Perbahanen Rasul-Rasul 19:1-41

  • Paulus i Epesus; lit si iperidiken mulihi (1-7)

  • Paulus ngajar (8-10)

  • Berhasil aminna pe lit malekat-malekat jahat (11-20)

  • Guntar i Epesus (21-41)

19  Sanga Apolos i bas Korinti, lawes me Paulus ngelewati daerah pelosok janah seh ia i Epesus. I je, jumpa ia ras piga-piga murid-murid  janah isungkunna kalak e, “Ialoken kena nge kesah si badia sanga kena jadi kalak si tek?” Ngaloi kalak e, “Lang. Lenga pernah ibegi kami maka lit kesah si badia.”  Nungkun ka Paulus, “Adi bage, peridin si apai si ialoken kena?” Ngaloi kalak e, “Peridin Johanes.”  Nina Paulus, “Peridin Johanes ilakoken jadi tanda maka kalak nggo ertobat,* janah isuruhna kalak e gelah tek nandangi kalak si reh kenca ia, eme Jesus.”  Megi si e, iperidiken me kalak e i bas gelar Tuan Jesus.  Kenca itama Paulus tanna ku datas takal kalak e, nusur me kesah si badia man kalak e, janah mulai me kalak e ngerana i bas erbage-bage bahasa ras ernubuat.  Kalak e lit kira-kira 12 dilaki.  Telu bulan dekahna, masuk Paulus ku ingan pulung kalak Jahudi.* Ngerana ia alu pang janah iusahakenna gelah tek kalak kerna Kerajan Dibata.  Tapi lit piga-piga kalak si keras kepala janah la nggit tek, icekurakina ka Dalan Tuan i lebe-lebe jelma si nterem, emaka itadingken Paulus kalak e janah ipisahkenna murid-murid i bas kalak e nari. Tiap wari ia erkhotbah i gedung sekolah Tiranus. 10  Dua tahun dekahna ilakokenna si enda. Emaka kerina kalak i propinsi Asia, termasuk kalak Jahudi ras Junani megi kata Tuhan. 11  Terus ilakoken Dibata perbahanen-perbahanen si luar biasa arah tan Paulus. 12  Emaka, alu namaken sapu tangan ras baju si pernah ipake Paulus ku kalak sakit, malem penakitna e janah malekat jahat si lit bas kalak e pe ndarat. 13  Tapi lit piga-piga kalak Jahudi si erdalan-dalan guna mpelawes malekat jahat ncubaken make gelar Tuan Jesus i bas mpelawes malekat jahat. Nina, “I bas gelar Jesus si iberitaken Paulus, kuperentahken kena ndarat i bas ia nari.” 14  Lit pitu anak Sekewa, imam kepala Jahudi. Kalak e pe bage ka perbahanenna. 15  Tapi nina malekat jahat e man kalak e, “Kutandai nge Jesus, janah kuteh ise Paulus. Tapi kena ise?” 16  Jenari lompat si kerasuken ndai ku kalak e, ilawanna janah italukenna kalak e kerina. Emaka kiam kalak e kerina i bas rumah e nari alu la ruis janah luka-luka. 17  Kerina kalak Jahudi ras Junani si tading bas Epesus meteh kejadin e. Mbiar kalak e kerina janah reh terpujina me gelar Tuan Jesus. 18  Enterem kalak si nggo jadi pengikut Jesus reh guna ngakui ras mpebetehken kerina perbahanenna si jahat alu terus terang. 19  Kalak si lit ilmu sihirna pe mpepulung buku-bukuna janah itutungna i lebe-lebe jelma si nterem. Ikira kalak e kerina erga buku e, lit 50.000 logam pirak. 20  Emaka kata Jahwe terus terberita alu cara si luar biasa janah erkuasa. 21  Kenca kejadin e, irencanaken Paulus lawes ku Makedoni ras Akaya, jenari lawes ku Jerusalem. Nina, “Jerusalem nari, arus ka aku lawes ku Roma.” 22  Emaka isuruhna dua kalak si nampati ia ku Makedoni, eme Timotius ras Erastus. Tapi Paulus tading i Propinsi Asia piga-piga waktu dekahna. 23  Paksa si e, guntar me Epesus erkiteken Dalan Tuan. 24  Lit sekalak dilaki gelarna Demetrius, dahinna tukang pirak si erban patung-patung rumah pertoton Artemis. Melala iberekenna keuntungen man teman-temanna sada dahin. 25  Ipepulungna teman-temanna e ras tukang-tukang si deban janah nina, “O teman-teman, pasti iteh kena maka kita banci jore erkiteken bisnista enda. 26  Enggo iidah ras ibegi kena maka nggo berhasil ipengaruhi Paulus nterem kalak i Epesus ras menam kerina kalak i Propinsi Asia, gelah tek maka dibata-dibata si iban alu tan labo dibata si benar. 27  Enda bahaya, sebap labo ngenca bisnista si ipandangi kalak, tapi rumah pertoton Dewi Artemis pe lanai kari iergai kalak. Janah dewi si isembah i belang-belang Propinsi Asia ras i belang-belang doni ka pe lanai kari ipehaga.” 28  Megi si e, merawa kel kalak e janah nina alu sora megang, “Terpujilah Artemis, dewi kalak Epesus!” 29  Emaka guntar me kota e. Kerina kalak si ngguntari e, iserbuna ku bas stadion janah isarenna ku je Gayus ras Aristarkus, kalak Makedoni si nemani Paulus bas perdalanenna. 30  Situhuna, idahi Paulus atena ku tengah-tengah jelma si nterem e, tapi la ipediat murid-murid. 31  Janah piga-piga pengurus perayan ras pertandingen, si erteman ras Paulus, ngirim pesan man bana. Ipindona gelah ula ibahayaken Paulus dirina alu masuk ku bas stadion e. 32  Situhuna, keadan i bas stadion e seh kel gejekna. Lit si serko bagenda, lit ka si serko bagah. Janah nterem ka kalak la itehna ngkai maka ia pulung i je. 33  Emaka idorong kalak Jahudi me Aleksander ku lebe-lebe jelma si nterem. Jenari iban Aleksander tanda alu tanna guna mbela diri. 34  Tapi kenca iteh kalak e maka ia kalak Jahudi, serko-serko kalak e kerina dua jam dekahna, “Terpujilah Artemis, dewi kalak Epesus!” 35  Dungna, ipetenang wali kota me jelma si nterem e, jenari nina, “O kalak Epesus, ise kin si la metehsa maka kota kalak Epesus eme penjaga rumah pertoton dewi Artemis ras patungna si ndabuh i langit nari? 36  Kerina kalak meteh kerna si e. Emaka tenanglah kena janah ukuri lebe kai si ate kena iban kena. 37  Sebap kalak si ibaba kena enda labo irampokna rumah pertotonta ntah pe labo ihinana dewita. 38  Emaka, adi iaduken Demetrius ras teman-temanna sada dahin atena sekalak jelma, lit kap gubernur-gubernur i bas wari-wari pengadilen, ku je sajalah ia ngadu. 39  Tapi, adi lit tuntuten kena si deban, e arus icakapken i bas sidang si resmi. 40  Sebap kejadin enda banci erban kita bahaya, banci kita ituduh erban pemberontaken. Janah la lit alasenta ngkai maka lit gerombolen si ngguntari enda.” 41  Kenca bage nina, isuruhna me jelma si nterem e mulih.

Cataten kaki

Ntah “jera dingen robah.”
As. “sinagoga.” Nen Kamus.