Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngone tane 2016

Aval avé wo nyoñe mintyi’ane miôé?

Aval avé wo nyoñe mintyi’ane miôé?

“Mi tuka’a yem jé é ne nkômbane Zambe.”BEÉP. 5:17.

BIA: 69, 57

1. Metiñe mevé méziñ me ne Kalate Zambe, a e tôñe me a ne bia mfi aval avé?

YÉHÔVA a belane Kalate Zambe asu na, a ve bia metiñe ma fombô mingumba mi mam miziñ. Éve’an é ne na, a tyili mbia nkeane binoñ, nkañane bengulemelan, wup a nso’ane meyok. (1 Bec. 6:9, 10) Nde fe, Yésus Krist, Mone Zambe, a nga jô beyé’é bé na: “Kelan, mi bo meyoñe mese beyé’é, a baptizô be jôé Ésa, a Mon, a mbamba nsisim a ye’ele be be ba’ale mejô mese me nga jô mia: me aye tabe be mia melu mese akekui asu’ulane ya si nyô.” (Mt. 28:19, 20) Metiñe me Zambe mete, me nga ba’ale fo’o be! E tôñe metiñe mete a volô na, bi tu’a semé bia bebien, bi bo mvo’é minsôn, a na, môt ase ya bebia a bi nda bôte ja nyiñe meva’a été. Ve jôme ja dañe mfi é ne na, éyoñe bia kôme tôñe metiñe me Yéhôva, to’o di da jô na, bi ke ôsu a kañete mbamba foé, bia subu Yéhôva bebé, bia bi fe bibotane bié.

2, 3. (a) Amu jé Kalate Zambe a nji ve bia metiñ, mfa’a ya mam mese bia yiane bo ényiñe jangan? (b) Minsili mivé bia zu yalan ayé’é di? (Fombô’ô fôtô ya atata’a ya ayé’é di.)

2 Ve Kalate Zambe a nji ve metiñe mfa’a ya mone jam ase. Éve’an é ne na, Kalate Zambe a nji ke a ve bone metiñe me fombô’ô avale mimbot é ne mvo’é asu Bekristen. Aval avé  fe’e Yéhôva, ja yené vôm ate? Mimbot a mefulu bia tyendé avale mimbu mia lôt, a avale mesi me ne. Nge Kalate Zambe a nga ye mane kate bia befatane mimbot bese bia yiane jaé, ve mam mese a jô mfa’a te me keya abo si éyoñe jangan ji. Jôme te nje Yéhôva a nji ve bia abui metiñ a lat a asu ésaé, nsaéban, a mimvôman. Nde ñhe, môt ase a nlô ya nda bôt ése, be ne fili ya nyoñe mintyi’an a lat a mam mete.

3 É ne kui na, bi kômbô nyoñe beta mintyi’ane miziñ, mi ne tyendé ényiñe jangane nya nya abui, ve bi teke yen atiñe Yéhôva éziñ da kate bia jame bia yiane bo. Ye nalé a tinane na, Yéhôva a nji bisi jam ése bia tobe na bia bo? Ye Ésa wongan ya yôp été, a ye kañese ntyi’an ôse bia nyoñ, nté bi nji tyame metiñe mé? Éyoñe Kalate Zambe a nji ve atiñ a lat a jam éziñ, aval avé bi ne yeme nge ntyi’ane bia te nyoñ, wo ve Yéhôva nleme mvaé, nge momo?

YE MINTYI’ANE WO NYOÑ MIA NAMBE WO, A BÔTE BEVOK?

4, 5. Aval avé mintyi’ane bia nyoñ mia nambe bia, a bôte bevok?

4 Bôte béziñe be ne buni na, teke môt a nyoñe ngap a mintyi’ane mise ba nyoñ. Asu na bi nyoñe mintyi’ane mia ve Yéhôva nleme mvaé, bia yiane yem a tôñe metiñ a miñye’elane mi ne Kalate Zambe été. Nde, asu na bi bi bibotane bi Zambe, mimboane miangan mia yiane liti na, bia tôñ atiñ a nga ve a lat a metyi. (Met. 9:4; Mam. 15:28, 29) Meye’elan ma ye volô bia na, bi nyoñe mintyi’ane mia lu’an a Kalate Zambe.

5 Beta mintyi’ane bia nyoñ, be ne nambe mvo’é jangan ya nsisim, a nyi ya minsôn. Ntyi’an ôse bia nyoñ, wo ye ve Yéhôva nlem avak, nge ve nye nlem abé. Mbamba ntyi’an aye wônô élat bi bili a Yéhôva, wôna mbia ntyi’an ki, aye ndamane je. Nde fe, mbia ntyi’an a ne ndeñele été nsisim bôte bevok, nge soo jo’ojo’o akônda été. É ne fo’o été na, mintyi’ane bia nyoñ mi ne mfi.Lañe Beromain 14:19; Begalate 6:7.

6. Éyoñe bia nyoñe mintyi’an, bia yiane bo nkômbane za?

6 Bia yiane bo aya éyoñe Kalate Zambe a nji ve ngumba atiñ éziñ? Éyoñe bi tele avale bité te, bia bebien bia yiane tu’a fase jame te nya mfasane, a tobe na bia bo sa ke avale bia nye’e, ve avale nkômbane Yéhôva ô né.Lañe Besam 37:5.

YEMEK JÉ É NE NKÔMBANE ZAMBE

7. Éyoñe Kalate Zambe a nji ve atiñ éziñ, aval avé bi ne yeme nkômbane Zambe éyoñe bi tele été éziñ?

7 Ô ne sili na, ‘Aval avé me ne yeme jôm Yéhôva a nye’e nge Kalate Zambe a nji ve atiñ éziñ a lat a jame si nge jame ka?’ Kalate Beéphésien 5:17 a jô na: “Mi tuka’a yem jé é ne nkômbane Zambe.” Éyoñe Kalate Zambe, a nji ve atiñ éziñ, aval avé bi ne yeme nkômbane Zambe? Bia yiane ye’elane nye, a kañese melep a ve bia a zene ya mbamba nsisim.

8. Aval avé Yésus a nga yeme jam Yéhôva a yi na a bo? Va’a éve’an.

8 Yenek avale Yésus a nga yem jé Ésa wé a mbe a yi na a bo. Biyoñe bibaé Yésus a nga taté ye’elan, ôsusua na a ve bizu’u bi bôte bidi. (Mt. 14:17-20; 15:34-37) Nde fe a nga bene bo na meko’o me veñesane fembé éyoñ a mbe a wô’ô zaé, a éyoñe Diable a nga ve’ele nye nkôte si. (Lañe Matthieu 4:2-4.) Mbôle a mbe a maneya yemban a ôsimesan Ésa wé, jôme te nje Yésus a nji bo na, mekok me veñesane fembé. Yaa, Yésus a mbe a yeme na nkômban Ésa wé  ô nji bo na, a belane ngul éte asu mfi wé. Mbenan a nga bene bo jame te wo liti na, a mbe a too ndi na Yéhôva a wulu nye zen é ne mvo’é, a na a ye ve nye bidi.

9, 10. Jé ja ye volô bia na bi nyoñe mbamba mintyi’an? Va’a éve’an.

9 Aval ane Yésus, éyoñe bi bili mbamba mintyi’an ya nyoñ, bia fe bia yiane tabe ndi a mezene me Yéhôva. Mimboane miangan mia yiane lu’an a mejô ma: “Tabe’e Yéhôva mebun a nleme wôé ôse, a te ye’ebe fe’e jôé womien: meme’e nye a mezene môé mese, Nnye ate a ye sôane mezene môé. Te bo fe’e mise môé womien; ko Yéhôva woñ, a kôlô abé.” (Mink. 3:5-7) Éyoñe bia yé’é na bi yem ôsimesane Yéhôva a zene ya Kalate Zambe, bi ne kui na bi yem nkômbane wé éyoñe bi tele été éziñ. Avale bia ye yemban a asimesane Yéhôva, nde fe nlem wongan wo ye mane bo nyule nyul a mezene mé.Éz. 11:19.

10 Bi tame nyoñ éve’an: Tame simesane na nga fam, a ke a kuse biôm bifatyele bifatyele. Nde a yen abeñe fia ékôndé a nye’e, ve bikôndé bite bi ne mbia tañ. Nde a sili émiene na: ‘Nnôm wom a ye yen aya, nge ma kuse bikôndé bi ne avale tañe di?’ Éko éziñe na, a yem éyalane ya nsili te ja’a ba nnôm be nji bo. Amu jé? Amu na, ba nnôm be nyiñeya ôbe nté, a yeme na, nnôm a nji dañe nye’e éyoñ a belane moné nneba’ane. A su’ulane nyoñe mbamba ntyi’an amu, a yem ôsimesane wé, a yem avale nnôme wé a ne wô’ôtane nleme wé été nge a kuse bikôndé bite. Avale da fe, nge bi mane yemban a ôsimesane Yéhôva a mimboane mié, bia ye bo ngule ya yeme nkômban Ésa wongane ya yôp été, éyoñe bi tele bité biziñ.

AVAL AVÉ Ô NE YEM ÔSIMESANE YÉHÔVA?

11. Minsili mivé bi ne sili bia bebien éyoñe bia lañ, nge yé’é Kalate Zambe? (Fombô’ô nka’ale ô ne nlô ajô na, “ Éyoñe wo yé’é Kalate Zambe, sili’i womiene na.”)

11 Nge bia kômbô yem ôsimesane Yéhôva, bia yiane telé ayé’é étam dangan ôsu. Éyoñe bia lañ nge yé’é Kalate Zambe, bi ne sili bia bebiene na, ‘Jé ma yé’é va a lat a Yéhôva, bezôsô mezene mé, a ôsimesane wé?’ Bia yiane bi aval ôsimesan ntili Besam David a mbe a bili. A nga jô na: “A Yéhôva, liti’i me mezene môé; ye’ele me mezene môé. Wulu’u me benya mejôô môé été, a ye’ele ma; amu wo ô ne Zambe ya nyiane wom; wo m’ayange ngume môs.” (Bs. 25:4, 5) Éyoñe wo fas éfus éziñe ya Kalate Zambe, ô ne jeñe biyalane ya minsili mi: ‘Aval avé me ne futi mam ma yé’é ma mimboan ényiñe jam? Mam ma yé’é ma me ne volô ma ? Ye nda? Ye nda bisaé jam? Ye sikôlô? Ye nkañete?’ Nné ane bia mane yeme vôme jôm bia te lañ é ne volô bia, é ne tyi’ibi éyoñe te na, bi yem avale bi ne futi je mimboan.

12. Aval avé bekalate bangan a bisulan ba volô bia na, bi yem ôsimesane Yéhôva mfa’a ya abui mam?

12 Jame baa bi ne beta bo na bi yemban ôsimesane Yéhôva é ne na, bi vô’ôlô’ô melebe ya Kalate Zambe ékôane jé ja ve bia. Kalate ba loone na, Index des publications des Témoins de Jéhovah a nsoé kalate ba loone na, Guide de recherche pour les Témoins de Jéhovah, be nga kômban na be volô bia na, bi yé’é na bi yem ôsimesane Yéhôva éyoñe bia yiane nyoñe mintyi’an. Bia yene fe beta mfi, éyoñe bia nyoñ éyoñe ya kôme vô’ôlô bisulan a nyoñe ngap a bie. Éyoñe bia bindi mam bia yé’é  bekalate bete a bisulan, bia ye tu’a yemelan ôsimesane Yéhôva, a bia fe, bia ye simesan ane nye. Nge bi yeme belane bidi ya nsisim Yéhôva a ve bia, bia ye yemban a mezene mé ôte’ete’e ôte’etek. Bia ye su’ulane bo ngule ya nyoñ avale mintyi’ane Zambe wongan a nye’e bia, a ye botan.

BO’O NA ÔSIMESANE YÉHÔVA Ô VOLÔ WO NA Ô NYOÑE MBAMBA MINTYI’AN

13. Va’a éve’ane ja liti avale bi ne nyoñe mbamba mintyi’an éyoñe bia tôñ ôsimesane Yéhôva.

13 Bi tame yen éve’ane ja liti avale ñyeman bia yem ôsimesane Yéhôva, ô ne volô bia na bi nyoñe mbamba mintyi’an. É ne kui na, mbôle bi ne bekañete mbamba foé, bi kômbô bo bekpwa’a mefane ya éyoñ ése. Asu na bi bo bekpwa’a mefan, bia yiane taté jeñe na bi sili nté nkôñ ényiñe jangan e si. Nté bia bo jame te, nleme wongan ô ne taté na, wo tyebe yôp. Bi ne sili bia bebiene nge bia ye fo’o nyiñe mvo’é éyoñe bi nji beta bi abui moné. É ne fo’o été na, atiñe ya Kalate Zambe é nji tindi bia a ngule na bi bo nkpwa’a mefan; bi ne ke ôsu a bo Yéhôva Zambe ésaé, bi to nkañete mbamba foé. Ve jame da, Yésus a ka’ale bia na, môt ase a nyum émiene mam amu Éjôé Zambe, a ye bi abui bibotan. (Lañe Luc 18:29, 30.) Nde fe, Yéhôva a wô’ô mvaé éyoñe bia wumulu nya ékaña’a a nlem ôse, bi va’a nye ‘biôm ane nlem wongan w’anye’e, bi aso menyu mangan.’ (Bs. 119:108; 2 Bec. 9:7) Éyoñe bia fase mam ma a zene ya meye’elan, ye bi nji yene na ôsimesane Yéhôva, wo wulu bia nga? E bi aval ôsimesane te a ne volô bia na, bi nyoñe mbamba ntyi’an, a na bi bi bibotane bi Ésa wongan ya yôp été.

14. Aval avé ô ne yeme nge fatane mbot éziñ ja ve Yéhôva nlem avak?

14 Bi tame nyoñ éve’an éfe: Bi tame jô na, wo nyamete avale mimbot éziñ é ne kolé bôte béziñ ya akônda ôbak. Éyoñ éziñe fe na, ô nji yem éfuse Kalate Zambe éziñ ja tyili avale mimbote te. Ôsimesane Yéhôva mfa’a ya jame te ô ne ôvé? Nlômane Paul ô nga ve melebe ma, a zene ya mbamba nsisim: “Ve mfa’a binga, ma yi na be jaé bijijine mengômesan, a biôme bi nyanga bi ne éjijin teke’e dia. Saa mfenan ésil, nge metabe [mekom] me or, nge bibat a nyanga é ne tañ anen. Ve be viane’e jaé mbamba mimboon, aval ane da yiane binga ba semé mame ya mbunan.” (1 Tim. 2:9, 10; Mfefé Nkôñelan) Melebe ma, ma fombô fe Bekristene be  ne befam. Bi ne bebo bisaé be Yéhôva ba nye’e nye, ajô te, bi nji yiane simesane ve mam bia bebiene bia nye’e. Ve bia yiane fe fas avale bôte bevo’o be ne yene mimbote miangan. Fulu éjijin a nye’an ja tindi bia na, bi jeñe na bi yem avale Bekristen bevo’o ba wô’ôtan éyoñe ba yene biyé bia jaé. Nalé a bo na, bi bo teke ndeñele be nge kolé be ôbak. (1 Bec. 10:23, 24; Beph. 3:17) Bia yiane ba’ale mam Kalate Zambe a jô ôsimesane wongan été, bi jeñe fe na bi yemelan ôsimesane Yéhôva mfa’a ya mimbot. Nge bi bo de, bi ne kui na bi nyoñe mintyi’an Yéhôva a nye’e.

15, 16. (a) Yéhôva a wô’ôtan aya éyoñ bia simesane mam bisôk? (b) Éyoñe bia top avale mimvôman éziñ, aval avé bi ne yeme mi mia ve Yéhôva nlem avak? (c) Aval avé beta mintyi’ane mia yiane nyoñeban?

15 Kalate Zambe a liti na, Yéhôva a nga wô’ô nlem mintaé, éyoñ a mbe a yene ane bôt ba bo mbia be mam a na, ‘fe’ ése ya asimesane dap e ne ve abé melu mese.’ (Lañe Metata’a 6:5, 6.) Éyoñe bia fas éfuse ji, bi ne yene na e simesane mam bisôk a ne abé. Mboane te ô ne bo na, bi bo jôme Kalate Zambe a tyili, a ji é nji lu’an a ôsimesane Yéhôva. Ñyé’é Jacques a nga tili na: “Fe’e je aso yôp, nje jame ya ôsu e ne na, mfuban, wôna nye’an mvo’é, évôvoé, avôle ya lat ñbwa, mvam a mbamba bibuma ne lut, te avôle ya selan, te medu’an.” (Jc. 3:17) Éyoñe bia yeme nalé, bia yiane bo ntindane ya jô’é mimvôman mia ve bia mbia b’asimesan. Éyoñe Bekristen ba tu’a yeme jôme Yéhôva a nye’e a ji a vini, b’aye ke wu nju’u ya beta ke sili môte mfe jôm ba yiane bo. Bebiene ba ye ji’a yeme jôme Kalate Zambe a jô mfa’a ya avale bekalate ba yiane lañ, bingeñgeñ ba yiane yen, a avale bivôé ba yiane bo.

16 Bi ne bi abui mezene ya nyoñe ntyi’an éziñ, ve mezene mete mese, ma yiane bo na, bi ke ôsu a ve Yéhôva nleme mvaé. Éyoñe bia kômbô nyoñe beta mintyi’an, é ne mvaé na bi ke nyoñe melebe be bemvendé, nge ke be Bekristen be ne bitôtôlô. (Tt. 2:3-5; Jc. 5:13-15) É ne fo’o été na, bôte befe be nji yiane nyoñe ntyi’an e señe jangan. Bekristen bese ba yiane jeñe na, be belane ngule jap ya yemelan mam. (Beh. 5:14) Bia bese bia yiane bo mam ma lu’an a mejô Paul a nga jô a ngule ya mbamba nsisim na: “Môt ase a ye be’e mbe’e wé émien.”Beg. 6:5.

17. Mfi ôvé bia yen éyoñe bia nyoñe mintyi’ane Yéhôva a nye’e?

17 Éyoñe mintyi’ane miangan mi bili mbôka’a ôsimesane Yéhôva, bia subu nye bebé. (Jc. 4:8) A nye’e bia a botane fe bia. Nalé a yemete mbunan wongan b’Ésa wongan a ne yôp été. Nde ñhe, njô’ané na metiñe ya Kalate Zambe a miñye’elane mié, mi liti bia ôsimesane Zambe mfa’a ya mam mete. É ne fo’o été na, kôm ése, bia ye yé’é mfefé jam é fombô’ô Yéhôva. (Jb. 26:14) Ve nge bia yeme ngule ya yé’é, bi ne kui na bi bi fek, ñyeman, a ngule ya yemelan bi ne volô bia na, bi yeme nyoñe mintyi’an. (Mink. 2:1-5) Asimesan a minta’ane mi mam mi môt a bili metyi m’abé mia lôt, ve jame da, ntili Besam a nga yeme fo’o ba’alane bia na: “Fe’e Yéhôva [mintyi’ane mi Yéhôva, MN] é tele ngul nnôm éto, minsimesane ya nleme wé mi akui miaé mi bôte mise.” (Bs. 33:11) Bi ne yeme nyoñe mintyi’ane miangan, éyoñe bia bo na asimesane dangan a mimboane miangan, mi lu’an a mi mi mfefe’e Zambe wongan Yéhôva.