Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngon awôm a baa 2017

A bongô​—“Sonda’an ésaé ya nyiane wônan miabebien”

A bongô​—“Sonda’an ésaé ya nyiane wônan miabebien”

“Ve aval ane mi nga bo mewô’ô biyoñe bise, . . . sonda’an ésaé ya nyiane wônan miabebien a woñ a mfô’ôban.”​—BEPH. 2:12.

BIA: 133, 135

1. Amu jé Kristen ése ja yiane duban? (Fombô’ô fôtô ya atata’a ya ayé’é di.)

MBU ôse, betoyini beyé’é Kalate Zambe ba duban. Abui y’été e ne bisoé, nge bongô. Be nga yiane yaé benya mejôô été. Ye ô ne wua ya été? Bia se’e wo abui. Kristen ése ja yiane duban, a ne fe zene ja kee bia ényiñ.​—Mt. 28:19, 20; 1 P. 3:21.

2. Amu jé ô nji yiane ko woñe ya ve womiene ngumba be Yéhôva?

2 E ne été na, mbatizô wo ve bia fane ya bi abui bibotan, ve wo ve bia mimbe’e miziñ. Avale mimbe’e avé? Môse wo duban, wo yalane na ôwé éyoñe ba sili wo nsili wu, “A ngala’ane ya ntañ, ye ô jôbaneya abé dôé, a ye ô veya womiene ngumba na wo bo nkômbane Yéhôva?” A zene ya mbatizô, wo liti mengana bôt été na, ô veya womiene ngumba be Yéhôva. Wo bo Yéhôva ngaka’a na wo ye nye’e nye, a telé nye ôsu ényiñe jôé ése. A nji bo jame ya nyoñ éngbwemese. Ye wo yiane jôbane ngaka’a éte? Momo. E  jô’é Yéhôva a wulu wo a nji ve’ele bo mbia jam. Môt a nji bisi Yéhôva a ne éjôé Satan si. Satan a nji yi na ô bi ényiñ. Jam a yi e ne na, mia nye mi bo Yéhôva éngana’a, a sup ényiñe ya nnôm éto.

3. Bibotane bivé wo bi éyoñe wo ve womiene ngumba be Yéhôva?

3 E ve womiene ngumba be Yéhôva, a nyoñe mbatizô a soo Kristen abui bibotan. Mbôle ô veya Yéhôva ényiñe jôé, ô ne jô a ngule jôé ése na: “Yéhôva a ne me ngam; m’aye bo te ko woñ: môt a ne ngule ya bo me jé?” (Bs. 118:6) Teke jam afe e ne soo bibotan ane e bo ngame Yéhôva, a e ve nye nlem avak.

ÉLATE JÔÉ A YÉHÔVA É NE MBE’E WÔÉ WOMIEN

4, 5. (a) Amu jé bia jô na, e ve womiene ngumba be Yéhôva a ne mbe’e môt émien? (b) Minju’u mivé Bekristene bese ba tôbane mie?

4 Mbôle ô nyoñeya mbatizô, amvôé dôé mia Yéhôva e bete ki fe bitule bebiaé bôé yôp. Womiene wo yiane saé asu ya na ô bi ényiñ, to’o ô ngenan ô nyiñ a bebiaé bôé. Amu jé ô nji yiane vuane nya ajô ate? Amu, ô vo’o ke yeme minju’u ô ne tôbane mie mimbu mia zu. Nge ô nga duban ô ngenane mongô, ô ne tôbane minju’u miziñ, nge ke meve’ele méziñ nté wo yaé a bo ndôman. Ésoé sita éziñ é nga jô na: “Bongô béziñ be wô’ô wôk ôson ya kate bôte ya sikôlô wop na be ne Bengaa be Yéhôva, amu nalé aye bo na, be sube mam méziñ, ane gâteau éyoñe bongô be sikôlô bevo’o ba bo abok abialé. Ve éyoñ a nto ésoé, nkômbane ya bisôk ô nto ngul, asu ya na a nyoñe mbamba ntyi’an, Kristen ja yiane yeme na, e bo Yéhôva mewôk a ve ényiñe ja dañe mvaé.”

5 E ne été na, sa ke bongô étam mbe ba tôbane minjuk nge ke meve’ele. To’o bôte be nga duban éyoñe be ntoo benya bôtô ba ye fe tôbane meve’ele. Ane meve’ele ya nda aluk, akon, nge njembane bisaé. Môt ase a ye fo’o tôbane minjuk; da ye sili nye na, a tabe Yéhôva mebun.​—Jc. 1:12-14.

6. (a) Aval avé ô ne liti na, ngaka’a ô nga bo Yéhôva é ne nya mfi? (b) Kalate Bephilippien 4:11-13 a ve wo ñye’elan ôvé?

6 Te vuane na ngaka’a ô nga bo Yéhôva é ne nya mfi, nalé aye volô wo na ô tebe ne bip to’o wo tôban avale nju’u avé. Nalé a tinane na, wo yiane kate Yéhôva na wo ye ke ôsu a bo nye ésaé, to’o bemvôé bôé a bebiaé bôé ba lume nye mvus. (Bs. 27:10) Été ése ô ne tebe, Yéhôva a ne volô wo na ô tôé ngaka’a ô nga bo nye.​—Lañe’e Bephilippien 4:11-13.

7. Jé ja tinane na, e saé mfa’a ya bi ényiñ a “woñ a mfô’ôban”?

7 Yéhôva a yi na ô bo mvôé jé. Ve asu ya na ô ba’ale amvôé ete, a saé mfa’a ya na ô bi ényiñ, da sili na ô ve ngul. Kalate Bephilippien 2:12 a jô na: “Sonda’an ésaé ya nyiane wônan miabebien a woñ a mfô’ôban.” Nalé a tinane na, wo yiane tu’a fas avale wo ye bo asu ya na, ô ba’ale amvôé e ne zañe mia Yéhôva, a wulu ba’aba’a a nye to’o ô tele minjuk été. Te simesane na ô vo’o ku. To’o bebo bisaé be Yéhôva be nga bo nye ésaé ayap éyoñe be nga ku. Nde ñhe, mam mevé ô ne bo asu ya na, ô saé mfa’a ya bi éyiñ?

 E NE NYA MFI NA Ô YÉ’É KALATE ZAMBE

8. Nne ba bo nya ayé’é aya, a amu jé nya ayé’é a ne mfi?

8 Asu ya na amvôé dôé mia Yéhôva e bo ngul, wo yiane laan a nye; nalé a tinane na ô vô’ôlô nye, ô kobô fe a nye. Asu ya na, ô vô’ôlô Yéhôva, wo yiane yé’é Kalate Zambe. Nalé a tinane na, ô nyoñe ñyeman éyoñe wo lañ a bindi Mejô me Zambe, a bekalate ôlo ô ne mewôk a fek wo tili. Ve yeme’e na, ayé’é ete e nji boban ane nge wo yé’é bekalate befe. Ô nji yiane jeñe ve na, ô ba’ale miñye’elan ve ane wo kômesane meve’ele. Nya ayé’é a ne ane wo ke dulu vôme wo nye’e; nalé a ve wo fane ya yeme mbamba mefulu me Yéhôva, mefulu ô nji be ô yeme’e. Nalé aye fe volô wo na, ô subu Yéhôva bebé, éyoñ éte nye fe a ye subu wo bebé.​—Jc. 4:8.

Ye wo yeme fo’o laan a Yéhôva? (Fôtô nyi a lu’an a abeñ 8-11)

9. Bikpwelé bivé bi nga volô wo ayé’é étame dôé?

9 Ékôane Yéhôva é kuliya abui bikpwelé asu ya na é volô wo na, ô bi mbamba nta’ane mam mfa’a ya ayé’é. Éve’an é ne na, nge ô kele anjeñe mefoé dangan jw.org nkobô Fulasi, wo ye yene vôm a ne ntilane na, “Explore la Bible!” Jeñe’ “Adolescents,” wo ye koone mbamba besikôlô minkañete ya Bible mi ne ve wo. Ô ne fe jeñe Fiches d’étude, vôm a ne ntilane na, “Qu’enseigne réellement la Bible ?” Vôm ate a ne volô wo na ô wônô mbunane wôé. Bikpwelé bite bi ne ye’ele wo aval ô ne timine bôte bevo’o mame wo yem. Nge wo yi, ô ne fe jeñe “Les jeunes s’interrogent . . . Comment trouver du plaisir à lire la Bible ?” e Réveillez-vous ! ya mbu 2009, Ngone nyini. Ayé’é a meye’elan bi ne nya mfi nté wo saé mfa’a ya bi ényiñ.​—Lañe’e Besam 119:105.

MEYE’ELANE ME NE NYA MFI

10. Amu jé Kristen é nji yiane bo fianga a meye’elan?

10 Bia vô’ôlô Yéhôva éyoñe bia yé’é Kalate Zambe, bia kobô nye éyoñe bia ye’elan. Kristen é nji yiane yene meye’elan ane zezé fulu, nge ke mbamba fane ya jeñe ma’a. Meye’elane me ne fo’o minlañ a Nté wongan. Yéhôva a yi na ô laan a nye. (Lañe’e Bephilippien 4:6.) Éyoñ ô tele nju’  été, Kalate Zambe a jô wo na ô “[kee] Yéhôva mbe’e wôé.” (Bs. 55:22) Ye wo buni fo’o mejô mete? Bemillion be bobejañ a besita be ne kate wo na, mejô mete me nga volô be. Me ne fe volô wo!

11. Amu jé wo yiane ve Yéhôva akéva éyoñ ése?

11 Meye’elane ma ve wo fane ya sili Yéhôva mvolan, ve ma su’u ke valé. Kalate Zambe a jô na: “Mi yeme ve akéva.” (Beco. 3:15, MN) Minju’u bia tôbane mie mi ne bo mbia abui, nalé a nga bo na, bi vuane bibotane bise bi bili. Bi ne tyi’i na, môs ôse, bia ye simesane mam melal Yéhôva a te bo bia, a ve nye akéva amu mame mete. Abigail, ésoé éziñ é nga duban é bili mimbu 12, a jô na: “Ma buni na, bi nji yiane ve môte mfe akéva ane bia yiane ve Yéhôva. Bia yiane ve nye akéva amu mame mese a bo bia. Môs éziñ me nga wô’ô mbamba abendé nyi: Nge bia vee ôyo mame tyé, éyoñ éte bia zu koone na, Yéhôva a nji ve bia biôm biziñ amu bi nji ve nye akéva, amu a nga ve bia biôme bite angô’é, abime biôm avé bi ne ngule ya bi éyoñe bia kôlô si?” *

E NE MFI YA YENE WO YÉHÔVA ÉNYIÑE JÔÉ

12, 13. Amu jé e ne mfi ya simesan éyoñ ô nga tyek a yene na Yéhôva a ne mvaé?

12 Yéhôva a nga kôté Njô bôte David abui biyoñ, nde a nga yia na: “Tameka tye’an a yen ane Yéhôva a ne mvaé: Ébotan a môt a sobô be nye.” (Bs. 34:8) Éfus éte ja liti na, môt ase a yiane yene wo Yéhôva ényiñe jé. Éyoñe wo lañe Kalate Zambe a bekalate ôlo ô ne mewôk a fek wo tili, a éyoñe wo tabe bisulan, wo bi ngule nyul éyoñe wo wô’ô avale Yéhôva a nga volô Bekristene bevo’o na be tebe ne bip. Ve nté wo yaé mfa’a ya nsisim, womien wo yiane yene wo Yéhôva ényiñe jôé. Ye ô tye’eya fo’o Yéhôva a yen ane a ne mvaé?

13 Bekristene bese be ne tyek, a yen ane Yéhôva a ne mvaé a zen éziñ. Éyoñe Yéhôva a loone be na, be subu ba Mone bebé. Yésus a nga jô na: “Môt a nji bo ngule ya zu be ma, ve Tate a nga lôme ma a dutu nye.” (Jn. 6:44) Ye mejô mete ma nambe wo? Ésoé é ne jô na, ‘Yéhôva a nga dutu bebiaé bam, me ke me nga tôñe be ve ntôñan.’ Ve éyoñe wo ve womiene ngumba be Yéhôva a duban, wo liti na amvôé mia Yéhôva e nto ngum aval. A nga yeme wo nya ñyemane. Kalate Zambe a kate bia na: “Nge môt éziñ a nye’e Zambe, nnye ate a nto ñyeman be nye.” (1 Bec. 8:3) Jeñe’ éyoñ ése na ô nyane été Yéhôva a nga telé wo ékôane jé été, ô nye’e fe je.

14, 15. Aval avé ésaé nkañete é ne volô wo na ô wônô mbunane wôé?

14 Ô ne fe tyek a yene na Yéhôva a ne mvaé, éyoñe wo kate bôte bevo’o mame wo yé’é. Ô ne de bo éyoñe wo kañete sikôlô. Bongô béziñe ba yen ayaé ya kañete bongô besikôlô bevok. A ne amu be nji yem avale ba ye bo éyoñe ba ye kañete be. E kañete a ne dañedañe bo ayaé vôme bôte be ne abui. Jé é ne volô wo?

15 Jam ôsu, simesa’ane mame ma bo na ô buni mam ô nga yé’é. Éyoñ ô ne anjeñe mefoé dangan jw.org, ye befiche d’étude be ne nkobô wôé? Nge  ô nji tu’a yem, nyoñe’ éyoñe ya jeñe be. Be ne volô wo na, ô simesane mam ô nga yé’é, ô yem amu jé wo buni me, a aval ô ne timine me bôte bevok. Nge mbunane wôé ô ne ngul, a nge wo tu’a kômesan, nalé aye volô wo na ô bo teke ko woñe ya kañete.​—Jr. 20:8, 9.

16. Jé é ne volô wo nge wo ko woñe ya kañete bôte bevo’o Mejô me Zambe?

16 To’o éyoñ ô maneya kômesan, ô ne beta ko woñe ya kañete. Sita éziñ a bili mimbu 18, a nga duban a bili mimbu 13. A jô na: “Ma yeme mam me nga yé’é, ve biyoñe biziñ me wô’ô kate timine me.” Jé ja volô nye na a dañe nju’u ôte? A jô na: “Ma jeñe na me bôé nleme wome si. Bongô be sikôlô bevok be ne meva’a ya kañete mame ba bo. Ma fe ma yiane bo meva’a ya kañete be Mejô me Zambe. Me wô’ô kate be mame ma bo, me wô’ô jô na, ‘Angô’é me nga ye’ele môt éziñe Mejô me Zambe . . .’ Mvuse ya valé, me nga kee nlañe wom ôsu. Akusa bo be wô’ô ke ji’a kañese mame ma so Kalate Zambe, ve bevo’o be wô’ô kômbô yem avale me wô’ô bo éyoñe ma kañete. Nalé a bo na be sili ma minsili. Éyoñe ma bo nalé, nkañete ô ne ma tyi’ibi. Nalé a ve ma abui mevak!”

17. Aval avé, avale wo yene mame wo yé’é e ne volô wo na, ô kañete bôte bevok?

17 Nge wo semé bôte bevok a liti na wo nyoñe be ngap, ba ye wô’ô mvaé ya vô’ôlô wo. Olivia a bili mimbu 17, a nga duban a ngenane mongô, a jô na: “Me mbe me ko woñe ya kobô ajô Bible éyoñe ma laan a bôte bevok. Me nji be me yi na be buni na, jam étam ma simesan e ne ve Bible.” Olivia a nga tyendé ôsimesane wé. A nji dañe beta simesane mam ma bo na a ko woñ, a jô na: “Abui bongô e nji yeme Bengaa be Yéhôva. Be nji yeme Bengaa be Yéhôva befe, ve bia. Nde ñhe, mame bia bo mme me ne bo na be nye’e bia, nge momo. Nge a bo ke na, bi ne awu ôsonô, nge na, bia ko woñe ya kañete bôt? Bôte ba ye ke nyoñe bia mvo’é amu ba yene na, bia nye’e ki jame bia bo. Be ne fe bene vô’ôlô bia amu ba yene na, bi nji buni mame bia ye’ele be. Ve, nge bia kañete be teke ko woñ, bi bo’o ane bia laane minlañ, ba ye semé bia.”

KELE’ ÔSU A SAÉ MFA’A YA BI ÉNYIÑ

18. Jé bia yiane bo asu ya na bi saé mfa’a ya bi ényiñ?

18 Avale bia te yene mebeñe ya yôp, e saé mfa’a ya bi ényiñ a ne fo’o beta mbe’e. Mbe’e ôte wo sili na bi lañe Kalate Zambe a bindi mame bia yé’é, bi fase avale Yéhôva a nga botane bia. E ve ngule ya bo mame mete aye wônô mbunane bi bili amu mbamba minkañe mi ne zañe bia be Yéhôva, nalé aye volô bia na bi kañete bôte bevok.​—Lañe’e Besam 73:28.

19. Amu jé ngule wo ve na ô saé mfa’a ya bi ényiñ é nji bo zezé?

19 Yésus a nga jô na: “Nge môt a ye tôñe ma, wôna a nyumu’ émiene mam, a beke’e [élé] jé, a bo’ ane me abo.” (Mt. 16:24) E ne été na, môt a kômbô bo ñyé’é Yésus a yiane ve émiene ngumba be Yéhôva a duban. A ne mame wo yiane bo asu ya na ô bo Kristen. Nalé a ve wo fane ya bi abui bibotan éyoñe ji, a ényiñe ya melu mese mfefé émo Yéhôva a ka’a bia. Ô mbili ñhe beamu bese ba yiane tindi wo na ô saé mfa’a ya bi ényiñ!

^ É.N. 11 Nge wo kômbô yeme mame mefe, kele’ anjeñe mefoé dangan jw.org, jeñe’e “Les Jeunes s’interrogent​—Pourquoi devrais-je prier?” A ne nkobô Fulasi, bo’o fe besisia bese be ne été.