Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngone muomô 2017

 MINNÔM BEKALATE

“Bia ye bi beta étôkane mfe éyoñ évé?”

“Bia ye bi beta étôkane mfe éyoñ évé?”

BI NE Mexico, memane me Ngon awôm a jia ya mbu 1932. Sondô jia mvus, be nga mane telé belambe minjoñe minjoñ, asu ya na, bôt a bemetua be yeme wulu beta tison a bili bôte million wua a mvuk. Ve éyoñe ji, teke fe môt a kobô ajô ete. Bôte ba kate mefoé, be maneya ke tebe été beminsini minkoñ, be bili becamera bap. Ba yange beta nneñ éziñ. Nneñ ate a ne za? A ne Joseph F. Rutherford, ntebele ya Societé Watch Tower. Bengaa be Yéhôva ya tison éte fe ba yange nye, amu a zu asu beta étôkane ya melu melal.

Kalate mefoé be mbe be lo’one na, L’Âge d’or a mbe a jô’ô na, “Bôte ya tisone nyi, ba ye ke ji’a vuane beta étôkane nyi, amu a ne ndeme ja liti ngule bia ve na, bi kate bôte benya mejôô.” Ve jé é nga bo na, beta étôkan ate a bo ngum aval, a to ke na, fo’o ve bôte 150 étam mbe be nga tabe été?

Ôsusua na mame ma ma boban, Mexique a nji be a dañe fôé nsisim. Ataté mbu 1919, bone bitôkan bi mbe bi nga boban, ve tañe mekônda é nga sis mimbu mi nga tya’a valé. Ndi nlem ése é mbe é nto Béthel be mbe na, ba zu yoé mbu 1929. Be mbe be yiane sôan abui mam. Éyoñe ñye’elan ô nga so na, nkañete mbamba foé, a nji yiane fulan ésaé nkañete a mam me makit, ane mojañ éziñ a mbe colporteur (nkpwa’a mefan) a nga kôlô ékôane Yéhôva, a kele té angôse beyé’é Kalate Zambe dé. Éyoñ éte jia jia, mojañ a mbe a tebele’e wofise ya Mexique a nga nyoñe mbia zen, ane be nga tyendé nye. E mbe sili’i na, be ve bobejañe be nga ke ôsu a kabetane Yéhôva ngule nyôl.

Mojañe Rutherford a nga ve bobejañe be mbe be wulu’u ba’aba’a a Yéhôva ngule nyôl, a zene ya njoman ôte. A nga bo beta minkañete mibaé, a beta bisulane bitane radio, bisulane bite bi nga nambe bôte minlem. A mbe éyoñ ôsu radio ya tison a kañese na, a kalane mefoé Bengaa be Yéhôva. Mvuse beta étôkan ate, mojañe be nga telé na, a tebele wofise ya Mexique, a nga mane tak ésaé mvo’é mvo’é, nalé a nga ve bobejañ ayôñe ya kañete mbamba foé, amu Yéhôva a mbe a bota’ane be.

Beta étôkan a nga bobane tisone ya Mexico, mbu 1941

Mbu ô nga tya’a valé, be nga beta bo beta bitôkane bife bibaé e Mexique, jia e Veracruz, ji vo’o ke tisone ya Mexico. Bobejañe be nga kañete abui, nalé a nga wum abui bibuma. Éve’an é ne na, mbu 1931, bekañete mbamba foé be mbe ve 82, ve ataté mbu 1941, tañe bekañete é nga lôte nyi ya mbu 1931 biyoñ awôm! Bôte bebé 1 000 be nga so tisone ya Mexico, na ba zu tabe étôkane ya mbu 1941.

“NKUNDA BÔT Ô MANEYA JAÉ MINJOÑ”

Mbu 1943, Bengaa be nga jaé bitimbi bi to ntilane na, “Ayoñe bôt e bili éto fili,” na be bañete  bôt étôkan é nga bobane bitisone 12 ya Mexique. * Be mbe be be’e bitimbi bibaé, jia mvus, ji vo’o ke ôsu. Bengaa be nga taté na, ba belane fatane nkañete éte mbu 1936.

Kalate mefoé éziñe ya mbu 1944 a liti bobejañe be be’e bitimbi tisone ya Mexico

Kalate mefoé éziñe ba loone na, La Nación a nga sek ésaé é nga boban a bitimbi. A nga tili na: “Môs ôsu, be nga jô Bengaa na, be ke ôsu a bañete bôt. Môs ô nga tya’a valé, bôte be nga so nya nya abui.” Betebe ôsu ya ñyebe Katôlôs be nga wô’ô jam ete ôlun, ane be nga taté na, ba bolé Bengaa éyôlé. Akusa bo ngul étibila’a, bobejañ a bekale be nga ke ôsu a ke minjoñ teke ko woñ. Kalate mefoé La Nación a nga beta tili na: “Tison ése é nga yene be . . . befam a binga be be’e bitimbi.” Kalate mefoé ate a mbe a bili fôtô a liti’i ane bobejañe be be’e bitimbi, be wulu’u minjoñe ya tisone ya Mexico. Nlô ajô ya afep ete ô mbe na: “Nkunda bôt ô maneya jaé minjoñ.”

“A MBE ÉTUA MBAMBA VÔME YA KE ÔYO”

Mimbu mite, abui Bengaa e mbe e va’a ngul asu ya na, e tabe’e bitôkan bi mbe bi boba’ane Mexique. Abui e nga so minlame mvus, bevôme beminsini minkoñ, nge bemetua be nji kui. Akônda éziñ é nga tili na: “Bi bili ve télégraphe.” Bôte be mbe be yiane wulu a mebo, nge ke bemulet yôp, tañ abime mimôs éziñ, asu ya na, be zu kui été beminsini minkoñ na, be ke tisone beta étôkan a boban.

Abui Bengaa e mbe azoé, e mbe e bili fo’o ve moné ya ya’ane dulu. Abui ya be be, e nga ke tabe menda me bobejañ. Be nga nyoñe be a anyep, bevo’o ki, be nga ke tabe meba m’ Éjôé. Éyoñ éziñ, bobejañe bebé 90, be nga ke tabe wofise ya Béthel. Asu ya na be ke ôyo, be nga mane taé becarton bekalate si. Annuaire a jô na, bobejañe bete be nga nye’e vôm be nga bômbô, “a mbe étua mbamba vôme ya ke ôyo.”

Bengaa bete be mbe angôndô ya meva’a ya tabe étôkan éte. Be nga ve Yéhôva akéva, teke jôm éziñ é mbe bo na, be bu’i étôkan éte. Den, Bengaa ya Mexique be nto bebé ya kui million jia, ba ke ôsu a ve Yéhôva akéva. * Mbu 1949, wofise ya Béthel ya Mexique ô nga tili bobejañe ya Tin Ékôan, a lat a bobejañe ya nlame wop na: “Minju’u ba tôbane mie, mi nji sé’é nye’ane ba nye’e mame ya nsisim. To’o éyoñ étôkan éziñ é maneya, ba ke ôsu a laane mbamba be mam ba te yé’é. Ve nsili be wô’ô su’ulane sili ô ne na, Bia ye bi étôkan éfe éyoñ évé?” Be mbe be sili’i nsili ôte melu mete, bi ngenane fe bi sili’i wô den.​—Minnôm bekalate bangan ya Amérique Centrale.

^ É.N. 9 Aval Annuaire ya mbu 1944 a mbe a jô’ô, étôkan éte “é nga bo na, bôte bese ya Mexique be yeme Bengaa be Yéhôva.”

^ É.N. 14 Mexique, bôte 2 262 646, be nga tabe Mesimesa’ane ya awu Yésus mbu 2016.