Perbahanen Rasul-Rasul 9:1-43

  • Saul i bas perdalanen ku Damaskus (1-9)

  • Ananias isuruh nampati Saul (10-19a)

  • Iberitaken Saul kerna Jesus i Damaskus (19b-25)

  • Reh Saul ku Jerusalem (26-31)

  • Ipepalem Petrus Eneas (32-35)

  • Dorkas si nggit mere ipekeke (36-43)

9  Tapi Saul, terus denga iancamna murid-murid Tuan janah ersura-sura kel ia munuh kalak e. Idahina imam si mbelin  janah ipindona surat guna ibereken man ingan-ingan pulung kalak Jahudi* si lit bas Damaskus, gelah adi jumpa ia ras kalak si ngikutken Dalan Tuan, dilaki ntah pe diberu, banci itangkapna janah ibabana ku Jerusalem.  Bas perdalanen, sanga nggo ndeher ku Damaskus, rempet lit sinar i langit nari nerangi sekelilingna,  janah ndabuh me ia ku taneh. Ibegina sora si ngataken, “Saul, Saul, ngkai maka isiksandu aku?”  Nungkun Saul, “Ise kin kam Tuan?” Ngaloi ia, “Aku kap Jesus, si isiksandu.  Tedislah janah masuklah ku bas kota, ipebetehken kari bandu kai si arus ilakokenndu.”  Kalak si ikut ras ia cinder saja i je janah lanai ngasup ngerana. Ibegina sora tapi ise pe la idahna.  Tedis me Saul janah ibukana matana tapi kai pe la idahna. Emaka itegu kalak e ia janah ibabana ku Damaskus.  Telu wari dekahna, la ia erpengidah janah la ia man ntah pe minem. 10  I Damaskus, lit sekalak murid si gelarna Ananias. Ngerana Tuan man bana arah pengenen,* “Ananias!” Ngaloi ia, “Enda aku, Tuan.” 11  Nina Tuan, “Laweslah kam ku rumah Judas i bas Dalan Pinter, janah daramilah sekalak dilaki si gelarna Saul arah Tarsus nari. Ia sangana ertoto gundari, 12  janah i bas sada pengenen,* idahna reh sekalak dilaki si gelarna Ananias. Jenari ijemakna ia, alu bage erpengidah ia mulihi.” 13  Tapi ngaloi Ananias, “O Tuan, nggo kubegi berita kerna ia i bas kalak si nterem nari, bage pe kerna kerina kejahatenna man umatndu si badia i Jerusalem. 14  Gundari nggo lit kuasana arah imam-imam si mbelin guna nangkapi kerina kalak si erlebuh man gelarndu.” 15  Tapi nina Tuan, “To dahi sajalah, sebap nggo kupilih ia guna mberitaken gelarku man bangsa-bangsa si deban, raja-raja, bage pe man kalak Israel. 16  Kucidahken kari man bana alu jelas uga lalana kiniseran si arus inanamina erkiteken gelarku.” 17  Emaka berkat me Ananias janah masuk ku rumah e, jenari itamana tanna ku takal Saul, janah nina, “O seninaku Saul, Tuan Jesus si nggo ncidahken dirina man bandu i bas dalan sanga kam ku jenda, nggo nuruh aku gelah banci kam erpengidah mulihi janah dem alu kesah si badia.” 18  Minter lit naktak bagi sisik ikan i bas mata Saul nari, jenari erpengidah ia mulihi. Tedis ia jenari iperidiken. 19  Kenca si e, man ia janah mulihken ka ia megegeh. Piga-piga wari dekahna tading ia ras murid-murid i Damaskus, 20  janah mis ia lawes ku ingan-ingan pulung kalak Jahudi, iberitakenna maka Jesus kap Anak Dibata. 21  Tapi kerina kalak si megiken ia jadi kemamangen janah nina, “La kin ia si niksa kalak si tading i Jerusalem si erlebuh man gelar e? La kin tujunna reh ku jenda guna nangkapi* ras maba murid-murid Jesus ku imam-imam kepala?” 22  Amin bage, Saul reh beluhna i bas erberita. Ibuktikenna alu cara si masuk akal maka Jesus kap Kristus, alu bage kalak Jahudi si tading i Damaskus lanai itehna cara ngelawan ia. 23  Piga-piga wari kenca si e, arih-arih kalak Jahudi guna munuh Saul. 24  Emaka suari berngi ijaga kalak e gerbang-gerbang kota gelah banci munuh ia. Dungna iteh Saul rencana kalak e. 25  I bas berngi wari, ibaba murid-murid ia janah ipenusurna tare keranjang arah lubang si lit bas tembok kota. 26  Seh kenca i Jerusalem, iusahakenna pulung ras murid-murid. Tapi kerina kalak e mbiar man bana sebap kalak e la tek maka ia nggo jadi murid Jesus. 27  Emaka isampati Barnabas ia janah ibabana ku rasul-rasul, jenari iceritakenna man kalak e alu jelas kerna uga Saul nggo ngidah Tuan i dalan, kerna uga Tuan nggo ngerana man bana, ras kerna uga Saul ngerana alu pang i bas gelar Jesus i Damaskus. 28  Emaka tetap Saul tading ras kalak e, bebas ia lawes ku japa pe i Jerusalem janahna mpebetehken kerna gelar Tuan Jesus alu pang. 29  Ngerana ia janah sijawapen ras kalak Jahudi si make bahasa Junani, tapi perban si e iusahaken kalak e munuh ia. 30  Sanga iteh turang senina si sada kiniteken kerna si e, ibabana ia ku Kesarea, jenari isuruhna ku Tarsus. 31  Kenca si e, runggun si lit i belang-belang Judea, Galilea, ras Samaria ngenanami kedamen janah reh paguhna. Erkiteken runggun e mbiar man Jahwe janah ndatken pengapul i bas kesah si badia nari, jumlah kalak e pe terus reh teremna. 32  Sanga isiari Petrus kerina daerah e, idahina ka kalak si badia si tading i Lida. 33  I je jumpa ia ras sekalak dilaki si gelarna Eneas. Ia lumpuh janah nggo waluh tahun dekahna ia ampar i bas ingan medemna. 34  Nina Petrus man bana, “O Eneas, ipepalem Jesus Kristus kam. Tedislah janah pesikap ingan medemndu.” Emaka minter ia tedis. 35  Sanga kerina kalak si tading bas Lida bage pe bas Saron ngidah ia, kalak e pe jadi murid-murid Tuan. 36  I Jope, lit sekalak murid si gelarna Tabita, adi iterjemahken ertina “Dorkas.”* Melala perbahanenna si mehuli janah isampatina kalak si mesera. 37  Tapi paksa si e, sakit ia, jenari mate. Emaka iperidi mayatna janah iamparken i bas ruangen si lit i datas loteng. 38  Jope la ndauhsa i Lida nari. Jadi sanga ibegi murid-murid maka Petrus paksana i Lida, isuruh kalak e dua dilaki ndahi Petrus guna ngataken, “Tolong meter kam reh ku jenda.” 39  Emaka mis berkat Petrus ras kalak e. Seh kenca i je, ibaba kalak e Petrus ku datas loteng, janah kerina diberu si mbalu si lit i je njumpai ia. Janahna ngandung, icidahken diberu-diberu si mbalu e kerina uis si nggo iban Dorkas sanga ia nggeluh denga. 40  Kenca si e, isuruh Petrus kerina kalak ndarat, jenari erjimpuh ia janah ertoto. Kenca si e, ialakenna mayat e janah nina, “O Tabita, kekelah!” Ibuka Tabita me matana janah inenna Petrus, jenari kundul ia. 41  Ijemak Petrus tanna janah isampatina cinder. Jenari ilebuhna kalak si badia ras diberu-diberu si mbalu ndai guna ncidahken maka Dorkas nggo nggeluh mulihi. 42  Kejadin e terberita i belang-belang Jope, janah nterem kalak jadi tek man Tuan. 43  Piga-piga wari dekahna Petrus tading i Jope ras sekalak dilaki si dahinna erban barang-barang arah kulit, gelarna Simon.

Cataten kaki

As. “sinagoga.” Nen Kamus.
Ntah “pengenehenen.”
Ntah “pengenehenen.”
Ntah “ngiket.”
I bas cakap Junani, Dorkas, janah i bas cakap Aram, Tabita. Duana ertina “Belkih” ntah “Rusa.”