Perbahanen Rasul-Rasul 3:1-26

  • Ipepalem Petrus pemindo-mindo si lumpuh (1-10)

  • Petrus ngerana i bas Serambi Salomo (11-26)

    • “Kerina ipesikap” (21)

    • Sekalak nabi si bali bagi Musa (22)

3  Bas sada wari, kira-kira jam telu karaben* eme waktuna guna ertoto, lawes me Petrus ras Johanes ku rumah pertoton.  Lit sekalak dilaki si lumpuh mulai lahirna nari sangana ibaba ku je. Tiap wari itama kalak ia i deher pintu rumah pertoton si igelari Gerbang si Mejile, gelah banci ia mindo-mindo man kalak si masuk ku rumah pertoton e.  Sanga idahna Petrus ras Johanes nandangi masuk ku rumah pertoton, ipindona perkuah ate kalak e.  Tapi itatap Petrus ras Johanes ia, janah nina, “Nen dage kami.”  Emaka itatapna kalak e janah iarapkenna gelah lit si ialokenna.  Tapi nina Petrus, “Pirak ras emas la lit bas aku, tapi kai si lit bas aku kubereken bandu. I bas gelar Jesus Kristus kalak Nasaret, erdalanlah!”  Ijemak Petrus tanna si kanan janah isampatina tedis. Minter megegeh nahena.  Lompat ia janah mulai erdalan. Jenari masuk ia ras kalak e ku bas rumah pertoton janahna lompat-lompat ras erdalan muji Dibata.  Kerina kalak ngidah ia erdalan ras muji Dibata. 10  Janah mulai itandai kalak e ia maka ia kap dilaki si biasa mindo-mindo i Gerbang si Mejile i rumah pertoton. Mamang kel ate kalak e janah jengang kel ia ngidah kai si nggo terjadi man si mindo-mindo ndai. 11  Sanga ijemak dilaki e denga Petrus ras Johanes i Serambi Salomo, kerina kalak kiam ndahi kalak e perban senggetna. 12  Ngidah si e, nina Petrus, “O kalak Israel, ngkai maka kena sengget ngidahsa? Engkai maka itatap kena kami, tempa-tempa ia banci erdalan erkiteken kuasa kami ntah pe erkiteken kami kalak si tutus erdibata? 13  Dibata Abraham, Isak, Jakup, ras nini bulangta, nggo mpehaga PelayanNa eme Jesus, si nggo iserahken kena janah itulak kena i lebe-lebe Pilatus, aminna pe ibebasken Pilatus atena ia. 14  Itulak kena kalak si badia ras si benar e, janah ipindo kena gelah sekalak pemunuh ibebasken man kena. 15  Kalak si Ipilih guna mere kegeluhen ibunuh kena. Tapi ipekeke Dibata ia i bas si mate nari, kami me si jadi saksina. 16  Alu gelarna janah perban erkiniteken man gelarna, dilaki si idah kena e ras si itandai kena e nggo jadi megegeh. Kiniteken kami man Jesuslah si erban dilaki enda jadi malem i lebe-lebe kena. 17  O turang senina, kueteh maka bali bagi peminpin kena, la isadari kena kai si nggo ilakoken kena. 18  Tapi, alu bage terjadi me kai si nggo ikataken Dibata arah kerina nabi, maka inanami Kristus nge pagi kiniseran. 19  “Emaka, ertobatlah,* janah mulihkenlah gelah dosa-dosa kena iampuni. Alu bage, ibereken Jahwe kemalemen ate man kena, 20  janah isuruhNa Jesus eme Kristus si nggo ipilihNa man kena. 21  Ia arus tetap tading i surga seh asa kerina ipesikap, bagi si nggo ikataken Dibata erkelangken nabi-nabiNa si badia si lit bas jaman si nai. 22  Bagi si nggo ikataken Musa, ‘Ipilih Dibata Jahwe pagi man kena sekalak nabi bagi aku arah tengah-tengah kena nari. Arus ibegiken kena kai pe si ikatakenna. 23  Ise pe si la megiken Nabi e pasti ikernepken Dibata.’ 24  Kerina nabi, mulai arah Samuel nari seh asa nabi-nabi si reh kenca ia pe, ikut mberitakenca alu tangkas kerna jaman enda. 25  Nabi-nabi e ngataken kerna perjanjin si iban Dibata ras nini bulang kena, janah perjanjin e guna kena ka nge, sebap Dibata nggo erjanji man Abraham, ‘Arah kesusurenndu pagi kerina keluarga i doni ipasu-pasu.’ 26  Kenca ipilih Dibata PelayanNa e, isuruhNa ia leben ndahi kena gelah ibanna kena sekalak-sekalak ertobat* i bas kejahaten kena nari. Enda pasu-pasu man kena.”

Cataten kaki

I bas kalak Jahudi, enda jam si pesiwahken.
Ntah “jera dingen robahlah.”
Ntah “jera dingen robah.”