Perbahanen Rasul-Rasul 16:1-40

  • Paulus milih Timotius (1-5)

  • Pengenen kerna kalak Makedoni (6-10)

  • Lidia jadi pengikut Jesus i Pilipi (11-15)

  • Paulus ras Silas ipenjaraken (16-24)

  • Penjaga penjara ras keluargana iperidiken (25-34)

  • Ipindoken Paulus gelah pejabat pengadilen mindo maap (35-40)

16  Seh me Paulus i Derbe ras i Listera. I je lit sekalak murid gelarna Timotius. Mamakna kalak Jahudi, ia pe murid ka nge. Tapi bapakna kalak Junani.  Turang senina i Listera ras Ikoni ngataken maka Timotius kalak si mehuli.  Emaka ikataken Paulus sura-surana guna maba Timotius. Isuruhna me gelah ia isunat, sebap kerina kalak Jahudi i bas daerah si nandangi idahina meteh maka bapak Timotius kalak Junani.  Asum kalak e lawes arah kota ku kota, ipeseh kalak e kai si nggo itentuken rasul-rasul ras pertua-pertua i Jerusalem gelah idalanken turang senina.  Erkiteken si e, reh paguhna kiniteken runggun-runggun janah tiap wari jumlah kalak e reh teremna.  Lawes me kalak e ku Perigia ras Galati, perban erkelangken kesah si badia, kalak e ilarang meritaken kata Dibata i bas Propinsi Asia.  Kenca seh kalak e i Misia, iusahakenna lawes ku Bitinia, tapi erkelangken kesah si badia la ipediat Jesus kalak e ku je.  Emaka lawes kalak e ku Troas arah Misia.  I bas berngi e, idat Paulus sada pengenen,* idahna cinder sekalak dilaki i bas Makedoni nari janah mindo kel man bana, nina, “Rehlah ku Makedoni, sampati min kami.” 10  Kenca datna pengenen* e, mis iusahaken kami lawes ku Makedoni. Sebap tek kami maka Dibata si nuruh kami meritaken berita si meriah man kalak e. 11  Emaka, Troas nari mis kami erlayar ku Samotrake, janah pepagina ku Neapolis. 12  I je nari lawes kami ku Pilipi, kota kalak Roma, eme kota si penting i daerah Makedoni. Kami tading i je piga-piga wari dekahna. 13  I bas wari Sabat lawes kami ku tepi lau si lit i darat gerbang kota, perban iakap kami i je lit ingan ertoto. Kundul kami janah ngerana ras diberu-diberu si pulung i je. 14  Sekalak i bas diberu e gelarna Lidia. Ia i kota Tiatira nari. Dahinna erbinaga uis si warna terong janah ia nembah man Dibata. Ibuka Jahwe ukurna, e maka tutus kel atena megiken kai si ikataken Paulus. 15  Kenca Lidia ras keluargana iperidiken, mindo ia man kami, nina, “Adi nggo kin iakap kena aku erkiniteken man Jahwe, rehlah kena janah tadinglah i rumahku.” Lalap ipindokenna gelah reh kami ku rumahna. 16  Sanga lawes kami ku ingan ertoto, jumpa kami ras sekalak diberu, ia pelayan. Ia irasuki malekat jahat si erbanca beluh ia ngeramal, emaka melala iberekenna keuntungen man tuanna. 17  Ikut-ikutina Paulus ras kami, janah alu sora si megang nina, “Kalak enda kap budak Dibata Si Meganjang janah iberitakenna dalan keselamaten.” 18  Piga-piga wari lalap bage ibanna, dungna nembeh ate Paulus. Emaka nina man malekat jahat e, “I bas gelar Jesus Kristus, ndaratlah kam i bas ia nari.” Emaka minter ia ndarat i bas diberu e nari. 19  Kenca idah tuanna maka lanai datna keuntungen arah diberu e nari, itangkapna Paulus ras Silas, jenari isarenna ku pajak guna ngadap man penguasa-penguasa. 20  Ibabana kalak e ku pejabat pengadilen janah nina, “Kalak enda kalak Jahudi, nggo guntar ibanna kota kami. 21  Iajarkenna kebiasan-kebiasan si la banci sialoken ntah sidalanken sebap kita kalak Roma.” 22  Jelma si nterem pe ikut ngelawan kalak e. Kenca irigatken pejabat pengadilen baju kalak e, iperentahkenna ka gelah ipekpeki alu tongkat. 23  Kenca ipekpeki, imasukken me kalak e ku penjara. Jenari isuruh me penjaga penjara njagai kalak e. 24  Sue ras perentah e, imasukkenna kalak e ku bas penjara si arah bas janah iiket* nahena. 25  Kira-kira i bas tengah berngi Paulus ras Silas ertoto janah rende muji Dibata. Tahanen si deban pe megi kalak e. 26  Rempet terjadi gempa si megegeh, emaka pondasi penjara pe mugur-ugur. Talangen kerina pintu penjara e janah lepasen rante si ngiket tan tahanen e. 27  Sanga medak penjaga penjara e, idahna nggo buka kerina pintu penjara. Ibuatna pedangna janah ibunuhna atena bana, perban iakapna nggo kiamen kerina tahanen ndai. 28  Tapi alu sora si megang nina Paulus, “Ula bunuh bandu, sebap jenda denga nge kami kerina!” 29  Emaka ipindona lampu janah kiam ia ku bas. Erjimpuh ia janahna nggirgir i lebe-lebe Paulus ras Silas. 30  Ibabana kalak e ndarat janah nina, “O Pa, kai si arus kulakoken gelah aku selamat?” 31  Ngaloi kalak e, “Teklah man Tuan Jesus, gelah kam bage pe keluargandu iselamatken.” 32  Jenari iberitaken kalak e kata Jahwe man bana ras man kerina kalak si lit i bas rumahna. 33  I bas berngi e ka pe, ibabana kalak e ku sada ingan janah itambarina luka-lukana. Kenca si e, mis ia iperidiken ras keluargana. 34  Jenari ibabana kalak e ku rumahna janah iberena man. Gundari, ia ras kerina si lit i bas rumahna ermeriah ukur perban nggo tek man Dibata. 35  Paginna, isuruh pejabat pengadilen piga-piga petugas gelah mpeseh kata enda, “Bebasken kalak e.” 36  Emaka ipeseh penjaga penjara kata e man Paulus, nina, “Isuruh pejabat pengadilen gelah duana kena ibebasken. Ndaratlah kena janah laweslah alu dame.” 37  Tapi ngaloi Paulus, “Lenga pe kami iadilina, nggo ipekpekina kami i lebe-lebe jelma si nterem, padahal kami kalak Roma. Imasukkenna ka kami ku penjara. Gundari, ipedaratna atena kami alu sinik-sinik? Lang, la kami nggit! Suruhlah kalak ndai ku jenda si mpedarat kami.” 38  Emaka ipeseh petugas-petugas me kerna si e man pejabat pengadilen. Dungna mbiar kel pejabat pengadilen e kenca meteh maka Paulus ras Silas kepeken kalak Roma. 39  Emaka idahi pejabat pengadilen me Paulus ras Silas guna mindo maap, jenari ibabana kalak e duana ndarat arah penjara nari. Kenca si e, ipindona gelah itadingken kalak e kota e. 40  Kenca ndarat i bas penjara nari, lawes kalak e ku rumah Lidia. Kenca jumpa ras turang senina, ipegegehina kalak e, jenari berkat me Paulus ras Silas.

Cataten kaki

Ntah “pengenehenen.”
Ntah “pengenehenen.”
Ntah “ipasung i bas beloti.”