Perbahanen Rasul-Rasul 4:1-37

  • Petrus ras Johanes itangkap (1-4)

    • Jumlah kalak si tek lit 5.000 kalak (4)

  • I lebe-lebe Pengadilen Agama Jahudi (5-22)

    • “La terngadiken kami ngerana” (20)

  • Ertoto mindo gelah perpang (23-31)

  • Ajar-ajar kongsi erta (32-37)

4  Sanga Petrus ras Johanes ngerana denga man jelma si nterem, reh me imam-imam, kepala penjaga rumah pertoton, ras kalak Saduki ndahi kalak e.  Nembeh ate kalak e perban iajar rasul-rasul jelma si nterem janah ipebetehkenna alu terus terang kerna kekeken Jesus i bas si mate nari.  Emaka itangkap kalak e ia janah ipenjarakenna seh paginna, sebap paksa si e nggo berngi.  Tapi nterem kalak si megi pengajaren e jadi tek, emaka murid-murid pe reh teremna, lit kira-kira 5.000 kalak.  Pepagina, pulung me penguasa-penguasa kalak e, peminpin-peminpin, ras ahli Undang-Undang Musa i Jerusalem,  radu ras Annas si jadi imam kepala, Kayapas, Johanes, Aleksander, bage pe kerina kade-kade imam kepala.  Isuruh kalak e Petrus ras Johanes cinder i tengah-tengah kalak e, janah mulai isungkunina, “Alu kuasa ise ntah i bas gelar ise kena ngelakoken enda?”  Jenari Petrus si dem alu kesah si badia, ngerana, “O penguasa-penguasa ras peminpin-peminpin,  adi iadili kena kami perban kai si mehuli si ilakoken kami man dilaki si lumpuh ndai, janah merhat kena meteh ise si erbanca ia malem, 10  emaka ipebetehken kami man kena kerina ras man kerina kalak Israel, dilaki enda banci cinder i lebe-lebe kena alu keadan sehat erkiteken gelar Jesus Kristus kalak Nasaret, si ibunuh kena i bas tiang* tapi ipekeke Dibata i bas si mate nari. 11  Ia me ‘batu si la meherga iakap kena o tukang bangunen, janah batu enda nggo jadi batu si utama.’ 12  Selain si e, arah Jesus ngenca kalak banci iselamatken, sebap la lit gelar si deban si ipilih Dibata i bas manusia nari si lit bas doni, si banci nelamatken kita.” 13  Mamang ate kalak e ngidah Petrus ras Johanes si pang kel ngerana, sebap itehna kalak e duana rakyat biasa si la erpendidiken. Sadar me kalak e maka dilaki e duana radu ras Jesus marenda. 14  Lanai iteh kalak e ngataken kai pe sebap idahna kalak si ipepalem ndai nggo tedis ras dua rasul e. 15  Emaka iperentahkenna si telu kalak e ndarat arah Pengadilen Agama Jahudi nari. Jenari nina sapih-sapih ia, 16  “Uga nge siban kalak e ndai? Tuhu-tuhu ilakokenna mukjizat si luar biasa, janah kerina kalak Jerusalem ngidahsa. Kita pe la banci ngataken maka si e la tuhu. 17  Adi bage, gelah ula reh mbarna berita e man jelma si nterem, eta siancam janah silarang gelah ula nai kalak e ngerana man ise pe i bas gelar Jesus.” 18  Kenca si e, ilebuh me dua rasul ndai janah ilarang ngerana ntah pe ngajar i bas gelar Jesus. 19  Tapi nina Petrus ras Johanes, “Cuba ukuri kena, apai nge iakap Dibata ulin, patuh man kena ntah man Dibata? 20  Tapi kami, la terngadiken kami ngerana kerna kai si nggo idah kami ras si ibegi kami.” 21  Emaka kenca iancamna dua rasul e, ibebaskenna me duana sebap la lit idatna alasenna guna ngukumsa. Mbiar ka kalak e man jelma si nterem si muji Dibata erkiteken kejadin e. 22  Sebap dilaki si ipepalem ndai alu mukjizat nggo 40 tahun lebih umurna. 23  Kenca ibebasken, idahi dua rasul e me murid-murid si deban janah iceritakenna kai si nggo ikataken imam-imam kepala ras peminpin-peminpin. 24  Megi si e, ras-ras kalak e ertoto man Dibata, nina, “O Tuhan Si Meganjangna, Kam kap si njadiken langit, doni, lawit, ras kerina isina, 25  si ngerana alu kesah si badia erkelangken nini bulang kami Daud, pelayanNdu, ‘Engkai maka guntar bangsa-bangsa janah suku-suku bangsa ngukuri kai si sia-sia? 26  Raja-raja i doni nggo ersikap janah penguasa-penguasa ersada guna ngelawan Jahwe ras kalak si ipilihNa.’ 27  Situhuna, Herodes, Pontius Pilatus, bangsa Israel, ras bangsa si deban, nggo pulung i kota e guna ngelawan Jesus, pelayanNdu si badia si ipilihNdu. 28  Pulung kalak e guna ngelakoken kerina si nggo itentukenNdu nai nari alu kuasa* ras peratenNdu. 29  O Jahwe, perdiatekenlah ancamen kalak e, janah banlah kami selaku budak-budakNdu pang meritaken kataNdu. 30  Gunakenlah tanNdu i bas mpepalem, janah banlah mukjizat ras tanda-tanda si luar biasa i bas gelar Jesus, pelayanNdu si badia.” 31  Kenca kalak e ertoto alu bulat ukur, mugur-ugur me inganna pulung e, janah kerina kalak e dem alu kesah si badia. Jenari, iberitaken kalak e kata Dibata alu pang. 32  Kerina kalak si nggo erkiniteken e ersada ukurna ras sepenggejapen. La lit sekalak pe si erpengakap maka kai pe si lit bas ia jangna sisada, tapi kerina iraskenna. 33  Selain si e, beluh kel rasul-rasul mereken kesaksin kerna kekeken Tuan Jesus janah terus kalak e ersaksi. Emaka kerina kalak e ngaloken lias ate Dibata si mbelin alu simpar. 34  La lit sekalak pe si kekurangen, perban kerina si lit taneh ntah pe rumahna, idayakenna janah ibabana asilna, 35  jenari iberekenna man rasul-rasul. Kenca si e, ibagi-bagiken rasul-rasul man tiap kalak sue ras keperlunna. 36  Lit sekalak dilaki si gelarna Jusup. Ia kesusuren Lewi si lahir i Kiprus. Rasul-rasul ngelebuh ia Barnabas, si ertina “Kalak si Nggit Nampati.” 37  Idayakenna tanehna jenari iberekenna senna man rasul-rasul.

Cataten kaki

Ntah “kayu.”
As. “tanNdu.”