Perbahanen Rasul-Rasul 17:1-34

  • Paulus ras Silas i Tesalonika (1-9)

  • Paulus ras Silas i Berea (10-15)

  • Paulus i Aten (16-22a)

  • Ngerana Paulus man kalak i Areopagus (22b-34)

17  Gundari iterusken kalak e perdalanenna arah Ampipolis ras Apolonia, janah seh i Tesalonika. I je lit sada ingan pulung kalak Jahudi.*  Bagi biasana, masuk Paulus guna ngajar. Telu wari sabat erturut-turut, isampatina kalak e ngangkai Kitap si Badia.*  Ijelaskenna ras ibuktikenna alu ayat-ayat maka arus inanami Kristus kiniseran janah ipekeke i bas si mate nari. Nina Paulus, “Jesus si kuberitaken man kena eme Kristus.”  Asilna nterem kalak jadi kalak si tek janah nggabungken diri ras Paulus bage pe Silas, termasuk ka nterem kalak Junani si nembah Dibata bage pe diberu-diberu si terpandang.  Tapi ngidah si e, cian ate kalak Jahudi. Emaka ipepulungna kalak gutul si lit i pajak. Ibanna sada kelompok guna ngguntari kota e. Iserbuna rumah Jason guna nangkap Paulus ras Silas gelah ibaba ku lebe-lebe kalak si gutul e.  Tapi perban la idatna Paulus ras Silas, isarenna Jason ras piga-piga senina ku penguasa-penguasa kota janah nina alu sora si megang, “Kalak si nggo erbanca guntar doni paksana i jenda,  janah ialoken Jason ia i rumahna. Kalak enda kerina nggo ngelawan undang-undang Kaisar alu ngataken lit raja si deban, gelarna Jesus.”  Megi si e, gulut me ukur jelma si nterem ras penguasa-penguasa e.  Tapi kenca igalari kalak e sen jaminen, ilepaskenna me Jason ras si debanna. 10  I bas berngi e ka, minter isuruh kalak e Paulus ras Silas ku Berea. Seh kenca i je masuk kalak e ku ingan pulung kalak Jahudi.* 11  Semangaten kalak i Berea mpelajari kata Dibata alu terbagesen janah ngalokenca asangken kalak i Tesalonika. Iperiksana Kitap si Badia tiap wari guna mastiken kebenarenna. 12  Erkiteken si e, nterem i bas kalak e nari jadi kalak si tek, termasuk ka nterem dilaki ras diberu kalak Junani si ihamati. 13  Tapi sanga ibegi kalak Jahudi i Tesalonika maka nggo iberitaken Paulus kata Dibata i Berea, idahi kalak e ku je guna mpengaruhi ras nggejekki jelma si nterem. 14  Emaka, itaruhken senina-senina me Paulus lawes ku daerah tepi lawit. Tapi Silas ras Timotius tetap tading i Berea. 15  Kenca itaruhken senina-senina e Paulus seh ku Aten, mulihken kalak e alu maba tenah i bas Paulus nari gelah Silas ras Timotius pedas reh ndahi Paulus. 16  Sanga itimai Paulus kalak e i Aten, idahna melala kel berhala i bas kota e, emaka segat kel atena. 17  Erkiteken si e, isampatina kalak Jahudi bage pe kalak si deban si nembah Dibata* i bas ingan pulung kalak Jahudi* guna ngangkai Kitap si Badia. Janah bage ka nge tiap wari si ilakokenna man kalak si lit i bas pajak. 18  Tapi piga-piga kalak i bas kelompok Epikurea ras Setoa nari mulai sijawapen ras Paulus. Lit si ngataken, “Kai nge si ikataken tukang koyok* ena?” Si debanna ngataken, “Kuakap si iberitakenna kerna dewa-dewa si deban.” Bage nina kalak enda sebap iceritaken Paulus kerna Jesus ras kekeken. 19  Emaka ibaba kalak e Paulus ku Areopagus janah nina, “Banci ikatakenndu man kami kai kin pengajaren si mbaru si iajarkenndu e? 20  Sebap ipetandakenndu man kami kai si lenga pernah ibegi kami, emaka merhat kami metehsa kai ertina.” 21  Kerina kalak Aten ras kalak si deban si tading i je meriah akapna nggunaken waktuna paksa ngadi-ngadi guna ncakapken ras megiken kerna kai si mbaru. 22  Cinder Paulus i tengah-tengah Areopagus janah nina, “Adi kuperdiateken, i bas kai pe biaren kena man dewa-dewa asangken kalak si deban. 23  Contohna, sanga aku erdalan-dalan, kuperdiateken kai si isembah kena. Kuidah lit sada batar-batar persembahen si lit tulisenna, ‘Man Dibata si La Itandai.’ Emaka gundari, kupetandaken man kena kerna Dibata si isembah kena e si la itandai kena. 24  Dibata si njadiken doni ras isina, Ia me Tuan nandangi langit ras doni. Ia labo tading i bas ingan sembah-sembahen si iban manusia, 25  janah labo perlu ilayani manusia sebap Ia me si mereken kegeluhen, kesah, ras kerinana man manusia. 26  I bas sekalak jelma nari, ijadiken Dibata kerina bangsa si ngiani doni enda. Itetapken Dibata waktu ras ingan kalak e tading, 27  gelah idarami kalak e Dibata. Adi tutus atena ndaramisa, pasti idatna. Situhuna, Ia labo ndauh i bas kita nari sekalak-sekalak. 28  Sebap, erkiteken Ia me maka kita nggeluh, muit, janah lit. Bagi si ikataken piga-piga penyair i tengah-tengah kena, nina, ‘Kita pe anak-anak* Dibata kap.’ 29  “Jadi, perban kita anak-anak* Dibata, ula min siakap maka Dibata e bali bagi emas, ntah pirak, ntah batu, ntah pe patung si iban manusia sue ras kai si ibayangkenna. 30  Payo, mbarenda ipediat Dibata la itandai kalak Ia, tapi gundari ipebetehkenNa man kerina kalak i japa pe gelah ertobat.* 31  Sebap nggo itentukenNa sada wari guna nghakimi kerina manusia i doni alu adil. IhakimiNa erkelangken sekalak dilaki si nggo ipilihNa. Janah, dilaki enda nggo ipekeke i bas si mate nari guna jadi jaminen man kerina kalak.” 32  Kenca ibegiken kalak e kerna kekeken kalak si mate, lit si mulai nokohi ia, si debanna ngataken, “Enggo me, ndigan-ndigan saja begiken kami kam.” 33  Emaka itadingken Paulus kalak e, 34  tapi lit piga-piga kalak si nggabungken diri ras Paulus janah jadi kalak si tek. Piga-piga eme, Dionisius sekalak hakim i bas pengadilen Areopagus nari, sekalak diberu si gelarna Damaris, ras piga-piga kalak si debanna.

Cataten kaki

As. “sinagoga.” Nen Kamus.
Ntah “Telu wari sabat erturut-turut, ercakap-cakap ia ras kalak e kerna Kitap si Badia.”
As. “sinagoga.” Nen Kamus.
Ntah “ercakap-cakap ia ras kalak e.”
As. “sinagoga.” Nen Kamus.
Ntah “kalak si pet ngerana.”
Ntah “kesusuren.”
Ntah “kesusuren.”
Ntah “jera dingen robah.”