Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngone zangbwale 2016

Kañete’e mbamba foé ya mvam

Kañete’e mbamba foé ya mvam

‘Kate mbamba foé Zambe.’MAM. 20:24.

BIA: 101, 84

1, 2. Aval avé nlômane Paul ô nga liti na, a ve Zambe akéva amu mvame jé?

NLÔMANE Paul ô mbe ngule ya jô a nlem ôse na: “Mvame [Zambe], nje é nga vebane be ma é nji yené momo.” (Lañe 1 Becorinthien 15:9, 10.) Paul a mbe a kôme yeme na, Zambe a nji yiane mvamane nye, amu a mbe a tibili’i Bekristen.

2 E memane ya ényiñe jé, Paul a nga tili Timothée, môte ba nye be mbe be bo’o ésaé na: “Me ave nyô a nga ve me ngu akéva, nnye a ne Krist Yésus Tate wongan, amu na, a nga yene me na, me ayian, ane a nga telé ma mfa’a ya ésaé jé.” (1 Tim. 1:12-14) Ésaé te é nga to jé? Paul a nga kate bemvendé ya akônda ya Éphèse ésaé a mbe a bili na a bo, éyoñ a nga jô na: “Me ne te simesane na ényiñe jam é ne jôm, ane me anye’e je mamien, ajô te me aye mane bo dulu dam, a ésaé éte me nga nyoñe je be  Tate Yésus, a kat mbamba foé ya mvame Zambe.”Mam. 20:24.

3. Avale ngumba ésaé avé Paul a nga bi? (Fombô’ô fôtô ya atata’a ya ayé’é di.)

3 “Mbamba foé” mbé Paul a mbe a kañete’e, a mbe a liti’i na Yéhôva a ne mvam? A nga jô Bekristen ya Éphèse na: “Mi wô’ôya nkômane ya mvame Zambe, nje éte é nga vebane be ma mfa’a wônan.” (Beép. 3:1, 2) Paul a nga bili mbe’e ya kañete begentil mbamba foé ndemben be fe be bo ngabe ya bôte ba ye jôé a Krist. (Lañe Beéphésien 3:5-8.) Paul a ne mbamba éve’ela asu Bekristen ya melu ma, amu a mbe a kañete’e a ayôñ ése, a liti’i fe na mvame Zambe “é nji yené momo” be nye.

YE MVAME ZAMBE NJE JA TINDI WO?

4, 5. Amu jé bi ne jô na “mbamba foé ya Éjôé” a “mbamba foé ya mvame Zambe” be ne jôme jia?

4 Melu ya asu’ulane ma, bebo bisaé be Yéhôva be bili mbe’e ya kañete ‘mbamba foé ya [Éjôé] Zambe . . . si se, a bo meyoñe mese ndem.’ (Mt. 24:14) Foé bia kañete é ne fe “mbamba foé ya mvame Zambe” amu bibotan bise bi to ndi na bia ye bi Éjôé Zambe si, bia ye so a zene ya mvame Zambe ja litibane be Krist. (Beép. 1:3) Ye môt ase ya be bia a ne vu Paul mfa’a ya liti na, a ve Yéhôva akéva amu mvame jé, a zene ya kañete a ayôñ ése?Lañe Beromain 1:14-16.

5 Avale bi nga yen ayé’é ya mvus, bia bi ne bebo mam abé, bia yene mfi ya mvame Yéhôva abui meval. Ajô te, bi ne ntindane ya ve ngule jangan ése na, bi bo na bôte be yem avale Yéhôva a liti nye’ane wé, a avale môt ase ya be be a ne yene mfi ya été. Aval avé bia yiane ye’ele bôte bevo’o na, be ve Yéhôva akéva amu mvame jé?

KAÑETE’E MBAMBA FOÉ YA NTAÑ

6, 7. Éyoñe bia ye’ele bôte jôm é ne ntañ, aval avé bia kañete mbamba foé ya mvame Zambe?

6 Émo ji ja yene mimboane mise mvaé. Nsem ô nji beta bo jam é ne abé mise me bôt, ajô te abui é nji yene mfi ya kôtéban. Nté ôte ôse, abui bôt é ne yene na, ényiñe fili é nji so benya mevak. Akusa bo ba laan a Bengaa be Yéhôva, abui é nji yeme jé é ne nsem, aval avé wo nambe bia, a jé bi ne bo na bi bo te beta bo alo ya abé. Minleme mia bômbô bôte ba nye’e Yéhôva si, éyoñe ba yé’é yeme na, nge ô va beta nye’an a mvame jé, Yéhôva a nga lôme Mone wé si na, a zu nyii bia abé, a mam ma tôn abé.1 Jn. 4:9, 10.

7 Paul a nga kobô ajô ya Mone Yéhôva a nye’e, a jô’ô na: “Bi bili nkôtane wongan be nye [Yésus] amu metyi mé, njamane ya mintyamane metiñe miangan, aval ane abui mame ya mvame jé.” (Beép. 1:7) Awu Krist é ne beta ndeme ja liti na, Zambe a nye’e bia, a na a mvamane bia abui. Ngo’o avale mbamba jame te, éyoñe bia yé’é na, nge bi liti e mimboane na bi bili mbunan metyi Yésus a nga sôé, bia ye bi njamane ya mam abé mangan. Mone môte wongan ya nlem fe aye bo mfuban! (Beh. 9:14) Ke mbamba foé ya kañete bôte bevo’o le!

 VOLÔ’Ô BÔTE NA BE BO AMVÔÉ A ZAMBE

8. Amu jé bebo mam abé ba yiane late ñbwa a Zambe?

8 Bi bili mbe’e ya bo na bôte bevok be yeme na, be fe be ne bo amvôé a Nté wop. Ôsusua na bôt ba liti a mimboane na be bili mbunane metuna’a me Yésus, Zambe a yene be ane besiñe bé. Nlômane Jean ô nga tili na: “Môt a buni Mon, nnye a ne ényiñ ya melu mese; ve môt a bo te wô’ô Mon, a ye yen ényiñ ya melu mese, Zambe a ye bo ve yaa ajô dé.” (Jn. 3:36) Mbamba jam a ne na, awu Krist da bo na nlatane ñbwa a Zambe ô boban. Paul a nga jô na: “Melu mvus mi nga to nkandane be Zambe a besiñ amu asimesane denane ya mbia mimboane mi mam mienan été, ve éyoñe ji a maneya late mia ñbwa nyôle ya minsône mié été amu awu.”Beco. 1:21, 22.

9, 10. (a) Mbe’e ôvé Krist a nga ve bobenyañe bé be ne miñwo’an? (b) Aval avé “mintômba mife” mia volô bobenyañe bap be ne miñwo’an?

9 Krist a nga ve bobenyañe bé be ne si va jôme Paul a loone na, “ésaé ya nlatan ñbwa.” Paul a nga tili miñwo’an Bekristen ya ntete mimbu ôsu, a timine be jame te éyoñ a nga jô na: “Mam mese me aso be Zambe, nnye ate a nga late bia ñbwa be émien amu Krist, a a nga ve bia ésaé ya nlatan ñbwa; e ne na, Zambe a nga bo a late’ bôte ya si nyô ñbwa be émien amu Krist, a ne te lañe be mintyamane metiñe miap, a a nga ve bia mejô me ya nlatane ñbwa. Ajô te, bi ne bekat mbañete señe Krist, aval ane nge Zambe a lep a anyu dangan: bi aye’elane mia señe Krist na, mi latane Zambe ñbwa.”2 Bec. 5:18-20.

10 “Mintômba mife” mi bili beta meva’a ya volô miñwo’an ésaé nkañete. (Jn. 10:16) Mbôle “mintômba mife” mi ne bôte Krist a nga lôm, ba bo beta nsôl ésaé mfa’a ya ye’ele bôte benya mejôô, a mfa’a ya volô be na, be late ñbwa a Yéhôva. Jame di é ne beta ngabe ya ésaé ya kañete mbamba foé ya mvame Zambe.

KAÑETE’E MBAMBA FOÉ A NE NA, ZAMBE A WÔ’Ô MEYE’ELAN

11, 12. Amu jé a ne mbamba foé na, bôt be yé’é na be ne ye’elane Yéhôva?

11 Abui bôt da ye’elan amu meye’elan ma bo na be wô’ôtane bebiene mvo’é, ve be nji tu’a buni na, Zambe a wô’ô meye’elane map. Ba yiane yeme na Yéhôva a ne “Nyô a wô’ô meye’elan.” Ntili Besam David a nga tili na: “A wo, Nyô a wô’ô meye’elan, nsôn ôse w’aye zu be wo. Mbia be mam m’adañe me ngu: mfa’a ya mintyamane metiñe miangan, w’aye jamé mie.”Bs. 65:2, 3.

12 Yésus a nga jô beyé’é bé na: ‘Nge mi aye ja’é jam a jôé dam, me aye bo de.’ (Jn. 14:14) Teke bisô, éyoñe Yésus a jô na “jam,” a jô jôm ése ja tôban a nkômbane Yéhôva. Jean a ve bia ndi nleme na: “Nyina é ne ngule minlem bi bili be nye na, nge bi asili jam éziñ aval ane nkômbane wé, a wô’ô bia.” (1 Jn. 5:14) Ngo’o avale mbamba jame na, bia ye’ele bôte bevo’o na meye’elan me nji bo ve jôm ja bo na be wô’ôtan na be ne mvo’é, ve me ne fe mbamba zene ya subu “éto  njôane ya mvam” Yéhôva bebé! (Beh. 4:16) Éyoñe bia ye’ele bôt avale ba yiane ye’elan, za ba yiane ye’elan, a jé ba yiane sili, bi ne volô be na be subu Yéhôva bebé a bi mvolan éyoñe minjuk.Bs. 4:1; 145:18.

AVALE MVAME YÉHÔVA JA YE YENÉ MFEFÉ NTA’ANE MAM

13, 14. (a) Beta jam mbé miñwo’an mia ye bi melu ma zu? (b) Beta ésaé mbé miñwo’an mia ye bo asu bôt?

13 Mvame Yéhôva ja ye ke su’u ve nta’ane mam abé wu. Paul a nga kobô ajô ya mbamba jam Zambe a nga bo bôt 144 000, mbe bete ba ye jôé a Krist Éjôé ya yôp. A nga tili na: “Zambe, vôm a mbe abui mvam, amu beta nye’ane wé ñwô ôte a nga nye’e bia, akôsa bo éyoñ bi mbe miñwuan amu mintyamane metiñ miangan, ane a nga ve bia ényiñ bia be Krist (mi nga nyiñ amu mvam), ane a nga wômôlô bia be nye, a toé bia be nye yôp été, be Krist Yésus: nde éte biyoñ ya ôsu a ye liti étua abui mame ya mvame jé vôm a mvamane bia be Krist Yésus.”Beép. 2:4-7.

14 Bi se ngule ya simesan beta jame Yéhôva a ye bo miñwo’an Bekristen, éyoñ a ye toé be bito bi njôô na be jôé a Krist e yôp été. (Lc. 22:28-30; Beph. 3:20, 21; 1 Jn. 3:2) E dañe dañe mfa’a wop, Yéhôva a ye “liti étua abui mame ya mvame jé.” Ba ye bo “mfefé Jérusalem,” minga Krist. (Nli. 3:12; 17:14; 21:2, 9, 10) Ba be Yésus ba ye saé asu “mvo’é ya meyoñe me bôt,” ba ye bo na, bôt be ne mewôk be kôtéban abé a awu akekui ba ye bo teke fe metyi ya abé.Lañe Nlitan 22:1, 2, 17.

15, 16. Aval avé Yéhôva a ye liti “mimtômba mife” mvame jé melu ma zu?

15 E kalate Beéphésien 2:7, Mfefé Nkôñelan bia lañe na, Zambe a ye liti mvame jé “mimbu mia zu.” Teke vaa nge beté, mfefé nta’ane mame Yéhôva ya si wo ye liti “étua abui mame ya mvame jé.” (Lc. 18:29, 30) Beta jame wua ya mame Yéhôva a ye bo na a liti mvame jé si va, a ne na a ye wômôlô bôt “mesoñ.” (Jb. 14:13-15; Jn. 5:28, 29) Bebo bisaé be Yéhôva be nga wu ôsusua na Krist a wu, a ba bese be ne “mintômba mife” ba wu melu ma, ba ye beta nyiñe na be zu ke ôsu a kañe Yéhôva.

16 Bizu’u bi bôte bi nga wu teke yeme Zambe, be fe ba ye wômô. Ba ye bi fane ya yebe na, be nyiñ éjôé Yéhôva si. Jean a nga tili na: “A me nga yene miñwuan, mi mi ne anen a mi mi ne tyôtyoé, mi tele asu éto njôan; a bekalate be nga kuiban: a kalate mfe a nga kuiban, nnye a ne kalate ya ényiñ: a miñwuan mi nga tyi’ibane mejô a mam me mbe ntilane bekalate bete été, aval ane mimboane mi mam miap mi né. A mañ me nga kuli miñwuan mi mbe été; a awu ba vôme ya miñwuan be nga kuli miñwuan mi mbe été: a mi nga tyi’ibane mejô, môt ase aval ane mimboane mi mam miap mi né.” (Nli. 20:12, 13) Yaa, da ye sili na bôt ba ye wômô, be futi mam ba ye yé’é e Kalate Zambe été e mimboan ényiñe jap. Nde fe, da ye sili na, be tôñe mimfefé miñye’elane mia ye kuibane “bekalate” ba ye liti avale Yéhôva é yi na bôt be nyiñ mfefé nta’ane mam. Éyoñe bôt ba ye yem mam me  ne bekalate bete été, a ye bo zene fok Yéhôva a ye liti mvame jé.

KELEK ÔSU A KAÑETE MBAMBA FOÉ

17. Jé bia yiane ba’ale nsisim éyoñ bia kañete?

17 Jam da dañe mfi e memane ya nta’ane mame wu é ne na, bi kañete mbamba foé ya Éjôé! (Mc. 13:10) Teke vaa nge beté, mbamba foé a liti mvame Yéhôva. Bia yiane ba’ale de nsisim éyoñ bia kañete. Éyoñ bi ne nkañete, nsôñane wongan wo yiane bo na bi ve Yéhôva duma. Bi ne de bo a zene ya kate bôt na, bengaka’a a bibotane bise ya mfefé émo bia liti beta mvame Yéhôva.

Nkañané Yéhôva a ayôñ ése, bi to ‘mbamba beba’ale ya mvame Zambe.’1 P. 4:10 (Fombô’ô mebeñ 17-19)

18, 19. Aval avé bia ve mvame Yéhôva duma?

18 Éyoñ bia kañete bôte bevok, bia yiane liti be na, éjôé Krist si, bôt ba ye yene mfi ôse ya awu Yésus, a ôte’ete’e ôte’etek nsem wo ye kôlô be metyi. Kalate Zambe a jô na: “Mintéane mi biôm mibien mi aye fe vas ébol ntaban éto belo, a ke tabe éto beti ya étôtô’ô ya bone be Zambe.” (Bero. 8:21) Jame te da ye boban ve a zene ya beta mvame Yéhôva.

19 Bi bili mvom ya kate bôt ba ye wôk, mbamba ngaka’a é ne e kalate Nlitan 21:4, 5: “[Zambe] a ye fimi mili’i mese mise map; a awu de aye fe bo; nalé fe ôlun vi aye fe bo, nge ñyôn, nge mintaé: mame ya ôsu me lôteya.” A Yéhôva, nyô a to éto njôan a jô na: “Ô lô, me abo mam mese mimfefé.” A jô fe na: “Tili’i: amu mejô ma me ne été a benya mejôô.” Éyoñe bia kañete bôte bevo’o mbamba foé a ayôñ ése, bia kôme fo’o ve mvame Yéhôva duma!