Perbahanen Rasul-Rasul 13:1-52

  • Barnabas ras Saul isuruh jadi utusen injil (1-3)

  • Pelayanen i Siprus (4-12)

  • Paulus ngerana man nterem jelma i Antiokia Pisidi (13-41)

  • Perentah guna erberita man bangsa si deban (42-52)

13  I bas runggun i Antiokia, lit piga-piga nabi ras guru. Gelarna eme Barnabas, Saul, Simeon si igelari Si Mbiring,* Lusius arah Kireni nari, bage pe Manaen si iajar ras Herodes penguasa daerah e.  Sanga kalak e ngelayani* Jahwe ras erpuasa, ipebetehken man kalak e arah kesah si badia, “Pilihlah Barnabas ras Saul guna ndahiken dahin si nggo Kutetapken man ia duana.”  Kenca erpuasa ras ertoto, itamaken kalak e tanna ku datas Barnabas ras Saul, jenari isuruhna kalak e.  Erkelangken kesah si badia, isuruh me kalak e lawes ku Selukia, jenari erlayar ku Kiprus.  Kenca seh i Salamis, iberitaken kalak e kata Dibata i bas ingan-ingan pulung kalak Jahudi.* Johanes pe ikut nampati kalak e.  Kenca idahina kerina pulau e, seh me kalak e i Papos. I je jumpa kalak e ras kalak Jahudi gelarna Baryesus. Ia tukang sihir ras nabi palsu.  Ia sierdahin Gubernur Sergius Paulus. Gubernur e kalak si pentar. Idilo gubernur e Barnabas ras Saul, perban merhat kel ia megiken kata Dibata.  Tapi tukang sihir e si igelari ka Elimas (enda penggelaren man tukang sihir i bas bahasa Junani) nentang kalak e. Iusahakenna gelah gubernur e la erkiniteken.  Saul si igelari Paulus dem alu kesah si badia, itatapna tukang sihir e, 10  janah nina, “O kam si terus ngelakoken erbage-bage kejahaten ras tipun, kam kap anak Iblis ras musuh kerina si benar, ngkai maka terus iubahndu dalan Jahwe si benar? 11  Nenlah! Tan Jahwe nge si ngelawan kam. Pentang me kam, janah piga-piga waktu dekahna la kam ngidah terang.” Rempet lanai ia erpengidah janah gelap iakapna. Emaka mutar-mutar ia ndarami kalak gelah lit si negu ia. 12  Ngidah kejadin e, jengang gubernur e nandangi ajaren Jahwe emaka ia jadi kalak si tek. 13  Paulus ras teman-temanna nadingken Papos janah seh kalak e i Perge si lit i Pampilia. Tapi itadingken Johanes kalak e janah mulihken ia ku Jerusalem. 14  Aminna pe bage, iterusken kalak e perdalanenna arah Perge nari ku Antiokia i Pisidi. I bas wari Sabat, lawes kalak e ku ingan pulung kalak Jahudi,* janah kundul i je. 15  Kenca dung Undang-Undang Musa ras Ajaren Nabi-Nabi ibacaken i lebe-lebe jelma si nterem, kepala* ingan pulung kalak Jahudi* nuruh kalak si deban mpeseh kata man kalak e, “O turang senina, adi lit rananndu si banci mpegegehi si pulung, katakenlah.” 16  Emaka cinder Paulus, janah ibanna tanda alu tanna, nina, “O kalak Israel bage pe kena kerina si mbiar man Dibata, begikenlah. 17  Dibata kalak Israel nggo milih nini bulangta, janah ibanNa kalak e jadi bangsa si mbelin sanga kalak e jadi kalak pertandang i bas taneh Mesir. IbabaNa kalak e ndarat je nari alu tanNa si megegeh. 18  Janah i bas taneh mesawang,* sabar Ia man kalak e kira-kira 40 tahun dekahna. 19  Kenca ikernepkenNa pitu bangsa i bas taneh Kanaan, iberekenNa taneh e jadi warisen man nini bulangta. 20  Kerina enda terjadi kira-kira 450 tahun dekahna. “Jenari iberekenNa me piga-piga hakim man kalak e seh asa jaman Nabi Samuel. 21  Tapi kenca si e, ipindo kalak enda sekalak raja. Emaka ibereken Dibata me Saul anak Kis i bas suku Benyamin nari. Ia merentah 40 tahun dekahna. 22  Kenca ipengadiNa Saul, iangkatNa Daud jadi raja. Kerna Daud, ersaksi Dibata, nina, ‘Enggo Kudat kalak si ngena ateKu eme Daud anak Isai. Ia me pagi si ngelakoken kerina sura-suraKu.’ 23  Bagi si nggo ijanjikenNa, arah kesusuren dilaki enda me ibereken Dibata sekalak juru selamat man kalak Israel eme Jesus. 24  Ope lenga Jesus reh, nggo iberitaken Johanes man kerina kalak Israel kerna peridin si jadi tanda pertobaten.* 25  Tapi sanga nandangi dung dahin Johanes, nina, ‘Ise kin iakap kena aku? Aku labo ia. Tapi nenlah! Ia reh kenca aku, mbuka selopna pe la aku cocok.’ 26  “O turang senina, kesusuren Abraham bage pe kalak si deban si mbiar man Dibata, berita keselamaten enda nggo ipeseh man banta. 27  La itandai penduduk Jerusalem ras penguasa-penguasana ia. Tapi sanga ihakimi kalak e ia, terjadi me kai si nggo itulis i bas Ajaren Nabi-Nabi, si ibaca alu sora si megang tiap sabat. 28  Aminna pe la lit idat kalak e kesalahen si erbanca ia patut iukum mate, ipindo kalak e man Pilatus gelah ia iukum mate. 29  Kenca ilakoken kalak e kerina kai si tertulis kerna ia, ipenusurna ia i bas tiang* nari janah ikuburkenna. 30  Tapi ipekeke Dibata ia i bas si mate nari. 31  Lit piga-piga wari dekahna, icidahkenna bana man kalak si lawes ras ia arah Galilea nari ku Jerusalem. Gundari, kalak enda me si mereken kesaksin kerna ia man jelma si nterem. 32  “Emaka, gundari ipebetehken kami man kena berita si meriah kerna janji si iban Dibata man nini bulangta. 33  Alu mpekeke Jesus, janji e tuhu-tuhu nggo itepati Dibata man banta anak-anakna. Bagi si nggo itulis i bas masmur si peduaken, ‘Kam kap anakKu, gundari Aku jadi Bapakndu.’ 34  Enggo ipekeke Dibata ia i bas si mate nari janah lanai lit i bas ia daging si banci macik. Nina Dibata, ‘Kubereken pagi pasu-pasu man kena bagi si nggo Kujanjiken man Daud erkiteken kekelengenKu si setia.’ 35  I bas masmur si deban ikataken ka, ‘Labo pagi ipediatNdu macik daging kalak si setia man baNdu.’ 36  Selain si e, Daud ngelayani Dibata segedang geluhna. Kenca ia medem i bas kematen, ikuburken ia ras nini bulangna janah dagingna pe macik. 37  Tapi ia si nggo ipekeke Dibata i bas si mate nari, la macik dagingna. 38  “Erkiteken si e, kukataken man kena turang senina, maka arah ia ngenca dosa banci iampuni. 39  Janah arah ia kerina kalak si tek banci ikataken la ersalah, tapi Undang-Undang Musa la banci erban kena ikataken la ersalah. 40  Emaka, hati-hatilah kena gelah kai si itulisken i bas Ajaren Nabi-Nabi la terjadi man kena, nina, 41  ‘Perdiatekenlah, o kena si nggit nghina. Senggetlah janah kerneplah, sebap Aku sangana ndahiken dahin i bas jaman kena, pendahin si la pernah iteki kena amin gia lit si njelaskenca man kena.’” 42  Sanga ndarat Paulus ras Barnabas je nari, ipindoken kalak e kel gelah ibahasna kerna si e mulihi i bas wari Sabat si reh. 43  Emaka kenca dung perpulungen i bas ingan pulung kalak Jahudi* e, nterem kalak Jahudi ras kalak si la Jahudi si nembah Dibata ngikutken Paulus ras Barnabas. Ipindoken Paulus ras Barnabas gelah tetap kalak e i bas lias ate Dibata si mbelin. 44  I bas wari Sabat si reh e, menam kerina kalak i bas kota e pulung guna megiken kata Jahwe. 45  Sanga idah kalak Jahudi jelma si nterem e, cian atena janah mulai ihinana kai si ikataken Paulus. 46  Tapi ngaloi Paulus ras Barnabas alu pang, nina, “Tuhu, kata Dibata arus lebe ipeseh man kena. Tapi perban itulak kena janah icidahken kena maka la kena cocok* ngaloken kegeluhen si rasa lalap, lawes me kami ku bangsa-bangsa. 47  Sebap nggo iperentahken Jahwe man kami alu kata-kata enda, ‘Enggo Kupilih kam jadi terang man bangsa-bangsa, gelah kam si maba keselamaten ku belang-belang doni.’” 48  Megi si enda, meriah ukur kalak i bas bangsa-bangsa si deban nari janah imuliakenna kata Jahwe. Kerina kalak si pusuh ras perbahanenna ngaloken kebenaren guna kegeluhen si rasa lalap jadi kalak si tek. 49  Kata Jahwe terus iberitaken ku belang-belang negri e. 50  Tapi iajuk-ajuk kalak Jahudi dilaki-dilaki si terpandang ras diberu-diberu si ihamati si mbiar man Dibata gelah Paulus ras Barnabas isiksa janah ipedarat i bas kota e nari. 51  Emaka ikisamken Paulus ras Barnabas me abu si lit i bas nahena guna jadi tanda persinget man kalak e, jenari lawes kalak e ku Ikoni. 52  Murid-murid pe terus dem alu keriahen ukur ras kesah si badia.

Cataten kaki

As. “Niger.”
Ntah “ngelayani jelma si nterem guna.”
As. “sinagoga-sinagoga.” Nen Kamus.
As. “sinagoga.” Nen Kamus.
Ntah “lit piga-piga kepala.”
As. “sinagoga.” Nen Kamus.
Taneh si mbelang si jarang iingani.
Ntah “jera dingen robah.”
Ntah “kayu.”
As. “sinagoga.” Nen Kamus.
Ntah “metunggung.”