Perbahanen Rasul-Rasul 7:1-60

  • Stepanus ngerana i lebe-lebe Pengadilen Agama Jahudi (1-53)

    • Sejarah nini bulang Israel (2-16)

    • Musa minpin Israel; Israel nembah berhala (17-43)

    • Dibata labo tading i bas rumah si iban manusia (44-50)

  • Stepanus ibenteri alu batu (54-60)

7  Jenari nungkun imam si mbelin, “Payo nge kerina e?”  Ngaloi Stepanus, “O Bapa ras senina-senina, begikenlah. Ope lenga nini bulangta Abraham tading i Haran, icidahken Dibata si mulia diriNa man bana sanga ia i Mesopotami.  Janah nina Dibata, ‘Tadingkenlah negrindu ras kade-kadendu, jenari laweslah kam ku negri si Kutuduhken kari man bandu.’  Emaka itadingkenna me negri kalak Kaldea janah tading i Haran. Jenari kenca mate bapana, isuruh Dibata ia tading i bas negri enda, ingan kena tading gundari.  La lit sitik pe ibereken Dibata taneh e man bana jadi warisen. Tapi erjanji Dibata maka iberekenNa taneh e jadi jangna ras kesusurenna, aminna pe paksa si e la lit anakna.  Ikataken Dibata ka maka kesusurenna pagi jadi kalak pertandang i bas negri si deban, iperbudak, ras itindas 400 tahun dekahna.  Nina Dibata ka, ‘Kuhakimi pagi bangsa si njadiken kalak e budak. Kenca si e, ndarat me kalak e janah ilakoken kalak e pelayanen si badia man bangKu i jenda.’  “Iban Dibata ka perjanjin sunat ras Abraham. Erkiteken si e, isunatken Abraham anakna Isak i bas wari si pewaluhken kenca ia lahir. Isak bapa Jakup janah Jakup bapa 12 nini bulangta.*  Cian ate kalak e nandangi Jusup emaka idayakenna ia ku Mesir. Tapi Dibata ras ia, 10  ibebaskenNa ia arah kerina kiniseranna. I lebe-lebe Paro raja Mesir, iban Dibata gelah ngena atena ia janah iberekenNa kepentaren man bana. Emaka iangkat Paro ia jadi si erkuasa i bas Mesir bage pe istanana. 11  I bas pudi wari terjadi me kelihen si dem kiniseran i belang-belang Mesir ras Kanaan, janah la banci idatken nini bulangta pangan. 12  Kenca ibegi Jakup maka lit persedian pangan i Mesir, isuruhna nini bulangta e lawes ku je. 13  Sanga pedua kaliken kalak e ku Mesir, ipebetehken Jusup kerna dirina man senina-seninana, dungna Paro pe meteh kerna keluarga Jusup. 14  Emaka itenahken Jusup bapana eme Jakup ras kerina keluargana gelah reh ku Mesir, teremna lit 75 kalak. 15  Emaka berkat me Jakup ku Mesir janah i bas pudi wari mate ia i je, bage ka pe nini bulangta. 16  Tulan-tulan kalak e ibaba ku Sihem, janah itamaken ku bas kuburen si itukur Abraham alu piga-piga sen pirak arah anak-anak Emor i Sihem. 17  “Kenca nggo ndeher waktuna janji Dibata man Abraham terjadi, bangsa e reh teremna janah ertambah-tambah i Mesir, 18  seh asa lit raja si deban merentah i Mesir, si la nandai Jusup. 19  Itipu raja e bangsata, isiksana, janah ipaksana nini bulangta ngambekken anakna si mbaru lahir gelah mate. 20  Sanga Musa lahir, merupa kel* ia. Telu bulan dekahna, ia ipebelin i rumah bapana. 21  Tapi sanga arus ia ibuang, ibuat putri Paro ia janah ipebelinna bagi anakna sendiri. 22  Emaka iajari me Musa kerna kerina kepentaren kalak Mesir. Ia erkuasa i bas kata ras perbahanen. 23  “Sanga umurna 40 tahun, turah ukurna ndahi senina-seninana eme kalak Israel. 24  Sanga idahna sekalak i bas kalak e iperlakoken alu la adil, ibelana seninana e, janah ibunuhna kalak Mesir ndai. 25  Iakap Musa iangkai senina-seninana e maka iselamatken Dibata me kalak e alu tan Musa, tapi la iangkai kalak e. 26  Pepagina idahna kalak Israel sangana rubati janah idahina. Icubakenna ndamekensa, nina, ‘Kena ersenina. Engkai maka kena rubat?’ 27  Tapi sekalak si mekpek temanna e, idorongna Musa, nina, ‘Ise si milih kam jadi peminpin ras hakim man kami? 28  Me labo atendu munuh aku bagi si ilakokenndu man kalak Mesir nderbih?’ 29  Megi si e, kiam me Musa janah jadi kalak pertandang i taneh Midian. I je lahir dua anakna dilaki. 30  “Kenca 40 tahun, idahi sada malekat Musa i taneh mesawang* i Deleng Sinai. Malekat e teridah bagi gara api si nutung rambah duri. 31  Mamang kel ate Musa ngidah si e. Sanga ideherina guna mereksasa, ibegina sora Jahwe, nina, 32  ‘Aku kap Dibata nini bulangndu, Dibata Abraham, Isak, ras Jakup.’ Nggirgir Musa janah lanai ia pang mereksasa terdauhen. 33  Nina Jahwe bana, ‘Agui selopndu ena, sebap kam tedis i bas taneh si badia. 34  Enggo Kuidah uga bangsaKu itindas i Mesir, janah nggo Kubegi pernderkuhna, emaka reh Aku guna mulahi kalak e. Gundari, Kusuruh me kam ku Mesir.’ 35  Musa enda me si itulak kalak e, alu ngataken, ‘Ise si milih kam jadi peminpin ras hakim?’ Ia me si isuruh Dibata erkelangken malekat si nggo teridah man bana i rambah duri si gara guna jadi kalak si nelamatken ras si minpin. 36  Ibabana kalak e ndarat, ibanna melala mukjizat ras tanda-tanda i Mesir, i Lawit Merah, bage pe i taneh mesawang* 40 tahun dekahna. 37  “Musa enda me si ngataken man kalak Israel, ‘Ipilih Dibata pagi man kena sekalak nabi bagi aku arah tengah-tengah kena nari.’ 38  Ia me si lit i tengah-tengah kalak Israel i taneh mesawang,* radu ras nini bulangta, bage pe malekat si ngerana man bana i Deleng Sinai. Janah, ialokenna perkatan si badia si rasa lalap guna ipeseh man banta. 39  Tapi la ipatuhi nini bulangta ia janah itulakna. I bas pusuhna lit denga sura-surana mulih ku Mesir. 40  Emaka nina man Harun, ‘Banlah dibata-dibata guna minpin kami. Sebap la iteh kami kai si terjadi man Musa, si mabai kami ndarat arah taneh Mesir.’ 41  Iban kalak e me sada patung anak lembu, jenari ipersembahkenna korban man berhala e. Erpesta me kalak e guna ngerayaken kai si nggo ibanna. 42  Emaka itadingken Dibata kalak e, ipediatNa kalak e nembah bintang-bintang i langit, bagi si tertulis bas Ajaren Nabi-Nabi, ‘O kalak Israel, 40 tahun dekahna kena i taneh mesawang,* la ibereken kena man bangKu persembahen ras korban. 43  Tapi si ibaba kena kemah Moloh ras bintang dewa Repan, eme patung-patung si iban kena guna isembah. Perban si e, Kubuang kena ku ingan si terdauhen asa Babilon.’ 44  “Sanga nini bulangta i taneh mesawang,* lit kap kemah kesaksinna. Kemah e isuruh Dibata iban Musa sue ras contoh si nggo idahna. 45  Ialoken nini bulangta kemah e jadi jangna, janah radu kalak e mabasa ras Josua ku taneh bangsa si deban, si ipelawes Dibata i lebe nini bulangta nari. Kemah e tetap lit i je seh asa jaman Daud. 46  Isenangken Daud Dibata janah ipindona kinihamaten guna mbangun rumah man Dibata Jakup. 47  Tapi si mbangun rumah man Dibata eme Salomo. 48  Aminna pe bage, Dibata Si Meganjangna labo tading i bas rumah si iban manusia, bagi si itulisken sekalak nabi, 49  ‘Surga kap tahtaKu, janah doni kap ingan naheKu. Rumah si uga kin ate kena ibangun kena bangKu? nina Jahwe. Ntah, i ja kin inganKu tading? 50  La kin tanKu si erbanca si e kerina?’ 51  “O kena si keras kepala, si pusuh ras cupingna tertutup.* Lalap ilawan kena kesah si badia bagi si nggo ilakoken nini bulang kena. 52  Nabi si apai kin si la isiksa nini bulang kena? Ibunuh kalak e kalak si mberitaken kerna kerehen kalak si benar, kalak si nggo ihianati ras si ibunuh kena, 53  ialoken kena Undang-Undang Musa si ipeseh erkelangken malekat-malekat, tapi la idalanken kena.” 54  Megi si e, melas kel pusuh kalak e janah erderep ipenna natap Stepanus. 55  Tapi, Stepanus si dem alu kesah si badia natap ku langit, janah idahna kemulian Dibata. Idahna ka Jesus cinder i sebelah kanan Dibata. 56  Nina Stepanus, “Kuidah langit talang, janah cinder Anak manusia i sebelah kanan Dibata.” 57  Megi si e, serko kalak e asa gangna janahna nutup cupingna. Jenari ras-ras kalak e nerang Stepanus. 58  Kenca isarenna ia ku darat kota, ibenterina alu batu. Itamaken saksi-saksi palsu e uis kalak e si arah darat i deher nahe sekalak anak perana si igelari Saul. 59  Asum ibenteri kalak e Stepanus alu batu, ertoto ia, “O Tuan Jesus, alokenlah kesahku.” 60  Jenari, erjimpuh ia janah nina alu sora si megang, “O Jahwe, ula min ukum kalak e erkiteken dosana e.” Kenca ikatakenna bage, medem me ia i bas kematen.

Cataten kaki

Ntah “12 kepala keluarga.”
Ntah “mejile kel iakap Dibata.”
Taneh si mbelang si jarang iingani.
Taneh si mbelang si jarang iingani.
Taneh si mbelang si jarang iingani.
Taneh si mbelang si jarang iingani.
Taneh si mbelang si jarang iingani.
As. “la isunat.”