Perbahanen Rasul-Rasul 20:1-38

  • Paulus i Makedoni ras i Junani (1-6)

  • Etikus ipekeke i Troas (7-12)

  • Arah Troas ku Miletus (13-16)

  • Paulus jumpa ras pertua-pertua i Epesus (17-38)

    • Ngajar arah rumah ku rumah (20)

    • “Riahen kap i bas mere” (35)

20  Kenca lanai guntar, ilebuh Paulus murid-murid janah ipegegehina. Kenca si e, ngata lawes ia jenari berkat me ia ku Makedoni.  Kenca idahina daerah-daerah e ras ipegegehina murid-murid si lit i je alu rananna, seh me ia i Junani.  Telu bulan dekahna ia tading i je. Tapi kenca ibegina lit rencana kalak Jahudi guna munuh ia, erlayar ia ku Siria. Jenari irencanakenna mulih arah Makedoni.  Paulus itemani Sopater anak Pirus i Berea nari, Aristarkus ras Sekondus kalak Tesalonika, Gayus i Derbe nari, Timotius, bage pe Tikikus ras Tropimus arah Propinsi Asia nari.  Leben kalak enda lawes janah itimaina kami i Troas.  Kenca Perayan Roti si La Itama Ragi, erlayar kami arah Pilipi. Janah kenca lima wari idahi kami kalak e i Troas, pitu wari dekahna kami tading i je.  I bas wari pertama minggu e, sanga kami ras-ras man, mulai me ngerana Paulus man kalak e sebap paginna berkat atena. Terus ia ngerana ngayak tengah berngi.  Emaka melala lampu ipasang i bas ruangen i datas loteng ingan kami pulung.  Lit sekalak dilaki si nguda denga gelarna Etikus, kundul ia i jendela. Sanga Paulus ngerana, terpedem ia. Dungna ndabuh ia arah lante telu nari. Paksa iangkat, ia nggo mate. 10  Emaka nusur Paulus, iamparkenna bana i datas anak e janah idakepna, jenari nina, “Ula nai kena erceda ate, nggeluh nge ia.” 11  Kenca bage, mulihken ia ku datas loteng janah ibenakenna acara man-man. Ngerana ka ia mulihi ngayak terang wari, jenari berkat ia. 12  Emaka ibaba kalak e anak dilaki ndai mulih janah meriah ukur kalak e perban ia nggeluh denga. 13  Jenari lawes kami nangkih kapal janah erlayar ku Asos, tapi Paulus erdalan atena. Bagi si nggo ikatakenna, isinggahi kami kari ia i jah gelah ikut ia nangkih kapal. 14  Emaka kenca jumpa kami i Asos, ibaba kami ia ku kapal jenari terus erlayar ku Mitilena. 15  Paginna terus kami erlayar janah seh i sebrang Pulau Kios. Paginna ka, ngadi kami kentisik i Samos, janah paginna seh kami i Miletus. 16  Enggo itetapken Paulus maka la ia singgah i Epesus gelah ula ndekah ia i Propinsi Asia. Sebap meter atena seh i Jerusalem gelah adi banci nggo ia i je paksa Perayan Pentakosta. 17  Tapi, Miletus nari ikirim Paulus pesan ku Epesus guna ngelebuh pertua-pertua si lit i je. 18  Kenca reh pertua-pertua e, nina Paulus, “Iteh kena uga kegeluhenku i tengah-tengah kena mulai kin tangtangna aku reh ku Propinsi Asia. 19  Erdahin aku jadi budak man Tuan alu meteruk ukur. Melala iluhku mambur janah melala kunanami percuban arah kalak Jahudi si ersura-sura munuh aku. 20  Aminna pe bage, la aku mbiar mpeseh kerina si erguna man kena ntah pe ngajar i lebe-lebe jelma si nterem bage pe arah rumah ku rumah. 21  Kujelasken man kalak Jahudi ras kalak Junani kerna pertobaten man Dibata bage pe kerna kiniteken man Tuanta Jesus. 22  Gundari nenlah! Isuruh Dibata aku erkelangken kesah si badia lawes ku Jerusalem, aminna pe la kuteh kai kari si terjadi man bangku i jah. 23  I bas tiap kota si kudalani, ipersingeti aku arah kesah si badia maka penjara ras kiniseran nggo nimai aku. 24  Aminna pe bage, labo kuakap merga kegeluhenku. Si pentingna banci kudungi dahinku ras pelayanen si nggo kualoken arah Tuan Jesus, eme mberitaken berita si meriah alu jelas kerna lias ate Dibata si mbelin. 25  “Enggo kuberitaken kerna Kerajan Dibata man kena. Tapi gundari, kuteh maka labo sada pe kena pagi ngidah aku mulihi. 26  Emaka, i bas wari enda kulebuh kena guna jadi saksi maka aku bersih arah dareh kerina kalak, 27  sebap nggo kupeseh man kena alu jelas kerna sura-sura Dibata. 28  Jadi, perdiatekenlah diri kena ras kerina rarasen, sebap kena nggo ipilih alu kesah si badia jadi pengawas* kalak e guna mpermakani runggun Dibata si nggo itukurNa alu dareh AnakNa. 29  Kuteh maka kenca aku lawes, reh me srigala-srigala si merawa ku tengah-tengah kena janah kejam perbahanen kalak e man rarasen e. 30  Selain si e, i tengah-tengah kena nari lit pagi si mpeseh ajaren sesat. Ate kalak e gelah murid-murid Jesus jadi pengikutna. 31  “Erkiteken si e, tetaplah erjaga-jaga janah ingetlah maka telu tahun dekahna kupersingeti kena suari ras berngi alu iluh mambur. 32  Mbera Dibata ras kataNa kerna lias ateNa si mbelin banci ngelindungi kena. KataNa enda nggo mpegegehi kena ras mbuka dalan gelah ialoken kena kai si nggo ibereken Dibata man umatNa si badia. 33  La pernah kuarapken pirak, emas, ntah baju ise pe. 34  Kena pe iteh kena maka tanku enda nge si erdahin guna keperlunku bage pe keperlun kalak si lit ras aku. 35  I bas si e, nggo kucidahken man kena maka kena pe arus mejingkat erdahin, arus isampati kena kalak si lemah janah arus inget kena kata-kata Tuan Jesus eme, ‘Riahen kap i bas mere asangken i bas ngalo.’” 36  Kenca dung ia ngerana, erjimpuh ia ras kalak e janah ertoto. 37  Tangis kalak e kerina, idakepna janah iemana Paulus. 38  Ceda kel ate kalak e perban ikataken Paulus maka lanai pagi ia jumpa. Jenari itaruhken kalak e Paulus ku kapal.

Cataten kaki

Ntah “si ngepkep.” Nen Kamus.