Matius 8:1-34

  • Sekalak si sakit kusta ipepalem (1-4)

  • Kiniteken sekalak perwira (5-13)

  • Enterem kalak ipepalem Jesus i Kapernaum (14-17)

  • Cara ngikutken Jesus (18-22)

  • Angin si meter ipengadi Jesus (23-27)

  • Malekat-malekat jahat isuruh Jesus masuk ku babi-babi (28-34)

8  Kenca nusur ia i deleng e nari, nterem kel jelma ngikutken ia.  Jenari, reh sekalak si sakit kusta ndahi ia janah erjimpuh i lebe-lebena, nina, “O Tuan, adi nggit kam, banci ipepalemndu aku.”  Emaka, idudurkenna tanna janah ijemakna kalak si sakit kusta e, nina, “Nggit nge aku! Malemlah kam.” Minter malem sakit kustana e.  Jenari nina Jesus man bana, “Ula kataken man ise pe, tapi laweslah, cidahken dirindu man imam. Kenca bage, berelah persembahenndu bagi si isuruh Musa, gelah jadi bukti maka kam nggo malem.”  Sanga ia masuk ku Kapernaum, sekalak perwira ndahi ia janah mindo kel man bana,  nina, “O Pak, lit suruh-suruhenku paksana ampar i rumah erkiteken lumpuh, mekelek kel iakapna.”  Ngaloi Jesus, “Seh kenca kari aku i jah, banci kupepalem ia.”  Nina perwira e, “O Pak, la aku metunggung* ngalo-ngalo kam i rumahku. Sitik ranan sajalah gia ibelaskenndu, tentu malem suruh-suruhenku e.  Sebap aku pe lit nge si ganjangen asa aku, janah lit ka nge prajurit-prajurit teruhenku. Adi ningku man bana, ‘Laweslah!’ minter nge ia lawes. Adi ningku man si deban, ‘Rehlah!’ minter nge ia reh. Janah adi ningku man suruh-suruhenku, ‘Ban enda!’ minter nge ibanna.” 10  Jengang Jesus megi rananna e. Emaka nina man kalak si ngikutken ia, “Situhuna kukataken man kena, lenga pernah aku jumpa bas Israel kalak si bage kel belinna kinitekenna. 11  Tapi nterem pagi reh arah timur ras barat nari janah kundul ras Abraham, Isak, bage pe Jakup i bas Kerajan surga. 12  Tapi, kalak* si arusna masuk ku bas Kerajan e iambekken ku darat ku ingan si seh kel gelapna. I je me ia tangis janah erderep ipenna ban suina.” 13  Jenari nina Jesus man perwira e, “Laweslah. Erkiteken kam nggo erkiniteken, jadilah si e man bandu.” Malem me suruh-suruhen perwira ndai i bas paksa si e. 14  Lawes Jesus ku rumah Petrus, i je idahna mami Petrus ampar erkiteken demam. 15  Emaka ijemak Jesus tanna, jenari lanai ia demam. Tedis me mami Petrus e janah isikapkenna pangan man bana. 16  Berngina, rehen jelma maba kalak si kerasuken man bana, janah alu sengkebabah ranan saja ipelawesna malekat-malekat jahat e. Ipepalemna ka kerina kalak si sakit. 17  Alu bage terjadi me kai si nggo ikataken arah Nabi Jesaya, “Ia kap si muat pinakitta ras si meneken si mesuita.” 18  Sanga idah Jesus kalak si nterem ngkelilingi ia, iiahkenna murid-muridna gelah lawes ku sebrang ras ia. 19  Janah reh me sekalak ahli Undang-Undang Musa ndahi ia, nina, “O Guru, ikut ateku ras kam ku japa pe kam lawes.” 20  Tapi nina Jesus, “Biang kerangen lit liang inganna, perik-perik lit asarna, tapi Anak manusia la lit inganna ngamparken takalna.” 21  Sekalak murid si deban ngerana man ia, nina, “O Tuan, lawes aku lebe ngkuburken bapakku.” 22  Tapi ngaloi Jesus, “Teruslah ikutken aku. Pediatlah kalak mate ngkuburken kalak mate.” 23  Jenari inangkihina perahu, murid-muridna pe ikut ras ia. 24  Rempet rembus angin si seh kel meterna i bas lawit, galumbang pe nderpa perahu e, emaka lau nggo masuken ku bas. Tapi Jesus paksana medem. 25  Emaka imedaki murid-muridna ia, nina, “O Tuan, sampati min! Enggo mate atena kita!” 26  Tapi nina man kalak e, “Engkai maka mbiar kel kena, o kena si kitik kinitekenna?” Jenari medak ia, isergangna angin ras lawit e. Emaka nggo seh kel tenangna. 27  Mamang kel ate kalak e janah nina, “Kalak si uga kin ia enda? Angin ras lawit pe patuh man bana.” 28  Seh kenca ia i sebrang, i daerah kalak Gadara, reh dua kalak dilaki si irasuki malekat jahat njumpai Jesus. Kalak e rehna i kuburen nari. Ise pe la pang lewat arah dalan e sebap seh kel ia rawana. 29  Minter serko kalak e, nina, “O Anak Dibata, kai kin atendu? Isiksandu kin atendu kami lenga pe seh paksana?” 30  Ndauh arah kalak e nari, melala babi sangana man. 31  Mindo malekat-malekat jahat e man bana, nina, “Adi ipelawesndu kami, suruhlah kami masuk ku babi-babi ah.” 32  Nina Jesus, “Laweslah!” Dungna ndarat me ia, jenari masuk ia ku babi-babi e. Emaka kiamen babi-babi e ku tebing jenari ndabuhen kerina ku lawit dungna mate gedap kerina. 33  Permakan-permakan babi e kiam ku bas kota. Iceritaken kalak e kerina si terjadi termasuk kerna kalak si kerasuken ndai. 34  Emaka reh kerina kalak si bas kota e ndahi Jesus. Kenca jumpa, ipindoken kalak e kel gelah lawes ia arah daerah kalak e nari.

Cataten kaki

Ntah “cocok.”
As. “anak-anak Kerajan.”