Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngone baa 2017

Ntañ “nya dase” da so bia be Zambe

Ntañ “nya dase” da so bia be Zambe

“Mfañe mvean ôse, a nya dase ase, bia so . . . be Ésaa.”​JC. 1:17, Mfefé Nkôñelan.

BIA: 20, 15

1. Bibotane bivé bi ne bi amu ntañ?

NTAÑ wo ve bia fane ya bi abui bibotan. Wo ve bone be Adam ba nye’e zôsô, fane ya bo bibu’a ya nda bôte Zambe. Ntañ wo ve fe bia fane ya bi ényiñe ya melu mese, e meva’a été. Ve ntañ wo ve bia mbamba be mame befe. Mbôle Yésus a nga kañese na a wu asu dangan, nalé a nga yemete na, Yéhôva nnye fo’o a yiane éto Njôô.​—Beh. 1:8, 9.

2. (a) Beta be mame bevé meye’elane me Yésus me ne ye’ele bia? (Fombô’ô fôtô ya atata’a ya ayé’é di.) (b) Jé ayé’é di da zu ye’ele bia?

2 Mimbu mibaé ôsusua na a wu, Yésus a nga jô beyé’é bé na, be ye’elane na: “A Tate wongan a ne yôp, Jôé dôé e bo’ étyi. [Éjôé jôé] e za’ak. Mam wo anye’e me bo’o si nyô, aval ane me abo yôp.” (Mt. 6:9, 10) Bi tame taté yen aval avé ntañ ô ne nya mfi, mfa’a ya fubu jôé Yéhôva, mfa’a ya yemete na, Zambe nnye a yiane éto Njôô, a mfa’a ya jalé ôvañe Yéhôva, asu ya na, bi tu’a wôk amu jé ntañ ô ne édima das.

 “JÔÉ DÔÉ E BO’O ÉTYI”

3. Yéhôva, éyôlé Zambe ja liti na, a ne avale Zambe avé, a aval avé Satan a nga ve mfufup éyôlé te mvit?

3 Jam ôsu Yésus a nga taté jô na bi sili éyoñe bia ye’elan e ne na, jôé Zambe e bo étyi. Yéhôva, éyôlé Zambe, ja liti na, a ne Zambe a ne ôyabe yôbô, Zambe ya fek, a Zambe ya étyi. Yésus a nga loone Yéhôva na, “Tate [a] ne Mfufup” meye’elane mefe a nga bo. (Jn. 17:11, Mfefé Nkôñelan.) Mbôle Yéhôva a ne étyi, metiñe mé mese, a mebendé mé mese me ne fe étyi. Afube ya Éden, Satan a nga jô na, Zambe a nji yiane jôé mona môt. Éyoñ a nga bolé éyôlé Zambe, Satan a nga ve mfufup éyôlé te mvit.​—Met. 3:1-5.

4. Aval avé Yésus a nga bo na, jôé Zambe e bo étyi?

4 Yésus a mbe fe a nye’e éyôlé Zambe nya nye’ane. (Jn. 17:25, 26) Yésus a nga ve ngul asu ya na, jôé Zambe e bo étyi. (Lañe Besam 40:8-10.) Éyoñ a nga nyiñe si va, Yésus a nga liti na, Yéhôva nnye fo’o, a yiane liti bitétéa bié bi bili fek avale bia yiane nyiñ. Yésus a nga ba’ale élate jé a Yéhôva, ja’a éyoñe Satan a nga bo na, a wu awu mintaé. Mbôl a nga wulu ba’aba’a a Yéhôva, Yésus a nga liti na, môt a ne zôsô teke ayeñ, a ne tôñe bezôsô metiñe me Yéhôva.

5. Aval avé bi ne fubu éyôlé Zambe?

5 Aval avé bi ne liti na bia nye’e éyôlé Zambe? A zene ya ntabane wongan. Yéhôva a yi na bi bo étyi. (Lañe 1 Pierre 1:15, 16.) Nalé a tinane na, bia yiane kañe ve Yéhôva étam, a na, bia yiane bo nye mewôk a nleme wongan ôse. To’o éyoñe bia tôban étibila’a, bia yiane ve mengule mangan mese na, bi ke ôsu a wulu aval ane metiñe mé, a miñye’elane mié mi né. Éyoñe bia bo mame ya zôsô, bia bo na éfufube jangan é faé, nalé a ve éyôlé Zambe duma. (Mt. 5:14-16) Aval ane bôt be ne étyi, bia liti a zene ya fatan ényiñe jangan na, metiñe me Yéhôva me ne mvaé, a na Satan a ne nlaa minsos. Nge bia bo ékop, aval ane da kui môt ase, bia yiane jôban mam abé mangan, a jô’é mbia mimboane mia ve éyôlé Zambe mvit.​—Bs. 79:9.

6. Akusa bo bi ne bebo mam abé, amu jé bi ne bo zôsô mise me Zambe?

6 Awu Yésus nde da bo na, Yéhôva a jamé mam abé me bôte ba liti na, ba buni nye. A kañese ba bese ba ve nye binyiñe biap na, be bo bebo bisaé bé. Yéhôva a lañe bezôsô Bekristene be ne miñwo’an ane bone bé, ve “mintômba mife,” mi ne bezôsô, a lañe mie ane bemvôé bé. (Jn. 10:16; Bero. 5:1, 2; Jc. 2:21-25) Nde ñhe, ataté éyoñe ji, ntañ wo volô bia na, bi bo zôsô mise me Ésa wongan ya yôp, wo volô fe bia na, bi fubu jôé dé.

“ÉJÔÉ JÔÉ E ZA’AK”

7. Bibotane bivé Éjôé Zambe ja ye so bie a zene ya ntañ?

7 Meye’elane Yésus a nga ye’ele beyé’é bé, a nga jô na bi sili Zambe na: “[Éjôé jôé] e za’ak.” Élat évé é ne zañe ntañ a Éjôé Zambe? A zene ya ntañ, Yéhôva a nga kôane bôte 144 000 asu ya na, be bo bejôô, a beprêtre nsamba a Yésus e yôp été. (Nli. 5:9, 10; 14:1) Yésus ba be bôte ba be be, ba ye jôé,  ba ye bo na, bezôsô be bôt, be nyoñe bibotane ya ntañ tañe toyina mimbu. Ba ye kôme si, a bo je Paradis, bebo bisaé be Yéhôva bese, ba ye bo bezôsô teke ayeñ, bibu’a bise ya nda bôte Yéhôva, bia ye bo nlatane jôme jia, bi ya yôp, a bi ya si. (Nli. 5:13; 20:6) Yésus a ye fite nyo nlô, a mane va mbia be mame bese éngana’a Satan é nga soo me​—Met. 3:15.

8. (a) Aval avé Yésus a nga liti beyé’é bé mfi ya kañete mbamba foé ya Éjôé Zambe? (b) Aval avé bi ne su’u Éjôé Zambe den?

8 Éyoñ a nga too si va, Yésus a nga volô beyé’é bé na, be yen mfi ya Éjôé Zambe. Nné ane a nga mane duban, été été, Yésus a nga kañete “mbamba foé y’Éjôé Zambe,” vôm ase a nga bi ngule ya ke. (Lc. 4:43, Mfefé Nkôñelan.) Ôsusua na a ke yôp, Yésus a nga kandane jô beyé’é bé na, be bo bengaa bé “mfa’a si nyô je adañ ôyap.” (Mam. 1:6-8) Bôte ya si ése, ba ye bi fane ya yeme jé é ne ntañ, a bo bibu’a ya Éjôé Zambe, a zene ya nkañetane mbamba foé ya Éjôé Zambe. Den, bia liti na, bia su’u bobenyañe be Krist be ngenane si va, éyoñe bia tôñ abendé Yésus da jô bia na, bi kañete’e mbamba foé ya Éjôé Zambe e si nyi ése.​—Mt. 24:14; 25:40.

“NKÔMBANE WÔÉ Ô BOBA’AN”

9. Amu jé bi bili ndi nleme na, Yéhôva a ye tôé nsôñane wé asu bôt?

9 Éyoñe Yésus a nga jô na: “nkômbane wôé ô boba’an,” jé a mbe a kômbô’ô jô? Yéhôva nnye a ne nté biôm. Éyoñ a jô na, jam éziñ e boba’an, a ne ve ane jam ete e maneya boban. (És. 55:11) A nji kañese na, éngana’a Satan é ndaman ôvañe wé asu bone be bôt. Ôvañe wé ya atata’a ô mbe na, si é jaé a bone be Adam ba Ève be ne mfuban teke ayeñ. (Met. 1:28) Nge Adam ba Ève be nga ye wu teke biaé bon, ôvañ ôte ô nji ye jaleban. Jôm ete nje a nga jô’é be na, be biaé bon akusa bo na, be boya nsem. A zene ya ntañ, Yéhôva a ve bezôsô be bôt bese fane ya bo mfuban teke ayeñ, a fane ya bi ényiñe ya nnôm éto. Yéhôva a nye’e bôt, a nkômbane wé ô ne na, bezôsô be bôt be nyiñ aval a nga sôñ.

10. Mfi ôvé ntañ ô ne asu bewu?

10 Jé ke ja ye boban asu bemilion be bôte be nga wu, teke bi fane ya yem, a kañe Yéhôva? Ntañ wo ve miñwuan fane ya wômô. Yéhôva, Ésa wongan a nye’e bia, a ye wômôlô be, a ve be éyoñe ya yem ôvañe wé, a bi ényiñe ya melu mese. (Mam. 24:15) Jame Yéhôva a yi e ne na bôt be nyiñ, sa ke na be wu. Mbôle nnye a ne Ajeñe ya ényiñ, a ye bo Ésa ya ba ba ye wômô miñwuan. (Bs. 36:9) Jôm éte nje Yésus a nga jô bia na, bi ye’elan: “Tate wongan a ne yôp.” (Mt. 6:9) Yéhôva a nga ve Yésus ésaé ya wômôlô miñwuan. (Jn. 6:40, 44) Aval ane “ñwômôlô bôt, a ényiñ,” Yésus a ye sondô ésaé jé e Paradis.​—Jn. 11:25.

11. Ôvañ ôvé Zambe a bili asu “beta nsamba bôt”?

11 Fulu akabe Yéhôva é nji bo ve asu mingumba mi bôt, jôm éte nje Yésus a nga jô na: Bôte bese, môt a bo ane Zambe a nye’e, nnye a ne me mojañ a ka a nyia wom.” (Mc. 3:35) Nkômbane Yéhôva ô ne na, bizu’u bi bôte ya “beta nsamba bôt” be so’o meyoñ  mese, menda me bôte mese, minkobô mise, be bo bebo bisaé bé. Ba ba liti na ba buni ntañ, a bo nkômbane Zambe, ba ye bo nsamba bôte wo ye jô na: “Nyian ô ne jôme Zambe wongan, nyô a too éto njôan, a e jôme Mone Ntômba.”​—Nli. 7:9, 10, Mfefé Nkôñelan.

12. Aval avé meye’elan me Tate ma kate bia nsôñane Yéhôva asu mona môt?

12 Meye’elan Yésus a nga ye’ele beyé’é bé, ma kate bia nsôñane Yéhôva asu bôt ba bo nye mewôk. Bia kômbô ve ngule jangan ése na, bi ve jôé Zambe étyi, avale meye’elane mete ma liti. (És. 8:13) Éyôlé Yésus ébien ja tinane na, “Yéhôva a ne nkôté wongan.” Éyoñe bia ye kôtéban a zene ya ntañ, nalé a ye fubu éyôlé Zambe. Yéhôva a ye belan Éjôé jé asu ya na, bôte ba bo nye mewôk be bu’ubane bibotane ya ntañ. Yaa meye’elan me Tate, ma ve bia ndi nleme na, jôm éziñ é nji bo ngule ya kamane na, nkômbane Zambe ô tôéban.​—Bs. 135:6; És. 46:9, 10.

LITI’I NA WO VE ZAMBE AKÉVA AMU NTAÑ

13. Éyoñe bia nyoñe mbatizô, jé bia liti Yéhôva?

13 Jame da ya mame bi ne bo, nge bia kômbô liti Yéhôva na, bia ve nye akéva amu ntañ, é ne na, bi ve Yéhôva ényiñe jangan amu bia buni ntañ a nyoñe mbatizô. Éyoñe bia nyoñe mbatizô, bia liti na, ‘bi ne ba be Yéhôva.’ (Bero. 14:8) Nalé a liti na, bia sili Yéhôva mbamba mone môte ya nlem. (1 P. 3:21) Yéhôva a yalane bia éyoñ a fubu bia a zene ya metyi me Yésus. Bi  too ndi nleme na, a ye ve bia mam mese a nga ka’ale bia.​—Bero. 8:32.

Jé wo yiane bo nge wo kômbô ve Zambe akéva amu ntañ? (Fombô’ô mebeñ 13, 14)

14. Amu jé bi ne ntindane ya nye’e bôte bevok?

14 Jé éfe bi ne bo asu ya na, bi liti Yéhôva na, bia ve nye akéva amu ntañ? Mbôle Yéhôva a bo mame mé mese a nye’an, nkômbane wé ô ne na, nye’an ô bo fulu bebo bisaé bé ba dañe bi. (1 Jn. 4:8-11) Éyoñe bia nye’e bôte bevok, bia liti na bi ne “bone be [Ésa wongan] a ne yôp.” (Mt. 5:43-48) Atiñe ya nye’e bôte bevok e ne atiñe baa da dañe metiñe mese mevok. (Mat. 22:37-40) Beta jam bi ne bo, nge bia kômbô liti bôte bevok na, bia nye’e be, a ne na, bi kañete’e mbamba foé ya Éjôé Zambe. Éyoñe bia liti bôte bevok na bia nye’e be, bia wumulu jôé Zambe. Mbamba jam a ne na, nye’an bia nye’e Zambe wo bo “ngumba mvo’é be bia,” éyoñe bia tôñ atiñe dé da jô bia na, bi nye’e bôte bevok, e dañe dañ bobejañe bangan.​—1 Jn. 4:12, 20.

YÉHÔVA A VE BIA ‘MELU YA ÉVÔVOÉ’ A ZENE YA NTAÑ

15. (a) Bibotane bivé Yéhôva a ve bia den? (b) Bibotane bivé bia ye bi melu ma zu?

15 Éyoñe bia liti na, bia buni ntañ, Yéhôva a ne jamé mam abé mangan. Kalate Zambe a ve bia ndi nleme na, mam abé mangan me ne ngule ya “vas.” (Lañe Mam Minlôman 3:19-21.) Avale bia te yene mvus, Yéhôva a tobe Bekristene be ne miñwo’an ane bone bé, a zene ya ntañ. (Bero. 8:15-17) Asu ba ya be bia be ne “mintômba mife,” ane ve ane Zambe a bete afebe da liti na, a tobeya bia ane bone bé. Éyoñe bia ye bo mfuban teke ayeñ, a dañe meve’ele ma su’ulan, Yéhôva a ye wô’ô mvaé ya sane afeb ete, a kañese bia ane bone bé a nye’e si va. (Bero. 8:20, 21; Nli. 20:7-9) Nye’an Yéhôva a nye’e bone bé, ô ne étyi teke man. Bia ye bu’ubane bibotane ya ntañ nnôm éto. (Beh. 9:12) Mfi ya das ete wo ye bo nnôm éto. Môt éziñ a nji bo ngule ya vaa bia das ete.

16. Aval avé ntañ wo ve bia nya éto fili?

16 Satan a nji bi ngule ya kamane bôte be bili mbamba nkômbane na, be jôba’ane mam abé map, a bo bibu’a ya nda bôte Yéhôva. Yésus a nga wu ‘éyoñe jia ya biyoñe bise.’ A nga ve ntañ éyoñ jia ya biyoñe bise (Beh. 9:24-26) Ntañ ô nga tyame mam abé mese Adam a nga kôé mvoñe bôte jé. Awu Yésus da kôté bia éto belo ya mbia nta’ane mame Satan a jôô nyi, a bi aye ke fe beta nyiñ a woñe ya awu.​—Beh. 2:14, 15.

17. Wo wô’ôtan aya éyoñe wo simesan abime Yéhôva a nye’e wo?

17 Bi ne tabe ndi a bengaka’a be Yéhôva. Yéhôva a vo’o ke du’u bia. A ne étyi teke tyendé. (Mal. 3:6) Yéhôva a nji ve bia ve ényiñ étam, a ve bia abui mam afe. A ve bia nye’ane wé. “Bi ayem a bi buniya nye’an Zambe a nye’e bia. Zambe a ne nye’an.” (1 Jn. 4:16) Si ése ja ye tyendé a bo Paradis, vôm bia ye nyiñe mefo’o ényiñ, vôme mona môt ase, a ye nye’e ane Zambe a nye’e. Bia bese bia yiane ñhe yia Yéhôva jia, tyiñe jia a beéngele, a jô na: “Nkañan, a étôtok, a ñyeman, a akéva, a duma, a ngu, a éwôlô, bi bo’o be Zambe wongan, nnôm éto a nnôm éto, Amen.”​—Nli. 7:12.