Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngone lale 2016

 NLÔ AJÔ YA ÉKÔ’ÔLA’A

Amu jé Yésus a nga tôbane minjuk a wu?

Amu jé Yésus a nga tôbane minjuk a wu?

“Abé é nga zu si nyô amu môte wua [Adam], a awu e nga zu amu abé; a nalé awu e nga kui be bôte bese, amu bese be nga bo abé.”Beromain 5:12

Wo ye yalan aya nge ba sili wo na, “Ye wo kombô nyiñ nnôm éto?” Abui bôt é ne yalane na, da kômbô nyiñe nnôm éto, ve é nji buni na, jame te da ye bobane môs éziñ. Bôt ba jô na, awu é ne ngabe jia ya ényiñe môt, é ne fe jam da kui be môt ase.

Bi tame sili wo na, “Ye ô kômesaneya na, wo ye wu?” Môt a ne mvo’é a ye yalane na, teké’é. Nalé a liti aya? Ke na, môt ase ya bebia a kômbô nyiñ, to’o a tôban avale minju’u avé. Kalate Zambe a liti na, Zambe a nga té bôt a nkômbane ya nyiñ. A jô na, “a maneya futi ajô ya nnôm éto nleme wop été.”Ecclésiaste 3:11.

Ve nya ajô a ne na, bôt be nji nyiñe nnôm éto. Jé é nga boban? Ye Zambe a nga bo fo’o jôm éziñ asu na, a kôme jame te? Biyalane Kalate Zambe a ve, bia volô bia minlem. Bia bo fe na, bi yem amu jé Yésus a nga tôbane minjuk a wu.

JÉ É NGA BOBAN?

Bekabetôlô belale be ôsu ya kalate Metata’a ba kate bia na, Zambe a nga telé Adam ba Ève e zene ya ényiñe ya nnôm éto. A nga kate fe be jame ba yiane bo ndemben be bi ényiñ. Ve minkañete mia liti bia avale be nga bo Zambe melo, a jañele éyiñe te. Nkañete ôte ô ne angôndô ya tyi’ibi aval é ne na, abui bôt é nji buni wô. Ve kalate Metata’a, a bekalate ya mbamba mefoé ba liti na, nkañete ôte ô nga bobane fo’o. *

Jé é nga boban éyoñ Adam a boya melo? Kalate Zambe a yalan avale di: “Abé é nga zu si nyô amu môte wua [Adam], a awu e nga zu amu abé; a nalé awu e nga kui be bôte bese, amu bese be nga bo abé.” (Beromain 5:12) Adam a nga bo abé éyoñ a nga bo Zambe melo. Ane a nga jañele ényiñe ya nnôm éto, a su’ulane fe wu. Bi ne bebo mam abé amu bi ne bone b’Adam. Jôme te nje bia kon, bia ke nnôm, a wu. Ñyeman ôte wo lu’an a mam beyeme mam, ba liti bia a lat a mvuane mon a vu mbiaé wé. Ye Zambe a nga bo jôm éziñ asu na, a kôme jame te?

 JÔME ZAMBE A NGA BO

Ôwé, Zambe a nga bo jôm éziñ. Zambe a nga mane kôme na, a beta kuse jôm Adam a nga jañele asu mvoñe bôte jé. Jôme te é ne, ndi nleme ya nyiñe nnôm éto. Zambe a nga bo de aya?

Kalate Beromain 6:23 a jô na: “Ma’ane ya abé me ne awu.” Nalé a tinane na, awu da so amu abé. Mbôle Adam a nga bo abé, jôme te nje a nga wu. Avale te fe, mbôle bia bo abé, jôme te nje bia fe, bia nyoñe ma’ane ya été, awu. Ve bi nji bi mekua amu, bi nga bialé a metyi me abé. Zambe ya nye’an a nga lôme Mone wé Yésus Krist asu na, a zu ya’ane ‘ma’ane ya awu’ asu dangan. Aval avé?

Awu Yésus da yoé zene ya bi mevak, a ényiñe ya nnôm éto

Avale zôsôa môte wua Adam, amu a nga bo Zambe melo, a nga kôé bia abé a awu. Avale te fe môte wua Yésus, amu a nga bo Zambe mewôk, a ye kôté bia abé a awu. Kalate Zambe a timine jame te avale di: “Amu melo ya môte wua, bôt abui be nga boban bebo abé, aval éte fe, amu mewô’ô ya môte wua, bôt abui ba ye kabe.” (Beromain 5:19) Yésus nnye a ne “môte wua” ate. A nga kôlô yôp, a bo môt a ne zôsô ne tiññ *, a zu wu si va a butane bia. Amu nalé, bi nto ngule ya loonebane na, bôte be ne zôsô. A bi nto ngule ya bi ndi nleme ya nyiñe nnôm éto.

AMU JÉ YÉSUS A NGA TÔBANE MINJUK A WU

Amu jé é nga sili na, Yésus a wu asu na, a zu kôté bia? Nga Zambe ya Ngul ése a mbe ve jô tyi’ibi na, mvoñe bôt Adam ba Ève é nyiñe nnôm éto? A mbe fo’o a bili ngule ya bo de. Ve mboan ôte ô nga ye tyame mejô émien a nga jô na, ma’ane ya abé me ne awu. Atiñe te é nji bo aval atiñe môt a ne tyendé, nge tyam aval a nye’e. A ne mbôka’a ya nya zôsô.Besam 37:28.

Nge Zambe a nga ye bo ékotekot mfa’a ya jame te, bôt be nga ye yeme na, a ne fe bo ékotekot e mam mefe. Bi tame nyoñ éve’an. Ye Zambe a nga ye bo zôsô nge a nga ye tyi’i na, kala si, kala ka, ya bone b’Adam, nnye a yiane nyiñe nnôm éto? Ye  bi nga ye tabe ndi na, Zambe a ye tôé bengaka’a bé? Mba’alane Zambe a ba’ale bezôsô metiñe bé asu na, a nyii bia, wo liti na, teke vaa nge beté, a ye bo jam é ne zôsô kom ése.

A zene ya awu Yésus, Zambe a ve bia ngule ya bi ényiñe ya nnôm éto e Paradis, e si va. Fombô’ô mejô Yésus a nga jô e Kalate Jean 3:16: “Ényiñe ya melu mese é ne na, be aye yeme wo wo étam ô ne nya Zambe, be aye yeme fe nyô ô nga lôm, nnye a ne Yésus Krist.” Awu Yésus é nji be é liti’i fo’o ve na, Zambe a ne zôsô, é mbe é dañe liti nye’ane Zambe a nye’e bôt.

Nde ñhe, amu jé Yésus a nga tôbane minjuk, a wu aval é ne ntilane bekalate ya mbamba mefoé? Yésus a nga wulu ba’aba’a a Zambe a tele beta meve’ele été. Mboan ôte ô nga liti éyoñe jia ya biyoñe bise na, Satan a ne nlaa minsos. Amu a nga jô na, teke môt éziñ a ne ke ôsu a wulu ba’aba’a a Zambe, éyoñ a tele e meve’ele été. (Job 2:4, 5) Mejô mete me nga ye yené zôsô éyoñ, Satan a nga dutu Adam na, a bo abé. Ve Yésus—nyô a mbe ane Adam—a nga wulu ba’aba’a a Zambe a kusa bo, a mbe a tele minju’u été. (1 Becorinthien 15:45) Nalé a nga liti na, Adam fe a mbe ve wulu ba’aba’a a Zambe, nge a nga ye tobe na a bo de. Njibane Yésus a nga jibi minjuk, ô ne beta éve’ela asu dangan. (1 Pierre 2:21) Yéhôva a nga botane Yésus amu a nga bo mewôk, a nga jô nye na, a ke nyiñe yôp été teke beta wu.

AVAL Ô NE YENE MFI YA AWU YÉSUS

Yésus a nga wu fo’o. Awu dé é nga yoé bia zene ya bi ényiñe ya nnôm éto. Ye wo kômbô nyiñe nnôm éto? Yésus a nga kate jame bia yiane bo, éyoñ a nga jô na: “Ényiñe ya melu mese é ne na, be aye yeme wo wo étam ô ne nya Zambe, be aye yeme fe nyô ô nga lôm, nnye a ne Yésus Krist.”Jean 17:3.

Bôt be ate kuli kalate mefoé nyi, ba bañete wo na, ô yé’é na wo yeme Yéhôva, nya Zambe, a Mone wé Yésus. Bengaa be Yéhôva ya vôm ô too ba ye wô’ô meva’a ya zu jome wo. Ô ne fe yene mbamba mefoé me ne volô wo anjeñe mefoé dangan é ne www.jw.org.

^ É.N. 8 Fombô’ô nlô ajô “Historicité de la Genèse,” e kalate ba loene na, Étude perspicace des Écritures, volume 1, page 986 a 988, Bengaa be Yéhôva be nga kuli.

^ É.N. 13 Zambe a nga futi ényiñe Mone wé abume be éndune ngone ba loone na, Marie. A zene ya mbamba nsisim, Zambe a nga bo na, Yésus a bo teke nyoñe metyi me abé me mbe nyôle Marie.Luc 1:31, 35.