Titus 1:1-16

  • Salam (1-4)

  • Titus isuruh milih pertua-pertua i Kreta (5-9)

  • Persingetilah kalak si nggit ngelawan (10-16)

1  Surat i bas Paulus nari, budak Dibata bage pe rasul Jesus Kristus si kinitekenna sue ras kalak si ipilih Dibata bage pe ras pemeteh si tepat kerna kebenaren si sue ras kesetian man Dibata.  Enda erpalasken arapen kegeluhen si rasa lalap si mbarenda nari nggo ijanjiken Dibata si la banci erbual.  I bas waktu si nggo itetapkenNa, ibanNa kataNa iteh arah dahin erberita. Aku ipilih guna mberitakenca sue ras perentah Si Nelamatken kita eme Dibata.  Surat enda man Titus, teman sada kiniteken si nggo kuanggap bagi anakku: Mbera idatndu lias ate si mbelin ras kedamen arah Bapakta eme Dibata, bage pe arah Kristus Jesus, Juru Selamatta.  Kutadingken kam i Pulau Kreta gelah ipesikapndu kai si perlu ipesikap, janah ipilihndu pertua-pertua i tiap kota menurut petunjuk enda:  Sekalak dilaki bebas min ia arah tuduhen, sada ngenca diberuna, anakna pe erkiniteken janah la icap kalak si gutul ntah pe si nggit ngelawani.  Sekalak pengawas* si ipilih Dibata arus bebas arah tuduhen, la perate-ate, la menukah merawa, la pemabuk, la kasar, la rangap ndatken untung si la jujur,  nggit ngalo-ngalo kalak si deban, ngena atena si mehuli, beluh rukur, nggit ngelakoken kai si benar, setia, banci ngkuasai diri.  Sanga ia ngajar,* nteguh itagangina kata si setia,* alu bage banci ipegegehina kalak si deban alu ajaren si benar janah banci ipersingetina kalak si ngelawan ajaren e. 10  Sebap nterem kalak si nggit ngelawan, nggit ncakapken si la erguna, nggit nipu, janah teremen i bas kalak e nari ngataken maka sunat e perlu. 11  Kalak si bage ula pediat ngerana sebap iajarkenna kai si la patut janah icedaina kerina kiniteken anggota keluarga guna ndatken untung si la jujur. 12  Salah sada i bas kalak e nari eme nabina, ngataken, “Kalak Kreta e perbual, kalak e bali bagi binatang si seh kel rawana, janah man medem saja ngenca dahinna.” 13  Kesaksin e benar. Emaka teruslah persingeti kalak e gelah paguh kinitekenna, 14  gelah lanai ibegikenna dongeng* kalak Jahudi ntah pe perentah kalak si lanai sue ras kebenaren. 15  Kerinana bersih man kalak si bersih, tapi man kalak si najis ras si la erkiniteken, la lit si bersih, perban perukuren ras pusuh peratenna nggo najis. 16  I lebe-lebe jelma si nterem ngaku ia maka itandaina Dibata, tapi arah perbahanenna teridah maka itulakna Dibata, erkiteken perbahanenna e erban ciga ate, la patuh, janah la cocok ilakokenna kai pe si mehuli.

Cataten kaki

Ntah “si ngepkep.”
Ntah “I bas carana ngajar.”
Ntah “kata si banci iteki.”
Ntah “turi-turin.”