Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngone lale 2016

 NLÔ AJÔ YA ÉKÔ’ÔLA’A | AMU JÉ YÉSUS A NGA TÔBANE MINJUK A WU?

Ye mam mete mese me nga bobane fo’o?

Ye mam mete mese me nga bobane fo’o?

Yésus ya Nazareth a nga wu ôyône ya mbu 33 ya É.J. Be nga bo’olô nye na, a ne nzametan. Be bôme nye mbia ébôm, a ke tyelé nye élé. A nga wu awu mintaé. Ve Zambe a nga wômôlô nye. Mvuse melu 40, Yésus a nga bete yôp.

Mbamba minkañete ba so bekalate ya mbamba mefoé (Matthieu, Marc, Luc, Jean). Be nga tilibane nkobô grek. Be wô’ô be loone na, mfefé élat. Ye mam mete mese me nga bobane fo’o? A ne fo’o beta nsili. Nge mam mete me nji boban, yeme na, mbunan Bekristen be bili, a ndi nleme ya nyiñe nnôm éto e paradis si va, bi ne fo’o ve biyeyem. (1 Becorinthien 15:14) Ve nge mam mete mese me nga boban, yeme na, mbamba be mam ba yange môt a binam melu ma zu. Bi ne ke bia kañete bôt mbamba be mam bete. Nde ñhe, ye bekalate ya mbamba mefoé, ba kañete mam me nga boban, ye momo?

JAME MAM METE MESE MA LITI

Bekalate ya mbamba mefoé ba selan a minkana. Bekalate bete ba kobô betotyii be mam, a ba kate fo’o mam avale me nga boban. Éve’an é ne na, e  bekalate bete été, bia koone biyôlé minlam bia bebien, bi ne ke jom. Mam ba kañete ma lu’an a mam me nga bobane si nyi.Luc 3:1, 2, 23.

Abui betili mame ya ntete mimbu ôsu a wu baa, ba kobô ajô Yésus. * Bekalate ya mbamba mefoé ba liti bia na, be nga wôé Yésus avale beromain ya melu mete, be mbe be wôé bôt. Nde fe, minkañete mite mia kañete mam ne sañesañ. Ja’a éyoñe mia kañete bikobe biziñe beyé’é be Yésus be nga bo, mia kobô ve betotyii. (Matthieu 26:56; Luc 22:24-26; Jean 18:10, 11) Mam mete mese ma liti na, bôte be nga tili bekalate ya mbamba mefoé be mbe zôsô. Mam mese be nga tili a lat a Yésus me ne betotyii.

JÉ JA LITI NA, YÉSUS A NGA WÔMÔ?

Akusa bo na abui bôte da yebe na, Yésus a nga nyiñ a wu, bôte béziñe ba sôô na, Yésus a nga wômô. Ja’a beyé’é bé be nji taté buni na, Yésus a nga wômô. (Luc 24:11) Bisô be mbe be bili bi nga man, éyoñe bebiene be nga yene Yésus a mis. Môs éziñ, bôte 500 a mvuk be nga yene nye.1 Becorinthien 15:6.

Ja’a be mbe be yeme na, be ne ke mimbôk a na, be ne wu, beyé’é be Yésus be nga ke ôsu a kañete bôte bese na, Yésus a wômôya. Be nga kañete foé éte ja’a be bôte bebien be nga wôé nye. (Mam Minlôman 4:1-3, 10, 19, 20; 5:27-32) Ye beyé’é be Yésus be mbe ve kañete a ngul ése na Yésus a wômôya, a too ke na jame te é mbe minsos? Nya ajô a ne na, ñwômane Yésus, ñwô ô mbe jam é nga ve Bekristene ngule ya kañete melu mvus, a melu ma.

Minkañete ya awu Yésus, a mi ya ñwômane wé, mi ne mendem ma liti na, minkañete ya bekalate ya mbamba mefoé, mi ne betotyii. Éyoñe wo kôme nyoñ éyoñe ya lañe mie, womiene wo ye fo’o kôme yeme nleme wôé été na, mam mete me nga boban. Mbunane wôé ô ne yem éyoñe wo wôk amu jé mam mete me nga boban. Nlô ajô wo tôñe wu, wo aye timine jame te.

^ É.N. 7 Éve’ane Tacite é ne éve’ane jia ya bive’ane bia liti na, bekalate bete be ne betotyii. A nga bialé mbu 55 ya É.J. A nga tili na: “Éyôlé [Bekristen] ja so be Krist, nnye ate a nga tôban abui minjuk éjôé Tibère si. Tibère émien a mbe éjôé Ponce Pilate si.” Suétone (ntete mimbu ôsu); mone juif ba loone na, Josephe (ntete mimbu ôsu); a Pline, ésoé ngovina ya Bithynie (atata’a ya ntete mimbu baa), bese be nga kobô ajô Yésus.