Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngone lale 2017

Va’a bôte ba yiane duma, duma ba yiane de

Va’a bôte ba yiane duma, duma ba yiane de

“Akéva, a duma, a étôtok, a ngu, bi bo’o be Nyô a to éto njôane yôp, a be Mon Ntômba, nnôm éto a nnôm éto.”NLI. 5:13.

BIA: 10, 16

1. Amu jé bôte béziñ ba yiane duma, jé bia zu fas ayé’é di?

E VE môte duma a tinane na, ô liti nye na a ne mfi mise môé, a na wo semé nye. E ne été na bia ve nye duma ete amu a nga bo jôme ja yiane duma, bi ne fe ve nye duma amu a bili nkôñ éziñ nge ke éto éziñ. Nde ñhe bi ne sili biabebiene na, Za nnye bia yiane ve duma, a amu jé a yian avale duma ete?

2, 3. (a) Amu jé Yéhôva nnye a yiane dañe nyoñe duma? (Fombô’ô fôtô ya atata’a ya ayé’é di.) (b) Za a ne Mone Ntômba ya kalate Nlitan 5:13, a amu jé a yiane nyoñe duma?

2 Avale kalate Nlitan 5:13 a liti, “Nyô a to éto njôane yôp, a . . . Mon Ntômba,” mbe ba yiane nyoñe duma. Kalate Nlitan kabetôlô 4 a ve bia amu wua a liti na, Yéhôva a yiane duma. Beéngele ba bete metyiñe yôp a ye’elane Yéhôva, “Nyô a vee nnôm éto a nnôm éto,” be jô’ô na: “A Tate wongan a Zambe wongan, wo ayiane nyoñe duma a ékaña’a a ngu: amu ô nga té biôm bise, a amu nkômbane wôé bi nga to, a bi nga téban.”Nli. 4:9-11.

 3 Yésus Krist, nnye a ne “Mon Ntômba Zambe a va mam abé ya si nyô.” (Jn. 1:29) Kalate Zambe a kate bia na Yésus a bili duma da dañe bejô bôte bese. A jô na a ne: “Njôô ya bejô bôt, a Tate ya betate; nnye étam a ne te wu, a to éfufup été, nje éte te ke môt a ne ngule ya kui je bebé; nnye ate te ke môt a nga yene nye.” (1 Tim. 6:14-16) Njô bôte mbé fo’o a ne tyi’i na a wu asu minseme miangan? Aval ane bizu’u beéngele, ye ô nji bo ntindane ya yôtane na: “Mon Ntômba a nga wôéban, nnye a yiane nyoñe ngu, a akum, a ñyeman, a éwôlô, a duma, a étôtok, a akéva”? Nli. 5:12.

4. Amu jé bi vo’o jô na, bi ne ve Yéhôva ba Yésus duma nge bia kômbô?

4 Bia yiane ve Zambe ba Yésus duma. Amu nge bia bene ve be duma, bia ye sup ényiñe ya melu mese. Mejô me Yésus bia lañe kalate Jean 5:22, 23, ma kate bia na: “Ésa te tyi’i môt ajô, ve a nga ve mon ntyi’ane mejô ôse; nalé bôte bese be aye ve Mone duma, ane be ave Ésa duma. Môt a bo te ve Mon duma, a bo fe te ve Ésa a nga lôme nye duma.”Lañe Besam 2:11, 12.

5. Amu jé bia yiane semé môt ase, a ve nye abime duma éziñ?

5 Mona môt a nga téban “éve’ela Zambe.” (Met. 1:27) Ve bôte bese be nji vu mefulu me Zambe avale da. Mona môt a bili ngule ya nye’e, ngule ya mvaman, a ngule ya tebe été môte mbok. Yéhôva a nga ve bôt mone môte ya nlem. Akusa bo na, biyoñe biziñ, mone môt ya nlem a ne yale bôte feñ, ve a liti fe be nsela’ane a ne zañe mbia zen a mbamba zen, bebela a minsos, zôsô a ékotekot. (Bero. 2:14, 15) Abui bôt da nye’e mfuban nge ke abeñe biôm. Ba nye’e fe be nyiñe mvo’é été a bôte bevok. To’o ba yeme nalé nge momo, be bili mefulu mete amu ba vu Zambe abim éziñ. Ajô ete nde ñhe bia yiane semé môt ase, a ve nye abime duma éziñ.Bs. 8:5.

BIA YIANE TABE NTYEL YA VE BÔTE DUMA BE NJI YIANE DE

6, 7. Mfa’a ya semé bôte bevok, nsela’ane mbé bia yene zañe Bengaa be Yéhôva a bôt befe?

6 Ôsusua na bia ve môt éziñe duma, bia yiane tu’a fas za a yiane duma, a abime duma avé bia yiane ve nye. Mbôle bi ne bebo mam abé, abui bôte da jô’é nsisime ya émo Satan ô wulu be. Jôm éte nje bôte béziñ, ba viane kañe ba bevok, be li’i ve be ve duma a ésemé bia yiane be. Ba wumulu betebe ôsu ya miñyebe, beta be bôte ya pôlitik, bôte ba wum e mame ya bivôé, a beta be bôte bevo’o bese. Be nga viane yene be ane bezambe. Bisoé, a benya bôtô ba yene be ane bive’ela ya tôñ, éko éziñ, jôm éte nje ba bo mam ane be, ba vu mbote wop, a mefulu map.

7 Benya Bekristen be nji ve bôte duma be nji yiane de. Ba yeme na, Yésus nnye étam a ne éve’ela bia yiane tôñ amu a ne mfufup. (1 P. 2:21) Zambe a vo’o ke wô’ô mvaé nge bia ve môte duma a lôt abim a yiane de. Bi nji yiane vuane benya mejôô ba: “Bese be nga bo abé te kui duma Zambe.” (Bero. 3:23) Nya ajô a ne na, teke môt éziñ a yiane na, be wumulu nye ane ba wumulu zambe éziñ.

8, 9. (a) Aval avé Bengaa be Yéhôva ba yene bijôé bi ngovina? (b) Ye bia yiane bo mam mese bijôé bite bia jô bia na bi bo?

8 Nlame bia nyiñ, mingum mi bôte  mmie mi bili éjôé. Ésaé betebe ôsu ya ngovina é ne na, be ba’ale mvo’é, be bo na bôte be tôñe metiñ a na, be nyiñ évôvoé été. Ésaé éte é ne asu mfi ya môt ase. Jôm éte nje Paul a nga jô Bekristen na, be semé bejôô bôte ya ngovina ane “ba ba jôô.” A nga jô be na: “Va’ane môt ase jôm é ne énjé (mam me ayiane veban be nye), toya, e be nyô a yiane nyoñe toya, . . . ésemé, e be nyô a yiane nyoñ ésemé.”Bero. 13:1, 7, Mfefé Nkôñelan.

9 Mbôle ba tôñ abendé éte, Bengaa be Yéhôva ba semé betebe ôsu bete, avale metiñ, a metume ya si be too ma jô. Éyoñe ba bo ésaé jap, bi ne teke ndeñele be. Ve, bia semé be, a su’u be, teke tyam atiñe Zambe. Bi vo’o ke bo Zambe melo, nge nyoñe ngap a mam me pôlitik, amu na éjôé ja tindi bia na bi bo de.Lañe 1 Pierre 2:13-17.

10. Aval avé bebo bisaé be Yéhôva ya melu mvus ba ve bia éve’ela mfa’a ya avale bia yiane semé betebe ôsu ya bijôé ya émo ji?

10 Bebo bisaé be Yéhôva ya melu mvus, be nga li’i bia mbamba éve’ela ya tôñ. Éyoñ éjôé ya Rome é nga jô bôte na be ke élañe bôt, Joseph ba Marie be nga ke. Be nga ke Bethléhem akusa bo na Marie a mbe nduu abum. (Lc. 2:1-5) Mvuse ya valé, éyoñe be nga somane Paul na, a ne ntyame metiñ, Paul a nga yalan njô bôt Hérode Agrippa ba Festus, nnye ate a mbe ngovina ya Judée, a évôvoé, a ésemé ése.Mam. 25:1-12; 26:1-3.

11, 12. (a) Amu jé bi nji yiane yene betebe ôsu ya miñyebe a betebe ôsu ya ngovina avale da? (b) Jé é nga kui éyoñe mojañ éziñ ya Autriche a nga liti ntebe ôsu ya pôlitik ésemé?

11 Bengaa be Yéhôva be nji yene betebe ôsu ya bamiñyebe ane bôte ba yiane ngum avale duma éziñ, to’o ba yi na be ve be duma. Bivuse miñyebe bia ve jôé Zambe mvit, a ndamane miñye’elane mié. Jôm éte nje bia yene betebe ôsu ya bamiñyebe aval ane bôte bevo’o bese, bi nji ve be duma be nji yiane de. Bi nji yiane vuane na, Yésus a nga jô betebe ôsu ya miñyebe ya éyoñe jé na, be ne bôt be ne medu’an, a mindidim mia liti bôte zen. (Mt. 23:23, 24) Mbamba jam a ne na, ésemé bia ve betebe ôsu ya éjôé é ne wume mbamba bibuma, avale bi nji be bi buni’i.

12 Leopold Engleitner ya Autriche a mbe ayôñe nkañete mbamba foé. Bezimba be nga bi nye a futi nye mimbôk éyoñe Benazis. Ba Heinrich Gleissner, beta ñyeme mam éziñ, be mbe nda mimbô’ô jia. Beta ñyeme mam ate a mbe fe beta môte ya pôlitik. Jôm éte nje Benazis be nji be be nye’e nye. E nda mimbô’ô wôé, mojañ Engleitner a nga kañete nye benya mejôô a ésemé ése, Heinrich Gleissner ke a kôme vô’ôlô nye. Éyoñe Beta Bita bi baa bi maneya, Gleissner a nga belane beta éto a mbe a bili asu ya na, a volô Bengaa ya Autriche. Bi ne lañ abui minkañete da yemete na, éyoñe Bengaa be Yéhôva ba liti bijôé ésemé, nalé a wume mbamba bibuma.

BÔTE BEFE BA YIANE DUMA

13. Bôte bevé bia yiane dañe semé a ve duma, amu jé?

13 Bobejañe ya mbunane fe ba yiane na, bi semé be a ve be duma. E dañedañe bemvendé ba liti bia zen. (Lañe 1 Timothée 5:17.) Bia semé bobejañe bete ja’a bi nji bo ayoñe da, ja’a bi nji bo sikôlô abime da, nge bi nkôñ  ényiñe wua. Kalate Zambe a loone be na “bôte mimvean,” Yéhôva a belane be mfa’a ya nyoñe ngap a bebo bisaé bé. (Beép. 4:8, Mfefé Nkôñelan) Tame simesan ésaé bemvendé ya mekônda, bejome mekônda, bemvendé ba tebele Wofise ya Béthel, a ba ya Tin Ékôan ba bo. Bobejañ a besita ya ntete mimbu ôsu be mbe be semé’é avale bôt ete, bia fe bia yiane be semé den. Bi nji kañe be, nge yene be ane beéngele. Ve bia semé be, a ve be duma da yiane be amu beta ésaé ba bo a éjote nyul.Lañe 2 Becorinthien 1:24; Nlitan 19:10.

14, 15. Nsela’ane mbé a ne zañe bemvendé ya ékôane Yéhôva a ba ba jô ve anyu na be ne betebe ôsu?

14 Bemvendé bete be ne beba’ale mintômba be ne éjote nyul. Amu nalé, ba vini na be wumulu be avale ba wumulu beta be bôte ya émo ji. Éyoñe ba bo nalé, ba selan a betebe ôsu ya bamiñyebe, ataté ba ya melu me Yésus azukui den, mbe a nga jô be na: “Be anye’e be to ôsu bisulane bidi, be anye’e fe benya bito menda me Zambe été, be anye’e fe na, bôt be batane be vôm bôt be wô’ô bo be sula’an.”Mt. 23:6, 7.

15 Beba’ale mintômba be ne éjote nyul, ba tôñe mejô me Yésus ma: “Te yebane na, be loene mia na Rabbi: amu môte wua a ne Ñye’ele wônan, a mia bese mi ne bobenyañ. Te loene môte ya si nyina na éso wônan: amu môte wua a ne mia Ésa, ve nyô a ne yôp été. Nalé fe te yebane na be loene mia na beye’ele: amu môte wua a ne Ñye’ele wônan, nnye a ne Krist. Ve mia, môt a ye dañ, nnye a ye bo mia mbo ésaé. Bôte bese môt a ye bet émiene yôp, a ye subane si; a môt a ye suu émiene si, a ye betebane yôp.” (Mt. 23:8-12) Jôm éte nje bobejañ a besita ba nye’e, ba semé, a ve bemvendé ya mekônda mese ya si nyi duma da yiane be.

Nté ba bo ésaé jap a éjote nyul, bemvendé ba bi nye’ane bobenyañe bap, ésemé, a duma ba yiane de (Fombô’ô mebeñe 13-15)

16. Amu jé bia yiane ke ôsu a ve ngule ya tôñe melebe Kalate Zambe a ve a lat a bôte bia yiane ve duma, a abime duma bia yiane ve be?

16 E ne fo’o été na, da sili bia éyoñ asu ya na, bi tu’a yem za nnye bia yiane ve duma, a abime duma avé bia yiane ve nye. Bekristene ya ntete mimbu ôsu fe be mbe be yiane bo nalé. (Mam. 10:22-26; 3 Jn. 9, 10) Ve ngule bia ve asu ya na, bi tôñe melebe ya Kalate Zambe mfa’a ôte, é nji bo zezé. Nalé a so bia abui bibotan.

 BIBOTANE BIA BI AMU BIA VE BÔTE ABIME DUMA BA YIANE DE

17. Mfi ôvé bi ne bi nge bia ve betebe ôsu duma da yiane be?

17 Nté bia ke ôsu a ve betebe ôsu ya ngovina duma da yiane be, nalé aye bo na, be fe be kamane bia a jô’é bia na, bi bo fili ya bo ésaé nkañete jangan. Éyoñ ése bia bo de, bôte ba semé ésaé jangan. Mimbu ya mvus, Birgit, nkpwa’a mefane ya si Jaman a nga ke nyoñe mone wé nlame sikôlô. Beye’ele be nga kate Birgit na, ane mimbu mia lôt, ba wô’ô abui meva’a ya ye’ele bone Bengaa be Yéhôva. Be nga jô na, da ye bo éngôngole jam nge bone Bengaa be Yéhôva ba mane kôlô sikôlô wop. Sita ate a nga yalane be na, “Bia ye’ele bone bangan mfi ya tôñe miñye’elane Kalate Zambe a ve a lat mbamba ntaban, nalé a tinane na, ba yiane semé beye’ele, a ve be duma ba yiane de.” Nde ñye’ele sikôlô wua a nga jô nye na, “Nge bongô besikôlô bese be ne ane bone benan, ve ésaé ñye’ele sikôlô é ne ve ane ô ntoo too Paradis.” Ñye’ele sikôlô wua ya été, a nga tabe beta étôkan a nga boban e Leipzig, tisone ya si Jaman.

18, 19. Amu jé e ne mfi ya ve bemvendé abime duma da yiane be?

18 Éyoñe bia ve bemvendé ya akônda duma da yiane be, nalé a liti na bia jô’é miñye’elane ya Kalate Zambe mi tebele bia, mmie mi ne mimfufup a njalan a fek. (Lañe Behébreu 13:7, 17.) Bi ne se’e be, a tôñe zene ba liti bia amu beta ésaé ba bo. Nya jô a ne na, jame bia yiane bo bo nde le. Nalé aye volô be na be bo ésaé jap a mevak. Ve nalé a nji tinane na, bia yiane vu bemvendé e bone be mam bese ba bo, fatane mbot, nge nyanga jap, tyiñe nkobô jap, avale ba bo nkañete ya mengana bôt, nge avale ba laan. Nge bia vu be mimfa’a mite, bi aye ke beta bo biabebien, nalé aye fe bo ve ane bia kañe be. Bi nji yiane vuane na, be fe be ne bebo mam abé. Môte bia yiane vu a ne Krist.

19 Bia volô bemvendé éyoñe bia ve be abime duma da yiane be. Nalé a volô be na, be bo teke bete bebiene yôp, nge buni na be ne zôsô abui, nge ke na, be ne mfi a dañe Bekristene bevok.

20. Mfi ôvé bia bi éyoñe bia ve bôte bevo’o duma da yiane be?

20 Jam afe e ne na, éyoñe bia ve bôte duma da yiane be, nalé a volô bia na, bi bo teke nyiñ ve asu biabebien. Nalé a volô bia na bi sa’ale fulu ya bete biabebiene yôp, a jeñe na duma ése é zu ve be bia éyoñe ba se’e bia amu bia te bo mbamba jam éziñ. Nalé a bo fe na, bi wulu tyiñe jia a ékôane Yéhôva, nje ja bo teke ve môta binam duma a lôte nné, ja’a a ne Ngaa Yéhôva nge momo. Jame da dañedañ e ne na, zene ya fek nje le. Amu ja volô bia na bi bo teke kolé ôbak éyoñe mojañe bia semé a bo bia mbia jam éziñ.

21. Beta mfi mbé bia bi éyoñe bia ve bôte duma da yiane be?

21 Beta mfi bia dañe bi éyoñe bia ve bôte duma da yiane be, a ne na bia ve Yéhôva Zambe nlem avak. Bia bo aval a yi na bi bo, bia liti nye éyoñ éte na, bia wulu ba’aba’a a nye. Nalé a ve nye ngule ya yalane môt a soñe nye. (Min. 27:11) Émo ji é ne njalan a bôte be nji yeme za nnye a yiane duma. Bi bili abui mevak, amu bia yeme za a yiane duma, a abime duma a yiane de, avale nkômbane Yéhôva ô né.