Perbahanen Rasul-Rasul 12:1-25

  • Jakup ibunuh; Petrus ipenjaraken (1-5)

  • Petrus ibebasken alu mukjizat (6-19)

  • Herodes iukum malekat (20-25)

12  Paksa si e, mulai isiksa raja Herodes piga-piga kalak i bas runggun nari.  Ibunuhna Jakup senina Johanes alu pedang.  Kenca idahna maka si ilakokenna e erban kalak Jahudi ermeriah ukur, itangkapna ka Petrus. Enda terjadi sanga Perayan Roti si La Itama Ragi.  Itangkapna ia janah ipenjarakenna. Lit empat kelompok prajurit si ergiliren njaga ia, tiap kelompok lit empat prajurit. Irencanaken Herodes gelah Petrus ibaba ku lebe-lebe jelma si nterem kenca Paskah.  Sanga Petrus i bas penjara, terus itotoken runggun ia alu bulat ukur.  Berngina, ope Petrus ibaba Herodes ku lebe-lebe jelma si nterem, Petrus medem i tengah-tengah dua prajurit. Ia iiket alu dua rante besi janah lit si erjaga i lebe-lebe pintu penjara.  Rempet lit cinder malekat Jahwe i je janah lit sinar si nerangi penjara e. Ijemakna Petrus janah iingetina, nina, “Iah medakken!” Minter lepas rante si ngiket tan Petrus.  Nina malekat e bana, “Ersikap kam, pake selopndu.” Ilakokenna kata malekat e. Nina malekat e ka, “Pake jubahndu, ikutken aku.”  Ndarat me Petrus janah ikutina malekat e. Tapi la isadarina kai si ilakoken malekat e tuhu-tuhu terjadi. Akapna ia sangana ndatken pengenen.* 10  Ilewati kalak e ingan si erjaga si pertama ras si peduaken, jenari seh kalak e i bas gerbang besi dalan ku kota. Talang sisada me gerbang e, emaka ndarat kalak e. Erdalan ia duana i bas sada gang, jenari rempet itadingken malekat e Petrus. 11  Sadar me Petrus kerna kai si terjadi janah nina, “Gundari tuhu-tuhu nggo kueteh maka Jahwe nuruh malekatNa mbebasken aku i bas tan Herodes bage pe i bas sura-sura kalak Jahudi nari.” 12  Kenca isadarina, lawes ia ku rumah Maria eme nande Johanes si igelari Markus. I je sangana nterem kalak pulung ras ertoto. 13  Sanga ituk-tukna pintu gerbang, ndarat me sekalak pelayan si diberu gelarna Rode guna ngenenca. 14  Kenca itandaina sora e sora Petrus, mis ia kiam ku rumah guna mpebetehken maka Petrus sangana i gerbang. Perban riahna ukurna, lanai ingetna nalangi gerbang ndai. 15  Nina kalak e bana, “Enggo adon kam e.” Tapi terus ikatakenna maka Petrus nggo reh. Nina kalak e ka, “Malekatna nge e.” 16  Tapi la erngadi-ngadi Petrus nuktuki. Sanga ibuka kalak e pintu, idahna Petrus janah sengget kel kalak e. 17  Tapi iban Petrus tanda alu tanna gelah ula gejek, jenari iceritakenna uga Jahwe mabai ia i bas penjara nari, janah nina, “Ceritaken kerna si enda man Jakup ras kerina turang senina.” Kenca si e, ndarat ia janah lawes ku ingan si deban. 18  Paginna kenca nggo ciger, kemamangen prajurit-prajurit perban la itehna kai si nggo terjadi man Petrus. 19  Tutus kel ate Herodes ndarami Petrus, tapi la idatna. Isungkunina penjaga-penjaga, janah iperentahkenna gelah kalak e ibaba guna iukum. Jenari lawes Herodes Judea nari ku Kesarea janah tading kentisik i je. 20  I bas sada paksa, merawa kel Herodes man kalak Tirus ras Sidon. Emaka ersada arih kalak e ndahi Herodes perban kalak e ndatken pangan i bas negri raja e nari. Tapi ope si e, ipindo kalak e lebe penampat Blastus eme pengawas istana. Jenari, mindo dame kalak e man Herodes. 21  I bas sada wari si nggo itentuken, ipake Herodes me paken kerajanna janah kundul ia i bas kursi penghakimen, jenari ngerana ia man jelma si nterem. 22  Kenca si e, ersurak jelma si nterem e, nina, “Enda sora dibata, labo sora manusia!” 23  Minter iparap malekat Jahwe si Herodes sebap la imuliakenna Dibata. Jenari ipan cacing-cacing ia, dungna mate. 24  Tapi reh teremna kalak si meteh kata Jahwe janah reh teremna ka jadi murid-murid. 25  Kenca idungi Barnabas ras Saul tugasna i bas nampati turang senina si lit i Jerusalem, ibaba kalak e Johanes si igelari Markus ikut ras kalak e.

Cataten kaki

Ntah “pengenehenen.”