Roma 11:1-36

  • Labo kerina kalak Israel itulak (1-16)

  • Perumpaman batang saitun (17-32)

  • Luar biasa kepentaren Dibata (33-36)

11  Adi bage, nungkun aku: Itulak Dibata nge umatNa? Lang! Aku pe kalak Israel, kesusuren* Abraham, i bas suku Benyamin nari.  Labo itulak Dibata umatNa, umat si tangtangna iperdiatekenNa. La kin iteh kena kai si ikataken sada ayat kerna Elia? Ngadu ia man Dibata kerna Israel,  “O Jahwe, nggo ibunuh kalak e nabi-nabiNdu janah nggo ihancurken kalak e batar-batar persembahenNdu. Gundari aku nari ngenca tading, janah ibunuh kalak e ka atena aku.”  Tapi kai nina Dibata man bana? “Lit denga umatKu si la erjimpuh nembah man Baal, teremna 7.000 kalak nari.”  Bage ka me gundari, lit denga kalak si sisa, si nggo ipilih Dibata erkiteken lias ateNa si mbelin.  Pilihen Dibata labo erkiteken perbahanen kalak e, tapi erkiteken lias ateNa si mbelin. Adi pilihen Dibata e erkiteken perbahanen kalak e, berarti pilihen Dibata e labo erkiteken lias ate si mbelin.  Uga dage? Kai si iarapken kalak Israel la datna, tapi si ndatsa eme kalak si nggo ipilih. Si deban lanai erpenggejapen pusuhna,  bali bagi si lit tertulis, “Ntabeh iban Dibata perpedem kalak e. Seh asa gundari mata kalak e lanai erpengidah janah cupingna lanai erpemegi.”  Daud pe ngataken, “Mbera-mbera pesta si iban kalak e jadi siding, jerat, batu si erban kalak tertuktuk, ras ukumen man kalak e. 10  Banlah mata kalak e gelap gelah la erpengidah, janah banlah mberat baban geluhna.”* 11  Emaka nungkun aku, “Tertuktuk nge kalak e janah ndabuh seh ngayak lanai banci cinder?” Lang! Tapi erkiteken kesalahen kalak e, kalak i bas bangsa si deban nari iselamatken guna erban kalak e cemburu. 12  Gundari, adi kesalahen kalak e jadi pasu-pasu man doni enda janah adi reh kurangna jumlah kalak e jadi pasu-pasu man bangsa si deban, pasti reh buena pasu-pasu adi lengkap jumlah kalak e! 13  Gundari ngerana aku man kena si rehna i bas bangsa si deban nari. Selaku rasul si isuruh ku bangsa si deban, kumuliaken pelayanenku. 14  Kuusahaken erban cian ate bangsaku gelah piga-piga i bas kalak e nari banci iselamatken. 15  Adi itulak Dibata kalak e, enda ertina doni erdame ras Dibata. Adi ialoken Dibata kalak e, kai si terjadi? Tentu bali bagi kalak mate si nggeluh mulihi. 16  Adi piga-piga bagin campuren tepung ipersembahken selaku asil si pertama, badia kap, janah kerina campuren tepung e pe badia. Janah adi urat sada batang kayu e badia, kerina dahan-dahanna pe badia. 17  Piga-piga dahan batang saitun ipotong. Tapi kena eme dahan saitun si liar, icangkokken ku dahan-dahan batang saitun si nggo ipotong ndai, alu bage ikut kena ngenanami kai si mehuli arah urat batang saitun si nggo ipotong e. 18  Emaka ula kena sombong nandangi dahan-dahan e. Adi sombong kena nandangi dahan-dahan e, ingetlah labo kena si mere man urat, tapi urat nge si mere kena man. 19  Jenari ning kena, “Dahan-dahan ipotong gelah banci aku icangkokken.” 20  Tuhu bage! Kalak e ipotong perban la erkiniteken, tapi kena tetap lit perban kena erkiniteken. Ula kena sombong, tapi hati-hatilah. 21  Adi dahan si asli saja banci ipotong Dibata, apai ka kena. 22  Gundari perdiatekenlah lias ate ras ukumen Dibata. Iukum Dibata dahan-dahan si ndabuh, tapi melias Ia man kena, gelah tetap kena i bas lias ateNa. Adi lang, kena pe ipotong ka nge. 23  Tapi, adi erkiniteken kalak e, banci kalak e icangkokken mulihi, perban ngasup Dibata ngelakokenca. 24  Adi kena saja pe, si ipotong arah batang saitun liar banci icangkokken ku batang saitun si ipelihara, aminna pe e la biasa ilakoken, dahan si asli pasti banci icangkokken ku batangna sendiri! 25  O turang senina, gelah ula iakap kena diri kena pentar, ateku iteh kena min rahasia si badia enda: Piga-piga kalak Israel tetap la erpenggejapen pusuhna seh ngasa jumlah kalak si ipepulung i bas bangsa si deban nari nggo lengkap. 26  Alu bage me kerina kalak Israel iselamatken. Enda sue ras ayat si ngataken, “Si nelamatken e rehna i Sion nari, janah ibanna Jakup ngadi ngelakoken kejahaten. 27  Enda me perjanjinKu man kalak e sanga Kuampuni dosa-dosana.” 28  Tuhu, kalak e jadi musuh Dibata perban itulakna berita si meriah, janah e erguna man kena. Tapi perban janji Dibata man nini bulang kalak e, ipilih me kalak e selaku kalak si ikelengi. 29  Sebap Dibata la berubah ukurNa nandangi kalak si nggo ipilihNa bage pe nandangi pemereNa. 30  Mbarenda la patuh kena man Dibata, tapi gundari nggo idat kena perkuah ate erkiteken kalak e la patuh. 31  Emaka, banci dat kena perkuah ate perban kalak e la patuh janah gundari kalak e pe banci ndatken perkuah ate. 32  Enggo ipediat Dibata kerina kalak bali bagi tahanen perban la patuh kalak e man baNa. Alu bage, banci icidahkenNa perkuah ateNa man kalak e kerina. 33  Seh kel luar biasana kebayaken, kepentaren, ras pemeteh Dibata! La banci siangkai kerina penghakimenNa, janah la banci siangkai kerina dalan-dalanNa! 34  Lit tertulis, “Ise kin si ngasup ngangkai perukuren Jahwe, ntah ise kin si ngasup ngajarken Ia?” 35  Entah, “Ise kin si pernah mere man Dibata maka arus ibalasNa?” 36  Sebap kerinana lit erkiteken Ia, arah Ia, janah guna Ia. Man baNa me kemulian seh rasa lalap. Amin.

Cataten kaki

Ntah “benih.”
As. “banlah kalak e mbengkung.”