Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngon awômô 2016

“Mi bo te vuane liti nye’an mfa’a ya beyeñ”

“Mi bo te vuane liti nye’an mfa’a ya beyeñ”

“Mi bo te vuane liti nye’an mfa’a ya beyeñ.”BEH. 13:2.

BIA: 124, 79

1, 2. (a) Minju’u mivé abui beyeñ da tôbane mie melu ma? (Fombô’ô fôtô ya atata’a ya ayé’é di.) (b) Mba’alan ôvé nlômane Paul ô nga ve, a wo tindi bia na bi sili minsili mivé?

OSÉE [1] a nga kôlô e Ghana a ke Europe, e zu koon a ngenane te bo Ngaa, den a nto mimbu 30. A simesan: “Me nga ji’a yemelane na abui bôt da ye ke me nyoñe ngap. Nde fe, mbia avep a mbe. Éyoñe me nga kôlô nseñ avion a wô’ôtan ane mbia avep a bi ma éyoñ ôsusua ényiñe jam, nde me nga taté na ma yôn.” Osée a nji be a yeme nkobô ya vôm ate, jôme te nje a nga bo ngumba mbu teke kui na a yene mbamba ésaé éziñ. Nda bôte jé é mbe é jemba’ane nye, ényiñ é mbe nye ayet, a mbe fe a wô’ôtane na a ne étam.

2 Tame ve’ele simesan aval ô ne kômbô na bôte be nyoñe wo nge ô tele aval été te. To’o wo so si fé nge na to’o nyul ékôbe jôé é ne aya, ye wo ye ke wô’ô mvaé na bôte be nyoñe wo Aba Éjôé a ayôñ ése? Kalate Zambe a tindi benya Bekristen na be bo “te vuane liti nye’an mfa’a ya beyeñ.”  (Beh. 13:2) Ntamané ñhe fas minsili mi: Ôsimesan ôvé Yéhôva a bili a lat a beyeñ? Amu jé e ne sili na bi tyendé ôsimesane wongan a lat a beyeñ? A aval avé bi ne ngule ya volô bôte ba so mesi mefe na, be wô’ôtane na be ne nda jap éyoñe be ne akônda dangan?

ÔSIMESANE YÉHÔVA A BILI A LAT A BEYEÑ

3, 4. Avale kalate Nkôlan 23:9 a jô, aval avé ayoñe Zambe é mbe é yiane nyoñe beyeñ, a amu jé?

3 Abui bôt e nga tôñe bone b’Israël éyoñe Yéhôva a nga bo na be kôlô minkôm Égypte. Mvuse ya valé, Yéhôva a nga ve ayoñe dé nkobe metiñ ô mbe ô liti’i na a nye’e beyeñ. (Nk. 12:38, 49; 22:21) Akôsa bo na biyoñe biziñ beyeñ be nji be ngule ya bo mam mese, ve Yéhôva a nga liti nye’ane wé éyoñ a nga mane ta’a mam mfa’a ya jalé miñyiane miap. Be mbe ngule ya kôane mebuka’a bidi ya mefube me bone b’Israël.Lv. 19:9, 10.

4 Ane ô vaa na Yéhôva a nga jô bone b’Israël na be semé beyeñ, a nga jô fe be na be ko be éngôngo. (Lañe Nkôlan 23:9.) Be mbe be yeme “nlem ntabe.” B’Égyptien be mbe be bili fulu ya liti na, ayoñe dap a ñyebe wop bia lôte meyoñe mese a miñyebe mivok. Ajô te, ôsusua na bone b’Israël ba bo alo Égypte, b’Égyptien be mbe be nga vini be. (Met. 43:32; 46:34; Nk. 1:11-14) Bone b’Israël be nga nyiñ abé éyoñ be mbe beyeñ, ve Yéhôva a nga jô be na be nyoñe beyeñ ‘aval ane be bialébialé.’Lv. 19:33, 34.

5. Jé ja ye volô bia na bi nyoñe bôte ba so mesi mefe avale Yéhôva a bo?

5 Melu ma, bi ne tabe ndi na Yéhôva a nyoñe fe ngap a bôte ya mesi mefe ba tabe bisulan e mekônda mangan. (Dt. 10:17-19; Mal. 3:5, 6) Nge bia fas minjuk miap aval ane, mbia ñyoñane bôte ba nyoñe be, nge njuk be bili amu be nji yeme nkobô, bia ye jeñe mezene ya liti be nye’an a tebe été jap.1 P. 3:8.

YE E NE SILI NA BI TYENDÉ ÔSIMESANE WONGAN A LAT A BEYEÑ?

6, 7. Jé ja liti na Bekristen ya ntete mimbu ôsu be nga yé’é na ba sa’ale nsisime ya nye’e mingum mi bôt?

6 Bekristen ya ntete mimbu ôsu be nga ve ngule jap ése na, be dañe nsisime ya nye’e mingum mi bôt ô mbe zañe Bejuif. E Pentécôte 33 ya É.J., Bekristen be mbe be nyiñe Jérusalem be nga liti mimfefé Bekristen ya mesi mefe nye’an. (Mam. 2:5, 44-47) Nye’ane be mbe be nye’e Bekristen ya mesi mefe ô nga liti na, ba kôme wôk atinane ya e “liti nye’an mfa’a ya beyeñ.”

7 Ve nté akônda e mbe e yaék, njuk éziñ, éko éziñe nsisime ya nye’e mingumba mi bôt ô nga bialé. Bejuif be mbe be kobô’ô Grèk be nga wôk ôlun na ba nyoñe minkuse miap abé. (Mam. 6:1) Mfa’a ya na ajô te é kômban, minlôman mi nga tobe befam zangbwal, na be nyoñe bôte bese avale da yian. Befam bete bese be mbe be be’e biyôlé Begrèk, nalé a liti na, minlôman mi mbe mi kômbô’ô kôm ajô te e zôsô été.Mam. 6:2-6.

8, 9. (a) Jé é ne liti na bi bili fulu ya yene bôte bevok aval étam?(b) Jé bia yiane vaa minlem miangan? (1 P. 1:22)

8 To’o bia yemelane de nge momo, metume mangan ma nambe asimesan a mimboane miangan. (Bero. 12:2) Nde fe, bi wô’ô wôk ane bôte ba nyiñe bia fefel, bôte bia be be bia saé, nge bongô  be sikôlô bevok, ba kobô bôte ya mesi mefe abé. Ba kobô fe bôte ya meyoñe mefe nge ba be be’e nyul ékôp éfe abé. Abim avé avale mboane te da nambe bia? A jé bi wô’ô bo éyoñe môt a kpwe’ele ayoñe dangan—éko éziñ éyoñ a nene mam méziñ ya metume mangan?

9 Nlômane Pierre ô nga jaé ndeñ a fulu ya yene bôte be nji be Bejuif aval étam, ve ôte’ete’e ôte’etek a nga yé’é na a vaa mbia b’asimesane bete nlem. (Mam. 10:28, 34, 35; Beg. 2:11-14) Avale da fe, nge bia yene na fulu ya yene bôte bevok aval étam, nge fulu ya dañe nye’e ayoñe dangan é bialéya bia nlem, bia yiane ve ngul ése bi bili na bi vaa je. (Lañe 1 Pierre 1:22.) Bia yiane yeme na bia bese bia yi nkôtan; bia bese bi ne bebo mam abé akusa bo ayoñ bi né. (Bero. 3:9, 10, 21-24) Ajô te bi nji yiane yene na bia dañe bôte bevok, sa nalé? (1 Bec. 4:7) Bia yiane yene mam ane nlômane Paul, nnye a nga bemene miñwo’on Bekristen na be “nji fe bo bejin a mintabe, ve . . . ba ya bôte ya nda Zambe.” (Beép. 2:19) Teke vaa nge beté, ngule bia ve na bi sa’ale fulu ya yene bôte ya mesi mefe aval étam ja ye volô bia na bi jaé mfefé môt.Beco. 3:10, 11.

AVALE BI NE LITI BEYEÑ NYE’AN

10, 11. Aval avé ñyoñane Boaz a nga nyoñe Ruth wo liti ôsimesane Yéhôva a bili a lat a beyeñ?

10 Teke vaa nge beté, Boaz a nga liti ôsimesane Yéhôva a lat a beyeñ a ñyoñan a nga yeme nyoñe Ruth, ngone ya Moab. Éyoñ a nga ke fombô ane ésaé nkôane bidi ya afube dé ja wulu, Boaz a nji be ve bo te yene beta nsôl ésaé Ruth, nneñ a nga bo. Ruth a nji be ntindane ya taté sili ôsusua na a ke kôane bidi afup—ve a nga bo de—éyoñe Boaz a yemeya nalé a nga bo akap mfa’a Ruth, a kañese na a kôane bidi afup ba bebo bisaé bé.Lañe Ruth 2:5-7, 15, 16.

11 Minlañe miap mia liti ne sañesañe na, Boaz a nga nyoñe ngap a Ruth, a mbe a wô’ô nye éngôngo amu aval ényiñ a mbe a nyiñi ane nneñ. A nga taté lôme nye na a ke saé a bebo bisaé be binga bé asu na, befam be mbe be saék afup be bo te ndeñele nye. Mvuse ya valé nde a nga bo na Ruth a bi jôme ya di, a mendim ya nyu ane bebo bisaé bese bevok. Nde fe, Boaz a nji kobô nye abé, ve a nga volô nye nlem.Ru. 2:8-10, 13, 14.

12. Mbamba be mam bevé bi ne yen éyoñ bia liti beyeñ nye’an?

12 Boaz a nji nye’e Ruth fo’o ve amu fulu nye’an a fulu akap a nga liti ntyi wé Naomi, ve amu a nga su’ulane bo mbo ésaé Yéhôva. Boaz a nga liti minga a nga ke ‘sobô mefabe me Zambe ya Israël si’ nye’an. Nye’ane te ô mbe ô liti’i nye’ane Yéhôva wo ba’ale élat. (Ru. 2:12, 20; Min. 19:17) Avale da fe melu ma, mbamba mimboane miangan mi ne volô “bôte bese” na be yem benya mejôô, a wô’ôtan abime Yéhôva a nye’e be.1 Tim. 2:3, 4.

Ye bia nyoñe fo’o bôte be ndeme suan Aba Éjôé a ayôñ ése? (Fombô’ô mebeñ 13 a 14)

13, 14. (a) Amu jé bia yiane ve ngul ése na bi yeme nyoñe beyeñ Aba Éjôé? (b) Aval avé ô ne dañe njuk ô bili na ô subu bôte ya metume mefe bebé?

13 Bi ne liti beyeñ nye’an éyoñ bia nyoñe be a ayôñ ése Aba Éjôé. Bi yianeya yene na, bôte ba so mesi mefe be wô’ô ko woñ biyoñ biziñ a jibi tabe étam. Avale be nga ye’ele be, a nkôñ ényiñe wop, bi ne bo na be yene na bôte be bili nyul ékôp éziñ, nge bôte ya  meyoñe mefe ba dañe be. Ajô te bia bia yiane taté nyoñe be ngap, a ve be ayôñe nyul. Nge a ne nkobô wôé, application JW Language a ne volô wo na ô yé’é avale ba nyoñe beyeñ nkobô wop.Lañe Bephilippien 2:3, 4.

14 Ô ne wô’ô aval étam na ô subu bôte ya metume mefe bebé. Ô ne kate be mam méziñ ma fombô wo na ô dañe nju’u te. Wo ye ji’a yene na mam ma funane zañe jenan me ne abui a dañe mam ma selan—benya be mam nge befe’e—a na, metume mese me bili mam me ne abeñ a ma me ne abé.

VOLÔ’Ô BÔTE BESE NA BE WÔ’ÔTANE NA BE NE NDA JAP

15. Jé ja ye volô bia na bi kôme wô’ô bôte ba yé’é na ba nyiñe mfefé si?

15 Nge wo kômbô volô bôte bevok na be wô’ôtane na be ne nda jap akônda, sili’i womien e zôsô été na, ‘Nge ma ma nyiñe si fe, aval avé me ne yi na bôte be nyoñe ma?’ (Mt. 7:12) Bo’ok ôjibi a bôte ba yé’é na ba nyiñe mfefé si. E jam bia yiane taté yem e ne na, bi vo’o ji’a kôme wôk fatane mfasane wop, nge mimboane miap. A lôte na ô tindi be na, be tôñe metume môé, nyoñek be avale be né.Lañe Beromain 15:7.

16, 17. (a) Jé bi ne bo mfa’a ya na bi subu bôte ya metume mefe bebé? (b) Aval avé bi ne kôme volô beyeñ ya akônda dangan?

16 Éyoñe bia yé’é yeme si môt a so, a metume mé, é ne bo tyi’ibi na bia be nye bi yeman. Éyoñe bia bo ayé’é ya nda bôt, bi ne nyoñ abim éyoñ éziñ na bi yé’é metume me bôte bi nji yembane be akônda, nge abeñe nkañete dangan. Mfa’a ya subu beyeñ bebé, bi ne fe bañete be na be zu di nda jangan. Nge Yéhôva a nga “dii meyoñe mefe mbé ya buni,” nga bia fe bi ne dii beyeñ mimbé miangan, mbe bete be ne “ba ya nda mbunan”?Mam. 14:27; Beg. 6:10; Jb. 31:32.

Ye bia yeme nyoñe bôte ba so mesi mefe? (Fombô’ô mebeñ 16 a 17)

 17 Éyoñe bia lôt éyoñ a nda bôte ja so si fe, nye’ane bia nye’e je wo yaé amu bia yene ngule ja ve na é tôñe metume ya si jangan. Ô ne yene na ba yi mvolan nté ba yé’é nkobô. Nde fe, ye bi ne lebe be avale be ne bo na be yen abeñe nda, nge asu ésaé? Avale mvolane te ô ne nambe be abui.Min. 3:27.

18. Éve’ela ésemé a mvean akéva évé bôte ba so mesi mefe be ne vu melu ma?

18 E ne été na, bôte ba so mesi mefe ba ve ngul ése na be tôñe metume ya mfefé si. Ruth a li’i bia mbamba éve’ela mfa’a te. Di ôsu, a nga semé metume ya mfefé si amu, a nga taté sili nge a ne ke kôane bidi afup. (Ru. 2:7) A nji belane ngul a mbe a bili na a bo de ane bôte be bili nye ékôla éziñ. Di baa, a nga ve beta akéva amu nye’an be nga liti nye. (Ru. 2:13) Éyoñe bôte ba so mesi mefe be bili mbamba ôsimesan, Bekristen a bôte befe ya vôm ba nyiñ ba ye semé be.

19. Beamu bevé ba tindi bia na bi yeme nyoñ beyeñ e zañe jangan?

19 Yéhôva a ne mvam, ajô te bi ne mevak amu a nga kañese na bôte ya bevôm bese be wô’ô mbamba foé. Éko éziñe na nlame wop, be nji be ngule ya yé’é Kalate Zambe, nge bo fili ya tabe bisulan a bebo bisaé be Yéhôva bevok. Ve amu be mbili fane ya bo de, nga bi ne volô be mfa’a ya na be bo te wô’ôtane na be ne beyeñ e zañe jangan? Akôsa bo bi nji bi biôm bi mo, nge na bi se ngule ya ve be mvolane wo yian, nye’an bia liti be, wo liti na Yéhôva a nye’e be. Nde ñhe, aval ane “bevu be Zambe,” mva’ané ngule jangan ése na bi yeme nyoñ beyeñ e zañe jangan.Beép. 5:1, 2.

^ [1] (abeñ 1) Ba te tyendé éyôlé.