Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngone zangbwale 2017

Alisa

Be nga ve bebien a nlem ôse​​​—e Turquie

Be nga ve bebien a nlem ôse​​​—e Turquie

BEKRISTENE ya ntete mimbu ôsu, be nga ve ngule ya kañete abui bôte “mbamba foé y’Éjôé”. (Mt. 24:14, Mfefé Nkônelan) Bekristen béziñ be nga ke mesi mefe. Éve’an é ne na, éyoñe nlômane Paul ô mbe missionnaire, ô nga kañete nlame ba loone dene na, Turquie. * Mbu 2014, mvuse bebé mimbu 2 000, Bengaa be Yéhôva be nga ke tôkane Turquie asu beta ôban nkañete. Amu jé bobejañe be nga nyoñe ntyi’ane ya kômesan ôban nkañete ôte? Beza be mbe benyoñe ngabe ya beta ôban nkañete ate?

“JÉ JA LÔT?”

Bengaa be Yéhôva e lôte 2 800 be ne Turquie, ve bôte million 79 ba nyiñe si éte. Nalé a liti na, Ngaa Yéhôva 1 a yiane kañete bôte 28 000. Nalé a tinane na bekañete mbamba foé be ngenane be yiane kañete abui bôt. Nsôñane ya ôban nkañete ôte ô mbe na, bobejañe be bela’an abim éyoñ be mbe be bili na, be kañete abui bôt. Bobejañ a bekale 550 ba kobô nkobô ya Turquie, be nga so mesi mefe na, ba zu kañete a bobejañe ya Turquie. Asu’ulane ya été e mbe aya?

Be nga kañete vôm ase. Akônda da ya Istanbul e nga tili na: “Éyoñe bôte be nga yene bia, be nga sili na: ‘Ye beta étôkan éziñ a boban e jale di? Bi lôô Bengaa be Yéhôva vôm ase!’” Akônda e ne tison Izmir e nga tili na: “Môt éziñ a nga ke yene mvendé ya wôé, a sili nye na: ‘Jé ja lôt ? Abim abui bôte mi nto di!’” Yaa, bôte bese be nga yene beta ésaé nkañete ate.

Steffen

Bobejañe be nga so mesi mefe, be nga nye’e ésaé nkañete éte. Steffen a mbe a so’o Danemark a nga jô na: “Môs ôse, me mbe me kañete’e bôte be mbe be ngenane teke tame wô’ô mam a lat a Yéhôva. Me mbe me wô’ôtan fo’o na, ma nyoñe ngap ésaé ya bo na, bôte be yem éyôlé Yéhôva.” Jean-David a mbe a so’o France a nga tili na: “Bi nga lôt abui mewolo bi kañete’e fo’o ve aku’u njoñe da. A mbe angôndô ya abeñ! Abui bôt e nji be e yeme’e Bengaa be Yéhôva. Bi mbe bi taté’é abeñe minlañe menda menda, bi liti’i bevidéo, bi li’i fe bôte bekalate.”

Jean-David (center)

 Benyoñe ngap 550 be nga ve bekalate 60 000, fo’o ve tañe sondô ébaé! Ôban nkañete ôte ô nga volô na, be kañete’e vôm ase.

Be nga tu’a bo ayôñ ésaé nkañete. Beta ésaé nkañete ate a nga nambe bobejañe ya Turquie abui. Abui e nga taté na, da fas aval e ne bo bekpwa’a mefan. Bengon awôm a bebaé, mvuse beta ésaé nkañete ate, tañe bepkwa’a mefan é nga bet e kui bôte 24 ntet.

Şirin

Bobejañe be nga so mesi mefe, be nga kañete na, ôban nkañete ôte ô nga volô be abui, to’o éyoñe be nga bulane mesi map. Şirin, sita a mbe a so’o Allemagne a nga tili na: “Bobejañe ya Turquie ba kañete bôt atemetem teke wôk ôson. Me ki me wô’ô wôk ôsone ya kañete bôt atemetem. Ve jé é nga volô ma na me kañete bôt atemetem? Beta ôban nkañete ate, éve’ela bobejañe ya Turquie, a abui meye’elan. Me nga kui na me kañete, a ve bôte betract. Éyoñe ji, me nji beta wôk ôsone ya kañete.”

Johannes

Johannes a mbe a so’o Allemagne a nga jô na: “Me nga yé’é abui mam asu ésaé nkañete jam. Bobejañe ya Turquie be mbe fo’o be kômbô’ô kañete abui bôte benya mejôô, a mezene mese. Be mbe be kañete’e éyoñ ése be mbe be bili fane ya bo de. Me nga nyoñe ntyi’ane ya vu be, éyoñe ma ye bulan Allemagne. Éyoñe ji, ma kañete abui bôt a lôt abim me mbe me kañete’e.”

Zeynep

Zeynep a mbe a so’o France a jô na: “Ôban nkañete ôte ô nga volô ma abui ésaé nkañete jam. Ô nga volô ma na, me dañe bo ayo’o nlem, a na, me dañe tabe Yéhôva ndi.”

Môt ase a nga subu nyi mbo’o bebé. Nye’an a élat, bi mbe zañe bobejañe be nga so mesi mefe bi nga nambe abui bôt. Jean-David bia te jôô nye yôp, a nga jô na: “Bi nga ‘tye’e’ bobejañ, a yen ane ba yeme nyoñe bia.” A nga beta jô na: “Be nga nyoñe bia ane bemvôé bap, a ane bôte ya menda me bôte map. Be nga bañete bia menda map. Me mbe me yeme’e na, bia bese bi ne bobenyañ; me mbe me ju’uya lañe de bekalate  bangan. Ve éyoñ éte, me nga yene de a mis. Me ne mengo’o dol, amu me ne mbo ésaé Yéhôva, ma ve nye akéva amu beta mvom ate.”

Claire (center)

Claire a mbe a so’o France a nga jô na: “Bia bese bi mbe nda bôte jia akusa bo bi mbe bi so’o Danemark, France, Allemange, nge ke Turquie. A mbe ve ane Zambe a nga mane tyame minné mi si.”

Stéphanie (center)

Stéphanie a mbe a so’o France a kô’ôlane na: “Beta ôban nkañete ate a nga ye’ele ma na, jam da late bia e nji bo metum, nge ke nkobô, a ne nye’ane bia bese bia nye’e Yéhôva.”

BE NGA BI BIBOTAN BIA LIBI

Abui ya bôte be nga nyoñe ngap ôban nkañete ôte, be nga taté na, ba jeñe mezene ya zu nyiñe Turquie, ndemben be suk ésaé nkañete wôé. Abui ya be be e boya de. Bôte ba nye’e bobejañe bete nya nya abui.

Tame yen éve’ane ya mon angôse nkañete a mbe a bili bekañete 25. Be nga bo abui mimbu be bili ve mvendé jia jia. Tame simesane meva’a bobejañ bete be nga wô’ô mbu 2015, éyoñe bobejañe besaman, be so’o Allemagne, a Pays-Bas be nga zu su’u be!

E KE VÔME BEKAÑETE MBAMBA FOÉ BA JEMBAN

Bôte be nga ke Turquie na ba ke kañete, ba jô na ba nyiñ aya wôé? E ne été na, e nji bo tyi’ibi biyoñe biziñ, ve éyoñe wo ke nyiñe vôme bekañete ba jemban, wo bi abui bibotan. Tame fase mam bobejañe béziñ be nga jô:

Federico

Federico, mojañ a ne nlu’an a bili mimbu 40 a nga ke nyiñ Espagne a jô na: “Mbôle me nji bi abui akum, nalé a volô me na, me bo fili, me ne ji’a kôlô a ke vôme mfe, nalé a volô fe ma na, me dañe bem ôsimesane wom e mam me ne mfi.” Ye a lebe bia na, bia fe bi ke mesi bekañete ba jemban? A jô na: “Mvo’é mvo’é! Éyoñe wo ke si fe a nsôñane ya volô bôte na, be yeme Yéhôva, teke vaa nge beté, wo ve womiene mo mé. Wo yene fo’o na Yéhôva a nye’e wo.”

Rudy

 Rudy, mojañ a ne nlu’an a lôteya mimbu 50, a so Pays-Bas a jô na: “Bi ne angôndô ya meva’a ya bo fatan ésaé nkañete éte, bia kañete bôte be nji tame wô’ô benya mejôô môs éziñ mbamba foé. Me ne angôndô ya mevak, éyoñe ma yen ane bôte ba kañese benya mejôô a mevak.”

Sascha

Sascha, mojañ a nga ke nyiñ Allemagne, a bili mimbu 40 a mvuk, a jô na: “Éyoñ ése me ne nkañete, ma tôbane bôte ba wô’ô benya mejôô éyoñ ôsu. E ve be fane ya yeme Yéhôva, a soo ma abui mevak.”

Atsuko

Atsuko, sita ya Japon a ne nlu’an, a bili mimbu 30 a mvuk a jô na: “Me mbe me taté’é yi éyoñ ése na, Harmaguédon a ji’a kui. Ve nkeane me nga ke Turquie wo bo na, me ve Yéhôva akiba abui, amu a ke ôsu a bo ôjibi. Éyoñe ma yen avale Yéhôva a wulu ékôane jé, nalé a bo na, me tu’a kômbô subu nye bebé.”

Alisa, sita ya Russie a bili mimbu 30 a mvuk a jô na: “E nyoñe ngabe fatane nkañete éte a nga volô ma na, me tye’e Yéhôva a yene na, a ne mvaé.” (Bs. 34:8) A beta jô na: “Yéhôva a nji bo fo’o ve Ésa wom, a ne fe Mvôé jam, mvôé ma jeñe na, me kôme yem, été ése me tele. Ényiñe ma nyiñe Turquie ja soo ma mevak, me bili fe abui bibotan!”

‘MI FOMBÔ’Ô MEFUB’

Beta ôban nkañete a nga bobane Turquie a nga bo na, mbamba foé a nambe abui bôt. Ve ésaé é ngenan abui. Môs ôse, bobejañe be nga ke Turquie na ba ke kañete, ba laan a bôte be ngenane te tame wôk ajô Yéhôva. Ye wo kômbô saé avale vôm ete? Nge nalé, bia ve wo ngule nyôle na: ‘Lôme’e mis, ô fombô’ô, amu mefub me nto éfumulu ne fuum a bitôtôlô bidi ya koé.’ (Jn. 4:35, Mfefé Nkôñelan) Ye ô ne ke suk ésaé nkañete vôme mebôta me nkañete me ne “éfumulu ne fuum”? Nge éyalane jôé é ne na, ôwé, taté’é na wo kômesan mfa’a ya tôé nsôñan ôte. Jam bi to de ndi e ne na: E nyoñe ngap e beta ésaé nkañete a boban “akekui mfa’a si nyô je adañ ôyap,” a so bibotan bi vo’o vek a jôm éziñ!​—Mam. 1:8.

^ É.N. 2 Kele’e lañe nsoé kalate ba loone na, Voyez le bon pays,’ afebe 32-33.