Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngon ébulu 2016

“Mejô me Zambe me ne vevee”

Minsili mi bôte ba lañe bekalate bangan

Minsili mi bôte ba lañe bekalate bangan

Mejô me ne e kalate Behébreu 4:12 ma jô na, “mejô me Zambe me ne vevee a me abo ésaé” ma tinan aya?

Bifuse bia bôman éfuse te, bia liti na nlômane Paul ô mbe ô kobô’ô ajô foé, nge nsôñane Zambe ô ne Kalate Zambe.

Bi wô’ô bo bi lañ éfuse te e bekalate bangan na bi liti na, Kalate Zambe a bili ngule ya tyendé binyiñe bi bôt, a jame te e ne fo’o été. Ve nge bia kômbô tu’a wôk Behébreu 4:12, e ne mfi na bi fase bifuse bia bôman éfuse te. Paul a nga jô Bekristen b’hébreu na, be saé fufulu a minsôñane mi Zambe. Abui minsôñane ya été e ne mimfufube mintilan. Paul a nga belan éve’ane bone b’Israël, mbe bete Zambe a nga vaa e mimkôm Égypte. Be mbe be bili ngaka’a ya ke nyiñ e si ya ntiñetan, e vôm “menyañ a wôé bi alen,” e vôm be mbe ngule ya bi nya awo’on.Nk. 3:8; Dt. 12:9, 10.

Nsôñane Zambe a mbe a bili mfa’a wop ñwô le. Ve mvuse ya valé, minleme mi bone b’Israël mi nga bo ayet, a be nga jembane mbunan, ane abui ya be be e nga sup awo’one Zambe a nga ka’ale be. (Nb. 14:30; Jos. 14:6-10) Ve Paul a nga beta jô na, “ntiñetane ya nyin awo’ane [Zambe] été” wo ye ke ôsu. (Beh. 3:16-19; 4:1) “Ntiñetane” te ô ne ngabe jia ya nsôñane Zambe a mbe a bili. Aval ane Bekristen b’Hébreu, bia fe bi ne yeme nsôñane Zambe a saé fufulu a wô. Paul a nga kobô mejô me ne e kalate Metata’a 2:2 a Besam 95:11, mfa’a ya ngôné na ngaka’a te é ne Kalate Zambe.

Teke vaa nge beté, bia wô’ô mvaé éyoñe bia yeme na, “ntiñetane ya nyin awo’ane [Zambe] été ô ngenan ô to.” Bi to ndi na bi ne ngule ya nyin awo’one Zambe avale Kalate Zambe a jô, a bi nyoñeya ntyi’ane ya bo de. Bi nji de bo amu bia tôñe metiñe me Moïse, nge amu Yéhôva a botane bia amu mbamba mimboane mife. Ve a ne amu bia ke ôsu a saé fufulu a nsôñane Zambe aval ô ne ntilan e Kalate Zambe. Nde fe avale bia te yen, betoyini be bôte ya si se be tatéya na ba yé’é Kalate Zambe a atinane ya nsôñane Zambe. Abui ya été e ne ntindane ya tyendé fatan ényiñe jap, e liti mbunane wop a mimboan, a e bo Bekristen. Avale Kalate Zambe a nambe be da liti ne sañesañe na, “mejô me Zambe me ne vevee a me abo ésaé.” Zambe a kate bia nsôñane wé e Kalate Zambe, nnye ate a tyendé binyiñe biangan, a a ye fe ke ôsu a wulu bia.