Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngon ôsu 2017

Emveané bôte bi to be ndi mimbe’e

Emveané bôte bi to be ndi mimbe’e

“Mam mete ô va’a me be bôt be ne [ba ya tabe be ndi] mbe be aye bo ngule ya ye’ele fe bôte bevok.”2 TIM. 2:2.

BIA: 103, 101

1, 2. Aval avé abui bôte da yen ésaé jap?

BE WÔ’Ô yeme bôte béziñ a aval ésaé ba bo. Abui bôt da dañe semé môt a bili aval ésaé éziñ, nge ke nyô a ne nkôñ éziñ. E metume méziñ, éyoñe mia môt mia zu yemban, nsili wua ya minsili a taté wo sili ô ne na: “Jé wo bo ényiñ?”

2 Éyoñe Kalate Zambe a kobô ajô bôte béziñ, a kate fe ésaé be mbe be bo’ok. A jô na, “Mathieu a mbe nyoñe taxe”; “Simon, nkôme bikôp”; a “Luc mbamba nsaé bôt.” (Mt. 10:3; Mam. 10:6, Mfefé Nkôñelan; Beco. 4:14) Ba yeme fe bôt a mimbe’e be be’e ékôane Yéhôva. Bi ne lañe Njô bôte David, nkulu mejô Élie, a nlômane Paul. Bôte bete be nga to be nye’e mimbe’e miap. Nge bia fe bi be’e mimbe’e miziñ, bia yiane mie nye’e.

3. Amu jé minnôm mia yiane yañele bisoé? (Fombô’ô fôtô ya atata’a ya ayé’é di.)

3 Abui ya be bia da nye’e ésaé ba bo, a ba kômbô je bo nnôm éto. Ve éngôngole jam é ne na, ataté melu m’Adam,  miaé bôt ôse wo yômbô, a miaé ôvok wo zu fole wô. (Ec. 1:4) Mimbu mi ndôme lôte mi, jam ete da te telé benya Bekristen minju’u été. Ésaé bebo bisaé be Yéhôva ba bo, é ne ve ke ôsu a nen, a abui mam da tyendé. Éyoñe mam ma tyendé, to’o mezene ya bo me ma tyendé fe. Mezene méziñ me wô’ô sili na, be tyendé biôm beyeme mam ba kôm. Minnôm mi bôte mivok, mi ne yen ayaé ya tôñe mintyendane mite. (Lc. 5:39) E ne kui na, bisoé bi bo ngul a dañe minnôm. (Min. 20:29) Ve e yañele bisoé na bi be’e beta mimbe’e, a ne jam da liti nye’an, a jam benya bôtô ba yiane bo.Lañe Besam 71:18.

4. Amu jé bôte béziñe ba yen ayaé ya ve ba bevok mimbe’e? (Fombô’ô nka’ale ô ne nlô ajô na, “ Amu jé bôte béziñe be nji kômbô ve ba bevok mimbe’e?”)

4 Bôte be be’e mimbe’e, be ne bo teke yene mfi ya yañele bisoé. Bôte béziñ ba ko woñe ya jañele mimbe’e miap ba nye’e. Ba bevok ba ko woñe na, bisoé bi ne bo teke bo mam avale bebien ba bo me. Bevo’o ki be ne jô na, be nji bi éyoñe ya yañele môte mfe. Bisoé ki bia yiane tabe ntyele ya bo ôjeja’a, éyoñe be nji ve be abui mimbe’e.

5. Minsili mivé bia zu fas ayé’é di?

5 Bi tame zu fas ajô te a zene ya minsili mibaé. Nsili ôsu, aval avé minnôm mi ne volô bisoé na bi be’e mimbe’e, a amu jé nalé a ne mfi? (2 Tim. 2:2) Nsili baa, Amu jé e ne mfi na, bisoé bi bi mbamba ôsimesan nté ba saé a bobejañe be nto minnôm, a jeñe na be vu be. Bia zu taté yen avale Njôô bôte David, a nga kômesane mone wé mfa’a ya na, a be’e beta mimbe’e.

DAVID A NGA KÔMESAN A SUK SALOMON

6. Jé Njôô bôte David a mbe a kômbô’ô bo, a aval avé Yéhôva a nga yalane nye?

6 David a nga bo abui mimbu a kele a tube Saül, mvuse ya valé nde a nga bo njôô bôt, a nyiñ abeñe nda. Ve nlem ô mbe nye abé, amu Yéhôva a nji be a bili  “nda,” a mbe a kômbô’ô lôñe nye temple. Nde David a nga jô Nathan, nkulu mejô na: “Tame yen, ma me to nda é ne nlôñan a cèdre, ve éwolo élate ya Yéhôva é to bindelé si.” Nathan ve yalane nye na: “Bo’o jam ese e ne wo nlem; amu Zambe a ne be wo.” Ve Yéhôva a nga ta’a mam aval afe. A nga jô Nathan a ke kate David na: “W’aye lôñe me nda m’aye tabe.” Akusa bo a nga jô David na a ye ke ôsu a botane nye, Yéhôva a nga tyi’i na, Salomon, mone David, nnye a ye lôñe temple. Jé David a nga bo?1 Mka. 17:1-4, 11, 12; 29:1.

7. Jé David a nga bo éyoñ a nga yeme ntyi’ane Yéhôva?

7 David a nji bene suk ésaé ya temple, akusa bo a mbe a yeme na aye ke bi duma ya été. Be nga su’ulane loone temple ate na, temple Salomon, sa ke temple David. Akusa bo jam ete e nga taé David nleme na a nji tôé ñyiane wé, a nga suk ésaé melôñ a nlem ôse. A nga ji’a mane tak mengôs, a kôane bityé, mvot, argent, or, a abui bilé bi cèdre. Nde fe, a nga ve Salomon ngule nyôl a jô’ô na: “Éyoñe ji, a mone wom, Yéhôva a tabe’e be wo; mam môé me kele’ ôsu; a ô lôñe’ nda Yéhôva Zambe wôé, aval ane a nga kobô ajô dôé.”1 Mka. 22:11, 14-16.

8. Amu jé David a mbe ve jô na, Salomon a nji bo ngule ya bo ésaé melôñ ya temple, ve jé a nga bo?

8 Lañe 1 Minkañete 22:5. Éko éziñ David a nga yiane jô na, Salomon a nji bo ngule ya bo avale beta ésaé te. Amu na, temple a nga ye bo “étua étôto’o jôm,” nde fe, Salomon a mbe a ngenane “mongô a nte’an.” Ve David a mbe a yeme na, Yéhôva a ye ve Salomon ngule ya bo ésaé a nga ve nye. Nde, David a nga beme mis e mam a mbe ngule ya bo; a nga tôkan abui biôm e nga ye volô ésaé te.

BO’OK MEVAK YA YAÑELE BÔTE BEVOK

A ne jam mevak éyoñe bia yen ane bisoé befam bia be’e beta mimbe’e akônda été (Fombô’ô abeñ 9)

9. Aval avé minnôm mi ne bi mevak éyoñe mia ve bisoé mimbe’e? Va’ak éve’an.

9 Bobejañe be ne minnôm, be nji yiane wô’ô abé éyoñe da sili na, be ve bisoé mimbe’e miap. Ve nalé a yiane boban amu na, éyoñe ba yañele bisoé, ésaé Yéhôva ja ke ôsu. Bôt be be’e mimbe’e, ba yiane wô’ô mvaé éyoñe bisoé ba te yañele, bia be’e mimbe’e. Bi tame nyoñ éve’an. Tame simesane mevak ésa a wôk éyoñ a ye’ele mone wé ndutane metua. Éyoñ a ngenane mongô, a nji bo jam afe, fo’o ve fombô ane ésa a dutu metua. Aval a yaé, avale te fe ésa a zu a timine nye mam a bo. Éyoñe mongô a kui ôkala a ne dutu metua, émien a kaa na a dutu, ésa a to nye fefel, a za’a fe a ve nye melebe mefe. Biyoñe biziñ, ésa a ne volô nye,  ve mvuse ya valé, mon a ye taté na a dutu teke mvolan ésa. A éyoñ ésa a ye bo nnôm, nnye a ye su’ulane be’e nye metua wé. Mfefek ésa ô ne mevak amu wo yene na, mon a nga yeme dutu metua étam, teke mvolan. Avale da fe, minnôm mi ne mevak éyoñe mia te nyoñ éyoñe ya yañele bisoé.

10. Ôsimesan ôvé Moïse a mbe a bili a lat a duma, a éjôé?

10 Minnôm mia yiane tabe ntyel a fulu éviele. Tame yen avale Moïse a nga bo éyoñe bôt béziñe ya Israël be nga taté na ba kulu mejô. (Lañe Nlañane Bôt 11:24-29.) Josué, mbo ésaé Moïse, a nga kômbô kamane be. Josué a mbe a yiane simesane na, ba zu wôlé beta éto Moïse a mbe a bili, a éjôé jé. Ve Moïse a nga jô nye na: ‘Ye wo [bo éviele] amu jôé dam? Ngo’o nge bôte bese ya Yéhôva be nto bekulu mejô, a Yéhôva a ve be nsisime wé!’ Moïse a nga yemelane na, Yéhôva nnye a mbe ajô te mvus. A lôte na a dutu duma be nye, Moïse a nga liti na nkômbane wé ô mbe na, bebo bisaé be Yéhôva bese be be’e avale mimbe’e dé. Aval ane Moïse, ye bi nji bo mevak éyoñe bôte bevo’o ba be’e mimbe’e bia yiane be’e?

11. Jé mojañ éziñ a nga jô éyoñe be nga ve môte mfe mbe’e wé?

11 Melu ma, bi bili abui bive’ela bi bobejañ ba te saé tañ abui mimbu, a kômesane bôte bevo’o na, be be’e mimbe’e. Bi bili éve’ane mojañe Peter, a te bo ésaé nkpwa’a mefan tañe mimbu 74. A te lôte mimbu 35 e wofise ya Béthel, Europe. A mbe ntebele ya ésaé nkañete ja boban angôse ya wofis ôte. Ve éyoñe ji, Paul, ésoé ja te saé a Peter mimbu mise mi, nje ba te ve mbe’e ôte. Éyoñe be nga sili Peter aval a yene ntyendan ôte, a nga yalane na, “Me ne angôndô ya mevak, amu a ne bobejañ ba te yañele asu ya na, be be’e beta mimbe’e, a ne fe ba ba nyoñe nju’u ya bo ésaé jap.”

JEÑEK A TÔÑE MELEBE MINNÔM MIA VE WO

12. Ñye’elan ôvé bia nyoñe nkañete Rehabam?

12 Éyoñe Salomon a nga wu, ane Rehabam (Roboam), mone wé a nga nyoñ éto njôô. Môs éziñ a mbe a yi melebe na a kôme jam éziñ, nde a nga taté ke laan a minnôm. Ve a nga bene melebe map! A nga viane tôñe melebe bebo bisaé bé be mbe bisoé. Nde mbia jam a nga kui. (2 Mka. 10:6-11, 19) Ñye’elan ôvé bi ne nyoñ été? Bisoé bia ye liti na, bi ne fek éyoñe bia ye jeñ, a tôñe melebe benya bôtô ba ve be. Ba yiane jeñe mezene mese ya bo de, be nji yiane bo ôjeja’a ya wua melebe benya bôtô ba ve be fé.

13. Aval avé bisoé a minnôm ba yiane saé fufulu?

13 Bisoé biziñ bi ne tebele ésaé minnôm mi bôte mia bo. To’o nalé, ba ye yene mfi ya taté jeñe fek, a ñyeman minnôm mi bôt, ôsusua na ba nyoñe mintyi’an. Paul bia te yene mvus, a nga fole Peter ésaé ya tebele ésaé nkañete ja boban angôse ya wofise wop, a jô na, “Ma jeñe na me bi melebe me mojañe Peter, a ma ve bôte bia be be bia saé ngule nyôle na, be bo avale da.”

14. Jé bia yé’é avale Paul ba Timothée be mbe be saé fufulu?

14 Timothée, ésoé ndôman, é nga saé abui mimbu a nlômane Paul. (Lañe Bephilippien 2:20-22.) Paul a nga tili bôte ya Corinthe na: “Me nga lôme  mia Timothée, nnye ate a ne mone wom me anye’e a nya mone wom be Tate, nnye a ye bo mia mi simesane mezene mam me ne be Krist, ja’ana aval ane me wô’ô ye’ele vôm ase, [akônda].” (1 Bec. 4:17) Mejô mete ma liti na, Paul ba Timothée be mbe be saé fufulu. Paul a nga nyoñ éyoñe ya ye’ele Timothée ‘mezene mé me ne be Krist.’ Paul a mbe a nyeke’e Timothée, amu a mbe a kôme nyoñ éyoñe ya vô’ôlô nye. Nde fe, Paul a mbe a to ndi na, Timothée a ne ngule ya nyoñe ngap a miñyiane ya nsisim mi bôte ya Corinthe. Ngo’o avale mbamba éve’ela bemvendé ba yiane vu, nté ba yañele bôte bevo’o na be be’e mimbe’e akônda été!

EMBA’ALANÉ MVO’É A ÉLAT ÉKÔANE YÉHÔVA ÉTÉ

15. Aval avé melebe Paul a nga ve Bekristene ya Rome ma yiane volô bia éyoñe ntyendan éziñ wo nambe bia?

15 Bia nyiñe mbamba biyoñ. Ngabe ya ékôane Yéhôva é ne si, ja yaé abui mezen, ve ñyaéan ôte wo bo na abui mam e tyendé. Éyoñe mintyendane mite mia nambe bia, embo’ané éjote nyôl, bi beme mis e mam ma fombô Yéhôva, sa ke émangan. Nalé a bo na, mvo’é é bo ékôane Yéhôva été. Paul a nga tili Bekristene ya Rome na: “Me ajô môt ase ya be mia na, . . . a bo’o te simesan émien adañ abim a yiane simesan. Ve simesan ôsimesane ya évôvoé, aval ane Zambe a nga ve môt ase abime mbunan. Amu na, aval ane bi bili bibu’a abui nyôle jia été, a bibu’a bise bi nji bi aval ésaé da: nalé ate fe bia, bi ne abui, bi ne nyôle jia be Krist.”Bero. 12:3-5.

16. Jé minnôm, bisoé, a binga bap be ne bo asu ya na be ba’ale mvo’é, a élat akônda Yéhôva été?

16 Bia bese, été ése bi tele, ensaéané mfa’a ya na, mam ma fombô beta Éjôé Yéhôva me ke ôsu. A minnôm, yañelané bisoé na bi bo mam mia bo. A bobejañe be ne bisoé, kañesané mimbe’e, yemané minné mienan, a kelané ôsu a semé minnôm. A beyal, vuané éve’ela minga Aquilla, Priscille, nnye a mbe a kele a litane nnôm, a su’u nye éyoñe bité biap bi nga tyendé.Mam. 18:2.

17. Ndi nleme fé Yésus a mbe a bili be beyé’é bé, a amu jé a nga yañele be?

17 Yésus a ne beta éve’ela a liti bia avale bi ne yañele bôte bevok na, be be’e mimbe’e. A mbe a yeme na, ésaé nkañete jé é mbeme man, a na, bôte bevok ba ye kee ésaé jé ôsu. Akusa bo beyé’é bé be mbe bebo mam abé, a mbe a to be ndi. A nga kate be na, ba ye bi abui ésaé ya bo a dañe nye. (Jn. 14:12) A nga belane mbamba mezene na a yañele be, a be nga kañete mbamba foé si ése.Beco. 1:23.

18. Mbamba be mam bevé bia yange, a jé bi ne bo éyoñe ji?

18 Éyoñe Yésus a nga wu, ane Yéhôva a nga wômôlô nye asu ényiñe ya yôp, a ve nye beta ésaé ya jôé “ba bese be adañe biwôlô, a ba be adañe biwôlô, a ba be ne abe biwôlô.” (Beép. 1:19-21) Nge bia wu bi wulu’u ba’aba’a a Yéhôva ôsusua na Harmaguédon a kui, Yéhôva a ye wômôlô bia mfefé émo wo ye bo zôsôô. Bia ye bo ésaé ja ye ve bia mevak. Ve éyoñe ji, bia bese bi ne bo beta ésaé a nyii bôt: ésaé ya kañete mbamba foé, a bo beyé’é. Bia bese, bisoé nge minnôm, enkelané ôsu a bi abui mame ya bo ésaé Tate.1 Bec. 15:58.