o ve foé bia kañete be, mbe ba bi ndem asu ényiñ. Ve mimbu mi ndeme lôte mi, é nga yené na, nwô’ane te ô mbe ô sili’i na be tyendé wô. Avale kalate Matthieu 25:31-33 a jô, Yésus nnye a tyi’i bôte mejô. A ye su’ulane tyi’i bôte mejô, nté beta njuk aye boban. A ye kandé bôte be ne ane mintômba asu ényiñ, a bôte be ne ane bikela asu awu.

Nde ñhe, a zene ya mfefé nwô’ane mame wu, jé ñyenan Ézéchiel a nga bi wo ye’ele bia? Wo ye’ele bia mam metan:

  1. Nté ôse Jérusalem a mbe a yange’e na a zu jianeban, Ésaïe a mbe mmombô. Mvuse ya valé, Ézéchiel ba Jérémie fe be nga bo aval ésaé da. Melu ma, Yéhôva a belane mon angôse miñwo’an na be ve bebo bisaé bé bidi ya nsisim, a na be bemene fe bôte bevok ôsusua na beta njuk a so. Bebo bisaé be Yéhôva bese, ba yiane bemene bôte foé te.Mt. 24:45-47.

  2. Ézéchiel a nji bo ésaé ya ve bôte ndem asu ényiñ; bebo bisaé be Zambe ya melu ma fe be nji bo je. Ba kate fo’o ve foé Yéhôva a  zene ya ésaé nkañete ba bo; beéngele ba wulu be éyoñe ba bo ésaé te.Nli. 14:6.

  3. Melu m’Ézéchiel, teke môt éziñ a nga bi ndem ba yen a mis, e mvom asu jé. É ne fe nalé melu ma. Jé bôt ba yiane bo asu na be bi jôm bi ne loene na, ndem asu ényiñ? Ba yiane kañese foé ba kate be, be jaé mfefé môt, be ve bebiene ngumba be Yéhôva, be su’u fe bobenyañe be Krist. (Mt. 25:35-40) Bôt ba bo mam mete, ba ye bi ndem ya ényiñ nté beta njuk aye boban.

  4. Melu ma, môt a bili nde’e memdime ya ntili bekalate a ne Yésus Krist; nnye a ve bôte ndem ya ényiñ. Beta nsamba bôt a ye bi ndem éyoñe Yésus a ye tyi’i na be ne bôte be ne ane mintômba, nté beta njuk aye boban. Jame te da ye bo na, be tebe ngame bôte b’aye bi ényiñ ya melu mese e si va.Mt. 25:34, 46. *

  5. Wôna, bôte besaman be bili jôm ba wôé je bôt mo, be ne nkane bita Yésus ya yôp été, ñwô ôte Yésus émien a jôé. Be mbeme zu jiane meyoñ, a mbia be bôte bese.Éz. 9:2, 6, 7; Nli. 19:11-21.

Ñwô’ane bia wô’ô mam ma, wo yemete ndi nlem bi bili be Yéhôva na, a ye ke wôé bezôsô be bôt fufulu a mbia be bôt. (2 P. 2:9; 3:9) Ñwô’ane te wo ba’alane fe bia mfi ya kañete bôte mbamba foé melu ma. Bôte bese ba yiane wô’ô foé ja bemene be ôsusua na asu’ulane da so!Mt. 24:14.

^ É.N. 6 Akusa bo na be nji bi ndem ba yen a mis e mvom mesu jap, bôte béziñ aval ane Baruc (ntili bekalate Jérémie), Ébed-Melec môte ya Éthiopie, a nda bôte Recab, be nga bi ényiñ. (Jér. 35:1-19; 39:15-18; 45:1-5) Be nga bi ndem be nji yen a mis asu ényiñ.

^ É.N. 12 Miñwo’an mia wulu ba’aba’a a Yéhôva mi nji yiane bi ndem asu ényiñ. Ve ba ye bi sitame ja su’ulan ôsusua na ba wu, nge ôsusua na beta njuk a taté.Nli. 7:1, 3.