Pilipi 4:1-23

  • Persadan, keriahen ukur, ngukuri kai si mehuli (1-9)

    • Ula kuatir kerna kai pe (6, 7)

  • Ngergai pemere kalak Pilipi (10-20)

  • Salam pendungi (21-23)

4  Emaka o turang senina si kukelengi ras si ateku tedeh, sumber keriahen ukurku bage pe mahkotaku, tetaplah paguh i bas ngelayani Tuhan bagi si nggo kukataken man kena.  Kupindoken man Eiodia ras Sintike gelah seperukuren i bas ngelayani Tuhan.  Man kena o temanku si radu ras aku erdahin alu bulat ukur, sampatilah diberu enda duana. Sebap nggo ikut ia duana ras aku erjuang i bas meritaken berita si meriah e, bage pe ras Klemen ras kerina temanku si deban, si kerina gelarna lit tertulis i bas buku kegeluhen.  Teruslah ermeriah ukur erkiteken Tuhan. Sekali nari kukataken: Ermeriah ukurlah!  Buktikenlah perukuren kena masuk akal man kerina kalak. Tuhan ndeher kap.  Ula kena kuatir kerna kai pe, tapi i bas kerinana pesehlah pemindon kena man Dibata i bas toto janah pindolah alu ngataken bujur.  Alu bage kedamen i bas Dibata nari si banci naluken perukuren kai pe, ngarak-ngarak pusuh ras perukuren kena erkelangken Kristus Jesus.  Emaka, o turang senina, teruslah ukuri kai pe si benar, kai pe si penting, kai pe si ngena ate Dibata,* kai pe si bersih, kai pe si erban turah ate keleng, kai pe si mehamat, kai pe si mehuli, ras kai pe si patut ipuji.  Teruslah lakoken kerina si ipelajari kena, si ialoken kena, janah si ibegi kena. Alu bage, Dibata kedamen tetap ras kena. 10  Selaku budak Tuhan, meriah kel ukurku erkiteken iukuri kena ka aku. Mbarenda, aminna pe iukuri kena aku, la lit kesempaten kena guna ncidahkenca. 11  Kukataken bage labo perban lit si kurang bas aku, sebap nggo erlajar aku gelah puas i bas keadan si ugapa pe. 12  Kuteh nge uga nggeluh i bas kekurangen bage pe uga nggeluh i bas kelebihen. I bas kerina keadan, la soal aku besur ntah pe melihe, kekurangen ntah pe erlebih, kuteh rahasiana gelah banci puas. 13  Ngasup aku ngadapi kai pe erkiteken gegeh si kualoken i bas Dibata nari. 14  Aminna pe bage, mehuli kel perbahanen kena i bas nampati aku sanga ngenanami kiniseran. 15  O kalak Pilipi, kenca tangtangna nari ibegi kena kerna berita si meriah, sanga berkat aku i bas Makedoni nari, la lit runggun si nampati aku bage pe si ngaloken aku, selain kena. 16  Sanga aku i bas Tesalonika, ikirim kena penampat man bangku, labo sekali ngenca, tapi dua kali. 17  Labo pemere kena si kuarapken, tapi ateku gelah perbahanen kena si mehuli e nambahi keuntungen man kena. 18  Kerina si kuperluken nggo lit bas aku janah lebih pe. Kerina bias kenca kualoken kirimen kena arah Epaproditus, kirimen kena e bali bagi korban si merim janah ngena ate Dibata. 19  Emaka alu kebayakenNa si mulia, isikapken Dibataku kerina keperlun kena arah Kristus Jesus. 20  Imuliakenlah Bapakta eme Dibata, rasa lalap seh rasa lalap. Amin. 21  Kirim salam man kerina kalak si badia si ersada ras Kristus Jesus. Turang senina si lit ras aku pe kirim salam man kena. 22  Kerina kalak si badia, terlebih-lebih si lit i bas istana Kaisar kirim salam man kena. 23  Mbera lias ate si mbelin arah Tuan Jesus Kristus terus nemani kena erkiteken i bas kena lit perukuren ras perbahanen si benar.

Cataten kaki

Ntah “kai pe si adil.”