Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngone lale 2016

 FE’E YA MELU MVUS, JA VOLÔ BIA MELU MA

Te tyelane minleme yôp

Te tyelane minleme yôp

ÑYE’ELANE YA KALATE ZAMBE: “Te tyelane minleme yôp ajô ényiñe jenan.”Matthieu 6:25.

Nalé a tinan aya? Yésus a nga kobô mejô ma, ékate mame ya nkôl. Beta kalate bifia ya Kalate Zambe a liti na, éfia Grek be nga kôñelane na, “e tyelé nleme yôp” é ne tinane na, “avale môt a wô’ô wôk éyoñ a ne azoé, éyoñ a wô’ô zaé, nge ke éyoñe mbia be mam ba kui nye ényiñe jé.” Nlem ô wô’ô tyebe bia yôp, éyoñe bia simesane mam me ne kui bia melu ma zu. Da yiane fo’o na, môt a tyelé nleme yôp mfa’a ya miñyiane ya nda bôte jé, a mvo’é minsône ya bôt a nye’e. (Bephilippien 2:20) Ve Yésus a nga jô na: “Te [ve’ele] tyelane minleme yôp.” A mbe a lebe beyé’é bé na, be bo teke dañe ko mam ma ye kui akiti woñ. Amu, nalé a ne bo na, ava’a be bili den é man.Matthieu 6:31, 34.

Ye ñye’elan ôte wo volô bia den? Bi ne fek éyoñe bia tôñe melebe me Yésus. Amu jé? Beyeme mam béziñe ba jô na, éyoñe môt a tyelé nleme yôp abui, boo wé a fas abui. Jame te “é ne bo na a kon ôsañ, a bi akone ya nlem, a na, a ku abuk.”

Yésus a nga ve nya amu ya bo teke dañe tyelé nleme yôp: Ntyelane nleme yôp ô nji bo mfi. “Mia, za a ne, nge a tyelé nleme wé yôp, a ne ngule ya limeti ényiñe jé nta ényi’a wo?” (Matthieu 6:27) E dañe tyelé nleme yôp aye ke bo na, ényiñe jôé é beta bo ayap, fo’o ve mone jôm, nge ke na é kômeban. Nde fe na, mam ma dañe tyelé bia minleme yôp, me wô’ô ke kui avale bia te simesan. Ñyeme mam éziñ a jô na: “E dañe tyelé nleme yôp a jô ya melu ma zu, a jañele bia éyoñ. Melu ma zu me wô’ô bo abeñ a lôté avale bia too bi simesane na, ma ye bo.”

Jé bi ne bo asu na, bi bo teke tyelé nleme yôp? Jam ôsu, tabe’e ndi a Zambe. Nge Zambe a ve anon bidi, a jalé mesam abeñe mengômesan, ye a ye ke jalé miñyiane miangan, nge bia telé mame ya ékaña’a jé ôsu? (Matthieu 6:25, 26, 28-30) Jame baa, fase mame ya môse wua. Yésus a nga jô na: “Te [ve’ele] tyelane minleme yôp a jô mam ma ye boban akiti: amu mame ya mi atyelé minleme yôp akiti, me aye boban akiti.” Ye womien ô nji yene na: “mam abé ya môse wua me ayiane môs ôte”?Matthieu 6:34.

Éyoñe bia bo bebo ya mbamba melebe Yésus a nga ve, bia ye bo mvo’é minsôn. Ve jame da dañe mfi é ne na, nleme wo ye bômbô bia si. Jôme te nje Kalate Zambe a loene na, “mvo’é Zambe.”Bephilippien 4:6, 7.