Kele vôm ô ne lañe de

Kele sous-menu

Kele tep

Bengaa be Yéhôva

Bulu

Nkume mmombô a bete (Asu ayé’é)  |  Ngon awômô 2017

Bi nye’e a mimboan a benya mejôô

Bi nye’e a mimboan a benya mejôô

‘Mbo’an te nye’ a nkobô, nge a ôyem; ve a mimboan a benya mejôô.’​—1 JN. 3:18.

BIA: 106, 100

1. Fatane nye’ane fé ja dañe befatane be nye’ane bese? (Fombô’ô fôtô ya atata’a ya ayé’é di.)

NYE’AN ô tii a miñye’elane ya Kalate Zambe (agapê), ô ne dase da so be Yéhôva. Nnye a ne Anjeñe ya fatane nye’an éte. (1 Jn. 4:7) Agapê a ne fatane nye’ane ja dañe befatane be nye’ane bese. Môt a bili fulu éte a ngbwane bôte bevok. Ve a nji su’u valé, a nyume fe émiene mam, amu a sôñe mvo’é bôte bevok. Agapê a ne fatane nye’ane ja tindi bia na, bi bo bôte bevo’o mbamba be mam, nalé a ve bia mevak, a nalé a bo na, ényiñe jangan é bi ngume nsôñan.

2, 3. Aval avé Yéhôva a nga liti bone be bôt nye’an ô ne te medu’an?

2 Yéhôva a nga taté na a nye’e bone be bôt ôsusua na, a té Adam ba Ève. A nga té si na é bo étaba’a mona môt, vôm a ye nyiñe meva’a été nnôm éto. Yéhôva a nji bo de asu mfi wé émien, ve asu mfi wongan. A nga liti fe nye’ane wé ô ne te medu’an, éyoñ a nga botane bone bé ya si, a ve be fane ya nyiñe Paradis.

3 Éyoñ Adam ba Ève be boya nye melo, Yéhôva a nga beta liti na a nye’e bone be bôt. Mbôl a mbe a yeme’e na, bone  be bôte béziñ ba ye bo nye mewôk, nde a nga kômesane ntañ na a ve be fane ya kôtéban. (Met. 3:15; 1 Jn. 4:10) Ajô te, ataté éyoñe Yéhôva a nga bo ngaka’a ya ntañ, e mise mé, a mbe ve ane metuna’a mete me maneya veban. Mvuse bebé mimbu 4 000, Yéhôva a nga kañese na, atyi’i Mone dé e zu wu si va asu bone be bôt. (Jn. 3:16) Bia ve nye akéva abui amu abim a nga nye’e bia!

4. Jé ja liti na, bone be bôt be ne bi nye’an ô ne te medu’an?

4 Bia fe bi ne bi nye’an ô ne te medu’an, amu Zambe a nga té bia éve’ela jé. Abé e ne bia menyul e wô’ô bo na, e bo ayaé ya bi fulu éte; nalé a nji tinane na, bi se ngule ya bi je. Zôsôa môt Abel, a nga liti Zambe nye’an ô ne te medu’an éyoñ a nga ve nye metuna’a; a nga ve nye biôm a mbe a dañe’e yene mfi. (Met. 4:3, 4) Noé a nga liti bôte ya éyoñe jé nye’an ô ne te medu’an éyoñ a nga kañete be foé Zambe tañe mimbu mewôm, akusa bo bôte be nji vô’ôlô nye. (2 P. 2:5) Abraham ki a nga telé nye’an a mbe a nyeke’e Yéhôva ôsu, miñyiane mié ke mvus, éyoñ a nga ye ve mone wé Isaac metuna’a. (Jc. 2:21) Aval ane bezôsô be bôte bete, bia fe bi ne bi nye’an ô ne te medu’an akusa bo minju’u bia tôbane mie.

JÉ É NE NYE’AN Ô NE TE MEDU’AN?

5. Bi ne liti nye’an ô ne te medu’an a mezene mevé?

5 Kalate Zambe a jô na, nye’an ô ne te medu’an wo litiban, sa ke a ‘nkobô, nge a ôyem, ve a mimboan a benya mejôô.’ (1 Jn. 3:18) Ye nalé a tinane na, bi vo’o ke liti a nkobô wongan na, bi bili nye’an ô ne te medu’an? Momo! (1 Bet. 4:18) Nalé a tinane na, nye’ane wongan ô nji yiane su’u ve biyaé, e dañedañ éyoñe bia yiane bo jôm éziñ. Éve’an é ne na, nge monyoñ éziñ a ne mbia azoé, jôm é ne volô nye é nji bo ve nkobô étam. (Jc. 2:15, 16) Aval ete fe, nye’ane bia nye’e Yéhôva a bôte bevok, wo tindi bia na, bi ye’elane Zambe na, “a lôme beva bidi afube dé.” Ve bi nji yiane su’u valé, biabebien bia yiane fe kañete.​—Mt. 9:38.

6, 7. (a) Jé é ne “nye’an ô ne te medu’an”? (b) Bôte bevé be nga bi nye’an ô ne medu’an?

6 Nlômane Jean ô nga tili na, bia yiane nye’e ‘a mimboan a benya mejôô.’ Nalé a tinane na, bia yiane bi “nye’an ô ne te medu’an.” (Bero. 12:9; 2 Bec. 6:6) Môt éziñ a ne jô na, a bili nye’an. Ve, ye nye’an ôte wo so fo’o nye nlem été? Jé ja tindi nye na, a bo mbamba be mam? Nge mam a bo me nji so nye nlem été, nyili a nji bo nye’an.

7 Bi tame zu kobô ajô bôte be nga bi nye’an ô ne medu’an. Afup Éden, Satan a nga kômbô liti Ève na, a nyoñe nye ngap, ve a mbe a sôñe’e jôm éziñe yat. (Met. 3:4, 5) Melu me David, Ahitophel a nga liti na a nji be nya mvôé wé. Nné ane a nga yene na, a bili fane ya bete minkôñ, a nga lume David mvus. (2 Sa. 15:31) Dene fe, bôte ba wosane benya mejôô, a ba ba té mengam akônda été, ba belane ‘nkobô ô ne ékôkon,’ a wu wo wone bôt, asu ya na be liti na ba nye’e bôt; ve ba jeñe ve mfi wop.​—Bero. 16:17, 18.

8. Minsili mivé bia yiane sili biabebien?

8 Nye’an ô ne medu’an wo wo’o môt a bili wô ôsone nyul, amu ô nji so be Zambe. Môta medu’an a ne du’u bôt, ve a vo’o ke du’u Zambe. Yésus a nga jô na, Zambe a ye foñesô bôte be bili  nye’an ô ne medu’an a ayok ese. (Mt. 24:51) E ne été na, bebo bisaé be Yéhôva, be vo’o ke kômbô bi nye’an ô ne medu’an môs éziñ. Ve bia yiane sili biabebiene na, ‘Ye nye’ane wom ô ne kom ése te medu’an, ye biyoñe biziñ me wô’ô jeñe mvo’é jam mamien?’ Bi tame zu yene bevôme benyine bia yiane jeñ a ngul ése na, bi bi “nye’an ô ne te medu’an.”

AVAL AVÉ BI NE ‘NYE’E A MIMBOAN A BENYA MEJÔÔ’?

9. Nye’an ô ne te medu’an wo tindi bia na bi bo jé?

9 Te loñe toñ éyoñe wo bo mbamba be mam. Éyoñe nalé a ne boban, bia yiane bo bobejañe mbamba be mam “asoé,” a mevak. (Lañe’e Matthieu 6:1-4.) Ananias ba Saphira be nji kui na be bo de. Be nji kômbô bo mveane wop asoé, be nji mane ve abime be nga ka’ale na ba ye ve, ve be nga kate mengana bôt été na, ba te ve abime be nga ka’ale. Be nga wu amu medu’ane map. (Mam. 5:1-10) Nye’an ô ne te medu’an, wo tindi bia na, bi wô’ô meva’a ya saane bôte bevok, teke yange duma éziñ. Bobejañ ba su’u Tin Ékôan mfa’a ya kômesane bidi ya nsisim ba bo de asoé, teke yange na, bôte be wumulu be. Be ne fe teke kate bôte bevo’o na, ba bo ésaé si ésaé ka.

10. Aval avé bi ne liti na, bi ne bôte ba taté wumulu ba bevok?

10 Bo’o nyô a taté wumulu bôte bevok. (Lañe’e Beromain 12:10.) Yésus a nga liti bia mbamba éve’ela ya tôñe mfa’a ya wumulu bôte bevok, amu a mbe a bo’o bisaé ôlo wo yiane bo. (Jn. 13:3-5, 12-15) Bia yiane jeñ a ngul ése na bi bi fulu éjote nyul, ndembene bia ye vu Yésus. Beyé’é be Yésus bebien be nga kôme yene mfi ya fulu éte, ve éyoñe be nga bi mbamba nsisim. (Jn. 13:7) Bi ne wumulu bôte bevok, éyoñe bi nji simesane na, bia dañe be mbôle bi bili abui ñyemane sikôlô, biôm bi mo, nge ke mimbe’e ékôane Yéhôva été. (Bero. 12:3) Bi nji yiane kômbô bobejañ éyoñe ba se’e be amu ba te bo ésaé éziñ. Ve bia yiane vak a be, ja’a bia buni na, bia fe bia yiane duma ba ve be, amu bia fe bia te bo ésaé éte.

11. Éyoñe bia se’e bôt, amu jé bia yiane be kate bebela?

11 Se’e bobenyoñe nya nse’ane. Bia yiane jeñe fane ya se’e bôte bevok, amu nalé a ne mvaé, a volô fe. (Beép. 4:29) Éyoñe bia se’e môt, bia yiane kate nye bebela. Bi nji yiane bo medu’an, nge ko woñe ya ve nye melep éyoñe nalé a yian. (Min. 29:5) Bi nji yiane bo na, éyoñe bi né a môt, bi se’e nye, ve éyoñ a kiya, bi nga so’o nye. Nge bia bo nalé yeme’e na, bi ne bôte medu’an. Nlômane Paul ô mbe ô yeme se’e bôte bevok, nalé a ve bia mbamba éve’ela ya tôñ. A nga se’e bobejañe ya Corinthe amu mbamba mefulu be mbe be bili. (1 Bec. 11:2) Ve éyoñ a mbe a yiane lebe be, a mbe a bo’o de a évôvoé ése, a nga kôme kate be amu jé a lebe be.​—1 Bec. 11:20-22.

E volô bobejañe be ne azoé a ne zene ya liti be nye’an, a zene ya bo anyep (Fôtô nyi a lu’an a abeñ 12)

12. Éyoñe bia bo anyep, aval avé bi ne bi nye’an ô ne te medu’an?

12 Bo’o anyep. Yéhôva a jô bia na, bi bo anyep a bobejañe ya nsisim. (Lañe’e 1 Jean 3:17.) Bia yiane ñhe de bo a mbamba mone môte ya nlem. Bi ne sili biabebiene na: ‘Ye me ne anyep fo’o ve a bemvôé bam, bôte be tele ôsu, nge ke bôte be ne bulane ma mvaé ma bo be? Ye me ne anyep to’o a  bobejañe me nji tu’a yem, nge ke ba be nji bi ngule ya bulane ma mvaé ma bo be?’ (Lc. 14:12-14) Tame fase na, mojañ éziñ a bo azoé amu a te nyoñe mbia mintyi’an, nge ke na, a vuane wo ve akéva amu mbamba jam ô nga bo nye. Éyoñ avale jam ete da kui, bia yiane tôñe melebe ma: “Mi bo’o anyep, wua a nyô mbok, tee nkobô menyiñ.” (1 P. 4:9, Mfefé Nkôñelan) Nge wo bo nalé, wo ye bi meva’a ma so éyoñe môt a ve.​—Mam. 20:35.

13. (a) Éyoñ évé é ne bo ayaé ya volô bobejañe be ne atek? (b) Jé bi ne bo na bi su’u be?

13 Su’u ba be ne atek. Kalate Zambe a jô na bi ‘volô mintetek, a bo abui njiban mfa’a ya bôte bese.’ Bi ne yeme nge bia nye’e bobejañe nya nye’ane éyoñe bia tôñ atiñ ete. (1 Bet. 5:14) E ne été na, bobejañe béziñe be ne atek, be wô’ô su’ulane bo ngule mfa’a ya nsisim. Bevo’o ki be wô’ô nyoñ abui éyoñe na, be wône nsisim. Jôm éte nje bia yiane jibi be, a liti be nye’an. Bi ne lañe be éfuse ya Kalate Zambe ja ve be ngule nyul, bi ne jô be na, be ke nkañete a bia, nge ke na, bi ne vô’ôlô be. Bi nji yiane simesane ve vôme bobejañ be ne ‘ngul’ nge “atek.” Bia yiane yeme na, bia bese bi bili bevôme bi ne ngul, a bevôme bi ne atek. To’o nlômane Paul ô nga yeme bevôm ô ne atek. (2 Bec. 12:9, 10) Bia bese bia yiane mvolane wo so be bobejañe ya nsisim.

14. Abim avé bia yiane jeñe mvo’é?

14 Jeñe’e mvo’é. Bia jeñ a ngul ése na bi nyiñe mvo’é a bobejañ, to’o éyoñe bia simesane na, bôte bevo’o be nji wô’ô bia, nge na, bia tôban ékotekot. (Lañe’e Beromain 12:17, 18.) Bi ne kôm abui mejô éyoñe bia yeme sili njaman, ve bi nji yiane bo ôsebaneboé. Bi nji yiane jô ve na, “Ma sili njaman amu wo wô’ô abé,” bia yiane meme jame bia te bo, a jô na, “Ma sili njaman amu jame ma te jô, da te bo wo nleme mintaé.” Mvo’é ja dañedañe mfi nda aluk. Nnôme ba ngal be nji yiane liti na ba nye’esan ve éyoñe be ne bôt été; nné ane ba kui nda, be nga lumane mbia bifia, be nga juan, nge teke totan.

15. Jé bi ne bo na bi jamé a nlem ôse?

15 Jamé’é a nlem ôse. Nge môt a te bo bia abé, bia jamé éyoñe bia bo te ke ôsu a wô’ô nye ôlun. Kalate Zambe a jô na: “Mi jiba’an a nye’an; mi tuka’a ve’ele ba’ale ntaban nleme wua ya nsisim nlatane ñbwa été.” Bia tôñ abendé ete éyoñe bia jamé bobejañ to’o éyoñe bebiene be nji yeme na, ba te bo bia mbia jam. (Beép. 4:2, 3) Asu ya na bi yeme jamé a nlem ôse, bia yiane jôé asimesane dangan, a bo “te lañesan abé.” (1 Bec. 13:4, 5) Nge bia ke ôsu a simesane mbia be mam ba bo bia, nalé  aye ndamane mbamba minkañe mi ne zañe bia be bobejañ, a mi mi ne zañe bia be Yéhôva. (Mt. 6:14, 15) Bia ye fe jamé a nlem ôse éyoñe bia ye’elan asu bôte ba bo bia abé.​—Lc. 6:27, 28.

16. Aval avé bia yiane yene mimbe’e ba ve bia ékôane Yéhôva été?

16 Te jeñe ve mvaé jôé womien. Nge bia bi mbe’e éziñ ékôane Yéhôva été, bia yiane yene wô ane zene ya liti bôte bevo’o nye’an. Bi nji yiane “jeñe’ mvaé [jangan biabebien], ve môt ase a jeñe’ mvaé bôte befe.” (1 Bec. 10:24) Éyoñe bi ne bitôkan, bobejañe ba nyoñe bôt, mbe be ne bôte b’ôsu be bili ngule ya nyiine vôm étôkane ja boban; be ne kômbô ba’ale bito bia dañe mvo’é asu dap, a asu bivuvumane biap. Ve, abui e nji bo nalé, ba jô’é bito bia dañe mvo’é asu bôte bevok. Mbôle ba jeñe mvo’é bôte bevok, ba liti be nye’an ô ne te medu’an. Sa mbamba éve’ela ya vu le!

17. Nye’an ô ne te medu’an wo yiane tindi môt a te bo abé na a bo jé?

17 Meme’ abé dôé, a te beta bo de. Bekristene béziñ ba jeñ a mezene mese na, be solé abé be nga bo amu ba wô’ô ôson, nge ke amu be nji kômbô bo bôte bevo’o nleme mintaé. (Min. 28:13) Môt a bo nalé a liti na a nji bi nye’an, a bo émien a bôte bevok abé. Nalé a ne vaa mbamba nsisim a mvo’é akônda. (Beép. 4:30) Nye’an ô ne te medu’an wo yiane tindi Kristen ja te bo abé na, a ke sili bemvendé mvolan.​—Jc. 5:14, 15.

18. Abim avé nye’an ô ne te medu’an ô ne mfi?

18 Mefulu mese, nye’an ñwô wo dañ. (1 Bec. 13:13) Ñwô wo bo na, bôte be yeme bia ane beyé’é be Yésus, a bôte ba vu Yéhôva, Anjeñe ya nye’an. (Beép. 5:1, 2) Paul a nga tili na: ‘Nge . . . me bili ke nye’an, me se ke jôm.’ (1 Bec. 13:2) Ngo’o nge bia ke ôsu a liti nye’ane wongan, sa ke ve a “nkobô,” ve a ‘mimboan a benya mejôô.’