Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngone tane 2017

 MINNÔM BEKALATE

“Beta étôkan ate a nga yemete nye’ane wongan, a nga ve fe bia ayôñ asu nkañete”

“Beta étôkan ate a nga yemete nye’ane wongan, a nga ve fe bia ayôñ asu nkañete”

AYÔN é nga taté na da bet mame tyé ya Môse nkul éwônga ya Ngon ébulu, mbu 1922. Bôte 8 000 be mbe njalan aba ya beta étôkan ate. Nde kaso a nga yôtane na, môt ase a kômbô a ne ke nseñ, ve a yeme na, aye bo ngule ya beta nyiin aba été.

Be nga taté étôkan a bia ya ékaña’a, mvuse ya valé nde mojañ Joseph F. Rutherford a nga ke tebe posmôden. Bôt abui be nga tabe bivôl na be vô’ôlô nye. Bevo’o ke be mbe be nyamela’an amu ayôñ. Nde mojañ Rutherford a nga jô be na be tabe si a vô’ôlô. Bi nji buni na, môt éziñ a nga yene beta besanda be mbe be tyele ôsu ya pôsmôden éyoñe nkañete ô nga taté.

Nkañete mojañe Rutherford ô mbe nlô ajô na, “Éjôé ya yôp é ntoo bebé.” Nkañete wé ô nga bo bebé ngumba awolo a étun. Ô mbe ô timi’in avale bekulu mejô ya melu mvus be nga yôtan aso ya Éjôé Zambe. A nga sili bôte na, “Ye mia buni fo’o na, Beta Njôô bôt a tatéya éjôé jé nga?” Ane bôte bese be nga yalane yôp été na: “Ôwé!”

Ane a nga jô be na: “Bula’ané ñhe afup, mia bone be Zambe a ne ôyabe yôbô. Yena’ané, Njô bôt a nga jôé! Ajô ete nde, kañeta’ané, kañeta’ané, kañeta’ané.”

Éyoñ éte ébien, besanda be mbe be tyele yôp be nga ku, ane bôte be nga yene bifia bi mbe ntilan ôsu ya pôsmôden: “Kañeta’ané foé Njô bôt a Éjôé jé.”

Mojañe Ray Bopp a jô na: “Bôte bese be mbe fe’e ne vema.” Sita Anna Gardner ki a jô na: “Bôte bese be nga kute mefas.” Mojañe Fred Twarosh ke na: “Bôte bese be nga tebe betetele ne vup.” Evangelos Scouffas a kañete na, “A mbe ve ane beta ngul éziñ a nga vaa bia bito a tele bia betetele, bi nga be angôndô ya mevak.”

Abui ya ba be nga tabe beta étôkan ate be mbe nkômesane ya kañete mbamba foé ya Éjôé Zambe. Nkañete ôte ô nga ve be ngule ya bo ésaé éte. Ethel Bennecoff a jô na beta étôkan ate, a nga “yemete nye’ane wongan, a nga ve fe bia ayôñ asu nkañete.” Odessa Tuck a mbe a bili mimbu 18 éyoñ éte, a kañete na, beta étôkan ate a nga ve nye éyalane ya nsili wu, “Za a ye ke?” A nga jô na: “Me nji be me yeme vôme ma yiane kañete, avale ma yiane kañete, nge foé ma yiane kañete. Jam étam me mbe me yeme e mbe na, me mbe me kômbô’ô vu nkulu mejô Ésaïe, nnye a nga yalane na: ‘Me nyô; lôme’ ma!” (És. 6:8) Ralph Leffler a jô na: “Môs ôte ñwô beta ésaé nkañetane mbamba foé ya Éjôé Zambe a nga taté, den, ésaé éte é maneya jaé si ése.”

Teke bisô na, Bengaa be Yéhôva be vo’o ke vuane beta étôkan a nga boban e Cedar Point, Ohio,  mbu 1922! George Gangas a jô na: “Beta étôkan ate a nga tindi ma na, me bo teke bu’i étôkane jangan éziñ.” Azukui den, mojañ Gangas a nji bu’i étôkan éziñ. Julia Wilcox a nga tili na: “Me vo’o kat abime mevak ma wôk éyoñ ése ma lañe jam e nga bobane Cedar Point mbu 1922. Me wô’ô jô Yéhôva na, ‘Akéva abui a Yéhôva amu ô nga kañese na, me tabe beta étôkan ate.’”

Aval ane sita Julia, abui ya be bia e bili étôkan éziñ é nga nambe bia abui, amu é nga jalé minleme miangan a nye’ane bia nye’e Zambe wongan, a Njôô ya Éjôé jé. É nga jalé fe minleme miangan a ayôñ asu ésaé nkañete. Éyoñe bia simesane bitôkane bite, bia fe bia jô Yéhôva na, “Akéva abui a Yéhôva amu ô nga kañese na, me tabe étôkan éte.”