Perbahanen Rasul-Rasul 25:1-27

  • Paulus iadili Pestus (1-12)

    • “Kupindo gelah Kaisar si ngadili aku!” (11)

  • Arih-arih Pestus ras Raja Agripa (13-22)

  • Paulus i lebe-lebe Agripa (23-27)

25  Telu wari kenca Pestus seh i propinsi e janah mulai merentah, lawes ia ku Jerusalem arah Kesarea nari.  Jenari, iceritaken imam-imam kepala ras kalak Jahudi si ihamati kerna Paulus. Emaka ipindo kalak e man Pestus  gelah Paulus ibaba ku Jerusalem, sebap nggo irencanaken kalak e munuh Paulus i tengah dalan alu erbuni-buni.  Tapi nina Pestus maka Paulus arus tetap i Kesarea, janah ia pe ku jah kari kentisik nari.  Nina, “Pediatlah kalak si erkuasa i tengah-tengah kena ikut ras aku, gelah banci kari iberekenna tuduhen kerna ia adi lit kin salahna.”  Emaka, kenca tading ia ras kalak e kira-kira waluh ntah sepuluh wari dekahna, lawes ia ku Kesarea. Paginna, kundul ia i bas kursi penghakimen. Isuruhna gelah Paulus ibaba ku bas.  Seh kenca Paulus i je, cinder me kalak Jahudi si reh i Jerusalem nari i sekelilingna. Ituduh kalak e ilakokenna melala kesalahen si serius, tapi la lit buktina.  Tapi ibela Paulus dirina, nina, “Labo aku ersalah nandangi Undang-Undang kalak Jahudi, nandangi rumah pertoton, bage pe nandangi Kaisar.”  Gelah ngena ate kalak Jahudi, nungkun me Pestus man Paulus, nina, “Nggit nge kam lawes ku Jerusalem gelah kuadili perkarandu i je?” 10  Ijawap Paulus, “Gundari aku cinder i lebe-lebe kursi penghakimen Kaisar, janah i jenda me arusna aku iadili. La lit salahku man kalak Jahudi, janah itehndu kang kerna si e. 11  Adi lit kin salahku si erbanca aku patut iukum mate, nggit nge aku mate. Tapi adi la lit buktina kerina tuduhen kalak e, ise pe la banci mereken aku man kalak e bagi si ipindona. Emaka kupindo gelah Kaisar si ngadili aku!” 12  Kenca arih-arih Pestus ras penasehat-penasehatna, nina man Paulus, “Perban ipindondu Kaisar si ngadili kam, laweslah kam ngadap Kaisar.” 13  Piga-piga wari kenca si e, seh me Raja Agripa ras Bernike i Kesarea. Idahi kalak e Pestus guna nghamati ia. 14  Kenca piga-piga wari kalak e i je, iceritaken Pestus me kerna masalah Paulus man Raja. Nina, “Lit sekalak tahanen si itadingken Pelik. 15  Sanga aku i Jerusalem iceritaken imam-imam kepala ras peminpin-peminpin kalak Jahudi kerna ia. Ipindo kalak e gelah ia iukum. 16  Tapi, kukataken man kalak e maka labo bage kebiasan Roma. Sekalak jelma la banci iserahken guna iukum, ope lenga ibereken kesempaten guna mbela dirina i lebe-lebe kalak si nuduh ia. 17  Emaka, kenca seh kalak e i jenda, paginna mis aku kundul i kursi penghakimen janah kusuruh gelah ibaba ia masuk. 18  Tedis me kalak si nuduh ia. Kenca kubegiken tuduhen kalak e, kepeken labo lit kejahaten si ilakokenna bagi si kubayangken. 19  Si ipersoalkenna eme kerna agamana saja ngenca, bage pe kerna sekalak dilaki si gelarna Jesus. Ia nggo mate, tapi lalap ikataken Paulus maka ia nggo nggeluh. 20  Perban lanai kuangka ndungi masalah e, kusungkun me ia, nggit ntah lang ia lawes ku Jerusalem gelah i jah ia iadili. 21  Tapi, ipindoken Paulus gelah tetap ia itahan seh asa iputusken Kaisar masalahna e.” 22  Jenari nina Agripa man Pestus, “Kubegi ateku ia langsung ngerana.” Ngaloi Pestus, “Pagi banci ibegindu.” 23  Paginna, reh me Agripa ras Bernike, icidahkenna kerina si mehaga si lit bas ia. Masuk ia duana ku bas ingan pengadilen radu ras komandan-komandan tentera, bage pe kalak si ihamati i bas kota e. Kenca si e, isuruh Pestus gelah Paulus ibaba masuk. 24  Nina Pestus, “O Raja Agripa ras kerina kena si lit i jenda. Nenlah dilaki enda. Kerina kalak Jahudi si lit i jenda bage pe si lit i Jerusalem, serko mindo man bangku gelah ula ia ipediat nggeluh. 25  Tapi la lit kudat salahna si erbanca ia patut iukum mate. Emaka sanga ipindokenna gelah Kaisar si ngadili ia, kukirim ia man bana. 26  Tapi la lit keterangen si pasti kerna ia si banci kutulisken man Kaisar. Emaka kubaba ia ku lebe-lebe kena kerina, khususna man bandu Raja Agripa, gelah kenca pemeriksan i bas persidangen enda banci lit si kutulisken kerna ia. 27  Sebap la mungkin kukirim sekalak tahanen adi la lit tuduhen-tuduhen kerna ia.”

Cataten kaki