Perbahanen Rasul-Rasul 24:1-27

  • Paulus ituduh (1-9)

  • Pembelan Paulus i lebe-lebe Pelik (10-21)

  • Perkara Paulus itunda seh asa dua tahun (22-27)

24  Lima wari kenca si e, reh me Imam si Mbelin Ananias, ras piga-piga peminpin kalak Jahudi, bage pe pengacara si gelarna Tertulus. Idahi kalak e Gubernur Pelik janah ipesehna tuduhenna kerna Paulus.  Kenca ia ilebuh, mulai me ituduh Tertulus si Paulus, nina, “O Gubernur Pelik, sanga kam minpin nge maka kami tetap aman. Melala perubahen i bas bangsa enda erkiteken rencana-rencanandu.  Igejapken kami kerna si e i japa pe janah katawari pe. Bujur kel ikataken kami man bandu Gubernur Pelik Si Ihamati kami.  Tapi gelah ula melala waktundu sia-sia, emaka kupindoken gelah ibegikenndu kami kentisik.  Sebap nggo iperdiateken kami maka dilaki enda lalap erban masalah, ipengaruhina kalak Jahudi i belang-belang doni, janah ia me peminpin sekte kalak Nasaret.  Icubakenna ka encemari rumah pertoton, emaka itangkap kami ia.  *——  Adi iperiksandu ia, itehndu kari maka tuduhen kami enda tuhu.”  Kalak Jahudi si lit i je pe ikut nuduh Paulus janah idukungna maka kai si ikataken Tertulus e tuhu. 10  Kenca ibereken gubernur e tanda man Paulus gelah ia ngerana, ngerana me Paulus, “Perban kueteh maka nggo ertahun-tahun dekahna kam jadi hakim i bas bangsa enda, emaka meriah ukurku mbela diriku i lebe-lebendu. 11  Bagi si nggo itehndu, kira-kira 12 wari si lewat, lawes aku ku Jerusalem guna nembah Dibata. 12  La pernah idapeti kalak e aku sijawapen ras ise pe i rumah pertoton, ntah pe erban guntar i bas ingan pulung kalak Jahudi,* bage pe i bas ingan-ingan si deban i kota e. 13  La banci ibuktikenna man bandu maka kai si ituduhna kerna aku e tuhu. 14  Tapi ngaku aku i lebe-lebendu, maka sentudu ras Dalan Tuan si ikataken kalak e ‘sekte,’ kulakoken pelayanen si badia man Dibata nini bulangku, sebap tek aku man kerina si lit i bas Undang-Undang Musa bage pe Ajaren Nabi-Nabi. 15  Pengarapenku man Dibata bali ras pengarapen kalak enda, maka lit kekeken i bas si mate nari, eme kekeken kalak si benar, bage pe kalak si la benar. 16  Emaka lalap nge kuusahaken gelah bersih* pusuh peratenku, i adepen Dibata ras manusia. 17  Kenca ertahun-tahun dekahna, mulih aku maba sumbangen* man bangsaku janah mere persembahen. 18  Sanga kulakoken si e, idapeti kalak e aku sangana ndalanken acara pembersihen diri i rumah pertoton. Paksa si e, la nterem jelma i je ntah pe la lit keributen. Tapi i je lit piga-piga kalak Jahudi arah Propinsi Asia nari, 19  si arusna gundari ngadap man bandu guna nuduh aku, adi kin tuhu-tuhu lit tuduhenna man bangku. 20  Entah, pediat saja kalak si lit i jenda ngataken kesalahenku, si idatna sanga aku ibaba ku Pengadilen Agama Jahudi.* 21  Bicara lit pe akapna salahku, eme perban kukataken i lebe-lebe kalak e, ‘Gundari aku iadili i adepen kena kerina perban tek aku maka kalak si mate nggeluh pagi mulihi!’” 22  Enggo melala iteh Pelik kerna Dalan Tuan. Emaka itundana persidangen e janah nina, “Adi nggo seh kari komandan Lisias i jenda, emaka kuputusken perkara e.” 23  Jenari isuruhna gelah Paulus tetap itahan perwira. Tapi iberena sitik kebebasen gelah teman-teman Paulus banci ndahi ia guna mereken keperlunna. 24  Kenca piga-piga wari, reh me Pelik ras diberuna Drusila si kalak Jahudi. Idilona Paulus, jenari ibegikenna ia ngerana kerna kiniteken man Kristus Jesus. 25  Tapi sanga ikataken Paulus kerna lagu langkah si benar, penguasan diri, ras penghakimen si nandangi reh, mbiar me Pelik janah nina, “Gundari lawes kam lebe, adi lit kari kesempatenku kulebuh ka kam mulihi.” 26  I bas paksa si e, iarapken Pelik gelah ibereken Paulus sen man bana. Emaka, reh rusurna ilebuhna Paulus janah ngerana ras ia. 27  Dua tahun kenca si e, Gubernur Pelik igantiken Porkius Pestus. Paulus lalap itahan Pelik, gelah ngena ate kalak Jahudi ia.

Cataten kaki

Ayat enda la lit i bas piga-piga tulisen si nai janah kemungkinen labo bagin arah Pustaka si Badia.
As. “sinagoga.” Nen Kamus.
Ntah “la ersalah.”
Ntah “perkuah ate.”
As. “Sanhedrin.”