Roma 1:1-32

  • Salam (1-7)

  • Ersura-sura Paulus reh ku Roma (8-15)

  • Kalak si ngelakoken kai si benar tetap nggeluh alu erkiniteken (16, 17)

  • Kalak si la patuh la banci ngelak (18-32)

    • Sipat-sipat Dibata teridah arah ciptanNa (20)

1  Aku Paulus, sekalak budak Kristus Jesus si ipilih jadi rasul. Aku ipisahken guna mberitaken berita si meriah i bas Dibata nari,  si nggo nai nari ijanjiken i bas Kitap si Badia erkelangken nabi-nabiNa.  Berita e kerna AnakNa si lahir jadi manusia arah kesusuren* Daud nari.  Alu kesah si badia, ia terbukti Anak Dibata sanga ipekeke ia i bas si mate nari. Ia me Jesus Kristus Tuanta.  Erkelangken ia, kualoken* lias ate si mbelin janah dahin selaku rasul, gelah kerina bangsa banci erkiniteken janah patuh man bana guna mere kemulian man gelarna.  Arah bangsa-bangsa e me kena ipilih jadi pengikut Jesus Kristus.  Surat enda ibereken man kerina kalak si ikelengi Dibata si lit i bas Roma, si ipilih jadi kalak si badia: Mbera ialoken kena lias ate si mbelin ras kedamen i bas Dibata nari, eme Bapakta, bage pe i bas Tuan Jesus Kristus.  Si pertama, kukataken bujur man Dibata erkelangken Jesus Kristus erkiteken kena kerina, perban kiniteken kena nggo icakapken i belang-belang doni.  Dibata, si man baNa kubereken pelayanen si badia alu bulat ukur, eme alu mberitaken berita si meriah kerna AnakNa, Ia me si jadi saksi maka la erngadi-ngadi kena kutotoken. 10  Kupindoken man Dibata gelah adi sentudu ras peratenNa, iberekenNa min kesempaten man bangku guna ndahi kena. 11  Merhat kel aku jumpa ras kena gelah banci kubereken pemere* i bas Dibata nari guna mpegegehi kena. 12  Maksudku, gelah ipegegehi kena aku alu kiniteken kena, janah kupegegehi kena alu kinitekenku. 13  O turang senina, perlu iteh kena maka lalap ateku reh ndahi kena, gelah lit asil pelayanenku i tengah-tengah kena, bali bagi pelayanenku i tengah-tengah bangsa si deban. Tapi seh asa gundari lit lalap si ngambatisa. 14  Rutang aku man kalak Junani bage pe man kalak si labo Junani,* man kalak si lit sekolahna bage pe man kalak si la lit sekolahna. 15  Emaka, man kena pe si lit i Roma, merhat kel aku mpeseh berita si meriah enda. 16  La aku mela kerna berita si meriah e, perban berita si meriah e kap bukti kuasa Dibata guna nelamatken kerina kalak si erkiniteken, tangtangna man kalak Jahudi, jenari man kalak Junani ka. 17  Alu bage, banci idah kalak si erkiniteken maka ipebetehken Dibata kebenarenNa arah berita si meriah e, janah si enda mpegegehi kiniteken kalak e, bali bagi si itulisken, “Kalak si ngelakoken kai si benar, tetap nge pagi nggeluh perban erkiniteken.” 18  Arah surga nari icidahken Dibata rawaNa man kerina kalak si la patuh ras si la benar. Ilakoken kalak e perbahanen si salah guna muniken kebenaren. 19  Arusna iteh kalak e kerna Dibata, perban nggo ibereken Dibata bukti si jelas man kalak e kerna diriNa. 20  Mulai kin doni enda ijadiken, jelas kap sipat-sipatNa si la teridah eme kuasaNa si la ermasap-masap ras kinidibatanNa.* Si enda banci teridah arah kai si iciptakenNa. Emaka la banci ikataken kalak e maka Dibata e la lit. 21  Aminna pe iteh kalak e kerna Dibata, tapi la imuliakenna ras la ia ngata bujur man baNa. Perukuren kalak e kerna kai si la erguna saja ngenca, janah pusuhna la erpenggejapen, ras ikuasai kegelapen. 22  Ngaku ia pentar, tapi situhuna ia motu. 23  La imuliaken kalak e Dibata si la ermasap-masap, tapi imuliakenna patung-patung si bentukna bali bagi manusia, perik, binatang si empat nahena, bage pe binatang si njoler. 24  Emaka, ipediat Dibata kalak e ngelakoken sura-surana si najis, alu bage lanai meherga ibanna dagingna sendiri. 25  Itukarkenna kebenaren Dibata alu kai si la tuhu. Isembahna janah iberekenna pelayanen si badia man kai si iciptaken, padahal Si Nciptakenca saja ngenca si arusna ipuji seh rasa lalap. Amin. 26  E me sebapna ipediat Dibata kalak e ngelakoken seks si la terkuasai. Si diberu ngelakoken hubungen si la wajar, 27  janah si dilaki la ilakokenna hubungen seks ras diberu bagi arusna, sebalikna galang kel napsuna man sapih-sapih dilaki. Ilakoken kalak e perbahanen si erban ciga ate, alu bage ialokenna ukumen si sue ras kesalahenna. 28  Erkiteken kalak e la nggit ngakui Dibata, emaka ipediat Dibata ceda perukuren kalak e, alu bage ilakoken kalak e kai si la patut. 29  Kalak e dem alu kai si la benar, kejahaten, rangap, dosa, cian, munuh, rubati, nipu, ersura-sura ngelakoken kai si jahat, cekurak, 30  ipitnahna kalak, rate segat man Dibata, kurang ajar, sombong, tual, erban rencana jahat, la patuh man orang tua, 31  la erpengangka, la nepati janji, la rate keleng, janah la rate mekuah. 32  Situhuna iteh kalak e maka menurut undang-undang Dibata si adil, kalak si bage perbahanenna arus iukum mate. Tapi itehna pe bage, lalap ilakokenna janah setuju ka ia nandangi kalak si bage perbahanenna.

Cataten kaki

As. “benih.”
Ntah “aloken kami.”
Ntah “kubereken kengasupenku si kualoken.”
Ntah “kalak asing.” As. “kalak Barbar.”
Ntah “kedudukenNa selaku Dibata.”