ÔKON BE VO’O SAÉ NGE ÉYEM BI NE MAM ME NE BO NA ENYIÑ É BO BIA NJUK. Éyoñ a nga bo éyem, Ulf, môt a mbe ôdidi’i a nya mvo’é mfa’a ya minsôn, a nga jô na: “Jam ete é nga te’e ma nya nya abui. Ngule jam a ayo’o nlem me mbe me bili bi nga man . . . Me nga wô’ôtane ve ane me ‘wuya.’”

Jam é nga kui Ulf da liti bia na, môt éziñ a se ngule ya bo na, minsône mié mi bo mvo’é kom ése. Ve jame da, bi ne bo mam m’éziñ asu ya na bi sa’ale ôkon. Ve, nge da kui na, mvo’é jangan ya minsôn ja ke ve abé abé? Ye nalé a tinane na bia zu nyiñe ve minju’ été? Avale bia zu yen, jam ete é vo’o bobane nalé. Bia zu taté yene melebe m’éziñ ma volô bia na, bi tabe mvo’é.

‘BA’ALE’E WOMIEN.’ (1 Timothée 3:2,  11) Éyoñe bia dañe di nge nyu, jam ete é ne bo abé asu mvo’é jangane ya minsôn, bia kee jôô abime moné ya bia jañelé! Bible a jô na: “Te tabe nsamba bôt b’adañe nyu vin, a be ba b’adi tit mbia ndian: amu nso’o ba ndôndok b’aye kui azoé.”​—Minkana 23:20, 21.

TE NDAMANE NYULE JÔÉ. “Mbo’ane biabebien mfuban mfa’a ya mvin ése ya minsôn a nsisim.” (2 Becorinthien 7:1) Bôte ba ndamane nyule jaba éyoñe ba nyu ta’a, meyok a lôte nné, a banga. Centre américain d’épidémiologie a jô na, ta’a a wô’ô bo na “môt a kon, na a bo éyem, a na bebé bibu’a bise ya nyule jé bi mane ndaman.”

YENE’ NYUL A ÉNYIÑE JÔÉ ANE ÉDIMA DAS. “Amu ngule [Zambe] bi ayiñ, a wulu, a tabe.” (Mam Minlôman 17:28) Nge bia nye’e ñye’elan ôte, nalé a ye tindi bia na bi sa’ale mam me ne bo na bi juk éyoñe bi ne nda bisaé, éyoñe bia dutu, nge tobe mimvômane miangan. E bo éyem amu bia te jeñe na bi wô’ô mva’é mon étun éyoñ a ne akute jam!

YEME’E JÔÉ WOMIEN. Ôsimesan a nyule jôé bi ne nlatan. Nde ñhe ô nji yiane dañe tyele nleme yôp, e dañe wô’ô ôlun, nge kômbô bôte bevok, a ke ke. Kalate Besam 37:8 a jô na: “Jôké’é ñyaan, a li’  ayaa.” Bia lañe fe na: “Te tyelane minleme yôp ajô mam me aye boban akiti: amu mame ya mi atyelé minleme yôp akiti, me aye boban akiti.”​—Matthieu 6:34.

JEÑE’ NA Ô BI MBAMBA B’ASIMESAN. E kalate Minkana 14:30, bia lañe na: “Nleme ne mieññ ô ne ényiñe ya minsôn.” Kalate Zambe a jô fe na: “Nlem ô ne mevak ô ne mbamba biañ.” (Minkana 17:22, Mfefé Nkôñelan) Mejô mete ma lu’an a ñyemane mam. Dokita éziñe ya Écosse a jô na, “Nge ô ne môt a ne mevak, melu ma zu teke na wo ye dañe kon a lôte bôte be ne ve ôlun été.”

YEME’E YEMBAN. Aval ane Ulf bia te jôô nye, é ne kui na bi bo teke bi jam afe ya bo ve na, bi jibi nju’u wo tibili bia. Ve, bi ne ngule ya top aval avé bia ye jibi wô. Bôte béziñ ba dañe bili atek a nalé a bo na, mam me ke ôsu a bo be ve abé. Kalate Minkana 24:10 a jô na: “Nge w’ aku som môse ya abé, wôna ngule jôé [jé fo’o bo] tyôtyoé.”

Bôte bevo’o be wô’ô ji’a mane yemban a mam ba tôbane me. Ba jeñe na be dañe mam mete. Nne Ulf a nga bo nalé. A nga jô na, éyoñ a nga ye’elan a bindi mame Kalate Zambe a jô, a “nga taté na a yene mam a ne ngule ya bo, a lôte na a fombô mam ma ndeñele nye.” A nde fe, aval ane abui bôt e nga kui na e dañe meve’ele map, a nga yé’é mbamba melebe ma lat a mvam, a fulu ya yeme tebe été bôte bevok. Nalé a nga tindi nye na, a kate bôte bevok abeñe foé e ne Bible, foé ja ve nlem évôvoé.

Môte mbok a nga dañe juk a mbe jôé na Steve. Éyoñ a mbe a bili mimbu 15, a nga bi ébubua a jam ete é nga bo nye na a bo éyem, teke fe ngule ya fô’ô tyiñ. Éyoñ a nga bi mimbu 18, nde a nga beta taté na a belane mo mé. Ane a nga ke université; e wôé nde a nga taté na a nyu banga, meyok, a bo fe mame ya bisôk. A mbe teke fe ndi nlem éziñ akekui éyoñ a nga taté na a yé’é Bible. Nalé a nga volô nye na, a beta yen ényiñ aval afe a na, a juan a abé mefulu dé. A nga jô na: “Me nji be me beta wô’ôtane na, ényiñe jam é ne zezé a teke ndoñ. Éyoñe ji, ényiñe jam é ne njalan a mevak, mvo’é a évôvoé.”

Mame Steve ba Ulf be nga jô ma bo na bi simesane mejô bia lane kalate Besam 19:7, 8: “Metiñe me Jehova me ne nya mvo’é, m’abeta ve nlem ngu. . . . Miñye’elane mi Jehova mi ne zôsô, mi ave ava’a nlem: mvinda Jehova é ne éngengeñ, j’ave mis ngule ya yen.”