Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngone muomô 2017

Nye’an​—Fulu é ne édima

Nye’an​—Fulu é ne édima

A NGULE ya mbamba nsisim, nlômane Paul ô nga kobô ajô ya mefulu ébule mbamba nsisim a bo na môt a bi. (Beg. 5:22, 23, Mfefé Nkôñelan) A nga loone mbamba mefulu mete mese na, “ébuma ya nsisim.” * Môt a bili ébuma éte a jaéya “mfefé môt.” (Beco. 3:10) Élé ba kôme ba’ale, nje ja wume bibuma; avale da fe, môt a bili mbamba nsisim, nnye a wum ébuma ya nsisim.​—Bs. 1:1-3.

Édima fulu Paul a nga taté lañ é ne nye’an. Ye nye’an ô ne fo’o fulu é ne édima? Paul a nga jô na, a “se ke jôm” nge a nji bi nye’an. (1 Bec. 13:2) Ve jé é ne nye’an, aval avé bi ne bi wô, a aval avé bia liti nye’ane môs ôse?

AVALE BIA LITI NYE’AN

Akusa bo na, bifia bi se ngule ya tu’a ve atinane ya nye’an, Kalate Zambe a kate bia avale bi ne liti wô. Éve’an é ne na, bia lañe na, nye’ane “wo ajaé jibi, a ô ne mvam.” Nde fe, “wo ava’a a benya mejôô,” a “wo abuti mam mese, wo abuni mam mese, wo atabe mam mese ndi nlem, wo ajibi mam mese.” Bia liti fe nye’an éyoñe bia kôme nye’e bôte bevok, éyoñe bia nyoñe ngap a be, a éyoñe bia kabetane be nya nkabetane. Ve môt a nji bi nye’an, a bo bôte bevok éviele, a ne mebun, a bili ntaban ô nji yian, a ne afom, a ba’ale ôviti’i nlem, a ne fe teke jamé. Avale mefulu ete e nji yian. Nye’ane bia kômbô bi “ô ne te jeñe mam mé.”​—1 Bec. 13:4-8.

AVALE YÉHÔVA BA YÉSUS BE NGA LITI NYE’AN

“Zambe a ne nye’an.” Nalé a tinane na, nye’ane wo so be Yéhôva. (1 Jn. 4:8) Mam mese a jô, a mimboane mié mise mia liti nye’ane wé. A nga liti na, a nye’e émo nya nye’ane, éyoñ a nga lôme Yésus na, a zu tôbane minjuk, a wu asu dangan. Nlômane Jean ô nga jô na: “Vôme nyôna nye’ane Zambe ô nga yené be bia na, Zambe a nga lôm atyi’i Mone dé a nga biaé si nyô, nde bi aye nyiñ amu nye. Vôme nyôna nye’an ô né, sa na, bia bi nga nye’e Zambe, ve na, nnye a nga nye’e bia, a a nga lôme Mone wé na, a bo metuna’a ya mam abé mangan.” (1 Jn. 4:9, 10) Amu Zambe a nye’e bia, bi ne bi njamane ya mam abé mangan, ndi nlem, a ényiñ.

Yésus a nga liti na a nye’e môta binam, amu a nga bo nkômbane Zambe a nleme wé ôse. Paul a nga tili na: ‘[Yésus] a nga jô na, Ô lô, me azu bo nkômbane wôé. . . . A nkômban ôte, bi nga telébane wô mfa’a Zambe, amu mveane ya nyôle Yésus Krist avebane da mfa’a ya biyoñe bise.’ (Beh. 10:9, 10) Teke môt éziñ a ne ngule ya liti avale nye’an ete. Yésus a nga jô na: “Môt éziñ a nji bi nye’ane wo dañ wuna na môt a ju ényiñe jé a butane bemvôé bé.” (Jn. 15:13, Mfefé Nkôñelan) Ye bia, bebo mam abé, bi ne ngule ya vu  nye’ane Yéhôva ba Yésus be nga liti bia? Ôwé! Bi tame ñhe zu yen avale bi ne de bo.

“[KELA’AN ÔSU] A WULU NYE’AN ÉTÉ”

Paul a ve bia ngule nyul éyoñ a jô na: “Bo’ane bevu be Zambe, ane bon be ne nye’an; a [ke ôsu a] wulu nye’an été, aval ane Krist fe a nga nye’e mia, a ve émien ajô dangan.” (Beép. 5:1, 2) Bia “[ke ôsu] a wulu nye’an été” éyoñe bia liti fulu éte mefase mese ya ényiñe jangan. Bia liti avale nye’an ete a mimboan, sa ke ve a bifia étam. Jean a nga tili na: “A ayôme bone dam, mbo’an te nye’ a nkobô, nge a ôyem; ve a mboan a benya mejôô.” (1 Jn.3:18) Éve’an é ne na, éyoñe bia wulu nye’an été, bi nye’e Zambe a bôte bevok, bi ne ntindane ya kañete be “mbamba foé y’ Éjôé.” (Mt. 24:14, Mfefé Nkôñelan; Lc. 10:27) Bia wulu fe nye’an été, éyoñe bi ne ôjibi, mbamba nlem, a éyoñe bia jamé. Ajô te nde Kalate Zambe a lebe bia na: “Aval ane [Yéhôva] a nga jamé mia, nalé ate fe mi bo’ok.”​—Beco. 3:13.

Ve avale nye’an ete e nji yiane kamane bia na, bi kate mam avale me né. Tame yen éve’ane ji: mbiaé a ne bo mam mese mon a nye’e asu ya na, a bo te beta yôn. Ve mbiaé a nye’e mone wé, a ye ke de bo éyoñ ése. Avale da fe, Zambe a ne nye’an, ve “nyô [Yéhôva] a nye’e, nnye ate a lep.” (Beh. 12:6) Éyoñe bia wulu nye’an été, bia ye ve mbamba melep éyoñe nalé a sili. (Min. 3:11, 12) E ne été na, éyoñe bia lebe môte mbok, bia yiane ba’ale na, bia fe bi ne bebo mam abé, a na, e ne kui na, biabebiene fe bi bo mam ma liti na, bi nji bi nye’an. Bia bese bi bili bevôme môt ase ya be bia a yiane beta ve ngule mfa’a ya nye’an. Aval avé ñhe bi ne de bo? Bi tame zu yene mam melal.

AVALE BI NE BI FULU NYE’AN

Jam ôsu, sili’i Zambe mbamba nsisim, amu nnye a ve wo fulu nye’an. Yésus a nga jô na, Yéhôva a ve “bôt be aja’é nye mbamba nsisim.” (Lc. 11:13) Nge bia ye’elan asu ya na, bi bi mbamba nsisim, a ve ngule ya ‘ke ôsu a wulu a nsisim,’ mimboane miangan mia ye tu’a liti na, bi ne nye’an. (Beg. 5:16) Nge ô ne mvendé ya akônda, ô ne sili mbamba nsisim asu ya na, a volô wo na, ô yeme ve bôte mbamba melebe ma so Kalate Zambe. Nge ô ne mbiaé, ô ne sili Yéhôva mbamba nsisim na, a volô wo na, ô bo ngule ya lebe bone bôé, sa ke a ayaa, ve nye’an été.

Jame baa, nyoñek éyoñe ya fas avale Yésus a nga bo éyoñe be nga soñe nye. (1 P. 2:21, 23) Nkômbane ya fas éve’ela Yésus ô ne dañe bo ngul, éyoñe ba te bo bia mbia jam, nge ke jam e ne ékotekot. Biyoñe biziñ, bia yiane sili biabebiene na, ‘Jé Yésus a nga ye bo?’ Sita Leigh a jô na, e sili nsili ôte a nga volô nye na, a fas ôsusua na a bo jam éziñ. A jô na: “Môs éziñ, minga bia nye bia saé, a nga tili bôte bia be be bia saé bekalate internet. A mbe a so’o ma, a jô’ô fe na, me nji yeme saé. Jam ete e nga bo ma nleme mbia mintaé. Ve me nga sili mamiene na, ‘Aval avé me ne vu Yésus mfa’a ya nyiñ a minga nyi?’ Éyoñe me faseya avale Yésus a nga ye bo nge nnye a mbe a tele été jam, ane me nga tyi’i na, ma jô’é ajô ete. Me nga su’ulane yeme na, minga ate a mbe beta nkôkon, a na, nlem ô mbe ô tyele nye yôp abui. Me nga yene fo’o na, éko éziñ, mam a nga tili, me nji be me so’o nye nlem. E fas avale Yésus a nga liti nye’an, a nga volô ma na, me liti minga ate avale nye’ane Yésus a nga liti.” Yaa, nge bia vu Yésus, mam mese bia ye bo, ma ye bo kom ése ve a nye’an.

Jame lale, jeñe’e fe na, ô bi nye’ane wo tindi wo na, ô nyume womiene mam, ñwô ôte ô ne ndeme benya Bekristen. (Jn. 13:34, 35) Ajô te, Kalate Zambe a ve bia ngule nyule na, bi bi aval “ôsimesane” Yésus a mbe a bili. Éyoñ a nga kôlô yôp, “a nga yen émiene  momo” amu bia, to’o “akekui awu.” (Beph. 2:5-8) Éyoñe bia vu nye, asimesane dangan, a avale bia wô’ôtane mam, da tu’a funane Krist. Bi ne fe ntindane ya telé miñyiane mi bôte bevok ôsu. Bibotane bivé bi ne beta bi, éyoñe bia liti nye’an?

MFI YA LITI NYE’AN

Éyoñe bia liti nye’an, bia bi angôndô ya abui bibotan. Tame yene bive’ane bi:

Mfi ôvé bia yen éyoñe bia liti bôte bevo’o nye’an?

  • BI NE NDA BÔTE JIA: Amu bia nye’e bôte bevok, bia yeme na, akônda ese bi ne ke si nyi, bobejañe ba ye nyoñe bia a ayôñ ese. Ngo’o avale mbamba jam e ne na, ‘bobenyañe bangan be to si nyô’ ba nye’e bia! (1 P. 5:9) Nge ô vaa zañe Bengaa be Yéhôva, vôme mbé mfe ô ne koon avale nye’an ete?

  • MVO’É: Kalate Zambe a jô na: “Miabebien mi jiba’an a nye’an.” Nalé a volô bia na bi nyiñe “nlatane ya ñbwa été.” (Beép. 4:2, 3) Bia wô’ôtane nye’an ôte éyoñe bi ne bisulan, bitôkan, a beta bitôkan. Ye womien ô nji yene na, avale nsisime mvo’é ete, e ne jame ya semé émo é ne mengame mengame ji? (Bs. 119:165; És. 54:13) Éyoñe bia jeñe mvo’é a bôte bevok, bia liti na, bia nye’e be nya nye’ane. Nalé a ve Ésa wongane ya yôp été nlem avak.​—Bs. 133:1-3; Mt. 5:9.

“NYE’AN WO LÔÑ”

Paul a nga tili na: “Nye’an wo lôñ.” (1 Bec. 8:1, Mfefé Nkôñelan) Aval avé nye’ane wo lôñ? Ba loone kabetôlô 13 ya kalate ôsu Paul a nga tili bôte ya Corinthe na, “Sam ya nye’an.” Nlômane Paul wo kate bia avale nye’ane wo lôñ. Nye’ane wo taté jeñe mfi môte mbok. (1 Bec. 10:24; 13:5) Nde fe, mbôle môt a bili nye’an a fas, a nyoñe ngap a bôte bevok, a ne ôjibi, a mbamba nlem, nalé a nene nye’ane ya menda me bôt; nalé a bo fe na, akônda e bo nlatan.​—Beco. 3:14.

Nye’ane bia nye’e Yéhôva ñwô wo dañe mfi, a ôyabe yôp. Avale nye’an ete da late bôte ya metume mese, meyoñe mese, a minkobô mise. Ba kañe Yéhôva mevak été, “a nleme wua.” (Soph. 3:9) Enyoña’ané ñhe ntyi’ane ya liti édima fulu éte môs ôse, nje éte é ne fulu jia ya mefulu ya ébuma ya nsisim.

^ É.N. 2 Benkume mmombô a bete ba zu, ba ye kobô ajô ya fulu ése ya ébuma ya nsisim. Bia zu taté a fulu jia nlô ajô wu.