Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngon ôsu 2018

Élat bia bu’ubane je éyoñe ya Mesimesa’ane

Élat bia bu’ubane je éyoñe ya Mesimesa’ane

“Aka’a mvo’é a mvaé e né ane bobenyañ be to vôme wua a nleme wua!”​—BS. 133:1.

BIA: 18, 14

1, 2. Beta nsula’ane mbé a ye bobane mbu 2018, amu jé bia jô na teke nsula’ane mfe a dañe nyili? (Fombô’ô fôtô ya atata’a.)

MAME ngô’é ya Ngone lale é too melu 31, mbu 2018, bebo bisaé be Zambe, a abui bôt afe, ba ye sulan asu Tawôla Tate. Avale mewolo me nkolo ma ke ma selane mesi mesi, nalé fe Mesimesa’ane ya awu Yésus ma ye bobane si se meku’u menyin, bana be so’o, bana be kelek. Teke nsula’ane mfe si va, a late bôte mbu ôse, ane nyili!

2 Môs ôte, Yéhôva ba Mon ba ye yen ane bizu’u bi bôt ya si se, bia so bi kele’e Mesimesa’ane ya awu Yésus, akekui môse wo ye man; ngo’o abim abui avak ba ye wôk! Kalate Zambe a nga jô na “bizu’u bi bôt, te ke môt a mbe ngule ya lañe bie, bi so’o meyoñe mese a menda me bôte mese, a bôte bese a minkobô mise,” bia ye yôtane na: “Nyian ô bo’o be Zambe wongan, nnye a to éto njôane yôp, a be Mon ntômba.” (Nli. 7:9, 10) Avale duma te nde  bia ve Yéhôva môse Mesimesa’ane ya awu Yésus, ngo’o avale mbamba jam ete!

3. Bia zu bi biyalane ya minsili mivé?

3 Ayé’é di da zu yalane minsili mi: (1) Aval avé môt ase ya be bia a ne kômesan, mfa’a ya yene mfi ya Tawôla Tate? (2) Aval avé Mesimesa’ane ya awu Yésus ma volô bebo bisaé be Yéhôva na be tabe nlatan? (3) Jé môt ase ya be bia a ne bo asu na a ba’ale élat éte? (4) Tawôla Tate a ye kandane boban éyoñ évé?

AVALE BI NE KÔMESAN ASU MESIMESA’ANE A YENE MFI YA ÉTÉ

4. Amu jé bia yiane jeñ a ngul ése na bi tabe Mesimesa’ane?

4 Amu jé é ne mfi na bi tabe Mesimesa’ane? Bisulane bi ne ngabe jia ya ékaña’a bia ve Yéhôva. Teke vaa nge beté, Yéhôva ba Yésus ba nye’e môt ase a jeñ a ngul ése na, a tabe beta nsula’ane ate. Ajô te, ane ô vaa ngul ôkon, nge ke ngul ébubua éfe, teke jam éziñ da yiane bo na bi bu’i Mesimesa’ane. Éyoñ Yéhôva a yene na bisulan bi ne mfi mise mangan, nalé a bo na a ke ôsu a ba’ale éyôlé jangane “kalate ya ôsimesan,” nge ke na, “kalate ya ényiñ,” vôme biyôlé bi bôte ba ye nyiñe nnôm éto bi ne ntilan.​—Mal. 3:16; Nli. 20:15.

5. Nté Mesimesa’ane ma ye subu, jé é ne volô bia na ‘bi yem nge bi nga’an mbunan été’?

5 Nté Mesimesa’ane ma ye subu, bia yiane nyoñ éyoñe ya bindi a yen nge élate jangan a Yéhôva é ne ngul. (Lañe’e 2 Becorinthien 13:5.) Aval avé bi ne bo de? Bia yiane ‘jeñe na bi yem nge bi nga’an mbunan été.’ Bi ne sili biabebiene na: ‘Ye ma buni fo’o na, ékôane Bengaa be Yéhôva, é ne susu’a ékôane Yéhôva a belane je na, a tôé nsôñane wé? Ye me ne fo’o ayôñ ésaé nkañete? Ye mimboane miam mia liti na, ma buni na bi nto melu ya asu’ulan, a na, éjôé Satan é mbeme man? Ye mbunane wom ô ngenan fo’o ngul aval ô mbe éyoñ me nga ve mamien ngumba be Yéhôva?’ (Mt. 24:14; 2 Tim. 3:1; Beh. 3:14) Biyalane ya minsili mite bia ye volô bia na, bi yem nge bi nga’an mbunan été.

6. (a) Nge bia kômbô bi ényiñe ya melu mese, jé bia yiane bo? (b) Aval avé mvendé éziñ ja kômesane Mesimesa’ane mbu ôse, a bi ne vu je aya?

6 Lañe’ a bindi minlô mejô mia ve atinane ya Mesimesa’ane. (Lañe’e Jean 3:16; 17:3.) Nge bia kômbô bi ényiñe ya melu mese, bia yiane ‘yé’é yeme’ Yéhôva, a ‘liti na bia buni’ atyi’i Mone Dé, Yésus. Zia biyoñe ya Mesimesa’ane, ô ne yé’é minlô mejô mia ye volô wo na, ô subu Yéhôva ba Yésus bebé. Tame yen ane mvendé éziñ é wô’ô jaé zu ja bo. Mimbu mimbu, a nga tôkane minlô mejô ya Nkume mmombô a bete mia kobô ajô ya Mesimesa’ane, a ajô ya nye’ane Yéhôva ba Yésus be nga liti bia. A wô’ô beta lañe mie, a bindi mie éyoñe Mesimesa’ane me nto bebé, asu na a tu’a wô’ô mfi ya nsula’ane ate. A kô’ôlane mfefé nlô ajô wua, nge ke mibaé mbu ôse. A jô na mboon ôte wo bo na a yé’é mfefé jam mbu ôse, a na, a tu’a nye’e Yéhôva ba Yésus. Nge wo fe wo bo nalé, wo ye tu’a nye’e Yéhôva ba Yésus, wo ye tu’a kômbô ve be akiba, a wo ye tu’a yene mfi ya Tawôla Tate.

 MESIMESA’ANE YA AWU YÉSUS MA VOLÔ NA BI BO NLATAN

7. (a) Meye’elane mevé Yésus a nga bo alu a nga bôndé Tawôla Tate? (b) Jé ja liti na Yéhôva a nga vô’ôlô meye’elane mete?

7 Alu a nga bôndé Tawôla Tate, Yésus a nga ye’elane na beyé’é bé bese be bo jôme jia, aval ane ba Ésaa wé be ne jôme jia. (Lañe’e Jean 17:20, 21.) Yéhôva a nga vô’ôlô édiñe Mone jé, ajô te den, bemillion be bôt ba buni na Zambe a nga lôme Yésus si va. Teke nsula’ane mfe a kôme ngôné élat é ne zañe Bengaa be Yéhôva, ane Mesimesa’ane ya awu Yésus. Bôte ya meyoñ mese ba sulane Meba m’Éjôé ya si se, mintangan a bivindi fufulu. Mesi méziñ, bôte ba yen aval étame na, mintangan a bivindi bi sulane vôme wua na bia kañe Zambe. Ve Yéhôva ba Yésus ba nye’e ba yen aval élat ete.

8. Jé Yéhôva a nga jô nkulu mejô Ézéchiel mfa’a ya élat?

8 Bi nji yé’an a élat é ne zañe jangan, amu Yéhôva émien a nga jô na, bebo bisaé bé ba ye bo nlatane jôme jia. A nga jô nkulu mejô Ézéchiel na a lat meboñ m’élé mebaé: ôlé “Juda,” a ôlé “Joseph.” (Lañe’ Ézéchiel 37:15-17.) Minsili bôte ba lañe bekalate bangan ba sili” ya Nkume mmombô a bete ya Ngone zangbwale, mbu 2016, a timin éfus éte a jô’ô na: “Yéhôva a nga kat Ézéchiel foé ndi nlem. A nga ka’ale na, a ye lat ayoñ Israël éyoñ é bulaneya si ya ntiñetan. Foé éte é mbe fe é liti’i élat ja ye bo zañe bebo bisaé be Zambe ya melu ya asu’ulan.”

9. Aval avé nkulan ajô ya kalate Ézéchiel wo tôéban Mesimesa’ane ya mbu ôse?

9 Ataté mbu 1919, Yéhôva a kôan miñwo’an, mmie mite mi ne ôlé “Juda.” Mvuse ya valé, bôte be bili ndi nleme ya nyiñe nnôm éto si va, be nga zu lat a miñwo’an; bizu’u bi bôte bite mbie bi ne ôlé “Joseph;” minsamba mite mibaé mi nga su’ulane bo ve “mbame wua.” (Jean 10:16; Zac. 8:23) Yéhôva a nga ka’ale na, alé ate abaé da ye bo jôme jia wo wé été. (Éz. 37:19) Den, minsamba mite mibaé mia saé a nleme wua éjôé Krist si, nnye ate nkulan ajô wo loone na, “David, mbo ésaé [Yéhôva].” (Ez. 37:24, 25) Mbu ôse, élat Ézéchiel a nga jô je, ja yené ne fômelé, éyoñ miñwo’an mi ngenane si va, a “mintômba mife,” mia sulan asu Mesimesa’ane ya awu Yésus. Bi’i ki, aval avé bi ne volô na élat éte é ke ôsu?

MAM BI NE BO ASU NA BI BA’ALE ÉLATE JANGAN

10. Aval avé bi ne volô na akônda é bo nlatan?

10 Jam ôsu é ne na, bia yiane bo éjote nyul. Éyoñ a nga to si va, Yésus a nga jô beyé’é bé na, ba yiane kôme sulu bebiene si. (Mt. 23:12) Môt a ne éjote nyul a nji bi nsisime ya émo, a ne étyi te wumulu émien. Éjote nyul ja volô bia na, bi bo ba be tele bia ôsu mewôk a nlem ôse, avale mewô’ ete e ne mfi asu na akônda é bo nlatan. Jam da dañ é ne na, môt a ne éjote nyul a ve Zambe nlem avak, amu Yéhôva “a tele bôte be ne mebun ngame yat, ve a mvamane ba be ne minlem nje’eban.”​—1 P. 5:5.

11. Aval avé bia yemete élate jangan éyoñ bia bindi atinane ya fembé a won?

11 Jame baa é ne na, bia yiane tu’a fas atinane ya fembé a won ya  Mesimesa’ane. Ôsusua na môs ôte wo kui, a e dañe dañ éyoñ môs ôte ô kuiya, kôme’e bindi atinane ya fembé é ne te mvusu, a won. (1 Bec. 11:23-25) Fembé é ne ndeme ya metuna’a ya nyule Krist é mbe teke nsem, wone ki a ne ndeme ya metyi mé a nga ve asu dangan. Ve bi nji yiane su’u ve na bi yem atinane ya fembé a won. Bia yiane fe yeme na ntañ ô ne ndeme ja liti na Yéhôva ba Yésus ba nye’e bia angôndô ya abui; Yéhôva a nga ve bia atyi’i Mone dé, Yésus ki a nga kañese na a wu asu dangan; teke nye’an ôfe wo dañe wuli. Éyoñ bia fas avale be nga nye’e bia, bia fe bi ne ntindane ya nye’e be. Éyoñ bia be bobejañ bia nye’e Yéhôva, a ne ane bia bese bi tii nkol, nkole wo yemete élate jangan.

Éyoñ bia jamé, bia yemete élate jangan (Fôtô nyi a lu’an a abeñe 12 a 13)

12. Aval avé éve’ela Yésus a nga nyoñ kalate Matthieu ja liti na Yéhôva a yi na bi jamé bôte bevok?

12 Jame lale é ne na, bia yiane jamé a nlem ôse. Éyoñ bia jamé bôte bevok, bia liti na, bia nye’e ntañ Yésus a nga ya’an asu mam abé mangan biabebien. Tame lañ évé’an Yésus a nga nyoñ kalate Matthieu 18:23-34. Éyoñ ete sili’i womiene na: ‘Ye ma bo fo’o jôme Yésus a jô éfuse ji? Ye ma yeme fo’o tebe été bobejañ, a jibi be? Ye ma jamé fo’o môt a te bo ma abé a nlem ôse? E ne été na bikop bia selan; bivo’o biziñ bi ne bo ayaé ya jamé, amu bi nga bialé abé été. Ve éve’ela ji ja liti bia jame Yéhôva a yi na bi bo. (Lañe’e Matthieu 18:35.) Yéus a jô bia bôsa na, nge bi teke jamé bôte bevok, a to ke na bi bili benya beamu ya bo de, Yéhôva fe a ye ke jamé bia. Angôndô ajô fo’o! Bia yemete élate jangan éyoñ bia jamé bôte bevok, avale Yésus a jô bia.

13. Aval avé bia liti na bia nye’e mvo’é a élat?

13 Éyoñ bia jamé bôte bevok, bia liti na bia nye’e mvo’é. Nlômane Paul ô  nga lebe bia na bi “[ba’ale] nlatane ya nsisim a ntabane mvo’é.”(Beép. 4:3, Mfefé nkôñelan) Zia biyoñe ya Mesimesa’ane, e dañedañ alu ya mesimesa’ane, bia yiane kôme fas avale bia belane bôte bevok. Sili’i womiene na: ‘Ye da kôme fo’o yené na, me ne môt a ba’ale ki ôviti’i ziñ? Ye ba yeme fo’o ma ane môt a nye’e mvo’é a élat?’ Minsili mite mi ne fo’o mi bia yiane sili biabebien éyoñe ya Mesimesa’ane.

14. Aval avé bia liti na bia jibi bobejañ “a nye’an”?

14 Jame nyini é ne na bia yiane vu Zambe wongane ya nye’an. (1 Jean 4:8) Bi nji yiane ve’ele jô môs éziñe na: “Ma yeme na ma yiane nye’e bobejañ, ve me nji bo ntindane ya bo mvôé môt ase.” Môt a jô nalé a tôñe ki melebe me Paul ma jô na, bia yiane ‘jiban a nye’an.’ (Beép. 4:2) Paul a jô ki ve na, bia yiane jiban. A jô na bi bo de “a nye’an.” Nga mia yene nsela’ane? Mekônda mangan me ne njalan a bôte meval meval; Yéhôva a nga dutu bese be nye. (Jean 6:44) Yéhôva a nga dutu be amu a nye’e be. Nde aval avé bi ne bele jô na bi bi vo’o nye’e be? Bi nji yiane nyume môte nye’ane Yéhôva a yi na bi ve nye.​—1 Jean 4:20, 21.

BIA YE KANDANE BO MESIMESA’ANE ÉYOÑ ÉVÉ?

15. Amu jé bia jô na, mbu éziñ wo zu, ñwô ôte bia ye kandane bo Mesimesa’ane ya awu Yésus?

15 Mbu éziñ wo zu, ñwô ôte bia ye kandane bo Mesimesa’ane ya awu Yésus. Amu jé bia jô nalé? Kalate Becorinthien ôsu, Paul a jô Bekristen be ne miñwo’ane na, éyoñ ése ba bo mesimesa’ane ya awu Yésus, ba ke ôsu a “kañete awu Tate akekui a ye so.” (1 Bec. 11:26) Éfia ‘nsoan’ Paul a belane je éfuse ji, ja funane ji Yésus a nga belane je, éyoñ a nga kobô ajô ya asu’ulane ya émo. A nga kobô ajô beta étibela’a a zu, a jô’ô na: “Ndeme ya Mone môt je aye yené yôp été : éyoñe te meyoñe mese ya si nyô me aye yi du, a yene Mone môt a za’a minkute yôp a ngu a étôto’ anen. A ye lôme beange bé a beta nkobô toñ, be aye kôane bôt Zambe a nga top be so’o mimfa’a minyine ya si nyô, ataté mfa’a yôpe wua, akekui mfa’a yôp mbok.” (Mt. 24:29-31) ‘Nkôan bôte Zambe a nga top,’ wo ye boban éyoñ miñwo’an mi ngenane si va, mia ye bi ma’ane map. Jam éte da ye boban valé beta étibela’a a tatéya, ôsusua na bita ya Harmaguédon bia boban. Wônaa, bôte 144 000 ba, ba ye fulan a Yésus, na be wosane bejôô bôte ya si. (Nli. 17:12-14) Éyoñ jam ete da ye kui, bia ye ke beta bo Mesimesa’ane môs éziñ, amu Yésus é bo a ‘soya.’

16. Amu jé wo kômbô tabe Mesimesa’ane ya mbu wu?

16 Ngo’o nge bia bese bia ve ngule ya tabe Mesimesa’ane ya mbu wu, Ngone lale é too melu 31! Ngo’o nge Yéhôva a volô bia na bi ke ôsu a nyan élat é ne zañe jangan! (Lañe’e Besam 133:1.) Te bia vuane na môs éziñe wo zu, ñwô ôte bia ye kandane bo Mesimesa’ane ya awu Yésus. E zañe va, enjeñané a ngul ése na bi tabe Mesimesa’ane ya mbu wu, enlitané na bia nye’e bi yene’ élate bebo bisaé be Yéhôva ba bu’ubane je éyoñe ya Mesimesa’ane.