Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngon awôm a baa 2016

‘E fase mame ya nsisim a ve bia ényiñ a mvo’é’

‘E fase mame ya nsisim a ve bia ényiñ a mvo’é’

“Ba be ne éjôé nsisime si, [ba fase] mame ya nsisim.”BERO. 8:5, Mfefé Nkôñelan.

BIA: 45, 36

1, 2. Amu jé kalate Beromain kabetôlô 8 a dañe nambe Bekristene be ne miñwo’on?

ÉYOÑE wo kômesane Mesimesa’ane ya awu Yésus, éko éziñ na, ô wô’ô lañe Beromain 8:15-17. Bifus bite bia liti aval avé Bekristen ba yeme na be ne miñwo’on—mbamba nsisim nnye a bo’olô nsisime wop na, be ne miñwo’on. Éfus ôsu ya kabetôlô ate ja kobô ajô ya “ba be ne be Krist Yésus.” Nde, ye Beromain 8 a nambe fo’o ve Bekristene be ne miñwo’on? Nge na, ye a nambe fe Bekristene be bili ndi nleme ya nyiñe si va?

2 Bôte kabetôlô ate a dañe nambe, be ne Bekristene be ne miñwo’on. Be nga bi “nsisim,” ba yange fe ‘ntaban éto bon, e ne na, nyiane ya menyôle [minsôn miap].’ (Bero. 8:23) Melu ma zu, ba ye bo bone be Zambe e yôp été. Be bili mvom éte amu, éyoñe be dubaneya ane Bekristen, Zambe a ve be bibotane ya ntañ bia nambe be, a jamé bikobe biap, a jô na be ne bezôsô, a tobe fe be ane bone bé.Bero. 3:23-26; 4:25; 8:30.

3. Amu jé bia jô na kalate Beromain kabetôlô 8 a nambe fe bôte be bili ndi nleme ya nyiñe si va?

3 Kabetôlô ate a kobô fe ajô ya Bekristene be bili ndi nleme ya nyiñe si, amu Zambe a yene fe be ane bôte be ne zôsô.  Mame Paul a nga tili bekabetôlô ya mvus ma liti bia de. E kabetôlô 4, a kobô ajô Abraham. Zôsôa môt ate a nga nyiñ ôsusua na Yéhôva a ve bone b’Israël Metiñ me Moïse, a na Yésus a wu asu bikobe biangan. Ve Yéhôva a nga yene ngule mbunan Abraham a mbe a bili, ane a nga lañe nye wô ane zôsô. (Lañe Beromain 4:20-22.) Avale da fe, Yéhôva a ne yene na, Bekristene ba wulu ba’aba’a a nye melu ma, a be bili ndi nleme ya nyiñe si nnôm éto avale Kalate Zambe a ye’ele, be ne bezôsô. Ajô te, be ne yene mfi ya melebe me ne kalate Beromain kabetôlô 8, amu me ne asu bezôsô be bôt.

4. Beromain 8:21 a yiane tindi bia na bi sili biabebiene nsili ôvé?

4 Kalate Beromain 8:21, a ve bia ndi nleme na, teke bisô, mfefé émo wo ye so. Éfuse te ja ve bia ngaka’a na, “mintéane mi biôm mibien mi aye fe vas ébol ntaban éto belo, a ke tabe éto beti ya étôto’o ya bone be Zambe.” Nsili ô ne ñhe na: to’o bia ye nyiñe yôp, to’o bia ye nyiñe si va, ye bi too fo’o ndi a ngaka’a éte? Beromain kabetôlô 8 a ve bia melebe ma ye volô bia na bi bi ndi nlem éte.

“E FASE MAME YA MINSÔN”

5. Nsela’ane mbé Paul a kobô nye e kalate Beromain 8:4-13?

5 Lañe Beromain 8:4-13. Kalate Beromain 8 a kobô ajô nsela’ane a ne zañe bôte ba wulu “mfa’a ya minsôn,” a ba ba wulu “mfa’a ya nsisim.” Bôte béziñ be ne simesane na, nsela’ane ate a ne zañe bôte be nji bo benya mejôô, a ba be ne benya mejôô, nge ke zañe ba be nji bo Bekristen a ba be ne Bekristen. Ve Paul a nga tili bôte be “to Rome kalate, mbe Zambe a nye’e, mbe be ne nloene na be bo bôte ya Zambe.” (Bero. 1:7) Nde ñhe, Paul a liti nsela’ane a ne zañe Bekristene ba wulu ane nkômbane ya mame ya minsôn ô né, a ba ba wulu ane nkômbane ya mame ya nsisim ô né. Nsela’ane mbé a mbe zañe Bekristene bete?

6, 7. (a) Kalate Zambe a belan éfia “minsôn” éyoñ a kobô ajô jé? (b) Éfia “minsôn” bia koene je e kalate Beromain 8:4-13, ja tinan aya?

6 Tame fas, jé Paul a mbe a loene na “minsôn”? Kalate Zambe a belan éfia “minsôn” abui meval. Biyoñe biziñ, a belan éfia éte éyoñ a kobô ajô ya nyule jangan. (Bero. 2:28; 1 Bec. 15:39, 50) A wô’ô fe belan éfia éte éyoñ a  kobô ajô avuman. Yésus a mbe “mvoñe bôte David mfa’a ya minsôn,” Paul ki a nga loene Bejuif na, “bobenyañe bam mfa’a ya minsôn.”Bero. 1:3; 9:3, Mfefé Nkôñelan.

7 Ve mam Paul a nga tili e kabetôlô 7, ma bo na bi tu’a wôk jôm a loen e kalate Beromain 8:4-13, na “minsôn.” A nga jô na, Bekristen béziñ ya ntete mimbu ôsu, be mbe be nyiñi ane minkômbane ya “minsône” mi né, nalé a tinane na, be mbe be tôñe “mbia minkômban” mi mbe mi ‘bo’o ésaé bibu’a ya menyôle [map] été.’ (Bero. 7:5) Nalé a volô bia na, bi wô’ô jôme Paul a nga kômbô jô éyoñ a nga kobô ajô ya “ba be ne éjôé minsône si,” mbe a nga jôô be na, “ba [fase] mame ya minsôn.” Paul a mbe a kobô’ô bôte be mbe éjôé ya minkômbane miap si, nge ke bôte be mbe be fase fo’o ve mame ya minkômbane miap. Bi ne jô na, be ne bôte ba tôñe minkômban, a asimesane dap, aval ane asimesane ya mam bisôk, nge mam mefe.

8. Amu jé e mbe e yiane na be bemene to’o Bekristene be mbe miñwo’on ajô ya fase “mame ya minsôn”?

8 Ve ô ne sili womiene na, amu jé Paul a nga jô Bekristene be ne miñwo’on na, be nji yiane nyiñ ane minkômbane ya “minsône” mi né? Ye mboan ôte ô ne bo abé asu Bekristene ya melu ma, mbe Zambe a yene zôsô, a mbe a kañeseya ane bemvôé bé? Mbia jam a ne na, Bekristen béziñ be nga taté na ba nyiñ ane minkômbane ya “minsône” mi né. Éve’an é ne na, Paul a nga tili na bobejañe béziñe ya Rome be mbe belo ya “mebume map bebien,” nalé a tinane na, be mbe belo ya mame ya bisôk, bidi, bilam, a mam mevok mese. Abui ya be be e mbe e “du’u ba be ne bibunibuni” (ba be ne tyi’ibi ya du’uban). (Bero. 16:17, 18; Beph. 3:18, 19; Jd. 4, 8, 12) Simesa’ane fe mojañe ya akônda ya Corinthe a nga “bili nga ésa.” (1 Bec. 5:1) Jôm éte nje Zambe a nga belane Paul na, a bemene Bekristen ajô ya fase “mame ya minsôn.”Bero. 8:5, 6.

9. Melebe me ne Kalate Beromain 8:6 me nji kamane mam mevé?

9 Melebe mete me ne fe mfi asu dangan éyoñe ji. E Kristen é kañeya Yéhôva abui mimbu, é ne taté na ja fase mame ya minsôn. Nalé a nji tinane na, Kristen é nji yiane fase mam ma fombô bidi, ésaé,  awo’on, nge ke bone be mam nnôm ba ngal ba bo na, be liti na ba nye’esan. A ne mam ya ényiñe bebo bisaé be Zambe. Nga Yésus émien, a mbe a wô’ô mvaé ya di, a ve bôte bevo’o bidi? A mbe fe a wo’on. Paul ki a nga kobô ajô ya mam nnôm ba ngal ba bo asu ya na, be ve nda alu’u jap abeñ.

Minlañe miôé mia liti na wo fase mame mevé: ye mame ya nsisim, ye ma ya minsôñ? (Fombô’ô mebeñ 10, 11)

10. Éyoñe Kalate Beromain 8:5, 6, a jô na bi nji yiane ‘[fase] mame ya minsôn,’ nalé a tinan aya?

10 Nde ñhe, Paul a mbe a kômbô’ô jô aya éyoñ a nga jô na, bi nji yiane [fase] mame ya minsôn”? Éfia ya nkobô Grèk Paul a nga belane je ja tinane na, “e bem ôsimesan, nge nleme wôé e jam éziñ, e nyoñ éyoñe ya tu’a fas aval ô ne bo jam éziñ, a e belane mezene mese ô bili, asu ya na ô bo jam ete.” Ba ba tôñe nkômbane ya minsôn, ba jô’é na mbia b’asimesane bap mbe be jôé be. Ñyeme mam éziñ a nga timine kalate Beromain 8:5. A nga jô na: “[E fase] mame ya minsôn, a tinane na, e dañe futi nlô, e dañe kobô, e dañe wumulu mame me tii a minkômbane ya minsôn.”

11. Minsili mivé bia yiane sili biabebiene nge bia kômbô yeme mam bia dañe nye’e?

11 Bekristene ya Rome be mbe be yiane tu’a yemelane mame ba dañe simesan. Ye e ne bo na, “mame ya minsôn” mme me mbe me jôé binyiñe biap? Den, bia fe bia yiane sili biabebiene minsili mi: Jé ma dañe nye’e, mam ma kobô ma dañe fombô jé? Mam mevé ma tôñesane me môs ôse? Bôte béziñ be ne dañe fase mame ma fombô meyok, avale be ne kôme menda map, avale be ne bi mimfefé biyé, avale be ne bo beta be mam, avale be ne ke mewo’on, a mam mefe. Avale mam ete e nji bo abé; e ne ne bo mfi asu ényiñ. Éve’an é ne na, môs éziñ, Yésus a nga bo na mendim me veñesa’ane meyok, Paul ki a nga jô Timothée na, a nyu “ôyôme vin.” (1 Tim. 5:23; Jn. 2:3-11) Ve ye Yésus ba Paul be nga “dañe kobô, a wumulu” meyok? Ye mme be mbe be dañe nye’e, ye be mbe be ‘dañe kobô’ ajô meyok? Momo. Bia ki, jé bia dañe nye’e?

12, 13. Amu jé bi nji yiane nyoñe mame bia fas éngbwemese?

12 E nyoñ éyoñe ya fase biabebien a zene ya minsili mite a ne mfi. Amu jé? Paul a nga tili na: “Ôsimesane ya minsôn ô ne awu.(Bero. 8:6) A nji bo jame ya nyoñ éngbwemese—bi ne wu nsisim éyoñe ji, bi ne fe jañele ényiñe ya melu mese. Ve Paul a nji jô na, nge môt a taté na a ‘[fase] mame ya minsôn,’ asu’ulane dé da ye bo ve awu. A ne fe tyendé. Tame simesane Kristene ya Corinthe be nga telé feñ amu a nga bo mvine mam ya “minsôn.” Ve a mbe ngule ya tyendé, ane a nga tyendé. A nga jô’é mbia be mam a mbe a bo’ok, a bulane mbamba zen.2 Bec. 2:6-8.

13 Nge môt ate a nga tyendé, Kristen ya melu ma fe é ne tyendé, e dañedañe nyô a nji dañe bo mvine mame ya minsôn aval ane ma môte ya Corinthe a nga bo. Teke bisô, melebe me Paul a lat a asu’ulane ya môt a ‘[fase] mame ya minsôn’ me nga yiane volô Bekristen na be tyendé!

“E FASE MAME YA NSISIM”

14, 15. (a) A lôte na bi ‘fase mame ya minsôn,’ jé éfe bi ne bo? (b) ‘[E fase] mame ya nsisim’ a nji tinan aya?

14 Éyoñ Paul a maneya lebe bia ajô ya ‘[fase] mame ya minsôn,’ a nga ve bia mbamba ndi nleme nyi: “Ôsimesane ya nsisim ô ne ényiñ a mvo’é.” Ényiñ a mvo’é, ngo’o avale mbamba bibotan ete! Aval avé bi ne bi bibotane bite?

15 ‘[E fase] mame ya nsisim’ a nji tinane na môt a yiane nyiñ ényiñe biyeyem.  A nji tinane na, môt a nji yiane kobô mam mefe, fo’o ve mam ya Kalate Zambe, nge ke mam ma fombô élat é ne zañe ba Zambe, a ndi nlem a bili asu melu ma zu. Nsimesa’ané na Paul a Bekristene bevok ya ntete mimbu ôsu, be mbe be bo’o Zambe ésaé, be nyiñe fe ane bôte bevo’o bese. Be mbe be ja’a bidi, be nya’a fe meyok. Abui ya be be, e nga lu’u binga, a bi menda me bôt, e nga saé fe mfa’a ya toñe bebien.Mc. 6:3; 1 Bet. 2:9.

16. Akusa bo na Paul a mbe a nyiñi ane bôte bevo’o bese, jé é mbe é nyoñe nye abui éyoñ?

16 Ve bebo bisaé be Yéhôva bete, be nji jô’é na mam mete me tebe ôsu ényiñe jap. Kalate Mam Minlôman a liti bia na, Paul a mbe a lôñe menda bindelé, ve jam a mbe a telé’é ôsu e mbe na: a kañete’e, a ye’ele fe bôt Mejô me Zambe a mban ôse. (Lañe Mam Minlôman 18:2-4; 20:20, 21, 34, 35.) Mam mete mme a nga jô bobenyañ, a bekale bé ya Rome na be bo. Mame ya nsisim, me mbe mame Paul a mbe a telé’é ôsu ényiñe jé. Bekristene ya Rome be mbe be yiane vu nye, bia fe bia yiane de bo.Bero. 15:15, 16.

17. Nge bia ‘[fase] mame ya nsisim,’ aval ényiñ avé bi ne bi?

17 Nge bia vu Paul, mbamba be mam bevé bia ye bi? Kalate Beromain 8:6 a yalane ne sañesañ: “Ôsimesane ya nsisim ô ne ényiñ a mvo’é.” Nalé a tinane na bia yiane jô’é mbamba nsisim a jôé asimesane dangan, bia yiane fe bo mam ma lu’an a asimesane Zambe, a ma a nye’e. Bi ne tabe ndi na, nge bia bo na mbamba “nsisim” a jôé ényiñe jangan, bia ye nyiñe meva’a été, a ényiñe jangan ja ye bi ngumba nsôñan. Ébotan ja dañ, é ne ényiñe ya nnôm éto e yôp été, nge ke si va.

18. Aval avé ‘[e fase] mame ya nsisim’ a so mvo’é?

18 Bia yiane liti na bi too ndi a ngaka’a nyi: “Ôsimesane ya nsisim ô ne . . . mvo’é.” Abui bôt da jeñ a ngul ése na e bi mvo’é minlem. Ve nté ba jeñe nya mvo’é teke je bi, bi bi nga bu’ubane je. Jam e ne volô bia na, bi bi avale mvo’é éte, e ne na, bi jeñe mvo’é a bôte ya menda me bôte mangan, a ba ya akônda. Bia yiane fe yeme na, bobejañ a bekale bangan be fe be ne bebo mam abé aval ane biabebien. Ajô te, mejô me ne kui zañe jangan, ve nge ma kui, bia yiane tôñe melebe Yésus a nga ve bia na: Bi “ke taté late . . . ñbwa.” (Mt. 5:24) Nalé a ne tyi’ibi éyoñe bia simesane na, môt mbok fe a kañ e “Zambe [a ve] mvo’é.”Bero. 15:33; 16:20.

19. Fatane mvo’é fé bi ne bi éyoñe bia fase mame ya nsisim?

19 Fatane mvo’é éziñ ja lôte mvo’é ése bi ne bi. Éyoñ bia ‘[fase] mame ya nsisim,’ bi ne mvo’é a Nté wongan. Ésaïe a nga kobô mejô me mbe me nambe’e bôte ya melu mé, ve ma dañe tôébane melu ma: “A [Yéhôva] w’aye ba’ale nye mvo’é mvo’é, nyu ôsimesane vié ô tii be wo; amu a buni wo.”És. 26:3; lañe Beromain 5:1.

20. Amu jé wo nye’e melebe me ne kalate Beromain kabetôlô 8?

20 Nde ñhe, to’o bi ne miñwo’on, nge bôte be bili ndi nleme ya nyiñe Paradis nnôm éto e si va, bi ne ve akéva amu melebe me ne e kalate Beromain kabetôlô 8. Ngo’o avale mevak bi ne wôk amu bia tôñe melebe ma jô bia na, bi bo te jô’é “minsôn” mi jôé bia! Bia yiane bo fek, a tôñe melebe ma: “Ôsimesane ya nsisim ô ne ényiñ a mvo’é.” Bibotane bia ye bi bia ye bo nnôm éto amu Paul a nga jô na: “Ma’ane ya abé me ne awu; ve mveane zesé ya Zambe ô ne ényiñe ya melu mese be Krist Yésus Tate wongan.”Bero. 6:23.