Perbahanen Rasul-Rasul 27:1-44

  • Paulus erlayar ku Roma (1-12)

  • Kapal e ientamken angin si meter (13-38)

  • Kapal hancur (39-44)

27  Kenca nggo iputusken maka kami arus erlayar ku Italia, Paulus ras tahanen si deban iserahken man Julius, sekalak perwira i bas pasuken Agustus nari.  Inangkihi kami kapal si reh i Adramiti nari. Kapal e erlayar ku pelabuhen-pelabuhen si lit i bas Propinsi Asia. Aristarkus, kalak Makedoni si rehna arah Tesalonika nari pe ikut ras kami.  Paginna seh kami i Sidon. Mehuli perbahanen Julius man Paulus. Ipediatna ia ndahi temanna guna ngaloken penampat kalak e.  Perban erlawanen angin ras kapal kami, emaka erlayar kami i deher Kiprus.  Jenari, ibentasi kami lawit si mbelang i gedang-gedang Kiliki ras Pampilia. Kenca si e, seh kami i Mira si lit bas Likia.  I je, jumpa perwira e ras kapal si rehna i Aleksandria nari. Kapal e muatna berkat ku Italia. Emaka, isuruh perwira e kami nangkih ku kapal e.  Piga-piga wari dekahna erlayar kami alu manjar-anjar. Aminna mesera kel iakap kami, dungna seh kang kami i Kenidos. Perban erlawanen angin ras kapal kami e, emaka terpaksa kami erlayar ku Pulau Kreta si lit i bas Salmone, gelah banci isilahi kami angin e.  Kenca ipala-palai kami erlayar i tepi pulau, seh kami i bas sada ingan si igelari Pelabuhen si Mejile, i deher kota Lesea.  Enggo melala keri waktu kami, janah waktu puasa guna Wari Pendamen pe nggo lewat. Bicara iterusken kami pe erlayar, bahaya kang nge. Emaka nina Paulus 10  man kalak e, “O teman-teman, kuakap bahaya nge adi terus kita erlayar. Labo saja kapal ras isina ngenca si bene, tapi kita pe banci mate.” 11  Tapi la ibegiken perwira e Paulus, padin kapna megiken kata kapten ras si mpuna kapal e. 12  Perban pelabuhen e labo ingan si sikap paksa musim mbergeh, teremen kalak e erlayar atena ku pelabuhen Peniks, si lit i bas Pulau Kreta si pengalana ku timur laut ras tenggara. I je ingan si sikap paksa musim mbergeh. 13  Sanga rembus angin i selatan nari alu manjar-anjar, iakap kalak e nandangi seh me i Peniks. Emaka iangkat kalak e jangkar janah mulai erlayar ku pantai Pulau Kreta. 14  Tapi la ndekah kenca si e, rembus me angin si meter nderpa kapal e. Angin e igelari angin timur laut.* 15  Ientamken angin si meter e kapal kami, janah lanai banci kami terus erlayar ngelawan angin. Emaka, ipediat kami ibabaken angin e kapal kami. 16  Gelah selamat, erlayar kami ku pulau si kitik, si igelari Kauda. Aminna pe bage, arus denga ipala-palai kami nelamatken sekoci* si lit i bas pudi kapal e. 17  Kenca sekoci e iangkat ku bas kapal, iiket me kerina bagin kapal si arah teruh gelah paguh. Perban mbiar kalak e kandas kapal e i Sirtis, ilonggarkenna nali layar kapal janah ipediatna kapal e ibaba angin. 18  Perban terus ientamken angin si meter kapal e, emaka paginna iambekken kalak e muaten kapal e. 19  I bas wari peteluken, iambekken kalak e me piga-piga alat-alat kapal. 20  Piga-piga wari dekahna, matawari ras bintang la teridah janah angin si meter pe terus ngentam kami, dungna bene me arapen kami gelah selamat. 21  Kenca nggo ndekah kalak e la man, cinder Paulus i tengah-tengah kalak e janah nina, “O teman-teman, bicara begiken kena min ndai kataku gelah la padah erlayar arah Kreta nari, labo min ndai perlu sinanami kiniseran ras kerugin si bagenda. 22  Amin gia bage, kupindoken man kena, ula kena mbiar, sebap labo kari sekalak pe i bas kena nari mate. Tapi kapal enda ngenca si bene. 23  Berngi ndai, reh malekat ndahi aku janah cinder ia i deherku. Malekat e isuruh Dibata si kulayani alu pelayanen si badia, 24  nina malekat e, ‘Ula kam mbiar Paulus! Kam arus ngadap man Kaisar, janah kerina kalak si erlayar ras kam pasti iselamatken Dibata erkiteken perkuah ateNa.’ 25  Emaka ula kena mbiar, sebap tek aku pasti ilakoken Dibata bagi si ikataken malekat e man bangku. 26  Aminna pe bage, la banci lang, ibabaken angin nge kita ku sada pulau.” 27  Kenca 14 berngi kapal kami bombang-bombang i Lawit Adria, i bas tengah berngi pegawai-pegawai kapal erpengakap maka kami nggo ndeher ku daraten. 28  Iukur kalak e me asa bagesna lawit e. Bages lawit e lit kira-kira 36 meter. Iteruskenna ka terleben sitik, kenca si e iukur kalak e ka, bagesna lit kira-kira 27 meter. 29  Perban mbiar kalak e kandas i batu karang, idabuhkenna empat jangkar arah pudi kapal e, janah iarapken kalak e gelah pedas min terang wari. 30  Tapi kiam ate pegawai-pegawai kapal e. Emaka ipesusurna sekoci i kapal e nari, ibanna tempa-tempa jangkar nge si idabuhken arah lebe kapal e. 31  Perban si e, nina Paulus man perwira ras piga-piga prajurit, “Adi itadingken kalak e kin kapal enda, labo kena banci selamat.” 32  Emaka ipotong prajurit-prajurit e nali-nali sekoci e, janah ipediatna sekoci e ndabuhen. 33  Paksa nandangi terang, iiahken Paulus kerina kalak e man, nina, “Enggo 14 wari dekahna kena tertima-tima, mbiar, janah kai pe la ipan kena. 34  Emaka manlah kena lebe, enda guna kena ka nge, sebap labo sada lambar buk pe pagi bene i bas takal kena nari.” 35  Kenca si e, ibuat Paulus roti, ertoto ia ngata bujur man Dibata i lebe-lebe kalak e kerina. Jenari icepik-cepikkenna, janah ipanna. 36  Emaka semangat me kalak e janah man ia kerina. 37  Teremna kami lit 276 kalak i bas kapal e. 38  Kenca nggo besur kerina, iambekken pegawai me gandum ku lawit, gelah reh nahangna kapal e. 39  Kenca terang wari, iidah kalak e sada teluk.* Tapi la itehna i ja ingan e. Emaka iusahakenna gelah seh i pantai e. 40  Ipotong kalak e me nali jangkar-jangkar janah ipediatna ndabuh ku lawit. Ilonggarkenna nali si ngiket kemudi kapal. Jenari ipenangkihna layar si arah lebe kapal gelah ibaba angin kapal e ku pantai. 41  Tapi itendeng kapal e uruk kersik si lit i bas lawit. Dungna kandas me kapal e janah lanai banci erdalan. Bagin kapal si arah lebe nggo leket i je, janah bagin si arah pudi nggo pecah ientam galumbang. 42  Erkiteken si e, arih-arih prajurit-prajurit guna munuh kerina tahanen gelah ula lit si erlangi jenari kiam. 43  Tapi perban la ate perwira e Paulus ibunuh, emaka ilarangna prajurit-prajurit munuh tahanen. Isuruhna kalak si beluh erlangi leben lompat ku lau janah erlangi ku daraten. 44  Jenari kalak si la beluh erlangi isuruhna make papan-papan ntah pe pecahen-pecahen kapal. Emaka selamat me kalak e kerina ku daraten.

Cataten kaki

As. “Euroakuilo.”
Ntah “kapal si kitik.”
Ntah “pantai si lit kersikna.”