Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngon ôsu 2017

Yéhôva a nga ve wo fili ya top, yeme’e belane je

Yéhôva a nga ve wo fili ya top, yeme’e belane je

“Vôme nsisime [Yéhôva] ô né, vôm ate éto fili é né.”2 BEC. 3:17, Mfefé Nkôñelan.

BIA: 40, 54

1, 2. (a) Éyoñe ba fas ajô fili ya top, asimesan avé bôte be bili? (b) Kalate Zambe a ye’ele bia jé a lat a fili ya top, a minsili mivé bia zu fas ayé’é di?

MINGA éziñ a mbe a bili beta ntyi’ane ya nyoñ, nde a nga jô mvôé jé na: “Te bo ma na me fas, kate ma jam ma yiane bo. Abime te.” Minga ate a nga jibi jô na be kate nye jam a bo, a lôte na a belane das Nté biôm a nga ve nye, fili ya nyoñe mintyi’an. Wo ki, Jé wo zômbô, ye nyoñe mintyi’an, ye jô’é bôte bevok be nyoñe mintyi’ane señe jôé? Ô lôô jam ete aya?

2 Bôt be faseya nsili ôte den a ntoo abui mimbu. Bôt béziñ ba jô na bi nji bo fili ya top, amu ba simesane na, Zambe a nga mane tili mam mese ma bobane den. Bevo’o ba jô na, bi ne bo nya fili nge bia bo mam mese bia kômbô bo. Ve nya ajô a ne na, Kalate Zambe étam, nnye a ne kôme yalane nsili ôte. Amu jé bia jô nalé? Amu a kate bia na, Zambe a nga té bia a fili ya top; ngule ya nyoñe mintyi’an. (Lañe Josué 24:15.) Kalate Zambe a ve biyalane ya abui minsili ane: Aval avé bi ne yeme nyoñe mintyi’an? Ye ngule ya nyoñe mintyi’an é bili minné? Aval  avé mintyi’ane bia nyoñ mia liti na bia nye’e Yéhôva nya nye’ane? Aval avé bi ne liti na bia semé mintyi’ane mi bôte bevok?

JÉ BI NE YÉ’É BE YÉHÔVA BA YÉSUS? 

3. Éve’ela évé Yéhôva a ve bia mfa’a ya belane fili jangan?

3 Yéhôva étam nnye a ne fili ya bo jôm ése a yi, ve aval a belan éto fili jé ja ve bia mbamba éve’ela ya tôñ. Éve’an é ne na, a nga tobe ayoñ Israël na e bo “jôme jé émien.” (Dt. 7:6-8) A nji nyoñe ntyi’an ôte tu-nlô. A nga tôé ngaka’a a nga bo mvôé jé Abraham mintete mimbu mvus. (Met. 22:15-18) Nde fe, mimboone mi Yéhôva mia lu’an kom ése a nye’an, a zôsô. Jam ete da yené aval a nga lebe bone b’Israël, biyoñe bise be nga lume nye mvus. Éyoñ ése be nga liti nye na ba jôban abé dap, Yéhôva fe a nga liti be nye’ane wé, a jamé fe be. A nga jô na: “M’aye saé [Israël amu bijabô bié]. M’aye nye’e be te nné.” (Os. 14:4) Ke mbamba éve’ela ya tôñe le, mfa’a ya belane fili jangan asu mfi bôte bevok!

4, 5. (a) Ététéa évé Yéhôva a nga taté ve fili ya top, a nga belane je aya? (b) Nsili ôvé môt ase ya be bia a yiane sili émien?

4 Éyoñe Yéhôva a nga taté na a té biôm, a nga tobe na a ve bitétéa bié bi ne fek fili ya top. Ététéa ôsu a nga ve das ete e mbe atyi’i Mone dé, “éve’ela Zambe a ne te yené.” (Beco. 1:15, Mfefé Nkôñelan) Ôsusua na Yésus a so si va, a nga tobe na a ke ôsu a wulu ba’aba’a a Ésa wé, a na a ke ki ngame Satan. Éyoñ a soya si va, a nga ke ôsu a belane fili jé ya top asu ya na a dañe meve’ele me Satan. (Mt. 4:10) Beta meye’elane Yésus a nga bo Yéhôva alu be nga bi nye, a nga ba’alane Yéhôva na, a ye ke ôsu a bo ve nkômbane wé. A nga jô nye na: “A Tat, nge wo ame’ete, ô va me élaé ji: ve akôsa bo nalé, sa ane me anye’e, ve ane wo anye’e e bo’ok.” (Lc. 22:42) Ngo’o nge bia fe bi ne vu Yésus, a belane fili jangan na bi wumulu Yéhôva! Ye bi ne ngule ya bo de?

5 Teke vaa nge beté, bi ne vu Yésus amu bia fe bi nga téban éve’ela Zambe, a éfunane jé. (Met. 1:26) Ve fili jangan é bili minné. Bi nji bo ane Yéhôva. Kalate Zambe a liti nalé, a jô fe na bia yiane semé minné Yéhôva a nga ve bia. A ye’ele na, binga ba yiane suu bebien éjôé beyôme si, bone ki ba yiane suu bebien éjôé bebiaé si. (Beép. 5:22; 6:1) Aval avé minné mite mia liti bia avale bia yiane belane fili jangan ya top? Éyalane ya nsili ôte é ne ve bia ényiñe ya melu mese.

BÔTE BE NGA YEME BELANE FILI JAP YA TOP, A BA BE NGA DIMINE BELANE JE

6. Liti’i amu jé Yéhôva a nga bo mbamba jam na a ve bia minné.

6 Ye bi ne jô na, bi ne nya fili éyoñe bi nji bo ngule ya bo mam mese bia kômbô bo? Ôwé! Amu jé bi ne jô nalé? Amu minné Zambe a nga futi mi ne ba’ale bia. Éve’an é ne na, éyoñe bia dutu metua, bi ne belane fili jangane ya top. Ve ye nlem wo ye bômbô wo si nge wo wulu njoñ ô ne teke metiñ, wu ndutu metua ase a bo ane a kômbô? Momo. Minné mi ne bia bese nya mfi nge bia yi na bi bo nya fili. Bi tame zu yene bone bive’ane ya Kalate Zambe bia liti avale bi ne yeme belane fili jangane ya top, a semé minné Yéhôva a nga ve bia.

7. (a) Aval avé das Yéhôva a nga ve Adam da liti nsela’ane a ne zañe betit a bôt? (b) Aval avé Adam a nga taté na a yeme belane das éte?

 7 Éyoñ a nga té Adam, môt ôsu, Yéhôva a nga ve nye das a nga ve fe beéngele, fili ya top. Das ete e mbe e liti’i nsela’ane a ne zañe bôt a betit, amu betit be nji bi ngule ya fas. Tame yen aval Adam a nga taté na a yeme belane das ete. Yéhôva a nga taté té betit ôsusua na a té môt. Ve Yéhôva a nga jô’é na, Adam nnye a bi mevak ya ve betit biyôlé. “Ane [Zambe] a nga zu bie be môt a yen ane a ye yôlé bie môé.” Adam a nga tu’a fombô tit ése, a ve je éyôlé ja yiane je. Yéhôva a nji bene biyôlé Adam a nga ve betit. Ve, “jôé se môt a nga yôlé jôm ése é vee, nde ete e mbe jôé dé.”Met. 2:19.

8. Aval avé Adam a nga dimine belane fili jé ya top, a nalé a nga so jé?

8 Mbia jam a ne na, Adam a nji ke ôsu a semé ésaé Yéhôva a nga ve nye ane mbé mefup, a mba’ale ya afup Éden. A nji ke ôsu a nye’e éto fili Yéhôva a nga beta ve nye éyoñ a nga jô na: “Biaéane bon, a fôé, a yiane si nyô, a jôô je; jô’ane fe kos . . . anon . . . a jôm ése é vee j’awulu si nyô.” (Met. 1:28) Ve éyoñ a nga di ébuma Yéhôva a nga kamane nye na a di, a nga tyi’i na a dañe minné Yéhôva a nga ve nye. Nge bi ne minjuk été den, a ne amu Adam a nga dimine belane fili jé ya top. (Bero. 5:12) Bia yiane semé minné Yéhôva a nga ve bia, amu bia kôme yeme minju’u mi nga kui amu Adam a nga dimine belane fili jé.

9. Yéhôva a nga ve ayoñ Israël fili ya tobe jé, a aval avé be nga belane fili éte?

9 Mvoñe bôt Adam ba Ève ja tôban minjuk, a awu amu melo bebiaé bap. Ve be nga bi ngule ya belane fili jap. Bia yeme nalé éyoñ bia yen avale Yéhôva a nga nyiñ a ayoñ Israël. Yéhôva a nga ve ayoñ Israël fili ya top: e bo ayoñe dé, nge momo. (Nk. 19:3-6) Ayoñ ese e nga tobe na da bo ayoñe Zambe, ane bese be nga jô na: “Mam mese Yéhôva a te jô, bi aye bo.” (Nk. 19:8) Ve éngôngole jam é ne na, ayoñ Israël é nji tôé ngaka’a jé. Den, bia yiane ke ôsu a fas éve’ane te, nalé aye volô bia na, bi yeme belane fili jangane ya top, a semé minné Yéhôva a ve bia.1 Bec. 10:11.

10. Bive’ane bivé bia liti na, bone be bôt be ne ve Yéhôva nleme mvaé akusa bo be ne bebo mam abé? (Fombô’ô fôtô ya atata’a ya ayé’é di.)

10 Kalate Behébreu kabetôlô 11, a ve bia biyôlé bebo bisaé be Yéhôva 16, be nga tobe na ba semé minné Yéhôva a nga ve be. Nalé a nga so be abui bibotan, a ndi nlem asu melu ma zu. Bi tame nyoñ éve’ane Noé; a nga liti ngule mbunan éyoñ a nga tobe na a lôñ arche avale Yéhôva a nga jô nye na a lôñ. Mboon ôte ô nga nyii nda bôte jé. (Beh. 11:7) Abraham ba Sara be nga bo Yéhôva mewôk a nlem ôse éyoñ a nga jô na be ke si ya ntiñetan. Be nga bi “[fane] ya bulan” e Ur, beta tison be mbe be so’ok. Ve, be nga bem ôsimesane wop e “mam me mbe ntiñetan,” amu be nga “kômbô si j’adañ.” (Beh. 11:8, 13, 15, 16) Moïse ki a nga lum akume ya Égypte mvus, a “tope ñwuan ékpwe’ele baa be bôt be Zambe a dañe na, a vôman abé été étun éyoñ.” (Beh. 11:24-26, Mfefé Nkôñelan) Ngo’o nge bi ne vu bebo bisaé be Yéhôva ya melu mvus bete,  éyoñe bia belane fili jangane ya top asu ya na bi bo nkômbane Zambe.

11. (a) Beta ébotane mbé bi ne bi amu bi ne fili ya top? (b) Jé é ne dañe tindi wo na ô yeme belane fili jôé ya top?

11 E ne fo’o été na, e ne bo tyi’ibi ya jô’é môte mfe a nyoñe mintyi’an asu dangan, ve nalé a bo na bi sup beta das Yéhôva a nga ve bia, fili ya top. Kalate Deutéronome 30:19, 20 (lañe) a kate bia bibotane bia bi éyoñe bia yeme belane das ete. Éfus 19 ja liti ane Yéhôva a jô bone b’Israël na be top. Éfuse 20 ja liti bia na, Yéhôva a nga ve be fane ya liti nye abim avé ba nye’e nye. Bia fe bi ne tobe na bia bo Yéhôva ésaé. E jam e ne dañe tindi bia na bi nyoñe ntyi’an ôte e ne na, bi belane fili jangane ya top asu ya na bi liti nye na bia nye’e nye, a na bia wumulu nye.

YEME’E BELAN ÉTO FILI JÔÉ

12. Aval avé bi nji yiane belane fili jangane ya top?

12 Tame simesane na ô nga ve mvôé jôé das éziñ é to beta tañ. Éyoñe te wo wô’ô na a te wua je akun, nge na, a te belane je na a bo môt éziñ mbia jam. Nga wo ye wô’ô jam ete mbia abé? Tame ñhe simesan avale Yéhôva a wô’ôtan éyoñ a yen ane bizu’u bi bôt bia dimine belan éto fili jap. Yeme fe na Kalate Zambe a nga jô na, “melu me asu’ulan,” bôt ba ye bo “bikalak.” (2 Tim. 3:1, 2) Bi nji yiane dimine belane beta das ate. Nde, jé bi ne bo asu ya na bi yeme belane fili jangane ya top?

13. Kate jam bi ne bo asu ya na, bi bo te dimine belan éto fili jangan.

13 Môt ase ya be bia a ne fili ya tobe bemvôé bé, mbote wé, nyanga jé, a mimvômane mié. Ve éto fili éte é ne bo “ébuta’a ya abé,” nge bia tobe na bia bo belo ya minkômbane miangane ya minsôn, nge jô’é na émo ji nje é mé bia. (Lañe 1 Pierre 2:16.) Bi nji yiane belan éto fili éte ane “jôme ya bo mame ya minsôn,” bia yiane nyoñe ntyi’ane ya bo “mam mese mfa’a ya duma Zambe.”Beg. 5:13; 1 Bec. 10:31.

14. Aval avé ndi bia futi be Yéhôva é ne volô bia na bi yeme belan éto fili jangan?

 14 Jam afe bi ne bo asu ya na bi yeme belan éto fili jangan e ne na, bi tabe Yéhôva mebun, a semé minné a ve bia. Nnye étam a ne ‘nyô a ye’ele bia ane bia ye yen mvolan, nyô a wulu bia zen bia yiane ke.’ (És. 48:17) Bia yiane sili biabebiene si, a kañese na: “Zene môt é nji bo be émien; ñyeman ô nji bo nleme môt été, ane a ye wulu a zene jé.” (Jr. 10:23) Bi nji yiane du’uban, a tabe ndi a fek jangan aval Adam a ayoñ Israël be nga bo. Ve bia yiane ‘Tabe Yéhôva mebun a nleme wongan ôse.’Min. 3:5.

TE KAMANE MÔTE MBOK NA A BELAN ÉTO FILI JÉ

15. Begalate 6:5 a ye’ele bia jé?

15 Bia te yene yôp na, Yéhôva a nga ve bia minné, nné wua ô ne na, bia yiane semé mintyi’ane bôte bevok ba nyoñ. Amu jé? Môt ase a ne fili ya top, ajô te, Bekristene bebaé be se ngule ya nyoñ kom ése ve avale ntyi’ane da. Jam ete e ne été, to’o éyoñe da fombô ntabane wongan, a ékaña’a bia ve Yéhôva. Ba’ale’e ñye’elan ô ne e kalate Begalate 6:5. (Lañe.) Éyoñe bia kañese na Kristen ése ja yiane “be’e mbe’e wé émien,” nalé aye bo na bi jô’é môt ase a nyoñe mintyi’ane mié.

Bi ne nyoñe mintyi’an, teke tindi bôte bevo’o na be yene mam ane bia (Fombô’ô abeñ 15)

16, 17. (a) Aval avé fili ya top é nga soo jo’ojo’o akônda ya Corinthe? (b) Aval avé Paul a nga kôm ajô te, a jam ete da ye’ele bia jé a lat a fili bôte bevok be bili na ba nyoñe mintyi’an?

16 Tame yen éve’ane Kalate Zambe a ve ja liti amu jé bia yiane jô’é bobejañ bebien be nyoñe mintyi’an, éyoñe jam da fombô mone môte ya nlem. E tisone ya Corinthe, nsili éziñ ô nga kandé Bekristen ngap ébaé. Nsili ôte ô mbe na, nge Kristen ja kuse tit e makit a too ke na tit éte é nga veban ane metuna’a mfa’a ya bengunemelan, ye a ne je di? Bôte béziñ be mbe be jô’ô na: ‘Amu na bengunemelan be ne zesé biôm, bi ne di tit teke tyelé nleme yôp.’ Ve bôte be nga taté kañe bengunemelan be mbe be yene na, nge ba di avale tit ete, a ne ve ane ba kañe bengunemelan bete. (1 Bec. 8:4, 7) Ajô éte e nga soo jo’ojo’o akônda été. Aval avé Paul a nga volô Bekristene ya Corinthe na be bi ôsimesane Zambe?

17 Jam ôsu, Paul a nga ba’alane be na bidi bi vo’o bo na, môt a subu Zambe bebé. (1 Bec. 8:8) A nga bemene be na, be bo teke jô’é “éto fili” jap é bo “ékolé ôbak e be mintetek.” (1 Bec. 8:9, Mfefé Nkôñelan) Mvuse ya valé, a nga lebe ba be mbe be bili mone môte ya nlem a ne akap abui na, be nji yiane ve ba ba di tit mekua. (1 Bec. 10:25, 29, 30) A nji be jame ya nyoñ éngbwemese, Kristen ése é mbe é yiane nyoñe ntyi’an. Nde ñhe, nga bia fe bia yiane jô’é na bobejañ be nyoñe mintyi’ane miap?1 Bec. 10:32, 33.

18. Aval avé bia ye liti na bia nyane édima das Yéhôva a nga ve bia?

18 Yéhôva a nga ve bia fili ya top, nya fili le. (2 Bec. 3:17) Bia nyane édima das ete, amu da ve bia fane ya nyoñe mintyi’ane mia liti Yéhôva na bia nye’e nye. Enkelané ôsu a liti na bia nye’e beta das Yéhôva a nga ve bia, éyoñe bia wumulu nye, a éyoñe bia jô’é na bôte bevok be nyoñe mintyi’ane miap.