Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngone baa 2018

AVAK​—Fulu ja so be Zambe

AVAK​—Fulu ja so be Zambe

BÔTE ba nye’e be nyiñe’e meva’a été. Ve melu ya asu’ulane ma, bia bese bia tôbane minju’u mi ne ayaé ya jibi. (2 Tim. 3:1) Ékotekot, akon, njembane bisaé, mintaé ya nlem, a mam mevo’o mese ma tya’a bia nlem, me ne bo na bôt béziñ be taté na ba jañele ava’a dap. To’o bebo bisaé be Yéhôva fe be ne bili atek a jañele ava’a dap. Nge nalé a kui wo, jé é ne volô wo na ô beta bi avak?

Asu na bi yalan nsili ôte, bia yiane taté yem jé é ne avak, a avale bôte béziñ be nga ba’ale ava’a dap akusa bo minjuk. Éyoñ éte bia zu yen avale bi ne ba’ale ava’a dangan, a nene de.

JÉ É NE AVAK?

Bia yiane yeme na avak da selan a vioé. Éve’ane ji: Éyoñ môt a so’o meyok, a ne ôsesa. Ve éyoñ meyo’o me maneya nye mis, vioé ô mané, nlem ô beta taté na wo taé nye. Ôsesa wé ô nji be benya meva’a.​—Min. 14:13.

Avak é ne fulu ja so nlem été. Ba timine de ane “mvaé môt a wôk amu a te bi, nge ke amu a yange mbamba jam.” Môt a ne mevak a ke ôsu a wô’ôtane mvaé éte ja’a éyoñ a tele minju’ été. (1 Bet. 1:6) Ajô te, môt a ne wô’ô jam éziñ mintaé, ve nlem ô too nye avak. Éve’ane é ne na, be nga bôme minlôman amu mi mbe mi kobô’ô ajô Krist. Ve mi “nga kôlô be betyi’i mejô, a wô’ avak amu Zambe a nga lô be aka’a bôt de ayiane jibi ékpwe’ele amu jôé [Yésus.]” (Mam. 5:41) Be nji be be wô’ô mvaé amu be nga bômeban. Ve minleme miap mi mbe avak amu be nga ba’ale élate jap a Zambe.

Bi nji bialé a aval ava’a ete, a e nji so atemetem. Amu jé? Amu nya ava’a a ne ngabe ya ébuma ya nsisim. Zambe a ne volô bia na bi “jaé mfefé môt” wo bo na bi bi avak. (Beép. 4:24; Beg. 5:22) Éyoñ bi ne mevak, bi ne ngule ya jibi minju’u ya ényiñ.

BIVE’ELA BI NE TÔÑ

Yéhôva a nga té si na bi nyiñe mvo’é été, sa ke na bi tôbane minju’u mise bi bili den. Mbia be mam be nji ve Yéhôva nlem avak. Bible a jô na: “Ngule ba mevak bi ne vôme wé été.” (1 Mka. 16:27) Nde fe, mbamba be mam bese bebo bisaé bé ba bo ba ve ‘Yéhôva nlem avak.’​—Min. 27:11.

Bia yiane vu Yéhôva, bi nji yiane dañe wô’ô ôlun nge mam me nji wulu ane bia yi. Ve, bia yiane bem ôsimesane mbamba be mam bi bili den, a ke ôsu a yange mbamba be mam ba zu. *

 Kalate Zambe a kobô fe ajô bôte be nga ba’ale ava’a dap minju’ été. Abraham a ne wua ya été, a nga jibi mam me mbe ve bo na a wu, a minju’u mi mbe mi so’o nye be bôte bevok. (Met. 12:10-20; 14:8-16; 16:4, 5; 20:1-18; 21:8, 9) Akusa bo minju’u mite mise, a nga ba’ale ava’a dé. Jé é nga volô nye? A mbe a yange’ môs a ye nyiñ Éjôé Messie si. (Met. 22:15-18; Beh. 11:10) Yésus a nga jô na: “Éso wônan Abraham a nga kômbô yene môse wom; ane a nga yene wô, a vak.” (Jean 8:56) Bia vu Abraham éyoñ bia bem ôsimesan ava’a da yange bia ôsu.​—Bero. 8:21.

Aval ane Abraham, Paul ba Silas be mbe be yange’e bengaka’a be Zambe. Mbunane wop ô mbe ngul, a be nga ba’ale ava’a dap akusa bo minju’ be nga tôbane mie. Môs éziñ, éyoñ be maneya yite be mbia ébôm a wua be nda mimbôk, “zañ alu, . . .  be nga ye’elane Zambe a yia bia.” (Mam. 16:23-25) Be nga ba’ale ava’a dap amu ndi nleme jap é mbe ngul, a mbôle be mbe be yeme’ na ba tôbane minju’u amu jôé Krist. Bia vu be éyoñ bia simesane bibotan bia bi amu bia bo Yéhôva Zambe ésaé.​—Beph. 1:12-14.

Abui bobejañe ya dene fe é ne mbamba bive’ela ya vu. Ngon awôm a jia ya mbu 2013, beta ôkôs a nga vuñe Philippines; ôkôs ôte ô nga ndamane menda Bengaa be Yéhôva a lôte 1 000. Georges a mbe a nyiñi’ Tacloban, nda jé fe é nga ndaman; a jô na: “Akusa bo jam é nga kui, bobejañ be mbe mevak. Me vo’o tu’a kate mia abim meva’a bi nga wôk.” Ja’a bia tôban avale minju’u avé, bia ye ba’ale ava’a dangan nge bia simesane mam mese Yéhôva a bo asu dangan. Mam mevé mefe me ne bo na bi ba’ale ava’a dangan?

MAM MA SOO BIA MEVAK

Teke jam afe da soo bia mevak ane élate jangan a Yéhôva. Tame simesane na Njôô ya si a yôp a ne Ésaa wongan, Zambe wongan, a Mvôé jangan!​—Bs. 71:17, 18.

A nga ve bia ényiñ a ngule ya bu’ubane je. (Ec. 3:12, 13) Mbôle Zambe a nga té bia bi bili fek, a ve fe bia mvome ya subu nye bebé, bi ne wô’ô nkômbane wé mfa’a wongan. (Beco. 1:9, 10) Bia yem amu jé bi ne si va, a aval avé bia yiane wulu. Ve abui bôte da yeme ki nsôñane ya ényiñ. Asu na a ngôné nsela’an ate, Paul a nga tili na: “Dis e nji yen, a alo teke wôk, e jam e nji nyiine nleme môt, mam mese Zambe a nga kôm asu ba ba nye’e nye. Yaa, bia Zambe a nga kulane de a zene ya nsisim.” (1 Bec. 2:9, 10, Mfefé Nkôñelan) Nga bia wô’ô mvaé ya yem nkômbane Yéhôva a nsôñane wé?

Fase’ mam mefe Yéhôva a boya asu bebo bisaé bé. Nga wo wô’o mvaé ya yeme na Yéhôva a ne jamé abé dôé? (1 Jean 2:12) Mvame Zambe ja bo na bi tabe ndi na mfefé émo ô mbeme so. (Bero. 12:12) Melu ma fe, bia bu’uban a élat é ne zañe bia be bobejañe ya si se. (Bs. 133:1) Kalate Zambe a jô fe bia na Yéhôva a kamane na Satan a mimbia minsisim mi ndeñele bebo bisaé bé. (Bs. 91:11) Nge bia bindi bibotane bi Zambe bite, ava’a dangan da ye nen a ke ôsu.​—Beph. 4:4.

AVAL Ô NE NENE AVA’A DÔÉ

Ye Kristen é ne mevak é ne beta nene ava’a dé? Yésus a nga jô na: “Mam ma,  me nga kate mia me na ava’a dam e bo be mia, a na ava’a denan e jaé ne lut.” (Jean 15:11, Mfefé Nkôñelan) Nga nalé a liti na bi ne nene ava’a dangan? Bi ne ve’e ngule bia ve na bia nene ava’a dangan a éyoñ môt a so nduan. Wo yiane febe nduan asu na nkaba’a ô bo ngul. Aval ete fe, wo yiane bi mbamba mefulu ya nsisim asu na ava’a dôé é nen. Te vuane na nsisime Zambe ñwô wo bo na ava’a é nen. Ajô te, nge wo yi na ava’a dôé é nen, wo yiane bo mbane ya ye’elane Yéhôva a bindi Mejô mé.​—Bs. 1:1, 2; Luc 11:13.

Ô ne fe nene ava’a dôé nge wo bo mame Yéhôva a nye’e. (Bs. 35:27; 112:1) Amu jé? Amu bi nga tébane na bi “ko Zambe woñ, a ba’ale metiñe mé; amu ngume jam môt a yiane bo ñwô le.” (Ec. 12:13) Nalé a tinane na bi nga tébane na bi bo nkômbane Zambe. Nde ñhe, éyoñ bia bo Yéhôva ésaé, bia ye tu’a bi ava’a ényiñ. *

BIBOTAN AVA’A DA SOO BIA

Nté bia ke ôsu a nene ava’a dangan, bia ye bi bibotane bia dañe mvaé môt a ne wô’ôtane biyoñ biziñ. Bia ye bo édima mis me Ésaa wongan a ne yôp, amu bia bo nye ésaé a ava’ ése, akusa bo minju’u bia tôbane mie. (Dt. 16:15; 1 Bet. 5:16-18) Ava’a dangan da ye fe volô bia na bi sa’ale ôzañ akum, a na bi bi nkômbane ya nyume biabebien mam amu Éjôé Zambe. (Mt. 13:44) Éyoñ bia yene mbamba bibuma mboon ôte wo wum, ava’a dangan, a di bôte bevo’o da nen.​—Mam. 20:35; Beph. 1:3-5.

Éyoñ a faseya mam me tii a mvo’é ya minsôn, ñyeme mam éziñe ya Université ya Nebraska, États-Unis, a nga jô na: “Nge wo ba’ale ava’a dôé den, yeme na wo ye bo mvo’é minsôn melu ma zu.” Mejô mete ma wô’an a ma ya Bible ma jô na: “Nlem ô ne mevak ô ne mbamba biañ.” (Min. 17:22) Yaa, nge wo nene ava’a dôé, wo ye tu’a bo mvo’é minsôn.

Nde, akusa bo minju’u ya ényiñ, mbamba nsisim a ne volô bia na bi bi ava’a da libi, a zene ya meye’elan, ayé’é a mbidane Mejô me Zambe. Bi ne fe kô’ôlan ava’a dangan éyoñ bia fas bibotane bia bi éyoñ ji, a éyoñ bia vu mbunane bôte bevok, a jeñe na bi bo nkômbane Zambe. Mejô me ne ntilan Besam 64:10 me ne fe bo émagan: “Bôt be ne zôsô b’aye va’a be Yéhôva, b’aye sobô be nye.”

^ É.N. 10 Bia ye kobô ajô ôjibi nlô ajô ôfe ya mi mia ngôné “ébuma ya nsisim.”

^ É.N. 20 Nge wo kômbô yeme mam mefe me ne volô wo na ô nene ava’a dôé, fombô’ô nka’ale ô ne nlô ajô na, “ Mam mefe ô ne bo na ô nene ava’a dôé.”