Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngone tane 2017

Be nga sili nkôñ ényiñe wop si

Be nga sili nkôñ ényiñe wop si

ÉYOÑE DANIEL BA MIRIAM be nga lu’an Ngon ébulu ya mbu 2000, be nga ke nyiñe Barcelone (Espagne). Daniel a kañete na: “Bi mbe bi nyiñe mbamba ényiñ. Mesu m’ésaé mangan me mbe me va’a bia ngule ya di beta berestaurant, ngule ya ke vôme bia kômbô, a ngule ya kuse mimfañe biyé. Bi mbe fe mbane nkañete.” Ve jam éziñ e nga tyendé ényiñe jap.

Beta étôkan a nga boban mbu 2006, nkañete éziñ ô nga bo na Daniel a fas abui. Ô mbe ô bili nsili wu: “Ye bia ve fo’o ngule jangan ése na, bi volô bôte ba ‘dutuban mfa’a ya awu,’ na be wulu zene ya ényiñe ya melu mese?” (Min. 24:11) Nkañete ôte ô nga ngôné mbe’e ya ye’ele bôte mbamba foé. (Mam. 20:26, 27) Daniel a jô na, “Me nga wô’ôtane ve ane Zambe a kobô ma.” Nkañete ôte ô nga liti fe na, môt a nene ésaé nkañete jé a ye bi abui bibotan. Daniel a mbe a yeme na, mejô mete me ne été. Miriam a nga ji’a bo nkpwa’a mefan, a mbe fe a nga bi bibotan.

Daniel a jô na, “Me nga tyi’i na, éyoñe ya tyendé fatan ényiñ jam é kuiya.” A nga sé’é abime mewolo a mbe a lôtô asu ésaé dé, a bo nkpwa’a mefan. Nté ôte ôse, a mbe fe a fase mevak ba Miriam ba ye bi, nge ba ke nyiñe vôme bekañete mbamba foé ba jemban.

MINTAÉ NLEM, MVUSE YA VALÉ, MBAMBA FOÉ

Ngone tane ya mbu 2007, Daniel ba Miriam be nga kôlô mesu m’ésaé map, a ke Panama, e zu koone na, be tatéya ke wôé melu ya mvus. Mfefé abôta nkañete dap, e mbe bikôte bi mañe ya Bocas del Toro, mañe ya Becaraïbe. Beguaymi, bôte ya minlame mvus, mbe be mbe be dañe nyiñe bikôte bi mañe bite. Daniel ba Miriam be nga fase na, nge be yeme belan abime moné be nga naan, be ne bo ngone mwom e Panama.

Asu ya na be kôlô ékôte mañe ji a ke jivok, be mbe be dañe bifunga a beminsini. Be ngenane be simesa’an môs ôsu be nga wulu kiliméta 32 a minsini, be bete minkôl, ényane viane si. E nga li’i mone jôme na, Daniel a jañele fek. Ve zene zen, Beguaymi be nga nyoñe be a ôsesa ôse, e dañedañ éyoñe be nga taté na, ba kobô bone bifia ya nkobô wop. Mvuse mon éyoñ, be mbe be mbili meyé’é 23.

Ve éyoñe be nga yene na, moné be nga naan a nga man, nde minlem mi nga taté na mia taé be. Daniel a kañete na: “Bi mbe bi wô’ô mintaé nlem éyoñe bi mbe bi simesa’ane na, bia zu bulan Espagne. A na bia zu li’i bôte bi mbe bi ye’ele Kalate Zambe.” Ve mvuse ngone jia, nde be nga bi mbamba foé. Miriam a jô na: “Bi nga bi kalate a jô’ô bia na, bi bo bekpwa’a mefane be ne ngum aval. Kalate ate a nga jalé bia a mevak, amu a nga ve bia fane ya kee ésaé jangan ôsu, teke bulan Espagne!”

JAM DA DAÑE VE BE MEVA’A NLEM

Mbôl ékôane Yéhôva é nga sé’é tañe bekpwa’a mefane be ne ngum aval mbu 2015, be nga jô Daniel ba Miriam na, be bo bekpwa’a mefane y’éyoñ ése. Jé be mbe be yiane bo? Be nga futi ndi nleme jap ngaka’a ja so kalate Besam 37:5, nye a jô na: ‘Ke’e Yéhôva zene jôé; Tabe’e fe nye mebun a nnye a ye bo mam señe jôé.’ Be nga yen ésaé ja ye volô be na be bo ésaé nkpwa’a mefane jap. Den be ne akônda ya Veraguas, e Panama.

Daniel a jô na: “Ôsusua na bia kôlô Espagne, bi nji be bi yeme nge bia ye bo ngule ya sili nkôñ ényiñe wongane si. Ve den bia bo de, nalé a bo na bi bo teke sube jam éziñe ya ma me ne nya mfi.” Jé ja dañe ve be mevak? Ba yalane na: “E volô bôte be ne éjote nyule na be yeme Yéhôva, a ve bia meva’a me ne teke ave’an!”