“Kelan, mi bo meyoñe mese beyé’é, a baptizô be . . . , a ye’ele be be ba’ale mejô mese me nga jô mia.”MT. 28:19, 20.

BIA: 141, 97

1, 2. Minsili mivé bi ne sili, éyoñe bia lañe mejô Yésus a nga jô e kalate Matthieu 24:14?

BÔTE bese ba yeme bia amu ésaé kañete bia bo. Ja’a bôte ba wosane bia, ba yeme na ésaé jangane le. Éyoñ éziñ ô tôbaneya bôt nkañete be jô’ô na, akusa bo ba sôô miñye’elane miangan, ba semé bia amu ésaé bia bo. Avale bia yem, Yésus a nga jô na mbamba foé ya Éjôé aye katebane si se. (Mt. 24:14) Ve aval avé bia yeme na, ésaé bia bo é ne ntôéane ya nkulane mejô Yésus? Ye a ne fulu éngelezek mfa’a wongan, éyoñe bia simesane na, bia étam bia bo ésaé te?

2 Abui miñyebe da buni na, da kañete mbamba foé. Ve jame da, susu’a ésaé ba bo é ne ve na ba kañete bôte menda me Zambe, bedo’oten, a zene ya meye’elan ba bo menda me Zambe, nge ke bisulan ba bo e bingeñgeñ, e beradio, a menjeñe mefoé. Bôte bevok, ba tametane na, ba volô bôt éyoñe ba yoé besikôlô, menda me biañ, a éyoñe ba bo mimvean. Ve ye mam mete mese, mme me ne ésaé kañete Yésus a nga jô beyé’é bé na be li’i ba bo?

3. Avale kalate Matthieu 28:19, 20 a jô, mam menyine mevé beyé’é be Yésus ba yiane bo?

 3 Ye beyé’é be Yésus be nga yange na, bôte mbe be zu koone be vôme be too? Momo! Éyoñ a wômôya, Yésus a nga jô mintete beyé’é bé na: “Ajô te kelan, mi bo meyoñe mese beyé’é, a baptizô be . . . a ye’ele be be ba’ale mejô mese me nga jô mia.” (Mt. 28:19, 20) Aval éfuse ji ja jô, bia yiane bo mam menyin. Bia yiane bo bôte bese beyé’é, a baptizô be, a ye’ele be. Ve jé bia yiane bo ôsusua na bi bo mam melale ma? Yésus a nga jô na: “Kelan!” Mfa’a ya atiñe te, mfase Kalate Zambe a nga jô na: “E ‘ke’ a ne ésaé mbuni ase a yiane bo, to’o da ye sili na, a ke njoñe yat, nge ke mañe yat.”Mt. 10:7; Luc 10:3.

4. Jé ja tinane na, e bo “beyobe bôt”?

4 Jé Yésus a mbe a kômbô’ô jô? Ye na, môt ase a ke a kañete aval a kômbô, nge ke na, ba yiane ta’a ésaé nkañetane mbamba foé? Mbôle môte wua a se ngule ya ke “meyoñe mese,” ésaé te ja yiane bo nta’an asu na, abui bôt é bo je. Ôsimesane Yésus a mbe a bili le, éyoñ a nga jô beyé’é bé na, be bo “beyobe bôt.” (Lañe Matthieu 4:18-22, Mfefé Nkôñelan.) Minobe Yésus a jô mie va, mi nji bo avale minobe môte wua a ke yop ôsôé a bili nnop a éja’a, a limiti’i kose jijia. Ve a ne avale minobe da sili ngul ésaé, beta nta’ane mam, a ésaé ya abui bôt da saé fufulu.Luc 5:1-11.

5. Minsili minyine mivé bia yiane yalan, a amu jé?

5 Asu na bi yeme bôte ba kañete mbamba foé melu ma avale Yésus a nga jô, bia yiane yalane minsili minyine mi:

  • Foé fé ja yiane kateban?

  • Jé ja yiane tindi bia na, bi bo ésaé te?

  • Bia yiane belane befatane be nkañete bevé?

  • Ésaé nkañete te ja yiane boban akekui vé, a ja yiane tabe nté mbé?

Biyalane ya minsili mite, bia ye volô bia na, bi yeme bôte ba bo ésaé nkañete te. Bia ye fe wônô ntyi’ane bi nga nyoñe na bia bo mban ya bo ésaé te.1 Tim. 4:16.

FOÉ FÉ JA YIANE KATEBAN?

6. Amu jé ô ne tabe ndi na, Bengaa be Yéhôva ba kañete fo’o foé Yésus a nga jô bôte na be kañete?

6 Lañe Luc 4:43. Yésus a mbe a kañete “mbamba foé ya ayoñ [Éjôé, MN] Zambe,” a mbe fe a yange’e na beyé’é bé be bo avale da. Nsamba bôt ôvé wo kañete “meyoñe mese” mbamba foé? Éyalan é nji bo a dimi—a ne fo’o Bengaa be Yéhôva. Ja’a bôte ba wosane bia ba yeme nalé. Éve’an é ne na, fata a nga jô Ngaa Yéhôva na a nga nyiñ abui mesi. Nde a nga sili Bengaa be Yéhôva ya mesi mete na, foé fé ba kañete. Be nga yalane nye aya? Fata a nga jô na: “Bese be nga yalan ane mekute na, ‘Mbamba foé ya Éjôé.’” Bôte bete be nji be “mekut”, ve éyalane jap é nga liti na be mbe nlatan avale benya Bekristen ba yiane bo. (1 Bec. 1:10) Ba miase fe foé é ne Nkume mmombô a bete A yôtan Éjôé Yéhôva. Kalate mefoé ate a kui ngon ése bebé bekalate million 59, tañe minkobô 254, nalé a bo na kalate mefoé ate a bo nyi a dañe miasebane si se.

7. Aval avé bia yeme na, betebe ôsu ya bamiñyebe, be nji kañete foé Yésus a nga jô be na be kañete?

7 Betebe ôsu ya bamiñyebe be nji  kañete foé ya Éjôé Zambe. Éyoñe ba kobô ajô ya Éjôé Zambe, abui da jô na é ne jôme môt a wô’ôtan, nge ke na, é ne jôm é ne nleme Kristen. (Luc 17:21) Be nji volô bôte na, be yeme na Éjôé Zambe é tele yôp été a na, Yésus nnye a ne Njô ya Éjôé te. Nde fe, be nji ye’ele bôte na Éjôé te, nje ja ye mane vaa minju’u mise môt a binam a bili a na, ana’ana ja ye vaa mbia be bôte bese be ne si. (Nli. 19:11-21) Ba viane nyoñe Yésus ane nkeñele mon, abô’ô Kilisimis a ane mbim, abô’ô Paska. A ne ane be nji yeme mam Yésus a ye bo, éyoñ a ye bo mfefé Njô ya si. Mbôle be nji kôme wô’ô foé ba yiane kañete, a nji bo jame ya kam nge ba dimine fe jôme ja yiane tindi be na be bo ésaé te.

JÉ JA YIANE TINDI BIA NA BI BO ÉSAÉ TE?

8. Jé é ne tindi bôte na be kañete?

8 Jé ja yiane tindi bia na bi kañete? A nji yiane bo moné bôte ba ve, nge biôm bi mo. Yésus a nga jô beyé’é bé na: “Mi nyoñeya te kus, va’ane te kuan.” (Mt. 10:8) Ésaé nkañetane mbamba foé, é nji yiane kuaban. (2 Bec. 2:17.) Bekañete mbamba foé, be nji yiane jeñe mfi wop éyoñe ba bo ésaé te. (Lañe Mam Minlôman 20:33-35.) Akusa bo mam Yésus a nga jô ma, abui miñyebe da yeme ngule na be sili bôte ya miñyebe miap moné. Ba ve betebe ôsu ya miñyebe miap moné, fo’o ve avale ba ya’ane bebo bisaé. Abui bevôm, betebe ôsu ya bamiñyebe be maneya tôkan abui akum.Nli. 17:4, 5.

9. Aval avé Bengaa be Yéhôva ba liti na nye’an, ñwô wo tindi be na be kañete?

9 Mfa’a Bengaa be Yéhôva, mimveane mia boban aya? Mimveane ba ve a nlem ôse, mmie mia su’u ésaé jap. (2 Bec. 9:7) Be nji sili moné Meba m’Éjôé map, nge ke beta bitôkane biap. Fo’o ve mbu ô nga mane wu, Bengaa be Yéhôva be nga kañete mbamba foé, tañe bebé mewolo bizu’u bibaé, a be nga bo meyé’é a lôte million ébul ngon ése. Ve jame ya kam é ne na, be nji be be kañete fo’o ve mbamba foé, be mbe fe be bo’o bisaé asu na be nyiñ. Beta mfase mam a nga kobô ajô ésaé Bengaa be Yéhôva a jô’ô na: “Nsôñane wop ô ne na be kañete a ye’ele bôt. . . . Nde fe, be nji bi betebe ôsu, jôme te nje ba kui na be kôme belane moné wop.” Jé ja tindi bia na bi bo ésaé te? Bia bo ésaé te a nleme wongan ôse, fo’o ve amu bia nye’e Yéhôva a bôte ba bômane bia. Avale ntindane te, nde da tôé nkulane mejô bia koone wô e kalate Besam 110:3. (Lañe.)

BIA YIANE BELANE BEFATANE BE NKAÑETE BEVÉ?

Bia kañete vôm ase bi ne koone bôt (Fombô’ô abeñ 10)

10. Avale befatane be nkañetane mbamba foé avé, Yésus ba beyé’é bé, be mbe be belane de?

10 Avale befatane be nkañetane mbamba foé avé, Yésus ba beyé’é bé, be mbe be belane de? Be mbe be kele vôm ase be ne koone bôt—minjoñ a bemakit. Be mbe be kele kañete bôte menda map. Ésaé te é mbe é sili’i na be ke ba ke menda menda asu na, ba jeñe bôte be mbe be kômbô’ô wô’ô mbamba foé. (Mt. 10:11; Lc. 8:1; Mam. 5:42; 20:20) Fatane nkañete éte, é mbe é bo’o na, be kañete avale bôt ése.

11, 12. Mfa’a ya ésaé nkañetane mbamba foé, aval avé bi ne vek ésaé bamiñyebe a bo a ji Bengaa be Yéhôva?

11 Ye menda me Zambe ya bamiñyebe  ma bo nalé? Abui biyoñ, be wô’ô ya’ane betebe ôsu na be zu bo bisulane menda me Zambe. Betebe ôsu bete be nji jeñe na be beta bo mimfefé beyé’é, ba viane jeñe na be ba’ale bôte be nyiineya miñyebe miap été. É ne été na, biyoñe biziñ, betebe ôsu be wô’ô tindi bôte bap na, be belane fatane nkañete éziñ. Éve’an é ne na, mbu 2 001, Pape Jean Paul II a nga tili kalate a jô’ô na: “Mimbu ya mvus, me nga ju’u kobô ajô mfefé fatane nkañete e bisulane biam. Ma beta de ba’alan éyoñe ji . . . Bia fe bia yiane beta nyoñe ntyi’ane nlômane Paul ô nga nyoñ, éyoñ a nga jô na: ‘Ngo’o ma nge me abo te kat mbamba foé.’” Pape a nga ke ôsu a jô na, “bi se ngule ya jô’é ésaé te mo be ‘mingumba mi bôt,’ ve mbo ésaé Zambe ase, a yiane be’e mbe’e ya kañete.” Bôte tañeya be nga bo avale kalate ate a nga jô?

12 Mfa’a Bengaa be Yéhôva ki? Mbe étam ba kate na, Yésus a nga tebe Njô ya Éjôé Zambe mbu 1914. Avale Yésus émien a nga ye’ele, ba telé fo’o ésaé nkañete ôsu ényiñe jap. (Marc 13:10) Kalate ba loone nkobô engilis na, Pillars of Faith—American Congregations and Their Partners, a jô na: “Bengaa be Yéhôva, ba telé ésaé nkañete ôsu ényiñe jap.” Éyoñ a simesane mejô Ngaa éziñ a nga kate nye, môt a nga tili kalate ate a ke ôsu a jô na: “Ba jeñe na be volô bôt to’o bebien ba wô’ô zaé, to’o ba nyiñ étam, to’o ba kon . . . ve be nji vuane na, ésaé ba yiane telé ôsu é ne na be kate bôte na asu’ulan é nto bebé a na, môt ase a yiane jeñe na a nyii émien.” Bengaa be Yéhôva ba ke ôsu a kate foé éte, be bela’ane befatane be nkañete Yésus a beyé’é bé be nga belane be.

ÉSAÉ NKAÑETE TE JA YIANE BOBAN AKEKUI VÉ, A JA YIANE TABE NTÉ MBÉ?

13. Abim avé ésaé nkañete ja yiane boban?

13 Yésus a nga liti abim avé ésaé nkañete ja ye boban éyoñ a nga jô na, mbamba foé aye katebane “si se.” (Mt. 24:14) Bebo bisaé be Zambe ba ye bo “meyoñe mese” beyé’é. (Mt. 28:19, 20) Nalé a tinane na ésaé te ja ye bobane si se.

14, 15. Jé ja liti na Bengaa be Yéhôva ba tôé nkulane mejô Yésus, a lat a ésaé nkañete ya si se? (Fombô’ô fôtô ya atata’a ya ayé’é di.)

14 Mfa’a ya yem avale Bengaa be Yéhôva be nga tôé nkulane mejô Yésus na, mbamba foé aye katebane si se, bi tame zu fase mam ma. E si ya Amelka étam, betebe ôsu ya menda me Zambe ba kui bebé 600 000, Bengaa be Yéhôva ki be ne bebé 1 200 000. E si se, bia lañe befata ya ñyebe Kathôlôs ô nga bialé Rome, 400 000 a mvuk. Éyoñe ji, bi tame zu yen abime Bengaa be Yéhôva da bo ésaé nkañete si se. Si se, Bengaa be  Yéhôva million muam, ba kañete bôt mejô me Zambe e mesi 240. Beta ésaé nkañete ate, a ve fo’o Yéhôva duma a ékaña’a!Bs. 34:1; 51:15.

15 Bia, Bengaa be Yéhôva, bia kômbô jeñe mezene mese na, bôte ya si se be wô’ô mbamba foé ya Éjôé Zambe, nté asu’ulan é ngenane te kui. Jôme te nje bia bo ésaé ya kôñelan, a kuli bekalate ba timine mejô me Zambe avale bôte befe ba be tame bo si nyi. Jôme te nje fe bia ve bôt bekalate, a bekalate mefoé e zezé. Bia ve fe bôte bekalate ba bañete be beta bitôkan, a Mesimesa’ane ya awu Yésus e zezé. Bi kuliya abui bekalate tañe minkobô 700 a mvuk. Bi kuliya Les Saintes Écritures. Traduction du Monde Nouveau a lôte bemilion 200 tañe minkobô 130 a mvuk. Fo’o ve mbu ya mvus, bi nga kuli bekalate be Zambe bebé milliard 4.5. Anjeñe mefoé dangan, bi nto ve lañe bekalate e minkobô 750 a mvuk. Nsamba bôt ôvé ôfe wo bo aval ésaé te?

16. Aval avé bia yeme na Bengaa be Yéhôva be bili mbamba nsisim?

16 Ésaé nkañete Yésus a nga jô je, é mbe na ja ye tebe éyoñ évé? Yésus a nga jô na ésaé nkañete ja ye ke ôsu akekui melu ya asu’ulan, “mvuse ya été nje asu’ulane da ye kui.” (Mt 24:14; Mfefé Nkôñelan) Ye ñyebe ôfe wo ke ôsu a kañete mbamba foé melu ya asu’ulane ma? Abui bôte bia tôbane nkañete é ne jô na: “Bi bili mbamba nsisim, ve mia mia bo ésaé nkañete.” Ye mboane bia bo ésaé te mban, ô nji liti na bi bili fo’o mbamba nsisime nga? (Mam. 1:8; 1 P. 4:14) Abui miñyebe é wô’ô jeñe na é kañete aval ane Bengaa be Yéhôva éyoñ ése, ve ésaé te é wô’ô kate be. Bôte bevok ba kañese na be kañete abim éyoñ éziñ, ve mvuse ya valé, be bulane ke bo bisaé biap be nga to be bo’o. É wô’ô fe kui na, be ke ba kañete menda menda, ve foé fé ba kañete? Éyalane ya nsili wu ja liti na, be nji ke ôsu a bo ésaé Yésus a nga taté na a bo.

ZA FO’O A KAÑETE MBAMBA FOÉ YA ÉJÔÉ MELU MA?

17, 18. (a) Amu jé bi ne tabe ndi na, Bengaa be Yéhôva be ne fo’o, nsamba bôt wo kañete mbamba foé ya Éjôé melu ma? (b) Jé é ne volô bia na bi ke ôsu a bo ésaé te?

17 Nde, za fo’o a kañete mbamba foé ya Éjôé melu ma? Bi ne jô a nleme wongan ôse na: “Bengaa be Yéhôva!” Amu jé bi ne tabe de ndi? Amu bia kañete foé Yésus a nga jô na bi kañete, mbamba foé ya Éjôé Zambe. Éyoñe bia ke yene bôt, bia belane befatane be nkañete ba yian. Nye’ane ñwô wo kôme fo’o tindi bia na, bi bo ésaé nkañetane mbamba foé, sa ke moné. Ésaé nkañete jangan, ja sôñe beta jam, nnye a ne na, bi kañete bôte ya meyoñe mese, a minkobô mise mbamba foé ya Éjôé. A bia ye ke ôsu teke tek a bo ésaé te mbu ôse ya yôp, akekui asu’ulan da ye so.

18 Bi ne fo’o fe’e ne vema, éyoñe bia yen abim ésaé Bengaa be Yéhôva ba bo melu ma. Ve aval avé jame te da kui na é boban? Nlômane Paul a yalan e kalate a nga tili bôte ya Philippe a jô’ô na: “Me ne ngule ya bo mam mese be nyô a ve ma ngu.” (Beph 4:13) Nkelan ôsu a bo ésaé nkañete jangan a nlem ôse, a ngul Ésa wongan a nye’e bia a ve bia.2 Tim. 4:5.