Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngone lale 2016

Yéhôva a kee bebo bisaé bé zene ya ényiñ

Yéhôva a kee bebo bisaé bé zene ya ényiñ

“Zene nyô, wula’an été.”ÉSAÏE 30:21.

BIA: 65, 48

1, 2. (a) Abui bôt é nga bi ényiñ a zene ya melebe mevé? (Fombô’ô fôtô ya atata’a ya ayé’é di.) (b) Bebo bisaé be Zambe be bili melebe mevé me ne ba’ale binyiñe biap?

“TEBE’E, FOMBÔ’Ô, VÔ’ÔLÔ’Ô.” Den a nto mimbu 100 a mvuk, e si ya Amérique du Nord, be nga ba’é mejô mete e vôme bemetua a beminsini minkoñ ba zu tôban. Amu jé? Amu na, minsini minkoñ a bo teke jimbi metua aye zu dañe vôm a lôt. E vô’ôlô melebe mete, a nga nyii abui bôt.

2 Yéhôva a ve bia mendem me ne nyii bia. Ve a nji su’u valé. A wulu bebo bisaé bé asu na, be bi ényiñe ya nnôm éto. A ba’ale be asu na, te mbia jam a kui be. Yéhôva a ne ane mbamba mba’ale mintômba. A wulu mintômba mié, a ve fe mie mebendé, ndemben mi ne bo ngule ya sa’ale mbia mezen.Lañ Ésaïe 30:20, 21.

ATATÉ MELU MVUS, YÉHÔVA A WULU BÔTE BÉ

3. Aval avé bôte bese be nga yale zene ja kee be awu?

3 Nté ane Yéhôva a nga té émo, a jaya zu a ve bôte ngumba avale metiñ, nge ke ngumba abo dulu. Éve’an é ne na, afup Éden, Yéhôva a nga ve metiñe me mbe na, ma ye volô bôte bese na, be bi ényiñe ya nnôm éto e meva’a été. (Metata’a 2:15-17)  Ve Adam ba Ève be nga bene tôñe mbamba melebe me Ésa wôp. Ève a nga tobe na, a vô’ôlô melebe me nga yené ane ma so be nyo. Adam ki a nga vô’ôlô minga wé. Asu’ulane ya été é mbe aya? Adam ba Ève be nga tôbane minjuk a su’ulane ke wu teke ndi nlem éziñ. Melo Adam ba Ève be nga bo, mme me nga bo na, bôt bese be yale mbia zen; e zene ya awu.

4. (a) Amu jé metiñe mefe me mbe me sili’i mvuse ndône mendim? (b) Aval avé ntyendane mam ô nga liti avale Zambe a yen ényiñ?

4 Zambe a nga ve Noé melebe me mbe ve nyii bôt. Mvuse ndône mendim, Yéhôva a nga jô bôte na, be bo teke di nge nyu metyi. Amu jé? Amu Yéhôva a mbe a ntele na, a zu jô’é bôte na be di tit. Nde Zambe a nga ve be mimfefé metiñ: “Ve mi aye bo te di nsôn ô ngenan ô vee, e ne na, ô ngenane metyi été.” (Metata’a 9:1-4) Atiñe te da liti bia ôsimesane Zambe mfa’a ya ényiñ. Yéhôva a ne Nté biôm bise, a nyô a ve bia ényiñ. Nde ñhe, a bili ngule ya telé metiñ a jô ya ényiñ. Éve’an é ne na, a nga ve atiñe na, môt a nji yiane wôé nyô mbok. Zambe a yen ényiñ a metyi ane biôm bi ne édima. Zambe a ye foñesô môt ase a belane jôme jia ya été mbia mbelan.Metata’a 9:5, 6.

5. Jé bia zu yen éyoñe ji, a amu jé?

5 Mvuse melu me Noé, Zambe a nga ke ôsu a ve bôte bé melep. Ayé’é di, bia zu yene bive’an biziñ bia ye liti bia avale Zambe a nga wulu bôte bé. Mfasane bive’an ôte, wo ye yemete ntyi’ane wongane ya wulu zene Yéhôva a liti bia. Mboan ôte wo ye kee bia mfefé émo.

MFEFÉ AYOÑ, MIMFEFÉ METIÑ

6. Amu jé é nga yiane na, bone b’Israël be ba’ale metiñe me Moïse, a fulu fé be mbe be yiane bi?

6 Melu me Moïse, Yéhôva a nga ve bôte bé metiñe ma liti ne sañesañ, avale ba yiane tabe, a kañe Zambe. Amu jé? Amu abui mam é nga tyendé. Bone b’Israël be nga tabe minkôm Égypte mintete mimbu mibaé a mvuk. Bôte bese be mbe be bôma’ane be, be mbe be kañe bewu, be belane bengulemelan. Be mbe fe be bo’o abui mam da vindane Zambe nlem. Éyoñe bone b’Israël be nga kôlô minkôm Égypte, mimfefé metiñe mi mbe mi sili’i. Bone b’Israël, be mbe na ba zu bo ayoñe da tôñe fo’o ve metiñe me Yéhôva. Abui bekalate da jô na, éfia é ne nkobô Hébreu na, “atiñ” ja so éfia ja tinane na, “e wulu, e ye’ele.” Metiñe me mbe me ba’ale bone b’Israël mbia mimboan, a mbia ékaña’a ya meyoñe me mbe me bôma’ane be. Éyoñe bone b’Israël be mbe be bo’o Zambe mewôk, Yéhôva a mbe a botane be. Ve éyoñe be mbe be biasé’é nye, be mbe be tôba’ane beta minjuk.Lañe Deutéronome 28:1, 2, 15.

7. (a) Kate amu jé Yéhôva a nga ve bone b’Israël metiñ. (b) Aval avé metiñe me Moïse me mbe ñye’ele asu bone b’Israël?

7 Amu mfe a liti na, mimfefé metiñe mi mbe mi sili’i. Metiñe me Moïse, me mbe me kômesa’ane bone b’Israël na, be yange Messie, Yésus Krist. Metiñe mete me mbe me bo’o na, bone b’Israël be yeme na, be ne bebo mam abé. Jame te é mbe fe é volô’ô be na, be yeme na, ntañe wo sili. Ñwô ôte ô ne metuna’a me ne teke ayeñ, metuna’a me mbe na, ma ye mane vaa abé ése. (Begalate 3:19; Behébreu 10:1-10) Nde fe, metiñe mete me nga volô na, be ba’ale éndane Messie. Me nga volô fe na, bôt be yemelane Messie éyoñ a ye so. Yaa, metiñe mete me mbe ane “ñye’ele” ya étun éyoñ, a kee bôt be Krist.Begalate 3:23, 24.

8. Amu jé bia yiane wulu avale miñye’elane mia so metiñe me Moïse mia jô?

8 Bia fe, amu bi ne Bekristen, bi ne yene  mfi wo so metiñe Zambe a nga ve ayoñ Israël. A zene fé? Bi ne nyoñ éyoñe ya tebe, a fombô miñye’elane mi aso metiñe mete été. É ne fo’o été na, bi nji beta bo metiñe me Moïse si. Ve abui miñye’elane ya été, da ke ôsu a volô bia ényiñe jangan ya môs ôse, a ékaña’a bia ve Yéhôva. Yéhôva a nga futi metiñe mete e Kalate Zambe été, asu na, bi yé’é me. Asu na miñye’elane ya été mi wulu fe bia. A nga bo fe de asu na, bi yeme na Yésus a nga ye’ele bia jôm éziñ ja dañe metiñ. Vô’ôlô jame Yésus a nga jô: ‘Mi nga mane wôk ane e nga jôban na: ‘Te bo mejian.’ Ve ma ma kate mia na: e môt ase a fombô minga a nkômban éziñe nlem, a boya mejian a minga ate nleme wé été.’ Nde bi nji yiane sa’ale fo’o ve mejian, bia yiane fe sa’ale mbia b’asimesan a mbia minkômban.Matthieu 5:27, 28, Mfefé Nkôñelan

9. Mimfefé mi mam mivé mi nga liti na, Yéhôva a yiane wulu bôt aval afe?

9 Éyoñe Yésus a soya si va ane Messie, Yéhôva a nga ve mimfefé metiñ. A nga kate fe mam mefe mfa’a ya nsôñane wé. Amu jé a nga yiane bo jame te? Amu mbu 33, Yéhôva a nga ben ayoñ Israël ya minsôn, a top akônda Bekristen. Valé fe, mimfefé metiñ mi mbe mi sili’i asu bebo bisaé be Zambe.

METIÑ ASU BEKRISTEN

10. Amu jé Bekristene ya akônda be nga bi mimfefé metiñ, a aval avé metiñe mete me mbe me sela’ane ma bone b’Israël be mbe be bili?

10 Yéhôva a nga ve bone b’Israël metiñe me Moïse asu na, me ye’ele be avale ba yiane nyiñ a kañe nye. Ataté ntete mimbu ôsu, bebo bisaé be Zambe be nji be be so’o vôme wua, be mbe be so’o bevôm bevôm. Be nga to fe bôte meval meva, a be nga lobane na, Israël ya nsisim. Be nga bo akônda Bekristen é ne éjôé ya mfefé élate si. Yéhôva a nga ve Bekristen mimfefé metiñ, nge ke na, a nga beta ba’alane be metiñe be mbe be yeme. Jame te é nga volô Bekristene na, be yem avale ba yiane nyiñ a kañe nye. Nalé a liti fo’o na, “Zambe a nji nye’e ngumba môt: ve meyoñe mese môt a ko nye woñ, a bo mame ya zôsô, nnye Zambe a yen mvaé.” (Mam Minlôman 10:34, 35) Bekristen be mbe be tôñe “metiñe me Krist,” mme mete me mbe mbôka’a ya miñye’elane mi mbe ntilane minlem miap été. Metiñe mete me mbe me volô’ô be bevôm bese be mbe be nyiñiBegalate 6:2.

11. Mefase mebaé ya ényiñe Kristene mevé “metiñe me Krist” ma fombô?

11 Israël ya nsisim a nga yene beta mfi ya wulu a Zambe a zene ya Yésus. Ôsusua na Yésus a bo mfefé élat, a nga ve beta metiñe mebaé. Da ya été da fombô ésaé nkañete. Da vo’o ki da fombô abo dulu beyé’é be Yésus ba yiane bi, a avale ba yiane nyoñe bobenyañe bap ya nsisim. Miñye’elane mite mi mbe mi fombô’ô Bekristene bese; miñye’elane mite mia fombô fe Bekristene bese ya melu ma, ja’a ba be bili ndi nleme ya ke nyiñe yôp.

12. Jé é mbe mfefé, ésaé nkañete?

12 Melu mvus, bôte ya meyoñe mefe be mbe be za’a Israël na, ba zu kañe Yéhôva. (1 Bejô Bôt 8:41-43) Ve mvuse ya valé nde, Yésus a nga ve atiñ é ne kalate Matthieu 28:19, 20. (Lañ.) Yésus a nga jô beyé’é bé na, be ‘ke’ meyoñe mese. E pentecôte ya mbu 33 Yéhôva a nga liti na, a yi na mbamba foé a katebane si se. Môs ôte, mbamba nsisime wé a nga ve bôte 120 ya mfefé akônda ngule ya kobô minkobô bejuif, a mi meyoñe mefe. (Mam Minlôman 2:4-11) Mvuse ya valé, ésaé nkañete éte é nga  kalane si ya Samarie. Ve mbu  36, ésaé éte é nga nambe to’o begentil be nji be ntyi’ane metye. Nalé a tinane na, Bekristen ba yiane kañete môt ase!

13, 14. (a) Jé “mfefé atiñe” Yésus a nga ve, wo tindi bia na bi bo? (b) Jé éve’ela Yésus ja ye’ele bia?

13 Yésus a nga ve fe “mfefé atiñ” é liti’i aval, bia yiane nyoñe bobejañ a bekale bangane ya nsisim. (Lañe Jean 13:34, 35.) Bia yiane liti be nye’ane wongan môs ôse. Ve bia yiane fe bo nkômesane ya ve ényiñe jangan asu dap. Metiñe me Moïse, me nji be me tindi’i bôte na, be bo de.Matthieu 22:39; 1 Jean 3:16.

14 Yésus a ne beta éve’ela asu dangan amu a nga liti na, a bili nye’an ô ne teke sôñe jôm éziñe yat. A nga nye’e beyé’é bé, aval é ne na, a mbe nkômesane ya wu asu dap. A yi na, beyé’é bé be bo avale da. Nde ñhe, bia yiane bo nkômesane ya tôbane minjuk nge ke kui na, bi wu asu bobejañ, a bekale bangan.1 Bethessalonicien 2:8.

MELEP ASU MELU MA, A ASU MELU MA ZU

15, 16. Mimfefé bité mivé bi tele éyoñe ji, aval avé Zambe a wulu bia?

15 Yésus a nga telé ‘mbo ésaé a ne mewôk a fek’ asu na, a ve beyé’é bé bidi ya nsisim éyoñe ja yian. (Matthieu 24:45-47) Bidi bite bi ne, beta miñye’elane mia yian, mi ne volô bia éyoñe bi tele mimfefé bité. Jé ja bo na, bité bite bi bo mimfefé?

16 Bi nga nyiñe “melu me asu’ulan.” Ana’ana, bi mbeme fe tôbane beta njuk, a ngenane teke tame kui môs éziñ. (2 Timothée 3:1; Marc 13:19) Nde fe, be titaneya Satan a mimbia minsisim yôp a wua be si. Jôme te nje, émo é ne njalan a minjuk. (Nlitan 12:9, 12) Bia bo Yésus mewôk a tôñ atiñ a nga ve na, mbamba foé a katebane  si se. Aval ésaé te é ngenane teke tame boban, abui minkobô éyoñ éfe!

17, 18. Aval avé bi ne liti na, bia tôñe melep a miñye’elane ba ve bia?

17 Ékôane Zambe ja ve bia abui biôm da volô bia na, bi bo ésaé nkañete. Ye wo belane bie? E bisulane biangan, ba ve bia melebe ma liti bia avale bia yiane belane biôm bite. Ye wo yene melebe mete na, ma so be Zambe?

18 Nge bia kômbô nyoñe bibotane bi Zambe, bia yiane vô’ôlô melebe mese a ve bia a zene ya akônda. Nge bia bo mewôk éyoñe ji, da ye bo tyi’ibi asu dangane na, bi tône melebe ba ye ve éyoñe “beta njuk” a ye so. Éyoñe te nje, mbia émo Satan ase aye tyameban. (Matthieu 24:21) Mvuse ya valé, mfefé émo wo ye bo zôsô, da ye sili na, bi bi mimfefé miñye’elan. Mfefé émo, Satan a ye ke beta tindi bôte na, be bo mbia be mam.

Mfefé émo, bia ye bi mimvulekane mi kalate mi bili mimfefé melep asu ényiñe ya Paradis (Fombô’ô mebeñ 19, 20)

19, 20. Mimvulekane mi kalate mivé mia ye yombô, jé nje bôte ba ye tôñe miñye’elane ya mimvulekane mi kalate mite ba ye bi?

19 E melu me Moïse, é mbe é sili’i na, ayoñ Israël é bi mimfefé metiñ. Ane Zambe a nga ve be me. Mvuse ya valé, akônda Bekristen é mbe é yiane nyiñe “metiñe me Krist” si. Avale te da da, Kalate Zambe a kate bia na, mfefé émo, bia ye bi mimvulekane mi kalate. Mimvulekane mi kalate mite, mia ye bi mimfefé metiñ. (Lañe Nlitan 20:12.) Nde fe, mimvulekane mi kalate mite, mia ye kate bia nkômbane Yéhôva éyoñe te. Bôte bese, ja’a ba ba ye wômô, ba ye bo ngule ya yeme nkômbane Zambe mfa’a wôp, éyoñe ba ye yé’é mimfefé miñye’elane mite. Mimvulekane mi kalate mite mia ye volô bia na, bi yem asimesane Yéhôva. Bia ye fe kôme wô’ô Kalate Zambe. Jame te da ye volô bia na, bi yeme ve bobejañ duma, a nyoñe be a nye’an, a ésemé. (Ésaïe 26:9) Tame simesan aval abui mam bia ye yé’é, a ye’ele bôte bevok éyoñe bia ye nyiñ éjôé Yésus Krist si!

20 Nge bia tôñe melebe me “ne ntilane mimvulekane bekalate été,” a wulu ba’aba’a a Yéhôva akekui meve’ele ma su’ulan, Yéhôva a ye tili biyôlé biangane nnôm éto e “Kalate ya ényiñ.” Bi ne bi ényiñe ya nnôm éto. Nde bia yiane TEBE na, bi lañe jôme Kalate Zambe a jô. Bia yiane FOMBÔ, a wô’ô jôm a tinane mfa’a wongan. Bia yiane fe VÔ’ÔLÔ a tôñe melebe me Zambe éyone ji. Nge bi bo mam mete, bi ne dañe beta njuk, a bi meva’a ya yeme nnôm éto abui mam a lat a Yéhôva, Zambe wongan a ne fek a nye’an.Ecclésiaste 3:11; Beromain 11:33.